ບົດຄວາມສຶກສາທີ 33
ພະເຢໂຫວາເບິ່ງແຍງປະຊາຊົນຂອງເພິ່ນ
“ພະເຢໂຫວາເຝົ້າເບິ່ງຄົນທີ່ນັບຖືເພິ່ນ.”—ເພງ. 33:18, ລ.ມ.
ເພງ 4 “ພະເຢໂຫວາເປັນຜູ້ລ້ຽງຂ້ອຍ”
ໃຈຄວາມສຳຄັນ a
1. ເປັນຫຍັງພະເຢຊູຈຶ່ງຂໍໃຫ້ພະເຢໂຫວາປົກປ້ອງພວກລູກສິດຂອງເພິ່ນ?
ໃນຄືນກ່ອນທີ່ພະເຢຊູຈະຕາຍ ເພິ່ນໄດ້ອະທິດຖານຂໍໃຫ້ພະເຢໂຫວາປົກປ້ອງພວກລູກສິດຂອງເພິ່ນ. (ຢຮ. 17:15, 20) ທີ່ຈິງ ພະເຢໂຫວາພ້ອມທີ່ຈະເບິ່ງແຍງແລະປົກປ້ອງປະຊາຊົນຂອງເພິ່ນຢູ່ແລ້ວ. ແຕ່ພະເຢຊູຮູ້ວ່າລູກສິດຂອງເພິ່ນຈະຖືກຊາຕານໂຈມຕີຢ່າງໜັກ. ດັ່ງນັ້ນ ເຂົາເຈົ້າຈຳເປັນຕ້ອງໄດ້ຮັບການຊ່ວຍເຫຼືອຈາກພະເຢໂຫວາເພື່ອຈະຮັບມືກັບການໂຈມຕີຂອງຊາຕານໄດ້.
2. ຕາມຄຳເພງ 33:18-20 ເມື່ອເຮົາເຈິບັນຫາ ເປັນຫຍັງເຮົາບໍ່ຕ້ອງຢ້ານ?
2 ຍ້ອນຊາຕານປົກຄອງໂລກນີ້ ເຮົາຈຶ່ງເຈິບັນຫາຫຼາຍຢ່າງ. ບັນຫາເຫຼົ່ານີ້ເຮັດໃຫ້ເຮົາຮູ້ສຶກທໍ້ໃຈແລະຍາກທີ່ຈະສັດຊື່ຕໍ່ພະເຢໂຫວາ. ແຕ່ໃນບົດຄວາມນີ້ເຮົາຈະເຫັນວ່າເຮົາບໍ່ຕ້ອງຢ້ານບັນຫາເຫຼົ່ານັ້ນ ເພາະພະເຢໂຫວາເບິ່ງແຍງເຮົາ ເຫັນບັນຫາທີ່ເຮົາເຈິ ແລະພ້ອມທີ່ຈະຊ່ວຍເຫຼືອເຮົາ. ໃຫ້ເຮົາມາເບິ່ງຕົວຢ່າງຂອງສອງຄົນທີ່ຢູ່ໃນຄຳພີໄບເບິນເຊິ່ງສະແດງໃຫ້ເຫັນວ່າ “ພະເຢໂຫວາເຝົ້າເບິ່ງຄົນທີ່ຢ້ານຢຳພະອົງ” ແນວໃດ.—ອ່ານຄຳເພງ 33:18-20, ລ.ມ. b
ເມື່ອເຮົາຮູ້ສຶກໂດດດ່ຽວ
3. ເຮົາອາດຈະຮູ້ສຶກໂດດດ່ຽວຕອນໃດແດ່?
3 ເຖິງວ່າເຮົາຈະຢູ່ໃນຄອບຄົວຂອງພະເຢໂຫວາທີ່ມີພີ່ນ້ອງຕະຫຼອດທົ່ວໂລກ ແຕ່ບາງເທື່ອເຮົາອາດຮູ້ສຶກໂດດດ່ຽວ. ຕົວຢ່າງເຊັ່ນ: ໄວລຸ້ນອາດຮູ້ສຶກໂດດດ່ຽວຕອນທີ່ອະທິບາຍຄວາມເຊື່ອໃຫ້ໝູ່ຢູ່ໂຮງຮຽນຟັງ ຫຼືຕອນທີ່ຍ້າຍໄປປະຊາຄົມໃໝ່. ພວກເຮົາບາງຄົນອາດຮູ້ສຶກເສົ້າແລະຄິດໃນແງ່ລົບ ແລະຄິດວ່າເຮົາສາມາດຈັດການກັບຄວາມຮູ້ສຶກນີ້ໄດ້ດ້ວຍຕົວເອງ. ເຮົາອາດບໍ່ກ້າເວົ້າໃຫ້ໃຜຟັງຍ້ອນຄິດວ່າບໍ່ມີໃຜເຂົ້າໃຈ ແລະບາງເທື່ອກໍຄິດວ່າບໍ່ມີໃຜສົນໃຈເຮົາແທ້ໆດອກ. ບໍ່ວ່າເຮົາຈະຮູ້ສຶກໂດດດ່ຽວຍ້ອນບັນຫາໃດກໍຕາມ ຄວາມຮູ້ສຶກນັ້ນກໍເຮັດໃຫ້ເຮົາອຸກໃຈແລະບໍ່ມີຄວາມຫວັງ. ແຕ່ພະເຢໂຫວາບໍ່ຢາກໃຫ້ເຮົາຮູ້ສຶກແບບນັ້ນ. ເຮົາຮູ້ໄດ້ແນວໃດ?
4. ເປັນຫຍັງຜູ້ພະຍາກອນເອລີຢາຈຶ່ງເວົ້າວ່າ “ຕອນນີ້ເຫຼືອແຕ່ລູກຄົນດຽວ”?
4 ໃຫ້ເຮົາມາເບິ່ງຕົວຢ່າງຂອງຜູ້ຮັບໃຊ້ທີ່ສັດຊື່ຄົນໜຶ່ງທີ່ຊື່ເອລີຢາ. ຍ້ອນເຢເຊເບນສາບານວ່າຈະຂ້າລາວ ລາວຈຶ່ງໄດ້ແລ່ນໜີຫຼາຍກວ່າ 40 ມື້ເພື່ອເອົາຊີວິດລອດ. (1ກສ. 19:1-9) ໃນທີ່ສຸດ ລາວກໍໄປລີ້ຢູ່ຖ້ຳຄົນດຽວ. ລາວເວົ້າກັບພະເຢໂຫວາວ່າ “ຕອນນີ້ [ຜູ້ພະຍາກອນ] ເຫຼືອແຕ່ລູກຄົນດຽວ.” (1ກສ. 19:10, ລ.ມ.) ແຕ່ທີ່ຈິງຍັງມີຜູ້ພະຍາກອນຄົນອື່ນໆທີ່ຢູ່ໃນອິດສະຣາເອນ ຍ້ອນໂອບາດີຢາໄດ້ຊ່ວຍຜູ້ພະຍາກອນຂອງພະເຢໂຫວາ 100 ຄົນໃຫ້ລອດຈາກເຢເຊເບນ. (1ກສ. 18:7, 13) ແລ້ວເປັນຫຍັງເອລີຢາຈຶ່ງຮູ້ສຶກໂດດດ່ຽວ? ລາວຄິດວ່າຜູ້ພະຍາກອນຄົນອື່ນໆທີ່ໂອບາດີຢາໄດ້ຊ່ວຍໄວ້ຕາຍໝົດແລ້ວບໍ? ຫຼືລາວອາດຮູ້ສຶກໂດດດ່ຽວຍ້ອນບໍ່ມີໃຜມາຢູ່ຝ່າຍພະເຢໂຫວາກັບລາວຕອນທີ່ທົດສອບວ່າໃຜເປັນພະເຈົ້າອົງທ່ຽງແທ້ຢູ່ທີ່ພູກາເມນ? ຫຼືລາວອາດຮູ້ສຶກໂດດດ່ຽວຍ້ອນຄິດວ່າບໍ່ມີໃຜຮູ້ວ່າລາວຕ້ອງເຈິອັນຕະລາຍຫຼາຍສ່ຳໃດ ຫຼືລາວອາດຄິດວ່າບໍ່ມີໃຜສົນໃຈລາວເລີຍ. ຄຳພີໄບເບິນບໍ່ໄດ້ອະທິບາຍຄວາມຮູ້ສຶກທັງໝົດຂອງເອລີຢາ ແຕ່ເຮົາໝັ້ນໃຈວ່າພະເຢໂຫວາເຂົ້າໃຈເຫດຜົນທີ່ເອລີຢາຮູ້ສຶກໂດດດ່ຽວແລະເພິ່ນຮູ້ວ່າຈະຊ່ວຍລາວແນວໃດ.
ເມື່ອເຮົາຮູ້ສຶກໂດດດ່ຽວ ເຮົາຈະໄດ້ຮັບກຳລັງໃຈຈາກວິທີທີ່ພະເຢໂຫວາຊ່ວຍເອລີຢາແນວໃດ? (ເບິ່ງຂໍ້ 5-6)
5. ພະເຢໂຫວາໄດ້ເຮັດໃຫ້ເອລີຢາໝັ້ນໃຈແນວໃດວ່າ ລາວບໍ່ໄດ້ຢູ່ຄົນດຽວ?
5 ພະເຢໂຫວາໄດ້ຊ່ວຍເອລີຢາໃນຫຼາຍວິທີ. ເພິ່ນໄດ້ຊວນເອລີຢາລົມໂດຍຖາມລາວຕັ້ງສອງເທື່ອວ່າ “ເອລີຢາ ເຈົ້າມາເຮັດຫຍັງຢູ່ນີ້?” (1ກສ. 19:9, 13, ລ.ມ.) ແລະທຸກເທື່ອທີ່ເອລີຢາລະບາຍຄວາມຮູ້ສຶກກັບເພິ່ນ ເພິ່ນກໍໄດ້ຕັ້ງໃຈຟັງລາວແລະຕອບລາວໂດຍເຮັດໃຫ້ລາວເຫັນວ່າເພິ່ນຢູ່ກັບລາວແລະເພິ່ນມີລິດອຳນາດຫຼາຍ. ນອກຈາກນັ້ນ ພະເຢໂຫວາຍັງໄດ້ເຮັດໃຫ້ເອລີຢາໝັ້ນໃຈວ່າຍັງມີຜູ້ຮັບໃຊ້ເພິ່ນອີກຫຼາຍຄົນຢູ່ໃນອິດສະຣາເອນ. (1ກສ. 19:11, 12, 18) ເອລີຢາຄືຊິຮູ້ສຶກໂລ່ງໃຈຫຼາຍແທ້ໆເມື່ອໄດ້ລະບາຍຄວາມຮູ້ສຶກກັບພະເຢໂຫວາແລະເຫັນວິທີທີ່ເພິ່ນຕອບລາວ. ພະເຢໂຫວາຍັງໄດ້ໃຫ້ວຽກມອບໝາຍທີ່ສຳຄັນກັບເອລີຢາໂດຍໃຫ້ລາວແຕ່ງຕັ້ງຮາຊາເອນເປັນກະສັດຊີເຣຍ ແຕ່ງຕັ້ງເຢຮູເປັນກະສັດອິດສະຣາເອນ ແລະແຕ່ງຕັ້ງເອລີຊາເປັນຜູ້ພະຍາກອນ. (1ກສ. 19:15, 16) ພະເຢໂຫວາໄດ້ຊ່ວຍເອລີຢາໃຫ້ຄິດເຖິງສິ່ງດີໆໂດຍທາງວຽກມອບໝາຍເຫຼົ່ານີ້. ນອກຈາກນັ້ນ ພະເຢໂຫວາຍັງໃຫ້ເອລີຊາມາເປັນໝູ່ສະໜິດກັບລາວ. ແລ້ວເຈົ້າເດ ເຈົ້າຈະໄດ້ຮັບຄວາມຊ່ວຍເຫຼືອຈາກພະເຢໂຫວາແນວໃດເມື່ອຮູ້ສຶກໂດດດ່ຽວ?
6. ເຮົາຈະອະທິດຖານເລື່ອງຫຍັງແດ່ເມື່ອເຮົາຮູ້ສຶກໂດດດ່ຽວ? (ຄຳເພງ 62:8)
6 ພະເຢໂຫວາເຊີນເຮົາໃຫ້ອະທິດຖານເຖິງເພິ່ນ. ເພິ່ນຮູ້ວ່າເຮົາເຈິບັນຫາຫຍັງມາແດ່. ເພິ່ນຢາກຟັງຄຳອະທິດຖານຂອງເຮົາ ແລະບໍ່ວ່າເຮົາຈະອະທິດຖານຫາເພິ່ນຕອນໃດ ເພິ່ນກໍພ້ອມທີ່ຈະຟັງ. (ສຸພາ. 15:8; 1 ທຊ. 5:17) ແລ້ວເຮົາຈະອະທິດຖານເລື່ອງຫຍັງແດ່ເມື່ອຮູ້ສຶກໂດດດ່ຽວ? ເຮົາສາມາດເຮັດຄືກັບເອລີຢາໂດຍລະບາຍຄວາມຮູ້ສຶກກັບພະເຢໂຫວາ. (ອ່ານຄຳເພງ 62:8) ບອກເພິ່ນໃຫ້ຮູ້ວ່າເຮົາກັງວົນເລື່ອງຫຍັງ ຮູ້ສຶກແນວໃດ ແລະຂໍເພິ່ນໃຫ້ຊ່ວຍເຮົາຮັບມືກັບບັນຫານັ້ນໄດ້. ຕົວຢ່າງເຊັ່ນ: ຖ້າເຮົາຮູ້ສຶກໂດດດ່ຽວແລະຢ້ານຕອນທີ່ໝູ່ຖາມເລື່ອງຄວາມເຊື່ອ ໃຫ້ຂໍພະເຢໂຫວາຊ່ວຍເຮົາໃຫ້ກ້າເວົ້າເລື່ອງຄວາມເຊື່ອນຳໝູ່ ແລະຂໍເພິ່ນຊ່ວຍເຮົາໃຫ້ຮູ້ວິທີອະທິບາຍເລື່ອງຄວາມເຊື່ອນຳໝູ່ຢ່າງໜັກແໜ້ນແຕ່ກໍເຮັດແບບອ່ອນໂຍນ. (ລກ. 21:14, 15) ແລະຖ້າເຮົາຮູ້ສຶກທໍ້ໃຈຫຼືຄິດໃນແງ່ລົບ ໃຫ້ຂໍພະເຢໂຫວາຊ່ວຍເຮົາໃຫ້ກ້າລົມກັບພີ່ນ້ອງທີ່ມີປະສົບການແລະພີ່ນ້ອງທີ່ເຂົ້າໃຈເຮົາ. ໃຫ້ລະບາຍຄວາມຮູ້ສຶກກັບພະເຢໂຫວາ ສັງເກດວ່າເພິ່ນຕອບຄຳອະທິດຖານຂອງເຮົາແນວໃດ ແລະຍອມຮັບການຊ່ວຍເຫຼືອຈາກຄົນອື່ນ. ເມື່ອເຮັດແບບນີ້ ເຮົາກໍຈະຮູ້ສຶກດີຂຶ້ນ.
ເຈົ້າໄດ້ຫາວິທີທີ່ຈະປະກາດຫຼາຍຂຶ້ນແລະລົມກັບຄົນອື່ນບໍ? (ເບິ່ງຂໍ້ 7)
7. ເຮົາໄດ້ບົດຮຽນຫຍັງຈາກປະສົບການຂອງມໍຣິຊີໂອ?
7 ພະເຢໂຫວາໃຫ້ເຮົາມີວຽກທີ່ດີຫຼາຍຢ່າງ. ເຮົາໝັ້ນໃຈວ່າເພິ່ນສັງເກດເຫັນແລະເຫັນຄ່າວຽກທຸກຢ່າງທີ່ເຮົາເຮັດ ບໍ່ວ່າຈະເປັນວຽກປະກາດຫຼືວຽກໃນປະຊາຄົມ. (ເພງ. 110:3) ແລ້ວການເຮັດວຽກມອບໝາຍເຫຼົ່ານີ້ຊ່ວຍເຮົາແນວໃດເມື່ອຮູ້ສຶກໂດດດ່ຽວ? ຂໍໃຫ້ເຮົາມາເບິ່ງປະສົບການຂອງພີ່ນ້ອງຊາຍຄົນໜຶ່ງທີ່ຊື່ມໍຣິຊີໂອ. c ບໍ່ດົນຫຼັງຈາກທີ່ມໍຣິຊີໂອຮັບບັບເຕມາ ໝູ່ສະໜິດຂອງລາວກໍອອກຈາກຄວາມຈິງ. ລາວບອກວ່າ: “ເມື່ອໝູ່ຖິ້ມພະເຢໂຫວາ ຂ້ອຍເລີ່ມບໍ່ໝັ້ນໃຈໃນຕົວເອງແລະຢ້ານວ່າຈະເຮັດຕາມທີ່ສັນຍາກັບພະເຢໂຫວາບໍ່ໄດ້ແລະອອກໄປຈາກຄອບຄົວຂອງເພິ່ນ. ຂ້ອຍຮູ້ສຶກໂດດດ່ຽວຫຼາຍແລະຄິດວ່າບໍ່ມີໃຜເຂົ້າໃຈຄວາມຮູ້ສຶກຂອງຂ້ອຍເລີຍ.” ແລ້ວສິ່ງໃດຊ່ວຍມໍຣິຊີໂອໄດ້? ລາວບອກວ່າ “ຂ້ອຍພະຍາຍາມເຮັດວຽກປະກາດໃຫ້ຫຼາຍຂຶ້ນ. ນີ້ຊ່ວຍຂ້ອຍບໍ່ໃຫ້ຄິດເຖິງແຕ່ຕົວເອງແລະບໍ່ຄິດໃນແງ່ລົບ. ຂ້ອຍມີຄວາມສຸກຫຼາຍຕອນທີ່ເຮັດວຽກປະກາດກັບພີ່ນ້ອງ.” ເຖິງວ່າເຮົາຈະບໍ່ສາມາດໄປປະກາດກັບພີ່ນ້ອງແບບເຫັນໜ້າກັນແທ້ໆ ແຕ່ເຮົາກໍໄດ້ຮັບກຳລັງໃຈທີ່ໄດ້ປະກາດກັບພີ່ນ້ອງທາງໂທລະສັບແລະຂຽນຈົດໝາຍ. ມີສິ່ງໃດອີກທີ່ຊ່ວຍມໍຣິຊີໂອ? ລາວບອກວ່າ: “ຂ້ອຍຍັງໄດ້ເຮັດຫຼາຍຢ່າງໃນປະຊາຄົມ. ຂ້ອຍຕັ້ງໃຈທີ່ຈະກຽມການປະຊຸມແລະສ່ວນມອບໝາຍຕ່າງໆທີ່ໄດ້ຮັບເປັນຢ່າງດີ. ການເຮັດແບບນີ້ຊ່ວຍຂ້ອຍໃຫ້ຮູ້ສຶກວ່າພະເຢໂຫວາແລະພີ່ນ້ອງເຫັນຄ່າສິ່ງທີ່ຂ້ອຍເຮັດ.”
ເມື່ອເຮົາຮູ້ສຶກທໍ້ໃຈກັບບັນຫາຫຼາຍຢ່າງ
8. ເຮົາຮູ້ສຶກແນວໃດເມື່ອເຈິບັນຫາຫຼາຍຢ່າງ?
8 ເຮົາຄາດໝາຍໄດ້ວ່າເຮົາຈະເຈິບັນຫາຫຼາຍຢ່າງໃນສະໄໝສຸດທ້າຍ. (2 ຕມ. 3:1) ແຕ່ເຮົາອາດຈະຕົກໃຈເມື່ອເຈິບັນຫາທີ່ບໍ່ຄາດຄິດຫຼືເມື່ອບັນຫາເຫຼົ່ານັ້ນມາຕອນທີ່ເຮົາບໍ່ໄດ້ຕັ້ງໂຕເຊັ່ນ: ເຮົາອາດຈະມີບັນຫາເລື່ອງເງິນ ບັນຫາສຸຂະພາບ ຫຼືຄົນທີ່ເຮົາຮັກຕາຍຈາກໄປ. ເມື່ອເຈິບັນຫາແບບນີ້ເຮົາອາດຈະຮູ້ສຶກທໍ້ໃຈ ແລະຖ້າເຮົາມີບັນຫາຫຼາຍຢ່າງພ້ອມໆກັນ ເຮົາກໍແຮ່ງຈະຮູ້ສຶກໜັກໃຈຫຼາຍກວ່ານີ້. ແຕ່ຂໍໃຫ້ຈື່ໄວ້ວ່າພະເຢໂຫວາເຫັນບັນຫາທຸກຢ່າງທີ່ເຮົາເຈິ ແລະເພິ່ນກໍຈະຊ່ວຍເຮົາໃຫ້ຜ່ານບັນຫາເຫຼົ່ານັ້ນໄປໄດ້.
9. ຂໍໃຫ້ເລົ່າວ່າໂຢບເຈິບັນຫາຫຍັງແດ່.
9 ໃຫ້ເຮົາຄິດເຖິງເລື່ອງຂອງໂຢບຜູ້ທີ່ສັດຊື່ຕໍ່ພະເຢໂຫວາ. ລາວເຈິບັນຫາຫຼາຍຢ່າງພ້ອມໆກັນ. ພາຍໃນມື້ດຽວຝູງສັດຂອງລາວຖືກລັກໄປໝົດ ຜູ້ຮັບໃຊ້ກໍຖືກຂ້າ ແລະລູກທຸກຄົນກໍຕາຍ. (ໂຢບ 1:13-19) ໂຢບເສຍໃຈກັບເລື່ອງເຫຼົ່ານີ້ຫຼາຍຢູ່ແລ້ວ ແຕ່ບໍ່ດົນຫຼັງຈາກນັ້ນລາວກໍພັດມາເປັນພະຍາດຮ້າຍແຮງທີ່ເຮັດໃຫ້ເຈັບປວດຫຼາຍ. (ໂຢບ 2:7) ເມື່ອໂຢບເຈິບັນຫາທີ່ໜັກໜ່ວງແບບນີ້ ລາວກໍເລີຍເວົ້າວ່າ: “ລູກຊັງຊີວິດຂອງລູກ. ລູກບໍ່ຢາກຢູ່ຕໍ່ໄປແລ້ວ.”—ໂຢບ 7:16, ລ.ມ.
ພະເຢໂຫວາບອກໂຢບໃຫ້ຮູ້ວ່າເພິ່ນເບິ່ງແຍງສິ່ງຕ່າງໆທີ່ເພິ່ນສ້າງແນວໃດເພື່ອໂຢບຈະໝັ້ນໃຈວ່າພະເຢໂຫວາຮັກລາວແລະຈະເບິ່ງແຍງລາວ (ເບິ່ງຂໍ້ 10)
10. ພະເຢໂຫວາຊ່ວຍໂຢບໃຫ້ອົດທົນກັບບັນຫາແນວໃດ? (ເບິ່ງຮູບໜ້າປົກ)
10 ພະເຢໂຫວາເບິ່ງແຍງໂຢບ. ຍ້ອນພະເຢໂຫວາຮັກໂຢບ ເພິ່ນຈຶ່ງຊ່ວຍໂຢບໃຫ້ອົດທົນກັບບັນຫາແລະສັດຊື່ຕໍ່ເພິ່ນໄດ້. ພະເຢໂຫວາໄດ້ເວົ້າກັບໂຢບແລະເຕືອນລາວໃຫ້ນຶກເຖິງສິ່ງທີ່ເພິ່ນສ້າງ ເຊິ່ງສະແດງເຖິງຄວາມຮັກແລະສະຕິປັນຍາຂອງເພິ່ນ. ເພິ່ນໄດ້ເວົ້າເຖິງສັດຫຼາຍຊະນິດທີ່ເປັນຕາງຶດແລະໜ້າປະທັບໃຈ. (ໂຢບ 38:1, 2; 39:9, 13, 19, 27; 40:15; 41:1, 2) ເພິ່ນຍັງໄດ້ໃຊ້ເອລີຮູມາໃຫ້ກຳລັງໃຈໂຢບ ແລະເຮັດໃຫ້ໂຢບໝັ້ນໃຈວ່າເພິ່ນຈະໃຫ້ລາງວັນກັບຜູ້ທີ່ອົດທົນ. ແຕ່ພະເຢໂຫວາຍັງໃຊ້ເອລີຮູມາໃຫ້ຄຳແນະນຳໂຢບໂດຍຊ່ວຍໂຢບໃຫ້ຄິດເຖິງພາບລວມເລື່ອງຄວາມຍິ່ງໃຫຍ່ຂອງເພິ່ນ ນີ້ຊ່ວຍໃຫ້ໂຢບບໍ່ ຄິດເຖິງຕົວເອງຫຼາຍເກີນໄປ. (ໂຢບ 37:14) ນອກຈາກນັ້ນ ພະເຢໂຫວາຍັງມອບໝາຍວຽກບາງຢ່າງໃຫ້ໂຢບໂດຍໃຫ້ລາວອະທິດຖານເພື່ອໝູ່ສາມຄົນທີ່ເຮັດຜິດ. (ໂຢບ 42:8-10) ແລ້ວໃນທຸກມື້ນີ້ ພະເຢໂຫວາຊ່ວຍເຮົາແນວໃດເມື່ອມີບັນຫາ?
11. ຄຳພີໄບເບິນຊ່ວຍເຮົາແນວໃດເມື່ອມີບັນຫາ?
11 ເຖິງວ່າພະເຢໂຫວາບໍ່ໄດ້ເວົ້າກັບເຮົາໂດຍກົງຄືກັບທີ່ເວົ້າກັບໂຢບ ແຕ່ເພິ່ນກໍເວົ້າກັບເຮົາໂດຍທາງຄຳພີໄບເບິນ. (ໂຣມ 15:4) ເພິ່ນໃຫ້ກຳລັງໃຈເຮົາໂດຍໃຫ້ເຮົາມີຄວາມຫວັງທີ່ດີເລີດໃນອະນາຄົດ. ໃຫ້ເຮົາມາເບິ່ງຂໍ້ຄຳພີບາງຂໍ້ທີ່ໃຫ້ກຳລັງໃຈເມື່ອເຮົາເຈິບັນຫາ. ພະເຢໂຫວາບອກເຮົາຜ່ານທາງຄຳພີໄບເບິນວ່າ ຈະບໍ່ມີສິ່ງໃດເຊິ່ງລວມເຖິງບັນຫາທີ່ໜັກໜ່ວງມາ “ຂັດຂວາງຄວາມຮັກທີ່ພະເຈົ້າສະແດງຕໍ່ພວກເຮົາ.” (ຣມ. 8:38, 39) ແລະເພິ່ນຍັງເຮັດໃຫ້ເຮົາໝັ້ນໃຈວ່າເພິ່ນ “ຢູ່ໃກ້ທຸກຄົນທີ່ຮ້ອງຫາເພິ່ນ.” (ເພງ. 145:18, ລ.ມ.) ນອກຈາກນັ້ນ ເພິ່ນຍັງບອກວ່າຖ້າເຮົາໝາຍເພິ່ງເພິ່ນ ເຮົາຈະສາມາດອົດທົນກັບບັນຫາຕ່າງໆແລະມີຄວາມສຸກໄດ້ເຖິງຈະຍັງມີບັນຫາຢູ່. (1 ກຣ. 10:13; ຢກບ. 1:2, 12) ຄຳພີໄບເບິນບອກເຮົາວ່າ ຄວາມທຸກທີ່ເຮົາເຈິຈະມີຢູ່ຊົ່ວຄາວແລະຢູ່ບໍ່ດົນເມື່ອທຽບກັບລາງວັນທີ່ພະເຈົ້າໃຫ້ເຮົາເຊິ່ງກໍຄືຊີວິດຕະຫຼອດໄປ. (2 ກຣ. 4:16-18) ພະເຢໂຫວາໃຫ້ຄວາມຫວັງກັບເຮົາວ່າ ເພິ່ນຈະກຳຈັດຕົ້ນເຫດຂອງບັນຫາທັງໝົດເຊິ່ງກໍຄືຊາຕານແລະພັກພວກຂອງມັນ. (ເພງ. 37:10) ແລ້ວເຈົ້າເດ ເຈົ້າຈື່ບໍວ່າມີຂໍ້ຄຳພີໃດທີ່ໃຫ້ກຳລັງໃຈເຈົ້າເມື່ອມີບັນຫາ?
12. ພະເຢໂຫວາຢາກໃຫ້ເຮົາເຮັດຫຍັງເພື່ອເຮົາຈະໄດ້ຮັບປະໂຫຍດຈາກຄຳພີໄບເບິນ?
12 ພະເຢໂຫວາຢາກໃຫ້ເຮົາຈັດເວລາສຶກສາຄຳພີໄບເບິນເປັນປະຈຳແລະຄິດຕຶກຕອງສິ່ງທີ່ເຮົາອ່ານ. ເມື່ອເຮົາເຮັດຕາມສິ່ງທີ່ໄດ້ຮຽນ ຄວາມເຊື່ອຂອງເຮົາກໍຈະເຂັ້ມແຂງແລະເຮົາກໍຈະໃກ້ຊິດກັບພະເຢໂຫວາຫຼາຍຂຶ້ນ. ເມື່ອເປັນແບບນີ້ເຮົາກໍຈະອົດທົນກັບບັນຫາໄດ້. ນອກຈາກນັ້ນ ພະເຢໂຫວາຍັງໃຫ້ພະລັງບໍລິສຸດກັບຜູ້ທີ່ເຮັດຕາມສິ່ງທີ່ຂຽນໄວ້ໃນຄຳພີໄບເບິນ ແລະພະລັງນີ້ກໍຈະຊ່ວຍເຮົາໃຫ້ມີ “ກຳລັງທີ່ຫຼາຍກວ່າປົກກະຕິ” ເພື່ອອົດທົນກັບບັນຫາຕ່າງໆໄດ້.—2 ກຣ. 4:7-10
13. ຄວາມຮູ້ທີ່ເສີມຄວາມເຊື່ອເຊິ່ງ “ທາດທີ່ສັດຊື່ແລະສຸຂຸມ” ຈັດໃຫ້ຊ່ວຍເຮົາໃຫ້ອົດທົນກັບບັນຫາໄດ້ແນວໃດ?
13 ພະເຢໂຫວາໃຊ້ “ທາດທີ່ສັດຊື່ແລະສຸຂຸມ” ເພື່ອຈັດໃຫ້ມີວິດີໂອ ເພງ ແລະບົດຄວາມຕ່າງໆເພື່ອຊ່ວຍເຮົາໃຫ້ມີຄວາມເຊື່ອເຂັ້ມແຂງແລະໃກ້ຊິດກັບເພິ່ນ. (ມທ. 24:45) ເພື່ອເຮົາຈະໄດ້ຮັບປະໂຫຍດ ເຮົາຄວນຈະໃຊ້ເວລາກັບສິ່ງເຫຼົ່ານີ້. ຫວ່າງບໍ່ດົນມານີ້ ພີ່ນ້ອງຍິງຄົນໜຶ່ງທີ່ຢູ່ສະຫະລັດອາເມຣິກາໄດ້ເຫັນຄ່າຄວາມຮູ້ແລະສິ່ງຕ່າງໆທີ່ເສີມຄວາມເຊື່ອ. ລາວບອກວ່າ: “ໃນໄລຍະ 40 ປີທີ່ຂ້ອຍຮັບໃຊ້ພະເຢໂຫວາ ຂ້ອຍມີບັນຫາຫຼາຍຢ່າງທີ່ເຮັດໃຫ້ຍາກທີ່ຈະສັດຊື່ຕໍ່ເພິ່ນ.” ພີ່ນ້ອງຍິງຄົນນີ້ເຈິບັນຫາຫຼາຍຢ່າງເຊັ່ນ: ພໍ່ເຖົ້າຂອງລາວຕາຍຍ້ອນຄົນເມົາເຫຼົ້າຂີ່ລົດຕຳ. ສ່ວນພໍ່ແມ່ກໍຕາຍຍ້ອນເປັນພະຍາດຮ້າຍແຮງ ແລະລາວເອງກໍເປັນມະເຮັງຕັ້ງສອງເທື່ອ. ແລ້ວສິ່ງໃດຊ່ວຍລາວໃຫ້ອົດທົນໄດ້? ລາວບອກວ່າ: “ພະເຢໂຫວາເບິ່ງແຍງຂ້ອຍສະເໝີ. ເພິ່ນຈັດໃຫ້ຂ້ອຍມີຄວາມຮູ້ແລະສິ່ງຕ່າງໆທີ່ເສີມຄວາມເຊື່ອໂດຍທາງທາດທີ່ສັດຊື່ແລະສຸຂຸມເພື່ອຊ່ວຍຂ້ອຍໃຫ້ອົດທົນໄດ້. ຍ້ອນແນວນີ້ ຂ້ອຍຈຶ່ງຮູ້ສຶກຄືກັບໂຢບທີ່ບອກວ່າ: ‘ຂ້ອຍຈະສັດຊື່ຈົນຮອດມື້ຕາຍ!’”—ໂຢບ 27:5, ລ.ມ.
ເຮົາຈະຊ່ວຍພີ່ນ້ອງໃນປະຊາຄົມແນວໃດ? (ເບິ່ງຂໍ້ 14)
14. ພະເຢໂຫວາໄດ້ໃຊ້ພີ່ນ້ອງໃຫ້ຊ່ວຍເຮົາແນວໃດເມື່ອເຈິບັນຫາ? (1 ເທຊະໂລນິກ 4:9)
14 ພະເຢໂຫວາໄດ້ສອນປະຊາຊົນຂອງເພິ່ນໃຫ້ຮັກແລະໃຫ້ກຳລັງໃຈກັນແລະກັນໃນຍາມທີ່ຍາກລຳບາກ. (2 ກຣ. 1:3, 4; ອ່ານ 1 ເທຊະໂລນິກ 4:9) ພີ່ນ້ອງຫຼາຍຄົນໄດ້ເຮັດຄືກັບເອລີຮູໂດຍຊ່ວຍເຮົາໃຫ້ຮັກສາຄວາມສັດຊື່ຕໍ່ພະເຢໂຫວາເມື່ອມີບັນຫາ. (ກຈກ. 14:22) ໃຫ້ເຮົາມາເບິ່ງວິທີທີ່ພີ່ນ້ອງໃນປະຊາຄົມໃຫ້ກຳລັງໃຈພີ່ນ້ອງໄດແອັນແລະຊ່ວຍລາວໃຫ້ມີຄວາມເຊື່ອທີ່ເຂັ້ມແຂງຕອນທີ່ຜົວຂອງລາວມີບັນຫາສຸຂະພາບຮ້າຍແຮງ. ລາວບອກວ່າ: “ເຖິງວ່າຈະຍາກ ແຕ່ເຮົາກໍຮູ້ສຶກວ່າພະເຢໂຫວາໄດ້ສະແດງຄວາມຮັກຕໍ່ເຮົາ ແລະຊ່ວຍເຮົາຕະຫຼອດໃນໄລຍະທີ່ຍາກລຳບາກຫຼາຍເດືອນ. ພີ່ນ້ອງໃນປະຊາຄົມໄດ້ຊ່ວຍເຮົາຫຼາຍຢ່າງ. ເຂົາເຈົ້າມາຢາມເຮົາ ໂທຫຼິ້ນນຳເຮົາ ແລະອ້ອມກອດທີ່ອົບອຸ່ນຂອງເຂົາເຈົ້າຊ່ວຍເຮົາໃຫ້ອົດທົນກັບບັນຫາໄດ້. ຍ້ອນຂ້ອຍຂັບລົດບໍ່ເປັນ ພີ່ນ້ອງຈຶ່ງໄດ້ຊ່ວຍໄປຮັບໄປສົ່ງຂ້ອຍຕອນທີ່ໄປປະຊຸມແລະໄປປະກາດ.” ເຮົາມີຄວາມສຸກຫຼາຍແທ້ໆທີ່ມີພີ່ນ້ອງທີ່ສະແດງຄວາມຮັກຕໍ່ກັນແບບນີ້!
ເຫັນຄ່າຄວາມຮັກທີ່ພະເຢໂຫວາສະແດງຕໍ່ເຮົາ
15. ເປັນຫຍັງເຮົາໝັ້ນໃຈໄດ້ວ່າເຮົາສາມາດອົດທົນກັບບັນຫາຕ່າງໆໄດ້?
15 ເຮົາທຸກຄົນຕ້ອງເຈິບັນຫາບໍ່ແບບໃດກໍແບບໜຶ່ງ. ແຕ່ເຮົາຈະບໍ່ໄດ້ຮູ້ສຶກໂດດດ່ຽວເມື່ອມີບັນຫາ ເພາະພະເຢໂຫວາເປັນຄືກັບພໍ່ທີ່ຮັກເຮົາ. ເພິ່ນເຝົ້າເບິ່ງເຮົາ ຢູ່ຄຽງຂ້າງເຮົາ ຟັງຄຳອະທິດຖານຂອງເຮົາແລະພ້ອມທີ່ຈະຊ່ວຍເຮົາສະເໝີ. (ເອຊາ. 43:2) ແລະເຮົາໝັ້ນໃຈໄດ້ວ່າເຮົາສາມາດຜ່ານບັນຫາເຫຼົ່ານັ້ນໄປໄດ້ ເພາະພະເຢໂຫວາໃຫ້ເຮົາມີຫຼາຍຢ່າງທີ່ຊ່ວຍເຮົາໃຫ້ອົດທົນ ເຊັ່ນ: ເພິ່ນໃຫ້ເຮົາສາມາດອະທິດຖານເຖິງເພິ່ນ ໃຫ້ມີຄຳພີໄບເບິນ ຄວາມຮູ້ແລະສິ່ງຕ່າງໆທີ່ເສີມຄວາມເຊື່ອ ແລະພີ່ນ້ອງທີ່ພ້ອມຈະຊ່ວຍເຫຼືອເຮົາໃນຍາມທີ່ຍາກລຳບາກ.
16. ເຮົາຕ້ອງເຮັດຫຍັງເພື່ອພະເຢໂຫວາຈະເບິ່ງແຍງເຮົາຕະຫຼອດໄປ?
16 ເຮົາຮູ້ສຶກເຫັນຄ່າແລະຂອບໃຈພະເຢໂຫວາຫຼາຍແທ້ໆທີ່ເບິ່ງແຍງເຮົາຄືກັບພໍ່ທີ່ຮັກລູກ. “ພວກເຮົາມີຄວາມສຸກເພາະສິ່ງທີ່ພະອົງເຮັດ.” (ເພງ. 33:21, ລ.ມ.) ເຮົາຈະສະແດງໃຫ້ເຫັນວ່າເຮົາເຫັນຄ່າສິ່ງທີ່ພະເຢໂຫວາເຮັດເພື່ອເຮົາໂດຍໃຊ້ສິ່ງຕ່າງໆທີ່ເພິ່ນຈັດໃຫ້ເຮົາ. ນອກຈາກນັ້ນ ເຮົາຍັງຕ້ອງເຮັດສ່ວນຂອງເຮົາເອງໂດຍເຊື່ອຟັງພະເຢໂຫວາແລະເຮັດສິ່ງທີ່ເພິ່ນເຫັນວ່າຖືກຕ້ອງ. ເມື່ອເຮັດແບບນີ້ ພະເຢໂຫວາກໍຈະເບິ່ງແຍງເຮົາຕະຫຼອດໄປ!—1 ປຕ. 3:12
ເພງ 30 ພະອົງເປັນພະເຈົ້າ ເປັນພໍ່ແລະເພື່ອນຂອງຂ້ອຍ
a ເຮົາຕ້ອງໄດ້ຮັບຄວາມຊ່ວຍເຫຼືອຈາກພະເຢໂຫວາເພື່ອຈະຮັບມືກັບບັນຫາທີ່ເຮົາເຈິໃນທຸກມື້ນີ້ໄດ້. ໃນບົດຄວາມນີ້ຊ່ວຍເຮົາໃຫ້ເຫັນວ່າພະເຢໂຫວາເປັນຫ່ວງແລະເບິ່ງແຍງປະຊາຊົນຂອງເພິ່ນ. ເພິ່ນຮູ້ບັນຫາທີ່ເຮົາແຕ່ລະຄົນເຈິ ແລະເພິ່ນຈັດໃຫ້ເຮົາມີສິ່ງທີ່ຈະຊ່ວຍເຮົາໃຫ້ຮັບມືກັບບັນຫານັ້ນໄດ້.
b ຄຳເພງ 33:18-20 (ລ.ມ.) ອ່ານວ່າ: ພະເຢໂຫວາເຝົ້າເບິ່ງຄົນທີ່ນັບຖືເພິ່ນ ແລະຄົນທີ່ລໍຖ້າຄວາມຮັກທີ່ໝັ້ນຄົງຂອງເພິ່ນ ເພື່ອຊ່ວຍເຂົາເຈົ້າໃຫ້ລອດຈາກຄວາມຕາຍ ແລະເພື່ອຊ່ວຍເຂົາເຈົ້າໃຫ້ມີຊີວິດຢູ່ຕອນທີ່ມີຄວາມອຶດຢາກ. ພວກເຮົາຫວັງໃຫ້ພະເຢໂຫວາຊ່ວຍພວກເຮົາ. ເພິ່ນເປັນຜູ້ຊ່ວຍແລະເປັນໂລ້ຂອງພວກເຮົາ.
c ຊື່ສົມມຸດ
