ບົດຄວາມສຶກສາທີ 11
ເຮັດແນວໃດເພື່ອຈະຮັບບັບເຕມາ?
“ມີຫຍັງທີ່ເຮັດໃຫ້ຂ້ອຍຮັບບັບເຕມາບໍ່ໄດ້?”—ກຈກ. 8:36
ເພງ 50 ຄຳອະທິດຖານອຸທິດຕົວ
ໃຈຄວາມສຳຄັນ a
ຢູ່ທົ່ວໂລກ ບໍ່ວ່າຜູ້ທີ່ອາຍຸໜ້ອຍຫຼືອາຍຸຫຼາຍກໍສາມາດກ້າວໜ້າຈົນຮັບບັບເຕມາໄດ້ (ເບິ່ງຂໍ້ 1-2)
1-2. ຖ້າເຈົ້າຍັງບໍ່ພ້ອມຮັບບັບເຕມາຍ້ອນມີບາງຢ່າງທີ່ຕ້ອງປັບປຸງ ເປັນຫຍັງບໍ່ຄວນທໍ້ໃຈ? (ເບິ່ງຮູບໜ້າປົກ)
ຖ້າເຈົ້າຢາກຮັບບັບເຕມາ ເຈົ້າກໍກຳລັງຕັ້ງເປົ້າໝາຍທີ່ດີ. ເຈົ້າພ້ອມທີ່ຈະຮັບບັບເຕມາແລ້ວບໍ? ຖ້າແມ່ນແລະຜູ້ດູແລກໍເຫັນດີນຳແລ້ວ ເຈົ້າກໍບໍ່ຕ້ອງລັງເລທີ່ຈະຮັບບັບເຕມາໃນການປະຊຸມໃຫຍ່ຄັ້ງຕໍ່ໄປ. ວຽກຮັບໃຊ້ທີ່ເຮັດໃຫ້ໄດ້ຮັບພອນຈາກພະເຢໂຫວາກຳລັງລໍຖ້າເຈົ້າຢູ່.
2 ແຕ່ຖ້າມີບາງຄົນບອກວ່າເຈົ້າຕ້ອງພັດທະນາຕົວເອງໃຫ້ຫຼາຍກວ່ານີ້ກ່ອນຈຶ່ງຮັບບັບເຕມາໄດ້ ຫຼືເຈົ້າເຫັນວ່າຕົວເອງມີບາງຢ່າງທີ່ຕ້ອງພັດທະນາ ກໍຢ່າຟ້າວທໍ້ໃຈ. ເຈົ້າສາມາດກ້າວໜ້າຕໍ່ໄປຈົນເຖິງຂັ້ນມີຄຸນສົມບັດທີ່ຈະຮັບບັບເຕມາໄດ້ ບໍ່ວ່າເຈົ້າຈະອາຍຸໜ້ອຍຫຼືຫຼາຍ.
“ມີຫຍັງທີ່ເຮັດໃຫ້ຂ້ອຍຮັບບັບເຕມາບໍ່ໄດ້?”
3. ຂ້າລາຊະການຊາວເອທິໂອເປຍຖາມຟີລິບແນວໃດ? ແລະຄຳເວົ້າຂອງລາວເຮັດໃຫ້ເກີດຄຳຖາມຫຍັງ? (ກິດຈະການ 8:36, 38)
3 ອ່ານກິດຈະການ 8:36, 38. ຂ້າລາຊະການຊາວເອທິໂອເປຍຖາມຟີລິບວ່າ “ມີຫຍັງທີ່ເຮັດໃຫ້ຂ້ອຍຮັບບັບເຕມາບໍ່ໄດ້?” ເຫັນໄດ້ວ່າຂ້າລາຊະການຜູ້ນີ້ຮູ້ສຶກວ່າພ້ອມທີ່ຈະຮັບບັບເຕມາແລ້ວ ແຕ່ລາວພ້ອມແທ້ໆບໍ?
ຂ້າລາຊະການຊາວເອທິໂອເປຍຕັ້ງໃຈທີ່ຈະຮຽນຮູ້ກ່ຽວກັບພະເຢໂຫວາຕໍ່ໆໄປ (ເບິ່ງຂໍ້ 4)
4. ຊາວເອທິໂອເປຍສະແດງໃຫ້ເຫັນແນວໃດວ່າລາວຕັ້ງໃຈທີ່ຈະຮຽນຮູ້ຕໍ່ໆໄປ?
4 ຂ້າລາຊະການຊາວເອທິໂອເປຍ “ໄປນະມັດສະການພະເຈົ້າຢູ່ເມືອງເຢຣູຊາເລັມ.” (ກຈກ. 8:27) ນັ້ນກໍສະແດງວ່າລາວປ່ຽນມານັບຖືສາສະໜາຢິວ ແລ້ວຄືຊິໄດ້ຮຽນຮູ້ກ່ຽວກັບພະເຢໂຫວາຈາກຄຳພີໄບເບິນພາກພາສາເຮັບເຣີ ແຕ່ລາວກໍຢາກຮູ້ຫຼາຍຂຶ້ນ. ສິ່ງທີ່ສະແດງວ່າລາວຢາກຮຽນຮູ້ຫຼາຍຂຶ້ນກໍຄື ຕອນທີ່ຟີລິບພົບລາວຢູ່ຫົນທາງລາວກຳລັງອ່ານມ້ວນໜັງສືຂອງຜູ້ພະຍາກອນເອຊາຢາຢູ່ ເຊິ່ງເປັນຄວາມຮູ້ທີ່ເລິກເຊິ່ງ. (ກຈກ. 8:28) ເຫັນໄດ້ວ່າຂ້າລາຊະການນີ້ບໍ່ໄດ້ຢາກຮູ້ພຽງແຕ່ຄຳສອນພື້ນຖານຂອງຄຳພີໄບເບິນເທົ່ານັ້ນ ແຕ່ລາວຢາກຮູ້ຄຳສອນທີ່ເລິກເຊິ່ງຫຼາຍຂຶ້ນເລື້ອຍໆ.
5. ຊາວເອທິໂອເປຍເຮັດຕາມສິ່ງທີ່ລາວໄດ້ຮຽນແນວໃດ?
5 ຜູ້ຊາຍຄົນນີ້ລາວເປັນຂ້າລາຊະການຊາວເອທິໂອເປຍທີ່ມີຕຳແໜ່ງສູງຂອງລາຊີນີກັນດາເກຂອງເອທິໂອເປຍ “ແລະເປັນຜູ້ເບິ່ງແຍງຊັບສິນທັງໝົດຂອງລາຊີນີ.” (ກຈກ. 8:27) ດັ່ງນັ້ນ ລາວຈຶ່ງມີວຽກຫຼາຍແລະມີໜ້າທີ່ຮັບຜິດຊອບຫຼາຍ. ແຕ່ລາວກໍຍັງຈັດເວລາເພື່ອນະມັດສະການພະເຢໂຫວາ. ນີ້ສະແດງໃຫ້ເຫັນວ່າລາວບໍ່ພຽງແຕ່ຮຽນຄວາມຈິງເທົ່ານັ້ນ ແຕ່ລາວເຮັດຕາມສິ່ງທີ່ໄດ້ຮຽນນຳ. ລາວຈຶ່ງເດີນທາງຈາກເອທິໂອເປຍເພື່ອໄປນະມັດສະການພະເຢໂຫວາຢູ່ວິຫານໃນເມືອງເຢຣູຊາເລັມແລະການເດີນທາງນັ້ນກໍບໍ່ງ່າຍ ຍ້ອນຕ້ອງໃຊ້ເວລາແລະຄ່າໃຊ້ຈ່າຍຫຼາຍ. ແຕ່ລາວກໍມີຄວາມສຸກທີ່ໄດ້ໄປນະມັດສະການພະເຢໂຫວາ.
6-7. ສິ່ງໃດເຮັດໃຫ້ຊາວເອທິໂອເປຍຄົນນີ້ຮັກພະເຢໂຫວາຫຼາຍຂຶ້ນເລື້ອຍໆ?
6 ຊາວເອທິໂອເປຍຄົນນີ້ໄດ້ຮຽນຄວາມຈິງທີ່ສຳຄັນຫຼາຍຢ່າງຈາກຟີລິບ ເຊິ່ງລວມເຖິງສິ່ງທີ່ສະແດງວ່າພະເຢຊູເປັນເມຊີອາ. (ກຈກ. 8:34, 35) ລາວປະທັບໃຈແທ້ໆເມື່ອຮູ້ວ່າພະເຢຊູເຮັດຫຍັງແນ່ເພື່ອລາວ. ນີ້ກະຕຸ້ນລາວໃຫ້ເຮັດຫຍັງ? ທີ່ຈິງ ລາວສາມາດທີ່ຈະໃຊ້ຊີວິດແບບເກົ່າກໍໄດ້ ຍ້ອນລາວເປັນຄົນທີ່ມີຕຳແໜ່ງສູງທີ່ປ່ຽນມານັບຖືສາສະໜາຢິວແລະກໍມີຄົນນັບໜ້າຖືຕາ. ແຕ່ຍ້ອນຄວາມຮັກທີ່ລາວມີຕໍ່ພະເຢໂຫວາແລະພະເຢຊູໄດ້ເພີ່ມຂຶ້ນເລື້ອຍໆຈົນເຮັດໃຫ້ລາວຕັດສິນໃຈຮັບບັບເຕມາເປັນລູກສິດຂອງພະເຢຊູ. ເມື່ອຟີລິບເຫັນວ່າລາວພ້ອມແລ້ວ ຈຶ່ງໃຫ້ລາວຮັບບັບເຕມາ.
7 ຖ້າເຈົ້າເຮັດຕາມຕົວຢ່າງຂອງຊາວເອທິໂອເປຍ ເຈົ້າກໍພ້ອມທີ່ຈະຮັບບັບເຕມາ. ແລະເຈົ້າເອງກໍຈະເວົ້າໄດ້ຢ່າງໝັ້ນໃຈວ່າ “ມີຫຍັງທີ່ເຮັດໃຫ້ຂ້ອຍຮັບບັບເຕມາບໍ່ໄດ້?” ໃຫ້ເຮົາມາເບິ່ງວ່າເຈົ້າຈະເຮັດຕາມຕົວຢ່າງຂອງຊາວເອທິໂອເປຍໄດ້ແນວໃດ ເຊັ່ນ: ລາວຮຽນຮູ້ຕໍ່ໆໄປ ເຮັດຕາມສິ່ງທີ່ໄດ້ຮຽນ ແລະພັດທະນາຄວາມຮັກທີ່ມີຕໍ່ພະເຈົ້າໃຫ້ຫຼາຍຂຶ້ນ.
ຮຽນຮູ້ຕໍ່ໆໄປ
8. ໂຢຮັນ 17:3 ບອກໃຫ້ເຈົ້າເຮັດຫຍັງ?
8 ອ່ານໂຢຮັນ 17:3. ຄຳເວົ້າຂອງພະເຢຊູທີ່ຢູ່ໃນຂໍ້ຄຳພີນີ້ຊ່ວຍໃຫ້ເຈົ້າຕັດສິນໃຈສຶກສາຄຳພີໄບເບິນບໍ? ພວກເຮົາຫຼາຍຄົນຮູ້ສຶກແບບນັ້ນ. ຄຳເວົ້ານີ້ຍັງບອກໃຫ້ເຮົາຮຽນຮູ້ຕໍ່ໆໄປບໍ? ແມ່ນແລ້ວ. ເຮົາຕ້ອງ “ຮັບຄວາມຮູ້ຕໍ່ໆໄປກ່ຽວກັບ . . . ພະເຈົ້າທ່ຽງແທ້ອົງດຽວ.” (ຜູ້ປ. 3:11, ລ.ມ) ເຮົາສາມາດຮຽນຮູ້ກ່ຽວກັບພະເຢໂຫວາໄດ້ຕະຫຼອດໄປ. ແລະແຮ່ງເຮົາມີຄວາມຮູ້ຫຼາຍຂຶ້ນ ເຮົາກໍແຮ່ງຈະໃກ້ຊິດກັບພະເຢໂຫວາຫຼາຍຂຶ້ນນຳ.—ເພງ. 73:28
9. ຫຼັງຈາກທີ່ເຮົາໄດ້ຮຽນຄວາມຮູ້ພື້ນຖານໃນຄຳພີໄບເບິນແລ້ວ ເຮົາຕ້ອງເຮັດຫຍັງອີກ?
9 ຕອນທີ່ເຮົາເລີ່ມຮຽນຮູ້ກ່ຽວກັບພະເຢໂຫວາ ເຮົາໄດ້ຮຽນແຕ່ຄຳສອນພື້ນຖານເທົ່ານັ້ນ. ໃນຈົດໝາຍທີ່ອັກຄະສາວົກໂປໂລຂຽນເຖິງພີ່ນ້ອງຄົນເຮັບເຣີ ລາວເອີ້ນຄຳສອນເຫຼົ່ານີ້ວ່າ “ເລື່ອງພື້ນຖານ.” ແຕ່ລາວກໍບໍ່ໄດ້ຄິດວ່າ “ຫຼັກຄຳສອນເບື້ອງຕົ້ນ” ນີ້ບໍ່ສຳຄັນ. (ຮຣ. 5:12; 6:1) ລາວໄດ້ປຽບທຽບຄຳສອນນີ້ເປັນຄືກັບນ້ຳນົມທີ່ເດັກນ້ອຍຕ້ອງກິນ. ແລະລາວຍັງກະຕຸ້ນຄລິດສະຕຽນທຸກຄົນໃຫ້ຮຽນຄວາມຮູ້ທີ່ເລິກເຊິ່ງໃນຄຳພີໄບເບິນນຳ ບໍ່ແມ່ນຮຽນແຕ່ຄຳສອນພື້ນຖານເທົ່ານັ້ນ. ເຈົ້າຢາກຮຽນຄວາມຮູ້ທີ່ເລິກເຊິ່ງໃນຄຳພີໄບເບິນບໍ? ແລະເຈົ້າຢາກຮຽນກ່ຽວກັບພະເຢໂຫວາແລະຄວາມຕ້ອງການຂອງເພິ່ນຫຼາຍຂຶ້ນບໍ?
10. ເປັນຫຍັງບາງຄົນອາດຮູ້ສຶກບໍ່ມັກການສຶກສາຮ່ຳຮຽນ?
10 ສຳລັບພວກເຮົາຫຼາຍຄົນ ອາດບໍ່ມັກສຶກສາຮ່ຳຮຽນ. ແລ້ວເຈົ້າເດ ຕອນທີ່ເຈົ້າຮຽນຢູ່ໂຮງຮຽນ ເຈົ້າຮຽນ ອ່ານ ແລະສຶກສາຄົ້ນຄວ້າເກັ່ງບໍ? ເຈົ້າຄິດວ່າແຮ່ງຮຽນກໍແຮ່ງມ່ວນແລະຄຸ້ມຄ່າບໍ? ຫຼືເຈົ້າຮູ້ສຶກວ່າເຈົ້າອ່ານແລະສຶກສາຄົ້ນຄວ້າບໍ່ເກັ່ງ? ຖ້າເປັນແບບນັ້ນ ກໍບໍ່ແມ່ນເຈົ້າຄົນດຽວ ຫຼາຍຄົນກໍຮູ້ສຶກແບບນັ້ນຄືກັນ. ແຕ່ເຈົ້າບໍ່ຕ້ອງຢ້ານ ເພາະພະເຢໂຫວາຈະຊ່ວຍເຈົ້າ. ເພິ່ນເປັນຜູ້ສອນທີ່ດີແລະເກັ່ງ.
11. ພະເຢໂຫວາສະແດງໃຫ້ເຫັນແນວໃດວ່າເພິ່ນເປັນ “ຄູຜູ້ຍິ່ງໃຫຍ່”?
11 ພະເຢໂຫວາບອກວ່າ ເພິ່ນເປັນ “ຄູຜູ້ຍິ່ງໃຫຍ່.” (ອຊຢ. 30:20, 21) ເພິ່ນອົດທົນ ໃຈດີ ແລະເຂົ້າໃຈເຮົາ. ເພິ່ນເບິ່ງສິ່ງທີ່ດີທີ່ຢູ່ໃນໂຕເຮົາແລະບໍ່ໄດ້ຄາດໝາຍໃຫ້ເຮົາເຮັດສິ່ງທີ່ເຮົາເຮັດບໍ່ໄດ້. (ເພງ. 130:3) ຂໍໃຫ້ຈື່ໄວ້ວ່າພະເຢໂຫວາເປັນຜູ້ທີ່ອອກແບບສະໝອງຂອງເຮົາ ຈຶ່ງເປັນເລື່ອງທຳມະດາທີ່ເຮົາຢາກຮຽນຮູ້. (ເພງ. 139:14) ແລະພະເຢໂຫວາຢາກໃຫ້ເຮົາຮຽນຮູ້ຕໍ່ໆໄປ ແລະມ່ວນກັບການຮຽນຮູ້ນັ້ນ. ດັ່ງນັ້ນ ຈຶ່ງເປັນເລື່ອງທີ່ດີທີ່ເຮົາຈະ “ປູກຝັງຄວາມຮູ້ສຶກຢາກ” ຮຽນຮູ້ຄວາມຈິງໃນຄຳພີໄບເບິນຕັ້ງແຕ່ຕອນນີ້. (1ປຕ. 2:2) ເພື່ອຈະເຮັດແບບນັ້ນໄດ້ ເຈົ້າຕ້ອງຕັ້ງເປົ້າໝາຍທີ່ເຈົ້າເຮັດໄດ້ແລະຈັດຕາຕະລາງການອ່ານແລະສຶກສາຄຳພີໄບເບິນເປັນປະຈຳ. (ຢຊ. 1:8) ພະເຢໂຫວາຈະຊ່ວຍເຈົ້າໃຫ້ມ່ວນກັບການອ່ານແລະຮຽນຮູ້ກ່ຽວກັບເພິ່ນຫຼາຍຂຶ້ນເລື້ອຍໆ.
12. ເປັນຫຍັງຈຶ່ງເປັນເລື່ອງດີທີ່ເຮົາຈະໃຊ້ເວລາສຶກສາຄົ້ນຄວ້າກ່ຽວກັບຊີວິດຂອງພະເຢຊູແລະວຽກຮັບໃຊ້ຂອງເພິ່ນ?
12 ໃຫ້ເຈົ້າໃຊ້ເວລາຄິດຕຶກຕອງກ່ຽວກັບຊີວິດຂອງພະເຢຊູແລະວຽກຮັບໃຊ້ຂອງເພິ່ນເປັນປະຈຳ ແລະໃຫ້ຮຽນແບບພະເຢຊູໃຫ້ຫຼາຍເທົ່າທີ່ເປັນໄປໄດ້ເພື່ອເຈົ້າຈະສາມາດຮັບໃຊ້ພະເຢໂຫວາໄດ້ຢ່າງເຕັມທີ ໂດຍສະເພາະໃນເວລາທີ່ຫຍຸ້ງຍາກນີ້. (1ປຕ. 2:21) ພະເຢຊູບອກກັບພວກລູກສິດຂອງເພິ່ນກົງໆວ່າ ເຂົາເຈົ້າຈະເຈິກັບບັນຫາ. (ລກ. 14:27, 28) ແຕ່ເພິ່ນກໍເຊື່ອວ່າເຂົາເຈົ້າຈະສາມາດສັດຊື່ຕໍ່ພະເຈົ້າໄດ້ຄືກັບທີ່ເພິ່ນເຮັດ. (ຢຮ. 16:33) ດັ່ງນັ້ນ ໃຫ້ເຈົ້າສຶກສາຄົ້ນຄວ້າເລື່ອງຊີວິດຂອງພະເຢຊູຢ່າງລະອຽດແລະຕັ້ງເປົ້າໝາຍທີ່ຈະຮຽນແບບເພິ່ນທຸກມື້.
13. ເຮົາຄວນຂໍຫຍັງຈາກພະເຢໂຫວາຕໍ່ໆໄປ? ແລະຍ້ອນຫຍັງ?
13 ການມີຄວາມຮູ້ຢ່າງດຽວຍັງບໍ່ພໍ. ຄວາມຮູ້ຈະເປັນປະໂຫຍດກໍຕໍ່ເມື່ອມັນຊ່ວຍເຮົາໃຫ້ຢາກຮູ້ຈັກພະເຢໂຫວາຫຼາຍຂຶ້ນ ແລະຊ່ວຍເຮົາໃຫ້ພັດທະນາຄຸນລັກສະນະທີ່ດີເພີ່ມຂຶ້ນ ເຊັ່ນ: ໃຫ້ຮັກແລະມີຄວາມເຊື່ອໃນພະເຢໂຫວາຫຼາຍຂຶ້ນ. (1ກຣ. 8:1-3) ຕອນທີ່ເຈົ້າສຶກສາຄົ້ນຄວ້າ ໃຫ້ເຈົ້າຂໍພະເຢໂຫວາຊ່ວຍເຈົ້າໃຫ້ມີຄວາມເຊື່ອຫຼາຍຂຶ້ນຕໍ່ໆໄປ. (ລກ. 17:5) ເພິ່ນຈະເຕັມໃຈຕອບຄຳອະທິດຖານຂອງເຈົ້າແນ່ນອນ. ຄວາມເຊື່ອທີ່ມາຈາກຄວາມຮູ້ທີ່ຖືກຕ້ອງເລື່ອງພະເຈົ້າຈະຊ່ວຍເຈົ້າໃຫ້ເຮັດຕາມສິ່ງທີ່ໄດ້ຮຽນ.—ຢກບ. 2:26
ເຮັດຕາມສິ່ງທີ່ໄດ້ຮຽນຕໍ່ໆໄປ
ກ່ອນນ້ຳຈະຖ້ວມ ໂນອາແລະຄອບຄົວຂອງລາວໄດ້ລົງມືເຮັດຕາມສິ່ງທີ່ໄດ້ຮຽນ (ເບິ່ງຂໍ້ 14)
14. ອັກຄະສາວົກເປໂຕສະແດງໃຫ້ເຫັນແນວໃດວ່າເປັນເລື່ອງສຳຄັນທີ່ຈະເຮັດຕາມສິ່ງທີ່ເຮົາໄດ້ຮຽນ? (ເບິ່ງຮູບພາບ)
14 ອັກຄະສາວົກເປໂຕເນັ້ນວ່າເປັນເລື່ອງສຳຄັນທີ່ລູກສິດຂອງພະເຢຊູຕ້ອງເຮັດຕາມສິ່ງທີ່ໄດ້ຮຽນຕໍ່ໆໄປ. ລາວໄດ້ເວົ້າເຖິງເລື່ອງຂອງໂນອາ. ພະເຢໂຫວາບອກໂນອາວ່າເພິ່ນຈະເຮັດໃຫ້ນ້ຳຖ້ວມໂລກເພື່ອທຳລາຍຄົນຊົ່ວໃນສະໄໝຂອງລາວ. ພຽງແຕ່ໂນອາຮູ້ເລື່ອງນີ້ຍັງບໍ່ພໍທີ່ຈະຊ່ວຍລາວກັບຄອບຄົວໃຫ້ລອດຊີວິດໄດ້ ລາວຕ້ອງລົງມືເຮັດນຳ. ຄຳເວົ້າຂອງເປໂຕສະແດງໃຫ້ເຫັນວ່າມີການສ້າງເຮືອແທ້ ເພາະລາວເວົ້າເຖິງໄລຍະເວລານັ້ນວ່າ “ລະຫວ່າງທີ່ມີການສ້າງເຮືອ.” (1ປຕ. 3:20) ເຮົາເຫັນວ່າໂນອາກັບຄອບຄົວໄດ້ລົງມືເຮັດຕາມສິ່ງທີ່ໄດ້ຮຽນຮູ້ຈາກພະເຢໂຫວາໂດຍສ້າງເຮືອລຳໜຶ່ງ. (ຮຣ. 11:7) ແລ້ວເປໂຕກໍສົມທຽບສິ່ງທີ່ໂນອາເຮັດເປັນຄືກັບການຮັບບັບເຕມາ. ລາວບອກວ່າ “ເລື່ອງນີ້ທຽບໄດ້ກັບການຮັບບັບເຕມາ ຕອນນີ້ ການຮັບບັບເຕມາຊ່ວຍພວກເຈົ້າໃຫ້ລອດ.” (1ປຕ. 3:21) ເຮົາອາດສົມທຽບສິ່ງທີ່ເຮົາກຳລັງເຮັດເພື່ອກຽມຕົວຮັບບັບເຕມາເປັນຄືກັບການສ້າງເຮືອທີ່ໂນອາກັບຄອບຄົວເຮັດເປັນເວລາຫຼາຍປີ. ແລ້ວເຈົ້າຕ້ອງເຮັດຫຍັງເພື່ອຈະພ້ອມທີ່ຈະຮັບບັບເຕມາ?
15. ເຮົາຈະສະແດງໃຫ້ເຫັນແນວໃດວ່າເຮົາກັບໃຈແທ້ໆ?
15 ສິ່ງທຳອິດທີ່ເຈົ້າຕ້ອງເຮັດກໍຄື ກັບໃຈແທ້ໆ. (ກຈກ. 2:37, 38) ການກັບໃຈແທ້ໆຈະຊ່ວຍເຈົ້າປ່ຽນແປງຕົວເອງໄດ້. ເຈົ້າໄດ້ເຊົາເຮັດສິ່ງທີ່ພະເຢໂຫວາບໍ່ມັກແລ້ວບໍ ເຊັ່ນ: ການໃຊ້ຊີວິດແບບຜິດສິນລະທຳ ການໃຊ້ຢາສູບ ຫຼືເວົ້າຄຳຫຍາບຄາຍ? (1ກຣ. 6:9, 10; 2ກຣ. 7:1; ອຟຊ. 4:29) ຖ້າເຈົ້າຍັງປ່ຽນແປງຕົວເອງບໍ່ໄດ້ ກໍໃຫ້ພະຍາຍາມຕໍ່ໆໄປ. ໃຫ້ຂໍຄຳແນະນຳຈາກຜູ້ນຳການສຶກສາຫຼືຜູ້ດູແລໃນປະຊາຄົມ. ຖ້າເຈົ້າຍັງອາຍຸໜ້ອຍແລະຢູ່ກັບພໍ່ແມ່ ກໍຂໍໃຫ້ພໍ່ແມ່ຊ່ວຍເຈົ້າໃຫ້ເຊົານິດໄສທີ່ບໍ່ດີທີ່ເຮັດໃຫ້ເຈົ້າຮັບບັບເຕມາບໍ່ໄດ້.
16. ການເຮັດສິ່ງທີ່ເສີມຄວາມເຊື່ອຕ້ອງເຮັດຫຍັງແດ່?
16 ສິ່ງສຳຄັນອີກຢ່າງໜຶ່ງກໍຄືການຈັດເວລາເຮັດສິ່ງທີ່ເສີມຄວາມເຊື່ອ ເຊັ່ນ: ເຂົ້າຮ່ວມການປະຊຸມແລະມີສ່ວນຮ່ວມໃນການປະຊຸມ. (ຮຣ. 10:24, 25) ຖ້າເຈົ້າເປັນຜູ້ປະກາດແລ້ວ ເຈົ້າໄດ້ໄປປະກາດເປັນປະຈຳບໍ? ແຮ່ງເຈົ້າມີສ່ວນຮ່ວມໃນວຽກນີ້ຫຼາຍເທົ່າໃດ ເຈົ້າກໍແຮ່ງຈະມ່ວນ. (2ຕມ. 4:5) ຖ້າເຈົ້າຍັງອາຍຸໜ້ອຍແລະຢູ່ກັບພໍ່ແມ່ ໃຫ້ຖາມຕົວເອງວ່າ ‘ຂ້ອຍຍັງໃຫ້ພໍ່ແມ່ເຕືອນຂ້ອຍຢູ່ບໍເລື່ອງການເຂົ້າຮ່ວມປະຊຸມແລະການປະກາດ? ຫຼືຂ້ອຍຮູ້ສຶກຕື່ນຕົວທີ່ຈະເຮັດແບບນີ້ດ້ວຍຕົວເອງ?’ ຖ້າເຈົ້າເຮັດສິ່ງເຫຼົ່ານີ້ດ້ວຍຕົວເອງກໍສະແດງວ່າເຈົ້າມີຄວາມເຊື່ອ ຮັກ ແລະເຫັນຄ່າສິ່ງທີ່ພະເຢໂຫວາໃຫ້ເຈົ້າ ເຊິ່ງກໍຄືການເຮັດສິ່ງທີ່ສະແດງວ່າເຈົ້າ “ເຫຼື້ອມໃສພະເຈົ້າ.” (2ປຕ. 3:11; ຮຣ. 13:15) ການເຮັດແບບນີ້ເປັນຄືກັບການໃຫ້ຂອງຂວັນກັບພະເຢໂຫວາ. ຖ້າເຮົາໃຫ້ຂອງຂວັນກັບພະເຢໂຫວາຍ້ອນເຮົາຢາກໃຫ້ ບໍ່ແມ່ນຍ້ອນຖືກບັງຄັບ ພະເຢໂຫວາກໍຈະດີໃຈແລະເຮົາເອງກໍຈະມີຄວາມສຸກເມື່ອເຮົາໄດ້ໃຫ້ສິ່ງທີ່ດີທີ່ສຸດກັບພະເຢໂຫວາ.—ສົມທຽບກັບ 2 ໂກຣິນໂທ 9:7
ໃຫ້ມີຄວາມຮັກຕໍ່ພະເຢໂຫວາຫຼາຍຂຶ້ນເລື້ອຍໆ
17-18. ຄຸນລັກສະນະທີ່ສຳຄັນຫຍັງທີ່ຊ່ວຍເຈົ້າໃຫ້ກ້າວໜ້າເພື່ອກຽມຕົວທີ່ຈະຮັບບັບເຕມາ? ແລະຄຸນລັກສະນະນີ້ຊ່ວຍເຈົ້າແນວໃດ? (ສຸພາສິດ 3:3-6)
17 ເມື່ອເຈົ້າພະຍາຍາມກ້າວໜ້າຕໍ່ໆໄປເພື່ອກຽມທີ່ຈະຮັບບັບເຕມາ ເຈົ້າອາດເຈິບັນຫາຫຼາຍຢ່າງ ເຊັ່ນ: ບາງຄົນອາດເຍາະເຍີ້ຍທີ່ເຈົ້າຈະເຂົ້າມາເປັນພະຍານພະເຢໂຫວາ ແລະອາດເຖິງຂັ້ນຕໍ່ຕ້ານຫຼືຂົ່ມເຫງເຈົ້າ. (2ຕມ. 3:12) ຫຼືເຈົ້າພະຍາຍາມຖິ້ມນິດໄສທີ່ບໍ່ດີ ແຕ່ບາງເທື່ອກໍກັບໄປເຮັດແບບເກົ່າອີກ. ຫຼືເຈົ້າອາດຮູ້ສຶກທໍ້ໃຈທີ່ເຮັດຕາມເປົ້າໝາຍບໍ່ໄດ້. ແຕ່ສິ່ງໃດຈະຊ່ວຍເຈົ້າໃຫ້ອົດທົນຕໍ່ໆໄປ? ສິ່ງທີ່ຈະຊ່ວຍເຈົ້າກໍຄື ຄວາມຮັກທີ່ເຈົ້າມີຕໍ່ພະເຢໂຫວາ ເຊິ່ງເປັນຄຸນລັກສະນະທີ່ສຳຄັນຫຼາຍ.
18 ຄວາມຮັກທີ່ເຈົ້າມີຕໍ່ພະເຢໂຫວາເປັນສິ່ງທີ່ດີງາມ ແລະເປັນສິ່ງທີ່ດີທີ່ສຸດທີ່ເຈົ້າໃຫ້ເພິ່ນໄດ້. (ອ່ານສຸພາສິດ 3:3-6) ຖ້າເຈົ້າຮັກພະເຢໂຫວາແທ້ໆເຈົ້າຈະບໍ່ເຊົາຮັກເພິ່ນແລະບໍ່ເຊົາຮັບໃຊ້ເພິ່ນເຖິງວ່າຈະເຈິບັນຫາ. ຄຳພີໄບເບິນບອກເຮົາວ່າ ພະເຢໂຫວາມີຄວາມຮັກທີ່ໝັ້ນຄົງຕໍ່ຜູ້ທີ່ຮັບໃຊ້ເພິ່ນ ເຊິ່ງໝາຍຄວາມວ່າເພິ່ນຈະບໍ່ມີວັນເຊົາຮັກເຂົາເຈົ້າຫຼືປະຖິ້ມເຂົາເຈົ້າ. (ເພງ. 100:5) ເຈົ້າຖືກສ້າງໃຫ້ມີຄຸນລັກສະນະທີ່ຄ້າຍຄືກັບພະເຢໂຫວາ. (ປຖກ. 1:26) ແລ້ວເຈົ້າຈະສະແດງຄຸນລັກສະນະນີ້ແນວໃດ?
ເຈົ້າສາມາດສະແດງຄວາມຂອບໃຈຕໍ່ພະເຢໂຫວາທຸກໆມື້ (ເບິ່ງຂໍ້ 19) b
19. ເຈົ້າຈະສະແດງຄວາມຂອບໃຈພະເຢໂຫວາຫຼາຍຂຶ້ນສຳລັບສິ່ງທີ່ເພິ່ນເຮັດເພື່ອເຈົ້າໄດ້ແນວໃດ? (ຄາລາເຕຍ 2:20)
19 ເພື່ອຈະມີຄວາມຮັກທີ່ໝັ້ນຄົງ ຂໍໃຫ້ເຈົ້າເລີ່ມຕົ້ນໂດຍການຮູ້ຈັກຂອບໃຈພະເຢໂຫວາ. (1ທຊ. 5:18) ໃນແຕ່ລະມື້ໃຫ້ຖາມຕົວເອງວ່າ ‘ມື້ນີ້ພະເຢໂຫວາສະແດງຄວາມຮັກຕໍ່ຂ້ອຍແນວໃດ?’ ຈາກນັ້ນ ໃຫ້ຂອບໃຈສຳລັບສິ່ງທີ່ພະເຢໂຫວາເຮັດເພື່ອເຈົ້າໃນຄຳອະທິດຖານ. ໃຫ້ຄິດວ່າສິ່ງທີ່ເພິ່ນເຮັດເພື່ອເຈົ້າຍ້ອນເພິ່ນຮັກເຈົ້າເປັນສ່ວນຕົວ. ອັກຄະສາວົກໂປໂລກໍຮູ້ສຶກແບບນັ້ນ. (ອ່ານຄາລາເຕຍ 2:20) ແລະໃຫ້ຖາມຕົວເອງອີກວ່າ ‘ຂ້ອຍຢາກສະແດງໃຫ້ພະເຢໂຫວາເຫັນບໍວ່າຂ້ອຍຮັກເພິ່ນ?’ ຄວາມຮັກທີ່ມີຕໍ່ພະເຢໂຫວາຈະຊ່ວຍເຈົ້າໃຫ້ຕ້ານທານການລໍ້ໃຈແລະອົດທົນກັບບັນຫາ ແລະຍັງຊ່ວຍເຈົ້າໃຫ້ເຮັດສິ່ງທີ່ເສີມຄວາມເຊື່ອເປັນປະຈຳແລະສະແດງໃຫ້ເຫັນວ່າເຈົ້າຮັກພະເຢໂຫວາທຸກໆມື້.
20. ການອຸທິດຕົວໃຫ້ພະເຢໂຫວາກ່ຽວຂ້ອງກັບຫຍັງ? ແລະເປັນຫຍັງເລື່ອງນີ້ຈຶ່ງສຳຄັນ?
20 ໃນທີ່ສຸດ ຄວາມຮັກທີ່ເຈົ້າມີຕໍ່ພະເຢໂຫວາຈະກະຕຸ້ນເຈົ້າໃຫ້ອຸທິດຕົວໃຫ້ເພິ່ນໃນຄຳອະທິດຖານ. ຂໍໃຫ້ຈື່ໄວ້ວ່າເມື່ອເຈົ້າອຸທິດຕົວໃຫ້ພະເຢໂຫວາ ເຈົ້າກໍມີຄວາມຫວັງທີ່ດີຫຼາຍແທ້ໆ. ນັ້ນກໍຄືເຈົ້າຈະເປັນຂອງເພິ່ນຕະຫຼອດໄປ. ເມື່ອເຈົ້າອຸທິດຕົວໃຫ້ພະເຢໂຫວາແລ້ວ ເຈົ້າສັນຍາວ່າຈະຮັບໃຊ້ເພິ່ນຕະຫຼອດຊີວິດບໍ່ວ່າຈະຍາກຫຼືງ່າຍ. ແລະການອະທິດຖານອຸທິດຕົວກໍເຮັດພຽງແຕ່ຄັ້ງດຽວເທົ່ານັ້ນ. ທີ່ຈິງ ການອຸທິດຕົວໃຫ້ພະເຢໂຫວາເປັນການຕັດສິນໃຈທີ່ສຳຄັນຫຼາຍ. ຕະຫຼອດຊີວິດຂອງເຈົ້າ ເຈົ້າອາດຕັດສິນໃຈໄດ້ດີຫຼາຍເທື່ອ ແຕ່ບໍ່ມີການຕັດສິນໃຈໃດທີ່ຈະດີກວ່າການຕັດສິນໃຈອຸທິດຕົວໃຫ້ພະເຢໂຫວາ. (ເພງ. 50:14) ຊາຕານພະຍາຍາມເຮັດໃຫ້ຄວາມຮັກທີ່ເຈົ້າມີຕໍ່ພະເຈົ້າໜ້ອຍລົງ ຍ້ອນຢາກເຮັດໃຫ້ເຈົ້າບໍ່ສັດຊື່ຕໍ່ເພິ່ນ. ແຕ່ຢ່າຍອມໃຫ້ມັນເອົາຊະນະເຈົ້າໄດ້! (ໂຢບ 27:5) ຄວາມຮັກທີ່ເຈົ້າມີຕໍ່ພະເຢໂຫວາຈະຊ່ວຍເຈົ້າໃຫ້ໃຊ້ຊີວິດໃຫ້ສົມກັບການອຸທິດຕົວແລະໃກ້ຊິດພະເຈົ້າຫຼາຍຂຶ້ນເລື້ອຍໆ.
21. ເປັນຫຍັງເຮົາຈຶ່ງບອກວ່າການຮັບບັບເຕມາບໍ່ແມ່ນຈຸດສິ້ນສຸດ ແຕ່ເປັນຈຸດເລີ່ມຕົ້ນ?
21 ຫຼັງຈາກທີ່ເຈົ້າອຸທິດຕົວໃຫ້ພະເຢໂຫວາແລ້ວ ໃຫ້ເຈົ້າໄປບອກກັບຜູ້ດູແລໃນປະຊາຄົມວ່າເຈົ້າຢາກຮັບບັບເຕມາ. ແຕ່ຂໍໃຫ້ຈື່ໄວ້ວ່າການຮັບບັບເຕມາບໍ່ແມ່ນຈຸດສິ້ນສຸດ ແຕ່ເປັນຈຸດເລີ່ມຕົ້ນໃນການຮັບໃຊ້ພະເຢໂຫວາຕະຫຼອດໄປ. ດັ່ງນັ້ນ ເຈົ້າຕ້ອງຮັກພະເຢໂຫວາໃຫ້ຫຼາຍຂຶ້ນຕັ້ງແຕ່ຕອນນີ້. ຕັ້ງເປົ້າໝາຍທີ່ຈະຮັກເພິ່ນໃຫ້ຫຼາຍຂຶ້ນເລື້ອຍໆທຸກໆມື້. ເມື່ອເຮັດແບບນີ້ ເຈົ້າກໍພ້ອມທີ່ຈະຮັບບັບເຕມາ. ແລ້ວເມື່ອມື້ນັ້ນມາຮອດ ມັນກໍຈະເປັນມື້ທີ່ພິເສດຫຼາຍສຳລັບເຈົ້າ. ແຕ່ຂໍໃຫ້ຈື່ວ່າມັນເປັນພຽງຈຸດເລີ່ມຕົ້ນເທົ່ານັ້ນ. ຂໍໃຫ້ຄວາມຮັກທີ່ເຈົ້າມີຕໍ່ພະເຢໂຫວາແລະພະເຢຊູເພີ່ມຂຶ້ນເລື້ອຍໆ!
ເພງ 135 ພະເຢໂຫວາເຊີນຢ່າງອົບອຸ່ນວ່າ ລູກຂອງເຮົາຈົ່ງມີປັນຍາເຖີດ
a ເພື່ອຈະມີຄຸນສົມບັດທີ່ຈະຮັບບັບເຕມາ ເຮົາຕ້ອງມີແຮງກະຕຸ້ນທີ່ຖືກຕ້ອງ. ນອກຈາກນັ້ນ ເຮົາຍັງຕ້ອງລົງມືເຮັດສິ່ງທີ່ຖືກຕ້ອງນຳ. ໃຫ້ເຮົາມາເບິ່ງຕົວຢ່າງຂອງຂ້າລາຊະການຊາວເອທິໂອເປຍ ແລະເບິ່ງວ່ານັກສຶກສາຄຳພີໄບເບິນຕ້ອງເຮັດຫຍັງແດ່ເພື່ອຈະມີຄຸນສົມບັດທີ່ຈະຮັບບັບເຕມາ.
b ຄຳອະທິບາຍຮູບພາບ: ພີ່ນ້ອງຍິງໄດ້ອະທິດຖານບອກກັບພະເຢໂຫວາວ່າ ລາວຮູ້ສຶກຂອບໃຈຫຼາຍຂະໜາດໃດທີ່ເພິ່ນໄດ້ໃຫ້ສິ່ງຕ່າງໆກັບລາວ.
