ບົດຄວາມສຶກສາທີ 32
ໃຫ້ມີຄວາມເຊື່ອຫຼາຍຂຶ້ນວ່າພະເຈົ້າເປັນຜູ້ສ້າງ
“ຄວາມເຊື່ອ . . . ມີຫຼັກຖານຊັດເຈນວ່າສິ່ງທີ່ເບິ່ງບໍ່ເຫັນນັ້ນມີແທ້.”—ຮຣ. 11:1
ເພງ 11 ສິ່ງທີ່ສ້າງສັນລະເສີນພະເຈົ້າ
ໃຈຄວາມສຳຄັນ *
1. ເຈົ້າໄດ້ຮຽນຮູ້ຫຍັງກ່ຽວກັບພະເຈົ້າທີ່ເປັນຜູ້ສ້າງເຮົາ?
ຖ້າເຈົ້າເກີດຢູ່ໃນຄອບຄົວທີ່ເປັນພະຍານພະເຢໂຫວາ ເຈົ້າກໍຄືຊິໄດ້ຮຽນຮູ້ເລື່ອງຂອງພະເຢໂຫວາຕັ້ງແຕ່ຍັງນ້ອຍແລ້ວ. ເຈົ້າໄດ້ຮຽນຮູ້ວ່າພະເຢໂຫວາເປັນຜູ້ສ້າງທຸກສິ່ງ ເປັນພະເຈົ້າທີ່ມີຄຸນລັກສະນະທີ່ດີ ແລະຢາກໃຫ້ມະນຸດມີຊີວິດທີ່ມີຄວາມສຸກໃນໂລກທີ່ເປັນອຸທິຍານ.—ຕົ້ນ. 1:1; ກຈກ. 17:24-27
2. ບາງຄົນຄິດວ່າຜູ້ທີ່ເຊື່ອວ່າມີຜູ້ສ້າງເປັນຄົນແບບໃດ?
2 ຫຼາຍຄົນບໍ່ເຊື່ອວ່າພະເຈົ້າເປັນຜູ້ສ້າງທຸກສິ່ງ ແລະເຖິງຂັ້ນບໍ່ເຊື່ອວ່າມີຜູ້ສ້າງເລີຍ. ແຕ່ເຂົາເຈົ້າເຊື່ອວ່າສິ່ງທີ່ມີຊີວິດເກີດມາໂດຍບັງເອີນ ແລ້ວຄ່ອຍໆວິວັດທະນາການຈາກສິ່ງທີ່ງ່າຍໆກາຍເປັນສິ່ງທີ່ມີຊີວິດທີ່ສະຫຼັບຊັບຊ້ອນ. ຫຼາຍຄົນທີ່ເຊື່ອເລື່ອງແບບນີ້ກໍເປັນຄົນທີ່ມີລະດັບການສຶກສາດີ. ເຂົາເຈົ້າບອກວ່າ ນັກວິທະຍາສາດພິສູດແລ້ວວ່າຄຳພີໄບເບິນສອນບໍ່ຖືກ ແລະມີແຕ່ຄົນບໍ່ສະຫຼາດ ບໍ່ມີການສຶກສາ ຫຼືຄົນທີ່ອ່ອນແອເທົ່ານັ້ນທີ່ເຊື່ອວ່າມີຜູ້ສ້າງ.
3. ເປັນຫຍັງຈຶ່ງສຳຄັນທີ່ເຮົາຈະມີຄວາມເຊື່ອເປັນຂອງຕົວເອງ?
3 ຄວາມຄິດຂອງຄົນທີ່ມີຄວາມຮູ້ຈະເຮັດໃຫ້ເຮົາບໍ່ໝັ້ນໃຈວ່າພະເຢໂຫວາເປັນຜູ້ສ້າງບໍ? ນີ້ກໍຂຶ້ນກັບເຫດຜົນ ທີ່ເຮົາເຊື່ອວ່າພະເຢໂຫວາເປັນຜູ້ສ້າງ. ເຮົາເຊື່ອຍ້ອນມີຄົນບອກເຮົາບໍ ຫຼືເຮົາເຊື່ອຍ້ອນໄດ້ກວດເບິ່ງຫຼັກຖານດ້ວຍຕົວເອງ? (1 ກຣ. 3:12-15) ບໍ່ວ່າເຮົາຈະເປັນພະຍານພະເຢໂຫວາມາດົນປານໃດແລ້ວ ເຮົາກໍຕ້ອງເສີມຄວາມເຊື່ອຂອງຕົວເອງໃຫ້ເຂັ້ມແຂງຂຶ້ນຢູ່ເລື້ອຍໆ. ຖ້າເຮົາເຮັດແບບນີ້ ເຮົາກໍຈະບໍ່ຖືກຫຼອກດ້ວຍ “ປັດຊະຍາແລະຄຳຫຼອກລວງທີ່ບໍ່ມີປະໂຫຍດ” ຂອງຄົນທີ່ມັກຂັດກັບຄຳສອນໃນຄຳພີໄບເບິນ. (ກລຊ. 2:8; ຮຣ. 11:6) ເພື່ອຈະຊ່ວຍເຮົາໃຫ້ມີຄວາມເຊື່ອຫຼາຍຂຶ້ນ ໃນບົດນີ້ເຮົາຈະມາເບິ່ງວ່າ (1) ເປັນຫຍັງຫຼາຍຄົນຈຶ່ງບໍ່ເຊື່ອວ່າມີຜູ້ສ້າງ? (2) ເຮົາຕ້ອງເຮັດຫຍັງແດ່ເພື່ອຈະເຊື່ອວ່າພະເຢໂຫວາເປັນຜູ້ສ້າງ? ແລະ (3) ເຮົາຕ້ອງເຮັດຫຍັງແດ່ເພື່ອຈະຮັກສາຄວາມເຊື່ອຂອງເຮົາໃຫ້ເຂັ້ມແຂງຢູ່ເລື້ອຍໆ?
ເປັນຫຍັງຫຼາຍຄົນຈຶ່ງບໍ່ເຊື່ອວ່າມີຜູ້ສ້າງ?
4. ຕາມເຮັບເຣີ 11:1 ຄວາມເຊື່ອແມ່ນຫຍັງ?
4 ບາງຄົນຄິດວ່າຄວາມເຊື່ອເປັນການເຊື່ອແບບງົມງວາຍບໍ່ມີຫຼັກຖານ. ແຕ່ຄຳພີໄບເບິນບອກວ່າ ຖ້າບໍ່ມີຫຼັກຖານກໍບໍ່ແມ່ນຄວາມເຊື່ອ. (ອ່ານເຮັບເຣີ 11:1) ຄຳພີໄບເບິນບອກວ່າ ຄວາມເຊື່ອຕ້ອງມີຫຼັກຖານຊັດເຈນ ເຊັ່ນ: ເຖິງວ່າເຮົາຈະເບິ່ງພະເຢໂຫວາ ພະເຢຊູ ແລະການປົກຄອງຂອງເພິ່ນບໍ່ເຫັນ ແຕ່ເຮົາກໍມີຫຼັກຖານທີ່ເຮັດໃຫ້ໝັ້ນໃຈວ່າສິ່ງເຫຼົ່ານັ້ນມີຢູ່ແທ້. (ຮຣ. 11:3) ພະຍານພະເຢໂຫວາຄົນໜຶ່ງທີ່ເປັນນັກວິທະຍາສາດບອກວ່າ: “ຄວາມເຊື່ອຂອງເຮົາບໍ່ແມ່ນແບບຫຼັບຫູຫຼັບຕາເຊື່ອໂດຍບໍ່ສົນໃຈຄວາມເປັນຈິງທາງວິທະຍາສາດ.”
5. ເປັນຫຍັງຫຼາຍຄົນຈຶ່ງເຊື່ອວ່າສິ່ງທີ່ມີຊີວິດເກີດຂຶ້ນເອງ?
5 ເປັນຫຍັງຫຼາຍຄົນຈຶ່ງບໍ່ເຊື່ອວ່າພະເຈົ້າເປັນຜູ້ສ້າງທຸກສິ່ງທັງໆທີ່ເຫັນຫຼັກຖານຢູ່ແລ້ວ? ກໍຍ້ອນວ່າບາງຄົນບໍ່ເຄີຍກວດເບິ່ງຫຼັກຖານດ້ວຍຕົວເອງ. ໂຣເບີດທີ່ເປັນພະຍານພະເຢໂຫວາບອກວ່າ: “ຍ້ອນຢູ່ໂຮງຮຽນບໍ່ເຄີຍສອນວ່າພະເຈົ້າເປັນຜູ້ສ້າງທຸກສິ່ງ ຂ້ອຍກໍເລີຍບໍ່ເຄີຍຄິດວ່າຈະມີຜູ້ສ້າງ. ແຕ່ເມື່ອຂ້ອຍອາຍຸ 20 ປາຍປີ ຂ້ອຍກໍໄດ້ເຈິກັບພະຍານພະເຢໂຫວາແລະເຂົາເຈົ້າໄດ້ຫາເຫດຜົນທີ່ໜັກແໜ້ນຈາກຄຳພີໄບເບິນເພື່ອເຮັດໃຫ້ຂ້ອຍເຫັນວ່າພະເຈົ້າເປັນຜູ້ສ້າງທຸກສິ່ງ.” *—ເບິ່ງຂອບ “ ສິ່ງທີ່ພໍ່ແມ່ຄວນຄິດເຖິງ.”
6. ເປັນຫຍັງບາງຄົນຈຶ່ງບໍ່ເຊື່ອວ່າມີຜູ້ສ້າງ?
6 ບາງຄົນບໍ່ເຊື່ອວ່າມີຜູ້ສ້າງທຸກສິ່ງຍ້ອນເຂົາເຈົ້າເຊື່ອແຕ່ສິ່ງທີ່ຕາເຫັນເທົ່ານັ້ນ. ແຕ່ເຂົາເຈົ້າກໍຍັງເຊື່ອໃນສິ່ງທີ່ເບິ່ງບໍ່ເຫັນເຊິ່ງມີຢູ່ແທ້ ເຊັ່ນ: ແຮງດຶງດູດຂອງໂລກ. ຄຳພີໄບເບິນເວົ້າເຖິງຄວາມເຊື່ອແບບນີ້ແຫຼະທີ່ບອກວ່າ ຄວາມເຊື່ອຕ້ອງ “ມີຫຼັກຖານຊັດເຈນວ່າສິ່ງທີ່ເບິ່ງບໍ່ເຫັນນັ້ນມີແທ້.” (ຮຣ. 11:1) ມັນຕ້ອງໃຊ້ເວລາແລະຄວາມພະຍາຍາມຫຼາຍເພື່ອຈະຫາຫຼັກຖານດ້ວຍຕົວເອງ ແຕ່ວ່າຫຼາຍຄົນບໍ່ຢາກເຮັດແບບນັ້ນ. ຄົນທີ່ບໍ່ໄດ້ສຶກສາຄົ້ນຄວ້າຫາຫຼັກຖານດ້ວຍຕົວເອງກໍອາດຈະສະຫຼຸບເອົາເອງວ່າ ບໍ່ມີຜູ້ສ້າງ.
7. ທຸກຄົນທີ່ມີລະດັບການສຶກສາບໍ່ເຊື່ອວ່າພະເຈົ້າເປັນຜູ້ສ້າງເອກະພົບບໍ? ຂໍໃຫ້ອະທິບາຍ.
7 ຫຼັງຈາກທີ່ນັກວິທະຍາສາດບາງຄົນໄດ້ສຶກສາກ່ຽວກັບຫຼັກຖານທີ່ມີຢູ່ແລ້ວ ເຂົາເຈົ້າກໍໝັ້ນໃຈວ່າພະເຈົ້າເປັນຜູ້ສ້າງເອກະພົບ. * ບາງຄົນອາດຈະຮູ້ສຶກຄືກັບໂຣເບີດທີ່ເວົ້າເຖິງກ່ອນໜ້ານີ້ທີ່ຄິດວ່າບໍ່ມີຜູ້ສ້າງສິ່ງຕ່າງໆເພາະຢູ່ມະຫາວິທະຍາໄລກໍບໍ່ໄດ້ສອນເລື່ອງນີ້. ແຕ່ວ່ານັກວິທະຍາສາດຫຼາຍຄົນກໍໄດ້ເຂົ້າມາເຊື່ອວ່າພະເຢໂຫວາເປັນຜູ້ສ້າງ ແລະໃນທີ່ສຸດເຂົາເຈົ້າກໍຮັກເພິ່ນ. ດັ່ງນັ້ນ ບໍ່ວ່າເຮົາຈະມີລະດັບການສຶກສາສູງຫຼືບໍ່ກໍຕາມ ເຮົາທຸກຄົນກໍຕ້ອງພະຍາຍາມເຮັດໃຫ້ຕົວເອງໝັ້ນໃຈວ່າພະເຈົ້າເປັນຜູ້ສ້າງ ເພາະບໍ່ມີໃຜທີ່ຈະເຮັດແບບນີ້ແທນເຮົາໄດ້.
ເຮົາຕ້ອງເຮັດຫຍັງແດ່ເພື່ອຈະເຊື່ອວ່າພະເຈົ້າເປັນຜູ້ສ້າງ?
8-9. (ກ) ຕອນນີ້ເຮົາຈະຕອບຄຳຖາມຫຍັງ? (ຂ) ການສຶກສາສິ່ງທີ່ພະເຈົ້າສ້າງເປັນປະໂຫຍດຕໍ່ເຈົ້າແນວໃດ?
8 ເຮົາຕ້ອງເຮັດຫຍັງແດ່ເພື່ອເຮົາ ຈະເຊື່ອວ່າພະເຈົ້າເປັນຜູ້ສ້າງ? ໃຫ້ເຮົາມາເບິ່ງ 4 ຢ່າງ.
9ສຶກສາເບິ່ງສິ່ງທີ່ພະເຢໂຫວາສ້າງ. ເມື່ອເຮົາສັງເກດເບິ່ງສັດສາວາສິ່ງ ຕົ້ນໄມ້ໃບຫຍ້າ ແລະດວງດາວຕ່າງໆ ເຮົາກໍຈະເຊື່ອວ່າພະເຢໂຫວາເປັນຜູ້ສ້າງ. (ເພງ. 19:1; ເອຊາ. 40:26) ແຮ່ງເຮົາຮຽນຮູ້ ກ່ຽວກັບສິ່ງເຫຼົ່ານັ້ນຫຼາຍເທົ່າໃດ ເຮົາກໍແຮ່ງຈະໝັ້ນໃຈຫຼາຍຂຶ້ນວ່າພະເຢໂຫວາເປັນຜູ້ສ້າງທຸກສິ່ງ. ໃນປຶ້ມຕ່າງໆຂອງອົງການ ມີຫຼາຍບົດຄວາມທີ່ອະທິບາຍລາຍລະອຽດກ່ຽວກັບສິ່ງທີ່ພະເຢໂຫວາສ້າງ. ເຖິງວ່າເລື່ອງນັ້ນຈະເຂົ້າໃຈຍາກ ແຕ່ຂໍໃຫ້ພະຍາຍາມອ່ານແລະເຂົ້າໃຈໃຫ້ຫຼາຍທີ່ສຸດເທົ່າທີ່ເປັນໄປໄດ້. ແລະຢ່າລືມວ່າໃນເວັບໄຊ jw.org ມີວິດີໂອຫຼາຍເລື່ອງທີ່ມ່ວນໆທີ່ເວົ້າເຖິງສິ່ງທີ່ພະເຈົ້າສ້າງເຊິ່ງເຮົາໄດ້ເບິ່ງມາແລ້ວໃນການປະຊຸມພາກຫວ່າງບໍ່ດົນມານີ້.
10. ຂໍໃຫ້ຍົກຕົວຢ່າງທີ່ສະແດງວ່າຕ້ອງມີຜູ້ສ້າງ. (ໂຣມ 1:20)
10 ເມື່ອເຮົາສຶກສາສິ່ງທີ່ພະເຈົ້າສ້າງ ໃຫ້ເຮົາພະຍາຍາມສັງເກດເບິ່ງວ່າສິ່ງເຫຼົ່ານັ້ນສອນໃຫ້ເຮົາຮູ້ຫຍັງກ່ຽວກັບຜູ້ສ້າງ. (ອ່ານໂຣມ 1:20) ຕົວຢ່າງເຊັ່ນ: ເຮົາຮູ້ວ່າດວງຕາເວັນບໍ່ພຽງແຕ່ໃຫ້ແສງສະຫວ່າງແລະຄວາມຮ້ອນທີ່ຈຳເປັນຕໍ່ສິ່ງທີ່ມີຊີວິດຢູ່ໃນໂລກ ແຕ່ມັນຍັງສົ່ງລັງສີທີ່ເປັນອັນຕະລາຍເຊັ່ນ ແສງຢູວີ (UV). ມະນຸດເຮົາຕ້ອງໄດ້ຮັບການປົກປ້ອງຈາກແສງທີ່ອັນຕະລາຍເຫຼົ່ານີ້. ແຕ່ໜ້າສົນໃຈທີ່ພວກເຮົາໄດ້ຮັບການປົກປ້ອງແລ້ວ. ໄດ້ຮັບການປົກປ້ອງແນວໃດ? ໜ່ວຍໂລກຂອງເຮົາມີຊັ້ນໂອໂຊນທີ່ເປັນຄືເກາະປ້ອງກັນໂລກຈາກແສງອັນຕະລາຍ. ເມື່ອແສງຢູວີ (UV) ມີຫຼາຍຂຶ້ນ ຊັ້ນໂອໂຊນກໍຈະໜາຂຶ້ນແລະປ້ອງກັນໄດ້ຫຼາຍຂຶ້ນ. ຕອນນີ້ເຈົ້າເຫັນດີນຳບໍວ່າ ຕ້ອງມີໃຜຜູ້ໜຶ່ງຕັ້ງໃຈໃຫ້ມີລະບົບແບບນີ້ແລະຜູ້ນັ້ນກໍຕ້ອງເປັນຜູ້ສ້າງທີ່ສະຫຼາດແລະເປັນຫ່ວງເຮົາແທ້ໆ?
11. ເຈົ້າຈະຊອກຫາຂໍ້ມູນໄດ້ຈາກໃສເຊິ່ງຈະຊ່ວຍເຈົ້າໃຫ້ເຊື່ອຫຼາຍຂຶ້ນວ່າມີຜູ້ສ້າງ? (ເບິ່ງຂອບ “ ຂໍ້ມູນທີ່ຊ່ວຍໃຫ້ເຊື່ອວ່າມີຜູ້ສ້າງ”)
11 ເຈົ້າສາມາດຊອກຫາຂໍ້ມູນຫຼາຍຢ່າງທີ່ຊ່ວຍໃຫ້ເຈົ້າມີຄວາມເຊື່ອຫຼາຍຂຶ້ນວ່າມີຜູ້ສ້າງໂດຍຄົ້ນຄວ້າໃນດັດຊະນີສັບພະໜັງສືຂອງວັອດສ໌ທາວເວີ (ພາສາອັງກິດ) ແລະໃນເວັບໄຊ jw.org ຫຼືເຈົ້າອາດຈະເບິ່ງວິດີໂອແລະບົດຄວາມຕ່າງໆທີ່ຊື່ວ່າ “ມີຜູ້ອອກແບບບໍ?” (ພາສາໄທ). ບົດຄວາມເຫຼົ່ານັ້ນຈະອະທິບາຍແບບສັ້ນກະທັດຮັດ ແລະສິ່ງທີ່ໜ້າສົນໃຈກ່ຽວກັບສັດແລະສິ່ງອື່ນໆທີ່ຢູ່ໃນທຳມະຊາດ ແລະຍັງອະທິບາຍວິທີທີ່ນັກວິທະຍາສາດພະຍາຍາມຮຽນແບບສິ່ງທີ່ຢູ່ໃນທຳມະຊາດ.
12. ຕອນທີ່ສຶກສາຄຳພີໄບເບິນ ເຮົາຄວນຈະໃສ່ໃຈເລື່ອງຫຍັງເປັນພິເສດ?
12ສຶກສາຄຳພີໄບເບິນ. ຕອນທຳອິດນັກວິທະຍາສາດທີ່ເວົ້າເຖິງກ່ອນໜ້ານີ້ບໍ່ໄດ້ເຊື່ອວ່າມີຜູ້ສ້າງ ແຕ່ວ່າຕໍ່ມາລາວກໍເຊື່ອວ່າມີຜູ້ສ້າງ. ລາວບອກວ່າ: “ສິ່ງທີ່ຊ່ວຍໃຫ້ຂ້ອຍເຊື່ອບໍ່ແມ່ນຍ້ອນຂ້ອຍຮຽນຈາກວິທະຍາສາດເທົ່ານັ້ນ ແຕ່ຍ້ອນຂ້ອຍຮຽນຄຳພີໄບເບິນນຳ.” ເຖິງວ່າເຮົາອາດຈະມີຄວາມຮູ້ໃນຄຳພີໄບເບິນດີຢູ່ແລ້ວ ແຕ່ເພື່ອຈະມີຄວາມເຊື່ອໃນຜູ້ສ້າງຫຼາຍຂຶ້ນເຮົາກໍຕ້ອງສຶກສາຄຳພີໄບເບິນຕໍ່ໆໄປ. (ຢຊວຍ. 1:8; ເພງ. 119:97) ຕອນທີ່ສຶກສາຄຳພີໄບເບິນ ໃຫ້ໃສ່ໃຈລາຍລະອຽດເລື່ອງປະຫວັດສາດ. ນອກຈາກນັ້ນ ໃຫ້ເບິ່ງວ່າຄຳພະຍາກອນຕ່າງໆທີ່ບອກໄວ້ລ່ວງໜ້າເກີດຂຶ້ນແທ້ແນວໃດ ແລະສັງເກດເບິ່ງວ່າເນື້ອໃນຕັ້ງແຕ່ຕົ້ນຈົນຈົບທີ່ຢູ່ໃນຄຳພີໄບເບິນສອດຄ່ອງກັນແນວໃດ. ເມື່ອເຮັດແບບນີ້ ເຮົາກໍຈະມີຄວາມເຊື່ອຫຼາຍຂຶ້ນວ່າຜູ້ທີ່ສ້າງເຮົາເປັນຜູ້ທີ່ສະຫຼາດແລະຮັກເຮົາ ແລະເປັນຜູ້ທີ່ດົນໃຈໃຫ້ຂຽນຄຳພີໄບເບິນຂຶ້ນມາ. *—2 ຕມ. 3:14; 2 ປຕ. 1:21
13. ມີຄຳແນະນຳເລື່ອງຫຍັງທີ່ສະແດງວ່າຄຳພີໄບເບິນໃຊ້ໄດ້ແທ້ໆ?
13 ຕອນທີ່ສຶກສາຄຳພີໄບເບິນ ຂໍໃຫ້ຄິດເບິ່ງວ່າຄຳແນະນຳໃນຫັ້ນເປັນປະໂຫຍດແນວໃດ ເຊັ່ນ: ຄຳພີໄບເບິນບອກລ່ວງໜ້າໄວ້ຫຼາຍປີແລ້ວວ່າ ການຮັກເງິນຄຳເປັນອັນຕະລາຍແລະເຮັດໃຫ້ “ເຈັບປວດໃຈຫຼາຍຢ່າງ.” (1 ຕມ. 6:9, 10; ສຸພາ. 28:20; ມທ. 6:24) ຄຳແນະນຳນີ້ໃຊ້ກັບທຸກມື້ນີ້ໄດ້ບໍ? ປຶ້ມທີ່ເວົ້າເຖິງຄວາມຄິດຂອງຄົນສະໄໝນີ້ບອກວ່າ: “ໂດຍທົ່ວໄປແລ້ວ ຄົນທີ່ນິຍົມວັດຖຸມັກຈະມີອາການໂສກເສົ້າ ແລະບໍ່ຄ່ອຍມີຄວາມສຸກ. ແລະຄົນທີ່ຢາກມີເງິນຄຳຫຼາຍໆກໍມັກຈະມີບັນຫາສຸຂະພາບທາງຈິດໃຈແລະທາງຮ່າງກາຍ.” ດັ່ງນັ້ນ ຄຳແນະນຳໃນຄຳພີໄບເບິນທີ່ບອກເຮົາບໍ່ໃຫ້ຮັກເງິນຈຶ່ງໃຊ້ໄດ້ຫຼາຍແທ້ໆ! ເຈົ້າໄດ້ຄິດເຖິງຄຳແນະນຳອື່ນໆທີ່ຢູ່ໃນຄຳພີໄບເບິນທີ່ເປັນປະໂຫຍດຕໍ່ຊີວິດເຈົ້າບໍ? ຖ້າເຮົາຄິດເຖິງຄຳແນະນຳດີໆເຫຼົ່ານັ້ນ ເຮົາກໍຈະເຫັນວ່າຜູ້ທີ່ສ້າງເຮົາຮູ້ວ່າສິ່ງໃດດີທີ່ສຸດສຳລັບເຮົາ ແລະເຮົາເອງກໍຢາກຈະເຮັດຕາມຄຳແນະນຳຂອງເພິ່ນ. (ຢກບ. 1:5) ນີ້ຈະເຮັດໃຫ້ເຮົາມີຊີວິດທີ່ມີຄວາມສຸກຫຼາຍຂຶ້ນ.—ເອຊາ. 48:17, 18
14. ການສຶກສາຄຳພີໄບເບິນສອນເຮົາໃຫ້ຮູ້ຫຍັງເລື່ອງພະເຢໂຫວາ?
14ຂໍໃຫ້ສຶກສາຄຳພີໄບເບິນໂດຍມີເປົ້າໝາຍທີ່ຈະຮູ້ຈັກພະເຢໂຫວາຫຼາຍຂຶ້ນ. (ຢຮ. 17:3) ຕອນທີ່ສຶກສາຄຳພີໄບເບິນ ເຈົ້າຈະເຫັນນິດໄສໃຈຄໍແລະຄຸນລັກສະນະທີ່ດີຂອງພະເຢໂຫວາ ເຊິ່ງຄຸນລັກສະນະເຫຼົ່ານີ້ຍັງໄດ້ສະແດງອອກໃນສິ່ງທີ່ເພິ່ນສ້າງນຳ. ຄຸນລັກສະນະເຫຼົ່ານີ້ຈະຊ່ວຍເຮົາໃຫ້ໝັ້ນໃຈວ່າ ພະເຢໂຫວາມີຕົວຕົນແທ້ໆ ເພິ່ນບໍ່ໄດ້ເປັນພຽງຕົວລະຄອນທີ່ຢູ່ໃນຄວາມຄິດຂອງຄົນຜູ້ໜຶ່ງເທົ່ານັ້ນ. (ອົບ. 34:6, 7; ເພງ. 145:8, 9) ເມື່ອເຮົາຮູ້ຈັກພະເຢໂຫວາດີຂຶ້ນ ເຮົາກໍຈະມີຄວາມເຊື່ອໃນເພິ່ນເພີ່ມຂຶ້ນ ຮັກເພິ່ນຫຼາຍຂຶ້ນ ແລະໃກ້ຊິດກັບເພິ່ນຫຼາຍກວ່າເກົ່າ.
15. ການເວົ້າເລື່ອງພະເຈົ້າກັບຄົນອື່ນຈະຊ່ວຍເຈົ້າແນວໃດ?
15ໃຫ້ບອກຄົນອື່ນວ່າເຈົ້າເຊື່ອແນວໃດເລື່ອງພະເຈົ້າ. ເມື່ອເຮັດແບບນີ້ ເຈົ້າກໍຈະມີຄວາມເຊື່ອທີ່ເຂັ້ມແຂງຫຼາຍກວ່າເກົ່າ. ແລ້ວເຈົ້າຈະເຮັດແນວໃດຖ້າເຈົ້າບໍ່ຮູ້ຕອບບາງຄົນທີ່ຖາມເຈົ້າວ່າພະເຈົ້າມີຢູ່ແທ້ບໍ? ໃຫ້ພະຍາຍາມຊອກຫາຄຳຕອບທີ່ຢູ່ໃນປຶ້ມຕ່າງໆຂອງອົງການ ແລະໃຫ້ເຂົາເຈົ້າເບິ່ງຂໍ້ມູນນັ້ນ. (1 ປຕ. 3:15) ແລະເຈົ້າຍັງສາມາດຂໍຄວາມຊ່ວຍເຫຼືອຈາກພີ່ນ້ອງທີ່ມີປະສົບການນຳ. ບໍ່ວ່າຄົນທີ່ຖາມເຈົ້າຈະຍອມຮັບຄຳຕອບຈາກຄຳພີໄບເບິນຫຼືບໍ່ ແຕ່ເຈົ້າກໍຈະໄດ້ຮັບປະໂຫຍດຈາກການຄົ້ນຄວ້າເລື່ອງນີ້. ເຈົ້າຈະມີຄວາມເຊື່ອທີ່ເຂັ້ມແຂງຫຼາຍຂຶ້ນ ແລະເຈົ້າກໍຈະບໍ່ຫຼົງເຊື່ອຄຳເວົ້າຂອງຄົນທີ່ມີຄວາມຮູ້ທີ່ບອກວ່າບໍ່ມີຜູ້ສ້າງ.
ຮັກສາຄວາມເຊື່ອໃຫ້ເຂັ້ມແຂງຢູ່ສະເໝີ
16. ຖ້າເຮົາບໍ່ໄດ້ເຮັດໃຫ້ຄວາມເຊື່ອເຂັ້ມແຂງຢູ່ສະເໝີ ຜົນຈະເປັນແນວໃດ?
16 ບໍ່ວ່າເຮົາຈະຮັບໃຊ້ພະເຢໂຫວາມາດົນປານໃດແລ້ວ ແຕ່ເຮົາກໍຕ້ອງຮັກສາຄວາມເຊື່ອໃຫ້ເຂັ້ມແຂງຢູ່ສະເໝີ. ຍ້ອນຫຍັງ? ກໍຍ້ອນວ່າຖ້າເຮົາບໍ່ລະວັງ ຄວາມເຊື່ອຂອງເຮົາກໍຈະອ່ອນລົງໄດ້. ຂໍໃຫ້ຈື່ໄວ້ວ່າ ຄວາມເຊື່ອກ່ຽວຂ້ອງກັບສິ່ງທີ່ເບິ່ງບໍ່ເຫັນ ແລະສິ່ງທີ່ເຮົາເບິ່ງບໍ່ເຫັນ ເຮົາກໍອາດຈະລືມໄດ້ງ່າຍໆ. ດັ່ງນັ້ນ ໂປໂລຈຶ່ງບອກວ່າ ການຂາດຄວາມເຊື່ອເປັນ “ບາບທີ່ຮັດຕົວພວກເຮົາໄດ້ງ່າຍ.” (ຮຣ. 12:1) ແລ້ວເຮົາຈະຮັກສາຄວາມເຊື່ອໃຫ້ເຂັ້ມແຂງຢູ່ສະເໝີໄດ້ແນວໃດ?—2 ທຊ. 1:3
17. ເຮົາຕ້ອງເຮັດຫຍັງເພື່ອຈະມີຄວາມເຊື່ອທີ່ເຂັ້ມແຂງຢູ່ສະເໝີ?
17 ໜຶ່ງໃຫ້ອະທິດຖານຂໍພະລັງບໍລິສຸດຈາກພະເຢໂຫວາເລື້ອຍໆ. ຍ້ອນຫຍັງ? ກໍຍ້ອນວ່າຄວາມເຊື່ອເປັນຄຸນລັກສະນະໜຶ່ງທີ່ເກີດຈາກພະລັງບໍລິສຸດຂອງພະເຈົ້າ. (ຄລຕ. 5:22, 23) ຖ້າພະລັງບໍລິສຸດຂອງພະເຈົ້າບໍ່ຊ່ວຍ ເຮົາກໍບໍ່ສາມາດມີຄວາມເຊື່ອແລະຮັກສາຄວາມເຊື່ອໃຫ້ເຂັ້ມແຂງໄດ້. ຖ້າເຮົາຂໍພະລັງບໍລິສຸດຈາກພະເຢໂຫວາເລື້ອຍໆ ເພິ່ນກໍຈະໃຫ້ເຮົາ. (ລກ. 11:13) ເຮົາຍັງສາມາດອະທິດຖານເຖິງພະເຢໂຫວາວ່າ: “ຂໍຊ່ວຍພວກເຮົາໃຫ້ມີຄວາມເຊື່ອຫຼາຍຂຶ້ນແດ່.”—ລກ. 17:5
18. ຕາມຄຳເພງ 1:2, 3 ເຮົາມີຂອງຂວັນຫຍັງ?
18 ສອງໃຫ້ອ່ານຄຳພີໄບເບິນເປັນປະຈຳ. (ອ່ານຄຳເພງ 1:2, 3) ຕອນທີ່ຂຽນຄຳເພງແລ້ວໆ ບໍ່ແມ່ນຄົນອິດສະຣາເອນທຸກຄົນຈະມີກົດໝາຍຂອງພະເຈົ້າ ມີແຕ່ກະສັດແລະປະໂລຫິດເທົ່ານັ້ນທີ່ມີກົດໝາຍຂອງພະເຈົ້າ ແລະທຸກໆ 7 ປີເຂົາເຈົ້າຈະອ່ານກົດໝາຍນີ້ໃຫ້ທຸກຄົນຟັງບໍ່ວ່າຈະເປັນ “ຊາຍຍິງກັບເດັກນ້ອຍ” ແລະຄົນຕ່າງຊາດທີ່ຢູ່ໃນແຜ່ນດິນຂອງເຂົາເຈົ້າ. (ບັນຍັດ. 31:10-12) ໃນສະໄໝພະເຢຊູ ມີບໍ່ເທົ່າໃດຄົນທີ່ມີມ້ວນໜັງສືພະຄຳພີ ແລະສ່ວນໃຫຍ່ມ້ວນໜັງສືກໍຈະເກັບໄວ້ໃນບ່ອນປະຊຸມຂອງຊາວຢິວ. ແຕ່ໃນທຸກມື້ນີ້ຫຼາຍຄົນສາມາດອ່ານຄຳພີໄບເບິນໄດ້ໃນບາງສ່ວນ ແລະອ່ານໄດ້ແບບຄົບຊຸດ. ນີ້ເປັນຂອງຂວັນທີ່ມີຄ່າຫຼາຍແທ້ໆ! ແລ້ວເຮົາຈະສະແດງໃຫ້ເຫັນແນວໃດວ່າເຮົາເຫັນຄ່າຂອງຂວັນນີ້?
19. ເຮົາຕ້ອງເຮັດຫຍັງເພື່ອຈະມີຄວາມເຊື່ອທີ່ເຂັ້ມແຂງຢູ່ສະເໝີ?
19 ເຮົາສະແດງໃຫ້ເຫັນວ່າເຮົາຮູ້ຄຸນຄ່າທີ່ມີຄຳພີໄບເບິນໂດຍອ່ານຄຳພີໄບເບິນເປັນປະຈຳ. ເຮົາຕ້ອງຈັດຕາຕະລາງທີ່ຈະອ່ານແລະສຶກສາຄຳພີໄບເບິນດີໆ ບໍ່ແມ່ນຈະອ່ານແຕ່ຕອນທີ່ວ່າງເທົ່ານັ້ນ. ຖ້າເຮົາອ່ານຄຳພີໄບເບິນເປັນປະຈຳ ເຮົາກໍຈະມີຄວາມເຊື່ອທີ່ເຂັ້ມແຂງຢູ່ສະເໝີ.
20. ເຮົາຄວນຕັ້ງໃຈທີ່ຈະເຮັດຫຍັງ?
20 ເຮົາບໍ່ເປັນຄືກັບ ‘ຄົນທີ່ມີຄວາມຮູ້ແລະຄົນສະຫຼາດ’ ຂອງໂລກນີ້ເພາະເຮົາມີຄວາມເຊື່ອທີ່ເຂັ້ມແຂງມາຈາກຄຳພີໄບເບິນ. (ມທ. 11:25, 26) ເມື່ອເຮົາສຶກສາຄຳພີໄບເບິນ ເຮົາກໍໄດ້ຮູ້ວ່າເປັນຫຍັງໂລກນີ້ຈຶ່ງເສື່ອມລົງເລື້ອຍໆ ແລະພະເຢໂຫວາຈະແກ້ໄຂບັນຫານີ້ແນວໃດ. ດັ່ງນັ້ນ ໃຫ້ເຮົາຕັ້ງໃຈເຮັດສິ່ງທີ່ເສີມຄວາມເຊື່ອ ແລະຊ່ວຍຫຼາຍຄົນເທົ່າທີ່ເປັນໄປໄດ້ໃຫ້ມາຮູ້ຈັກພະເຢໂຫວາຜູ້ທີ່ສ້າງທຸກສິ່ງ. (1 ຕມ. 2:3, 4) ແລະຂໍໃຫ້ເຮົາຕັ້ງໃຈລໍຖ້າເວລາທີ່ທຸກຄົນໃນໂລກນີ້ຈະສັນລະເສີນພະເຢໂຫວາ ຄືກັບຄຳເວົ້າທີ່ຢູ່ໃນພະນິມິດ 4:11 ທີ່ບອກວ່າ: “ພະເຢໂຫວາພະເຈົ້າຂອງພວກເຮົາ ພະອົງສົມຄວນໄດ້ຮັບການຍົກຍ້ອງສັນລະເສີນ . . . ເພາະພະອົງໄດ້ສ້າງທຸກສິ່ງ.”
ເພງ 2 ຊື່ຂອງພະອົງຄືເຢໂຫວາ
^ ຂໍ້ 5 ຄຳພີໄບເບິນບອກຢ່າງຈະແຈ້ງວ່າພະເຢໂຫວາເປັນຜູ້ສ້າງ ແຕ່ຫຼາຍຄົນບໍ່ໄດ້ເຊື່ອແບບນັ້ນ. ເຂົາເຈົ້າເຊື່ອວ່າທຸກສິ່ງທຸກຢ່າງເກີດຂຶ້ນມາເອງ. ແຕ່ສິ່ງທີ່ເຂົາເຈົ້າເວົ້າຈະບໍ່ເຮັດໃຫ້ຄວາມເຊື່ອຂອງເຮົາອ່ອນລົງ ຖ້າເຮົາເຮັດໃຫ້ຄວາມເຊື່ອໃນພະເຈົ້າເຂັ້ມແຂງແລະເຊື່ອໃນສິ່ງທີ່ຄຳພີໄບເບິນສອນ. ໃນບົດນີ້ເຮົາຈະມາເບິ່ງວ່າ ເຮົາຕ້ອງເຮັດຫຍັງແດ່ເພື່ອຈະມີຄວາມເຊື່ອທີ່ເຂັ້ມແຂງຫຼາຍຂຶ້ນ.
^ ຂໍ້ 5 ໂຮງຮຽນຫຼາຍບ່ອນບໍ່ໄດ້ສອນວ່າພະເຈົ້າເປັນຜູ້ສ້າງທຸກສິ່ງ ເພາະເຂົາເຈົ້າຮູ້ສຶກວ່າຖ້າສອນເລື່ອງແບບນີ້ຈະເປັນການບັງຄັບນັກຮຽນໃຫ້ເຊື່ອເລື່ອງພະເຈົ້າ.
^ ຂໍ້ 7 ເຮົາອາດເບິ່ງຄວາມຄິດເຫັນຂອງຜູ້ຊ່ຽວຊານຫຼາຍຄົນເຊິ່ງລວມເຖິງຜູ້ທີ່ເປັນນັກວິທະຍາສາດທີ່ເຊື່ອວ່າມີຜູ້ສ້າງໃນຄູ່ມືຄົ້ນຄວ້າສຳລັບພະຍານພະເຢໂຫວາ (ພາສາໄທ) ຫົວຂໍ້ “ວິທະຍາສາດແລະເຕັກໂນໂລຊີ” ຫົວຂໍ້ຍ່ອຍ “‘ການສຳພາດ’ (ບົດຄວາມຊຸດໃນຕື່ນເຖີດ!).” ນອກຈາກນັ້ນ ເຮົາຍັງສາມາດເບິ່ງໃນດັດຊະນີສັບພະໜັງສືຂອງວັອດສ໌ທາວເວີ (ພາສາອັງກິດ) ຫົວຂໍ້ “Science” ເລື່ອງ “scientists expressing belief in creation.”
^ ຂໍ້ 12 ໃຫ້ເບິ່ງບົດຄວາມທີ່ຊື່ວ່າ “ວິທະຍາສາດກັບຄຳພີໄບເບິນສອດຄ່ອງກັນບໍ?” ໃນຕື່ນເຖີດ! ກຸມພາ 2011 ແລະບົດຄວາມທີ່ຊື່ວ່າ “ສິ່ງທີ່ພະເຢໂຫວາບອກລ່ວງໜ້າສຳເລັດເປັນຈິງ” ໃນຫໍສັງເກດການ ມັງກອນ 2008 (ພາສາໄທ)
