ບົດຄວາມສຶກສາທີ 10
ເປັນຫຍັງເຈົ້າຄວນຮັບບັບເຕມາ?
“ພວກເຈົ້າ . . . ຕ້ອງຮັບບັບເຕມາ.”—ກຈກ. 2:38
ເພງ 34 ສັດຊື່ຕໍ່ພະເຈົ້າສະເໝີ
ໃຈຄວາມສຳຄັນ a
1-2. ເຮົາມັກຈະເຫັນຫຍັງໃນມື້ທີ່ມີການຮັບບັບເຕມາ? ແລະເຮົາຈະຮຽນຫຍັງໃນບົດຄວາມນີ້?
ເຈົ້າເຄີຍເຫັນພີ່ນ້ອງຮັບບັບເຕມາບໍ? ເຈົ້າໄດ້ຍິນເຂົາເຈົ້າຕອບຄຳຖາມສອງຂໍ້ຢ່າງໜັກແໜ້ນ. ເຈົ້າໄດ້ເຫັນໝູ່ເພື່ອນແລະຄອບຄົວຂອງເຂົາເຈົ້າຮູ້ສຶກພູມໃຈແລະດີໃຈຫຼາຍ. ເມື່ອພີ່ນ້ອງທີ່ຮັບບັບເຕມາຂຶ້ນຈາກນ້ຳ ເຈົ້າຈະໄດ້ຍິນສຽງຕົບມືແລະໄດ້ເຫັນໃບໜ້າຂອງຜູ້ທີ່ຮັບບັບເຕມາຍິ້ມແຍ້ມແຈ່ມໃສ. ໂດຍສະເລ່ຍແລ້ວມີຫຼາຍກວ່າພັນຄົນຮັບບັບເຕມາໃນແຕ່ລະອາທິດເພື່ອຈະເຂົ້າມາເປັນພະຍານພະເຢໂຫວາ.
2 ແລ້ວເຈົ້າເດ? ຖ້າເຈົ້າກຳລັງຄິດຈະຮັບບັບເຕມາ ເຈົ້າກໍກຳລັງເຮັດສິ່ງທີ່ດີເພາະຢູ່ໃນໂລກຊົ່ວນີ້ເຈົ້າເປັນຜູ້ໜຶ່ງທີ່ “ກຳລັງຊອກຫາພະເຢໂຫວາ.” (ເພງ. 14:1, 2, ລ.ມ.) ບົດຄວາມນີ້ຂຽນຂຶ້ນມາສຳລັບເຈົ້າບໍ່ວ່າເຈົ້າຈະອາຍຸໜ້ອຍຫຼືອາຍຸຫຼາຍ ແລະຍັງຊ່ວຍເຮົາທີ່ຮັບບັບເຕມາແລ້ວໃຫ້ມີຄວາມຕັ້ງໃຈທີ່ຈະຮັບໃຊ້ພະເຢໂຫວາຕະຫຼອດໄປ. ໃນບົດຄວາມນີ້ ເຮົາຈະມາເບິ່ງສາມເຫດຜົນທີ່ເຮັດໃຫ້ເຮົາຢາກຮັບໃຊ້ພະເຢໂຫວາ.
ຮັກຄວາມຈິງແລະຄວາມຖືກຕ້ອງຊອບທຳ
ຊາຕານໄດ້ໃສ່ຮ້າຍຊື່ສຽງຂອງພະເຢໂຫວາເປັນເວລາຫຼາຍພັນປີ ແລະຕອນນີ້ມັນກໍຍັງເຮັດແບບນັ້ນຢູ່ (ເບິ່ງຂໍ້ 3-4)
3. ເປັນຫຍັງຜູ້ຮັບໃຊ້ຂອງພະເຢໂຫວາຈຶ່ງຮັກຄວາມຈິງແລະຄວາມຖືກຕ້ອງຊອບທຳ? (ຄຳເພງ 119:128, 163)
3 ພະເຢໂຫວາສັ່ງປະຊາຊົນຂອງເພິ່ນໃຫ້ “ຮັກຄວາມຈິງ.” (ຊກາ. 8:19, ລ.ມ.) ພະເຢຊູຍັງບອກພວກລູກສິດໃຫ້ຮັກຄວາມຍຸຕິທຳຫຼືຄວາມຖືກຕ້ອງຊອບທຳ. (ມທ. 5:6) ນີ້ໝາຍຄວາມວ່າເຮົາຄວນມີຄວາມຕ້ອງການທີ່ຈະເຮັດສິ່ງທີ່ຖືກຕ້ອງ ສິ່ງທີ່ດີແລະສະອາດໃນສາຍຕາຂອງພະເຈົ້າ. ເຮົາເຊື່ອວ່າເຈົ້າຮັກຄວາມຈິງແລະຄວາມຖືກຕ້ອງຊອບທຳ. ເຈົ້າຄືຊິກຽດຊັງຄຳຕົວະແລະສິ່ງທີ່ບໍ່ດີທັງໝົດ. (ອ່ານຄຳເພງ 119:128, 163) ຄົນຂີ້ຕົວະກໍຮຽນແບບຊາຕານຜູ້ທີ່ປົກຄອງໂລກນີ້. (ຢຮ. 8:44; 12:31) ເປົ້າໝາຍອັນໜຶ່ງຂອງຊາຕານແມ່ນການໃສ່ຮ້າຍຊື່ສຽງຂອງພະເຢໂຫວາ. ຕັ້ງແຕ່ມີການກະບົດຢູ່ໃນສວນເອເດນ ຊາຕານໄດ້ເຜີຍແຜ່ຄຳຕົວະເລື່ອງພະເຢໂຫວາຕະຫຼອດມາ. ຊາຕານເວົ້າວ່າພະເຢໂຫວາເປັນຜູ້ປົກຄອງທີ່ເຫັນແກ່ຕົວ ບໍ່ສັດຊື່ ແລະບໍ່ໄດ້ເຮັດສິ່ງທີ່ດີໃຫ້ກັບມະນຸດ. (ປຖກ. 3:1, 4, 5) ຄຳຕົວະຂອງຊາຕານຍັງເຮັດໃຫ້ຜູ້ຄົນເຂົ້າໃຈຜິດແລະຮູ້ສຶກບໍ່ດີກ່ຽວກັບພະເຈົ້າ. ເມື່ອມະນຸດເລືອກທີ່ຈະບໍ່ “ຮັກຄວາມຈິງ” ຊາຕານກໍຊັກນຳເຂົາເຈົ້າໃຫ້ເຮັດສິ່ງທີ່ບໍ່ຍຸຕິທຳແລະເຮັດຊົ່ວ.—ຣມ. 1:25-31
4. ພະເຢໂຫວາສະແດງໃຫ້ເຫັນແນວໃດວ່າເພິ່ນເປັນ “ພະເຈົ້າທີ່ເວົ້າແຕ່ຄວາມຈິງ”? (ເບິ່ງຮູບພາບ)
4 ພະເຢໂຫວາເປັນ “ພະເຈົ້າທີ່ເວົ້າແຕ່ຄວາມຈິງ” ແລະສອນຄວາມຈິງໃຫ້ກັບຄົນທີ່ຮັກເພິ່ນ. (ເພງ. 31:5, ລ.ມ.) ນີ້ຈຶ່ງເຮັດໃຫ້ເຂົາເຈົ້າບໍ່ຖືກຊາຕານຕົວະອີກຕໍ່ໄປ. ພະເຢໂຫວາຍັງສອນຜູ້ຮັບໃຊ້ຂອງເພິ່ນໃຫ້ເປັນຄົນສັດຊື່ແລະເຮັດສິ່ງທີ່ຖືກຕ້ອງ. ເຂົາເຈົ້າກໍເລີຍມີຄວາມນັບຖືໂຕເອງແລະມີຄວາມສະຫງົບໃຈ. (ສຸພາ. 13:5, 6) ເຈົ້າຮູ້ສຶກແບບນັ້ນຄືກັນບໍ? ຕັ້ງແຕ່ສຶກສາຄຳພີໄບເບິນມາ ເຈົ້າໄດ້ຮຽນຮູ້ວ່າແນວທາງຂອງພະເຢໂຫວາດີທີ່ສຸດສຳລັບມະນຸດແລະສຳລັບເຈົ້າເປັນສ່ວນໂຕ. (ເພງ. 77:13) ດັ່ງນັ້ນ ເຈົ້າຈຶ່ງຢາກເຮັດຕາມສິ່ງທີ່ພະເຢໂຫວາບອກວ່າຖືກຕ້ອງ. (ມທ. 6:33) ເຈົ້າຢາກໃຫ້ຄົນອື່ນຮູ້ຈັກຄວາມຈິງກ່ຽວກັບພະເຢໂຫວາແລະພິສູດວ່າຊາຕານເປັນຜູ້ເວົ້າຕົວະ. ແລ້ວເຈົ້າຈະເຮັດແບບນັ້ນໄດ້ແນວໃດ?
5. ເຈົ້າຈະສະແດງໃຫ້ເຫັນແນວໃດວ່າ ເຈົ້າຮັກຄວາມຈິງແລະຄວາມຖືກຕ້ອງຊອບທຳ?
5 ເຈົ້າສາມາດເລືອກໃຊ້ຊີວິດໃນແບບທີ່ສະແດງວ່າ ‘ຂ້ອຍບໍ່ຟັງຄຳຕົວະຂອງຊາຕານ ຂ້ອຍຈະຍຶດໝັ້ນກັບຄວາມຈິງ. ຂ້ອຍຢາກໃຫ້ພະເຢໂຫວາເປັນຜູ້ປົກຄອງຂ້ອຍແລະຂ້ອຍຢາກເຮັດສິ່ງທີ່ພະເຢໂຫວາບອກວ່າຖືກຕ້ອງ.’ ເຈົ້າຈະເຮັດແບບນັ້ນໄດ້ໂດຍອະທິດຖານເຖິງພະເຢໂຫວາແລະບອກເພິ່ນວ່າ ເຈົ້າຈະອຸທິດຕົວໃຫ້ເພິ່ນແລະຮັບບັບເຕມາເພື່ອສະແດງໃຫ້ຄົນອື່ນເຫັນວ່າເຈົ້າອຸທິດຕົວໃຫ້ພະເຢໂຫວາແລ້ວ. ຖ້າເຈົ້າຮັກຄວາມຈິງແລະຄວາມຖືກຕ້ອງຊອບທຳ ເຈົ້າກໍຢາກຮັບບັບເຕມາ.
ຮັກພະເຢຊູຄລິດ
6. ຕາມຄຳເພງ 45:4 ເປັນຫຍັງເຈົ້າຈຶ່ງຮັກພະເຢຊູ?
6 ເປັນຫຍັງເຮົາຈຶ່ງຮັກພະເຢຊູ? ໃຫ້ເຮົາມາເບິ່ງເຫດຜົນນຳກັນທີ່ຢູ່ໃນຄຳເພງ 45:4 (ອ່ານ). ພະເຢຊູຕໍ່ສູ້ເພື່ອຄົນຖ່ອມ ເພື່ອຄວາມຈິງ ແລະເພື່ອຄວາມຍຸຕິທຳ. ຖ້າເຈົ້າຮັກຄວາມຈິງແລະຄວາມຍຸຕິທຳ ເຈົ້າກໍຕ້ອງຮັກພະເຢຊູນຳ. ລອງຄິດເບິ່ງວ່າພະເຢຊູກ້າຫານຂະໜາດໃດທີ່ປົກປ້ອງຄວາມຈິງແລະຄວາມຖືກຕ້ອງ. (ຢຮ. 18:37) ແລ້ວພະເຢຊູສອນແນວໃດໃນເລື່ອງຄວາມຖ່ອມ?
7. ເຈົ້າປະທັບໃຈຫຍັງກ່ຽວກັບຄວາມຖ່ອມຂອງພະເຢຊູ?
7 ພະເຢຊູສອນເຮົາໃນເລື່ອງຄວາມຖ່ອມຫຼືເປັນແບບຢ່າງໃຫ້ເຮົາ. ຕົວຢ່າງເຊັ່ນ: ເພິ່ນຍົກຍ້ອງພະເຢໂຫວາພໍ່ຂອງເພິ່ນສະເໝີ ບໍ່ແມ່ນຍົກຍ້ອງຕົວເພິ່ນເອງ. (ມຣກ. 10:17, 18; ຢຮ. 5:19) ເຈົ້າຮູ້ສຶກແນວໃດທີ່ພະເຢຊູເປັນຄົນຖ່ອມແບບນີ້? ແນ່ນອນວ່ານັ້ນຈະກະຕຸ້ນເຈົ້າໃຫ້ຮັກພະເຢຊູແລະຮຽນແບບເພິ່ນ. ເປັນຫຍັງພະເຢຊູຈຶ່ງເປັນຄົນຖ່ອມ? ກໍຍ້ອນວ່າເພິ່ນຮັກພະເຢໂຫວາແລະຮຽນແບບຄວາມຖ່ອມຂອງພໍ່ເພິ່ນ. (ເພງ. 18:35; ຮຣ. 1:3) ຍ້ອນເພິ່ນຮຽນແບບຄຸນລັກສະນະຂອງພະເຢໂຫວາໄດ້ຢ່າງສົມບູນແບບບໍເຈົ້າຈຶ່ງຮັກເພິ່ນ?
8. ເປັນຫຍັງເຮົາຈຶ່ງຮັກພະເຢຊູກະສັດຂອງເຮົາ?
8 ເຮົາຮັກພະເຢຊູກະສັດຂອງເຮົາເພາະເພິ່ນເປັນຜູ້ປົກຄອງທີ່ດີທີ່ສຸດ. ພະເຢໂຫວາໄດ້ຝຶກພະເຢຊູດ້ວຍຕົວຂອງເພິ່ນເອງແລະໄດ້ແຕ່ງຕັ້ງໃຫ້ເປັນກະສັດ. (ອຊຢ. 50:4, 5) ນອກຈາກນັ້ນ ໃຫ້ເຮົາຄິດເຖິງຄວາມຮັກແລະການເສຍສະລະທີ່ພະເຢຊູສະແດງຕໍ່ເຮົາ. (ຢຮ. 13:1) ຍ້ອນພະເຢຊູເປັນກະສັດຂອງເຮົາ ເຮົາຈຶ່ງຮັກເພິ່ນ. ພະເຢຊູໄດ້ອະທິບາຍວ່າຜູ້ທີ່ຮັກເພິ່ນແທ້ໆຈະໄດ້ເປັນໝູ່ກັບເພິ່ນ ແລະຜູ້ທີ່ເປັນໝູ່ກັບເພິ່ນກໍຕ້ອງເຊື່ອຟັງຄຳສັ່ງຂອງເພິ່ນ. (ຢຮ. 14:15; 15:14, 15) ເຮົາຮູ້ສຶກວ່າເປັນກຽດຫຼາຍແທ້ໆທີ່ໄດ້ເປັນໝູ່ກັບລູກຂອງພະເຈົ້າ!
9. ການຮັບບັບເຕມາຂອງພວກລູກສິດຄ້າຍຄືກັບການຮັບບັບເຕມາຂອງພະເຢຊູແນວໃດ?
9 ຄຳສັ່ງຢ່າງໜຶ່ງທີ່ພະເຢຊູບອກພວກລູກສິດໃຫ້ເຮັດກໍຄື ການຮັບບັບເຕມາ. (ມທ. 28:19, 20) ພະເຢຊູກໍເຮັດໃຫ້ເຫັນເປັນຕົວຢ່າງໃນເລື່ອງນີ້. ການຮັບບັບເຕມາຂອງພະເຢຊູແລະການຮັບບັບເຕມາຂອງພວກລູກສິດມີບາງຢ່າງທີ່ຄືກັນແລະມີບາງຢ່າງທີ່ຕ່າງກັນ. (ເບິ່ງຂອບ “ ການຮັບບັບເຕມາຂອງພະເຢຊູຕ່າງຈາກການຮັບບັບເຕມາຂອງພວກລູກສິດແນວໃດ?”) ພະເຢຊູຮັບບັບເຕມາເພື່ອສະເໜີຕົວທີ່ຈະເຮັດຕາມຄວາມຕ້ອງການຂອງພະເຢໂຫວາ. (ຮຣ. 10:7) ຄ້າຍຄືກັນ ເມື່ອພວກລູກສິດຮັບບັບເຕມາ ເຂົາເຈົ້າກໍໄດ້ສະແດງໃຫ້ເຫັນວ່າເຂົາເຈົ້າໄດ້ອຸທິດຕົວໃຫ້ພະເຢໂຫວາແລ້ວ. ນັ້ນໝາຍຄວາມວ່າຕໍ່ຈາກນີ້ໄປເຂົາເຈົ້າຈະໃຊ້ຊີວິດເພື່ອເຮັດຕາມຄວາມຕ້ອງການຂອງພະເຢໂຫວາ ບໍ່ແມ່ນຕາມຄວາມຕ້ອງການຂອງຕົວເອງ. ເຮົາເຫັນໄດ້ວ່າພວກລູກສິດກຳລັງເຮັດຕາມຕົວຢ່າງຂອງພະເຢຊູ.
10. ມີເຫດຜົນຫຍັງອີກທີ່ເຮົາຄວນຮັກພະເຢຊູ? ແລະຄວາມຮັກນັ້ນຄວນກະຕຸ້ນເຮົາໃຫ້ເຮັດຫຍັງ?
10 ເຈົ້າເຊື່ອວ່າພະເຢຊູເປັນລູກຊາຍຄົນດຽວຂອງພະເຢໂຫວາທີ່ຖືກແຕ່ງຕັ້ງໃຫ້ເປັນຜູ້ປົກຄອງເຮົາ. ເຈົ້າຮູ້ວ່າພະເຢຊູເປັນຄົນຖ່ອມແລະຮຽນແບບພະເຢໂຫວາໄດ້ຢ່າງສົມບູນແບບ. ເຈົ້າຮູ້ວ່າເພິ່ນໄດ້ລ້ຽງອາຫານຄົນຈຳນວນຫຼາຍ ໃຫ້ກຳລັງໃຈຜູ້ທີ່ທໍ້ໃຈ ແລະປິ່ນປົວຄົນທີ່ເຈັບປ່ວຍ. (ມທ. 14:14-21) ເຈົ້າໄດ້ເຫັນເພິ່ນນຳໜ້າໃນປະຊາຄົມຄລິດສະຕຽນໃນທຸກມື້ນີ້. (ມທ. 23:10) ແລະເຈົ້າຮູ້ວ່າໃນຖານະທີ່ເພິ່ນເປັນກະສັດໃນການປົກຄອງຂອງພະເຈົ້າ ເພິ່ນຈະເຮັດຫຼາຍກວ່ານີ້ອີກໃນອະນາຄົດ. ເຈົ້າຈະສະແດງໃຫ້ເຫັນແນວໃດວ່າເຈົ້າຮັກເພິ່ນ? ໂດຍເຮັດຕາມຕົວຢ່າງຂອງເພິ່ນ. (ຢຮ. 14:21) ສິ່ງທຳອິດທີ່ເຈົ້າຈະເຮັດແບບນັ້ນໄດ້ກໍຄື ອຸທິດຕົວໃຫ້ກັບພະເຢໂຫວາແລະຮັບບັບເຕມາ.
ຮັກພະເຢໂຫວາ
11. ເຫດຜົນທີ່ສຳຄັນທີ່ສຸດທີ່ເຮົາຮັບບັບເຕມາແມ່ນຫຍັງ? ແລະຍ້ອນຫຍັງ?
11 ເຫດຜົນທີ່ສຳຄັນທີ່ສຸດທີ່ເຮົາຮັບບັບເຕມາແມ່ນຫຍັງ? ພະເຢຊູໄດ້ບອກວ່າຄຳສັ່ງທີ່ສຳຄັນທີ່ສຸດຂອງພະເຈົ້າກໍຄື “ເຈົ້າຕ້ອງຮັກພະເຢໂຫວາພະເຈົ້າຂອງເຈົ້າສຸດຫົວໃຈ ສຸດຊີວິດ ສຸດຄວາມຄິດ ແລະສຸດກຳລັງ.” (ມຣກ. 12:30) ເຈົ້າຮັກພະເຢໂຫວາຄືກັບຂໍ້ນີ້ບອກບໍ?
ພະເຢໂຫວາໄດ້ໃຫ້ສິ່ງດີໆທຸກຢ່າງກັບເຈົ້າເຊິ່ງເຮັດໃຫ້ເຈົ້າມີຄວາມສຸກທັງໃນຕອນນີ້ແລະໃນອະນາຄົດ (ເບິ່ງຂໍ້ 12-13)
12. ເປັນຫຍັງເຈົ້າຈຶ່ງຮັກພະເຢໂຫວາ? (ເບິ່ງຮູບພາບ)
12 ມີຫຼາຍເຫດຜົນທີ່ເຈົ້າຮັກພະເຢໂຫວາ. ຕົວຢ່າງເຊັ່ນ: ເຈົ້າຮູ້ວ່າພະເຢໂຫວາເປັນ “ບໍ່ເກີດຂອງຊີວິດ” ແລະເປັນຜູ້ໃຫ້ “ສິ່ງດີໆແລະສົມບູນທຸກຢ່າງ” ແກ່ເຈົ້າ. (ເພງ. 36:9, ລ.ມ.; ຢກບ. 1:17) ສິ່ງດີໆທຸກຢ່າງທີ່ເຈົ້າມີໃນຊີວິດກໍມາຈາກພະເຢໂຫວາພະເຈົ້າທີ່ໃຈກວ້າງແລະຮັກເຈົ້າ.
13. ເປັນຫຍັງຄ່າໄຖ່ຈຶ່ງເປັນຂອງຂວັນທີ່ພິເສດ?
13 ຄ່າໄຖ່ເປັນຂອງຂວັນທີ່ພິເສດທີ່ພະເຢໂຫວາໄດ້ໃຫ້ເຮົາ. ເປັນຫຍັງເຮົາເວົ້າແບບນັ້ນ? ໃຫ້ເຮົາຄິດເບິ່ງວ່າພະເຢໂຫວາແລະພະເຢຊູໃກ້ຊິດກັນຂະໜາດໃດ. ເມື່ອພະເຢຊູເວົ້າວ່າ “ພໍ່ຮັກຂ້ອຍ” ແລະ “ຂ້ອຍຮັກພະອົງ” ພະເຢໂຫວາແລະພະເຢຊູມີສາຍສຳພັນທີ່ແໜ້ນແຟ້ນມາຫຼາຍພັນລ້ານປີແລ້ວ. (ຢຮ. 10:17; 14:31; ສຸພາ. 8:22, 23, 30) ລອງຄິດເບິ່ງວ່າພະເຢໂຫວາຈະຮູ້ສຶກເຈັບປວດຫຼາຍຂະໜາດໃດທີ່ເຫັນລູກຊາຍຕ້ອງທົນທຸກແລະຕາຍ. ພະເຢໂຫວາຮັກມະນຸດຫຼາຍ ເຊິ່ງລວມເຖິງເຈົ້ານຳ. ເພິ່ນຮັກຈົນເຖິງຂັ້ນເຕັມໃຈສະລະລູກຊາຍຄົນດຽວໃຫ້ມາເປັນຄ່າໄຖ່ ເພື່ອເຈົ້າແລະຄົນອື່ນໆຈະໄດ້ຮັບໂອກາດທີ່ຈະມີຊີວິດຕະຫຼອດໄປ. (ຢຮ. 3:16; ຄລຕ. 2:20) ນີ້ຈຶ່ງເປັນເຫດຜົນທີ່ສຳຄັນທີ່ເຮົາຮັກພະເຢໂຫວາ.
14. ເປົ້າໝາຍທີ່ດີທີ່ສຸດໃນຊີວິດຂອງເຈົ້າແມ່ນຫຍັງ?
14 ແຮ່ງເຈົ້າຮູ້ຈັກພະເຢໂຫວາຫຼາຍເທົ່າໃດ ເຈົ້າກໍແຮ່ງຮັກເພິ່ນຫຼາຍເທົ່ານັ້ນ. ເຈົ້າຄືຊິຢາກສະໜິດກັບພະເຢໂຫວາໃຫ້ຫຼາຍຂຶ້ນທັງໃນຕອນນີ້ແລະຕະຫຼອດໄປ ແລະເຈົ້າສາມາດເຮັດແບບນັ້ນໄດ້. ພະເຢໂຫວາຢາກໃຫ້ເຈົ້າເຮັດໃຫ້ເພິ່ນດີໃຈ. (ສຸພາ. 23:15, 16) ເຈົ້າສາມາດເຮັດແບບນັ້ນບໍ່ພຽງແຕ່ໂດຍທາງຄຳເວົ້າເທົ່ານັ້ນ ແຕ່ໂດຍການກະທຳນຳ. ການໃຊ້ຊີວິດຂອງເຈົ້າຈະເຮັດໃຫ້ເຫັນວ່າເຈົ້າຮັກພະເຢໂຫວາແທ້ໆ. (1ຢຮ. 5:3) ນີ້ເປັນເປົ້າໝາຍທີ່ດີທີ່ສຸດໃນຊີວິດຂອງເຈົ້າ.
15. ເຈົ້າຈະສະແດງໃຫ້ເຫັນແນວໃດວ່າເຈົ້າຮັກພະເຢໂຫວາ?
15 ເຈົ້າຈະສະແດງໃຫ້ເຫັນແນວໃດວ່າເຈົ້າຮັກພະເຢໂຫວາ? ທຳອິດ ໃຫ້ເຈົ້າອະທິດຖານເຖິງພະເຢໂຫວາແລະບອກກັບເພິ່ນວ່າເຈົ້າຈະອຸທິດຕົວໃຫ້ກັບເພິ່ນ. (ເພງ. 40:8) ຈາກນັ້ນ ໃຫ້ເຈົ້າຮັບບັບເຕມາເພື່ອສະແດງໃຫ້ຄົນອື່ນເຫັນວ່າເຈົ້າໄດ້ອຸທິດຕົວໃຫ້ພະເຢໂຫວາແລ້ວ. ຄືກັບທີ່ເຮົາເວົ້າໃນຕອນຕົ້ນຂອງບົດຄວາມນີ້ແລ້ວວ່າ ການຮັບບັບເຕມາເປັນຈຸດປ່ຽນທີ່ສຳຄັນໃນຊີວິດຂອງເຈົ້າແລະເປັນມື້ທີ່ໜ້າຍິນດີ ເພາະເຈົ້າຈະເລີ່ມໃຊ້ຊີວິດໃໝ່ເພື່ອພະເຢໂຫວາ ບໍ່ແມ່ນເພື່ອຕົວເຈົ້າເອງ. (ຣມ. 14:8; 1ປຕ. 4:1, 2) ນັ້ນອາດເປັນການຕັດສິນໃຈຄັ້ງສຳຄັນ ແຕ່ມັນຈະເປີດໂອກາດໃຫ້ເຈົ້າມີຊີວິດທີ່ດີທີ່ສຸດ. ແລ້ວມັນຈະເປັນແບບນັ້ນໄດ້ແນວໃດ?
16. ຕາມທີ່ບອກໄວ້ໃນຄຳເພງ 41:12 ພະເຢໂຫວາຈະໃຫ້ລາງວັນຫຍັງກັບຜູ້ທີ່ໃຊ້ຊີວິດເພື່ອຮັບໃຊ້ເພິ່ນ?
16 ພະເຢໂຫວາເປັນພະເຈົ້າທີ່ໃຈກວ້າງທີ່ສຸດ. ບໍ່ວ່າເຈົ້າຈະໃຫ້ສິ່ງໃດກັບເພິ່ນ ເພິ່ນຈະໃຫ້ເຈົ້າຄືນຫຼາຍເທົ່າ. (ມຣກ. 10:29, 30) ພະເຢໂຫວາຈະໃຫ້ເຈົ້າມີຊີວິດທີ່ມີຄວາມໝາຍແລະມີຄວາມສຸກທີ່ສຸດໃນຕອນນີ້ເຖິງວ່າຈະຢູ່ໃນໂລກຊົ່ວ. ແລະນັ້ນເປັນພຽງຈຸດເລີ່ມຕົ້ນ. ຖ້າເຈົ້າຮັບບັບເຕມາ ເຈົ້າກໍຈະມີໂອກາດມີຊີວິດທີ່ບໍ່ສິ້ນສຸດ. ເຈົ້າຈະໄດ້ຮັບໃຊ້ພະເຢໂຫວາພໍ່ທີ່ເຈົ້າຮັກຕະຫຼອດໄປ ແລະຄວາມຮັກລະຫວ່າງເຈົ້າກັບພະເຢໂຫວາຈະເພີ່ມຂຶ້ນເລື້ອຍໆ. ນອກຈາກນັ້ນ ເຈົ້າຈະມີຊີວິດຍືນຍາວເທົ່າທີ່ພະເຢໂຫວາມີຊີວິດຢູ່ ນັ້ນກໍຄືມີຊີວິດຕະຫຼອດໄປ.—ອ່ານຄຳເພງ 41:12
17. ເຈົ້າສາມາດໃຫ້ຫຍັງກັບພະເຢໂຫວາ ເຊິ່ງເປັນສິ່ງທີ່ເພິ່ນບໍ່ມີ?
17 ເມື່ອເຈົ້າອຸທິດຕົວແລະຮັບບັບເຕມາ ເຈົ້າກໍມີສິດທິພິເສດທີ່ຈະໃຫ້ສິ່ງທີ່ມີຄ່າກັບພະເຢໂຫວາ. ພະເຢໂຫວາໄດ້ໃຫ້ສິ່ງດີໆທຸກຢ່າງກັບເຈົ້າເຊິ່ງເຮັດໃຫ້ເຈົ້າມີຄວາມສຸກ. ເຈົ້າສາມາດຕອບແທນພະເຢໂຫວາພະເຈົ້າຜູ້ທີ່ສ້າງຟ້າສະຫວັນແລະໂລກນີ້ໂດຍໃຫ້ສິ່ງທີ່ເພິ່ນບໍ່ມີ ນັ້ນກໍຄືການເຕັມໃຈຮັບໃຊ້ເພິ່ນດ້ວຍຄວາມພັກດີ. (ໂຢບ 1:8; 41:11; ສຸພາ. 27:11) ນີ້ຈະເຮັດໃຫ້ເຈົ້າມີຊີວິດທີ່ມີຄວາມສຸກ. ດັ່ງນັ້ນ ເຫດຜົນທີ່ສຳຄັນທີ່ສຸດທີ່ເຈົ້າຄວນຮັບບັບເຕມາກໍຄືຮັກພະເຢໂຫວາ.
ເຈົ້າລໍຖ້າຫຍັງຢູ່?
18. ມີຄຳຖາມຫຍັງແດ່ທີ່ເຈົ້າອາດຈະຖາມຕົວເອງ?
18 ຖ້າມີຄົນຖາມເຈົ້າວ່າ ‘ເຈົ້າຈະຮັບບັບເຕມາບໍ?’ ເຈົ້າຈະຕອບຄຳຖາມນີ້ແນວໃດ? ມີແຕ່ເຈົ້າເທົ່ານັ້ນທີ່ຕອບຄຳຖາມນີ້ໄດ້. ແຕ່ຄຳຖາມນີ້ຈະຊ່ວຍເຈົ້າໃຫ້ຖາມຕົວເອງວ່າ ‘ຂ້ອຍກຳລັງລໍຖ້າຫຍັງ?’ (ກຈກ. 8:36) ຂໍໃຫ້ຈື່ສາມເຫດຜົນທີ່ເຈົ້າຄວນຮັບບັບເຕມາທີ່ໄດ້ຮຽນຢູ່ໃນບົດຄວາມນີ້. ເຫດຜົນທີໜຶ່ງ ເຈົ້າຮັກຄວາມຈິງແລະຄວາມຖືກຕ້ອງຊອບທຳ. ໃຫ້ຖາມຕົວເອງວ່າ ‘ຂ້ອຍຢາກເຫັນມື້ທີ່ທຸກຄົນເວົ້າຄວາມຈິງແລະເຮັດສິ່ງທີ່ຖືກຕ້ອງບໍ?’ ເຫດຜົນທີສອງ ເຈົ້າຮັກພະເຢຊູຄລິດ. ໃຫ້ຖາມຕົວເອງວ່າ ‘ຂ້ອຍຢາກໃຫ້ພະເຢຊູເປັນກະສັດຂອງຂ້ອຍ ແລະຂ້ອຍຢາກເຮັດຕາມຕົວຢ່າງຂອງເພິ່ນບໍ?’ ເຫດຜົນທີສາມເຊິ່ງເປັນເຫດຜົນທີ່ສຳຄັນທີ່ສຸດກໍຄື ເຈົ້າຮັກພະເຢໂຫວາ. ໃຫ້ຖາມຕົວເອງວ່າ ‘ຂ້ອຍຢາກເຮັດໃຫ້ພະເຢໂຫວາດີໃຈໂດຍເຕັມໃຈຮັບໃຊ້ເພິ່ນບໍ?’ ຖ້າເຈົ້າຕອບສາມຄຳຖາມນີ້ວ່າແມ່ນ ແລ້ວເປັນຫຍັງເຈົ້າບໍ່ຮັບບັບເຕມາ? ເຈົ້າລໍຖ້າຫຍັງຢູ່?—ກຈກ. 16:33
19. ເປັນຫຍັງເຈົ້າຈຶ່ງບໍ່ຄວນລັງເລທີ່ຈະຮັບບັບເຕມາ? ຂໍໃຫ້ຍົກຕົວຢ່າງ. (ໂຢຮັນ 4:34)
19 ຖ້າເຈົ້າລັງເລວ່າຈະຮັບບັບເຕມາບໍ ຂໍໃຫ້ຄິດເຖິງຕົວຢ່າງປຽບທຽບເລື່ອງໜຶ່ງຂອງພະເຢຊູ. (ອ່ານໂຢຮັນ 4:34) ພະເຢຊູສົມທຽບການເຮັດຕາມຄວາມຕ້ອງການຂອງພະເຈົ້າເປັນຄືກັບອາຫານ. ເປັນຫຍັງພະເຢຊູຈຶ່ງສົມທຽບແບບນັ້ນ? ກໍຍ້ອນວ່າອາຫານເປັນປະໂຫຍດຕໍ່ຮ່າງກາຍຂອງເຮົາ. ພະເຢຊູຮູ້ວ່າທຸກສິ່ງທີ່ພະເຢໂຫວາບອກໃຫ້ເຮົາເຮັດລ້ວນແຕ່ເປັນປະໂຫຍດຕໍ່ຕົວເຮົາເອງ. ພະເຢໂຫວາບໍ່ຢາກໃຫ້ເຮົາເຮັດສິ່ງທີ່ເປັນອັນຕະລາຍຕໍ່ຕົວເຮົາ. ສິ່ງທີ່ພະເຢໂຫວາຕ້ອງການໃຫ້ເຈົ້າເຮັດກໍຄືການຮັບບັບເຕມາແມ່ນບໍ? ແມ່ນແລ້ວ. (ກຈກ. 2:38) ດັ່ງນັ້ນ ຖ້າເຈົ້າເຮັດຕາມຄຳສັ່ງນີ້ໂດຍຮັບບັບເຕມາ ເຈົ້າກໍສາມາດໝັ້ນໃຈໄດ້ວ່າເຈົ້າຈະໄດ້ຮັບປະໂຫຍດແນ່ນອນ. ແລະຖ້າເຈົ້າບໍ່ໄດ້ລັງເລທີ່ຈະກິນອາຫານທີ່ແຊບທີ່ສຸດທີ່ຢູ່ຕໍ່ໜ້າເຈົ້າ ແລ້ວເປັນຫຍັງເຈົ້າຈຶ່ງລັງເລທີ່ຈະຮັບບັບເຕມາ?
20. ເຮົາຈະຮຽນຫຍັງໃນບົດຄວາມຕໍ່ໄປ?
20 ແລ້ວເຈົ້າເດ ລໍຖ້າຫຍັງຢູ່? ຫຼາຍຄົນອາດຈະບອກວ່າ ‘ຂ້ອຍຍັງບໍ່ພ້ອມ.’ ທີ່ຈິງ ການຕັດສິນໃຈອຸທິດຕົວໃຫ້ພະເຢໂຫວາແລະຮັບບັບເຕມາເປັນການຕັດສິນໃຈທີ່ສຳຄັນທີ່ສຸດໃນຊີວິດ. ດັ່ງນັ້ນ ເຈົ້າຕ້ອງໃຊ້ເວລາ ຄິດໃຫ້ດີ ແລະອອກຄວາມພະຍາຍາມຫຼາຍເພື່ອຈະມີຄຸນສົມບັດທີ່ຈະຮັບບັບເຕມາ. ແຕ່ຖ້າເຈົ້າຢາກຮັບບັບເຕມາແທ້ໆເຈົ້າຈະກຽມຕົວແນວໃດຕັ້ງແຕ່ຕອນນີ້? ເຮົາຈະມາຮຽນເລື່ອງນີ້ໃນບົດຄວາມຕໍ່ໄປ.
ເພງ 28 ໄດ້ເປັນເພື່ອນກັບພະເຢໂຫວາ
a ການຮັບບັບເຕມາເປັນຂັ້ນຕອນສຳຄັນສຳລັບນັກສຶກສາຄຳພີໄບເບິນທຸກຄົນ. ເປັນຫຍັງ? ເຂົາເຈົ້າຢາກຮັບບັບເຕມາກໍຍ້ອນຄວາມຮັກ. ຮັກຫຍັງແລະຮັກຜູ້ໃດ? ໃນບົດຄວາມນີ້ ເຮົາຈະໄດ້ຄຳຕອບແລະຈະມາລົມກັນວ່າຊີວິດຂອງເຮົາຈະເປັນແນວໃດຖ້າຮັບບັບເຕມາແລ້ວ.
