ບົດຄວາມສຶກສາທີ 35
ອົດທົນຕໍ່ໆໄປ
“ໃຫ້ປູກຝັງ . . . ຄວາມອົດທົນອົດກັ້ນ.”—ກລຊ. 3:12
ເພງ 114 “ຂໍໃຫ້ມີຄວາມອົດທົນ”
ໃຈຄວາມສຳຄັນ a
1. ເປັນຫຍັງເຮົາຈຶ່ງມັກຄົນທີ່ມີຄວາມອົດທົນ?
ເຮົາທຸກຄົນມັກຄົນທີ່ອົດທົນ. ເຮົາຮູ້ສຶກນັບຖືຄົນທີ່ອົດທົນລໍຖ້າໂດຍທີ່ບໍ່ຫງຸດຫງິດແລະບໍ່ອາລົມເສຍ ແລະເຮົາຮູ້ສຶກຂອບໃຈຕອນທີ່ຄົນອື່ນອົດທົນກັບເຮົາເມື່ອເຮົາເຮັດຜິດພາດ. ນອກຈາກນັ້ນ ເຮົາຮູ້ສຶກຂອບໃຈຜູ້ນຳການສຶກສາທີ່ອົດທົນສອນຄຳພີໄບເບິນໃຫ້ເຮົາ ແລະອົດທົນຕອນທີ່ເຮົາພະຍາຍາມເອົາຄຳແນະນຳນັ້ນໄປໃຊ້. ທີ່ສຳຄັນທີ່ສຸດ ເຮົາຂອບໃຈພະເຢໂຫວາຫຼາຍແທ້ໆທີ່ອົດທົນກັບເຮົາ!—ຣມ. 2:4
2. ຕອນໃດແດ່ທີ່ເຮົາອາດຮູ້ສຶກວ່າຍາກທີ່ຈະອົດທົນ?
2 ເຖິງເຮົາຈະມັກຄົນອົດທົນ ແຕ່ບາງເທື່ອກໍບໍ່ແມ່ນເລື່ອງງ່າຍທີ່ເຮົາເອງຈະອົດທົນ. ຕົວຢ່າງເຊັ່ນ: ຕອນລົດຕິດເຮົາອາດຮູ້ສຶກວ່າບໍ່ງ່າຍເລີຍທີ່ຈະພະຍາຍາມໃຈເຢັນໂດຍສະເພາະຕອນທີ່ເຮົາຟ້າວ ຫຼືເມື່ອມີຄົນອື່ນເຮັດສິ່ງທີ່ລົບກວນໃຈເຮົາ ເຮົາອາດຈະຮູ້ສຶກອາລົມເສຍແລະໃຈຮ້າຍ. ບາງເທື່ອເຮົາອາດຮູ້ສຶກວ່າບໍ່ງ່າຍທີ່ຈະລໍຖ້າໃຫ້ຄຳສັນຍາຂອງພະເຢໂຫວາເລື່ອງໂລກໃໝ່ເປັນຈິງ. ເຈົ້າຢາກຈະເປັນຄົນທີ່ອົດທົນຫຼາຍກວ່ານີ້ບໍ? ໃນບົດຄວາມນີ້ເຮົາຈະມາເບິ່ງວ່າ ການເປັນຄົນອົດທົນໝາຍຄວາມວ່າແນວໃດ ແລະເປັນຫຍັງຈຶ່ງສຳຄັນ. ນອກຈາກນັ້ນ ເຮົາຍັງຈະມາເບິ່ງວ່າສິ່ງໃດຈະຊ່ວຍເຮົາໃຫ້ອົດທົນໄດ້ຫຼາຍຂຶ້ນ.
ການເປັນຄົນອົດທົນໝາຍຄວາມວ່າແນວໃດ?
3. ຄົນທີ່ອົດທົນຈະເປັນແນວໃດຕອນທີ່ຄົນອື່ນເຮັດໃຫ້ເຈັບໃຈ?
3 ໃຫ້ເຮົາມາເບິ່ງ 4 ຢ່າງທີ່ສະແດງວ່າເຮົາເປັນຄົນອົດທົນ. ຢ່າງທຳອິດ ຄົນທີ່ອົດທົນຈະບໍ່ໃຈຮ້າຍງ່າຍ. ລາວຈະພະຍາຍາມໃຈເຢັນແລະບໍ່ຕອບໂຕ້ເມື່ອມີຄົນເຮັດໃຫ້ລາວເຈັບໃຈ ແລະຕອນທີ່ລາວເຄັ່ງຕຶງລາວຈະບໍ່ເວົ້າຫຼືເຮັດສິ່ງທີ່ບໍ່ດີຕໍ່ຄົນອື່ນ. ຄຳວ່າ “ບໍ່ໃຈຮ້າຍງ່າຍ” ທີ່ຄຳພີໄບເບິນໃຊ້ເປັນເທື່ອທຳອິດແມ່ນຢູ່ໃນອົບພະຍົບ 34:6 ເຊິ່ງເວົ້າເຖິງພະເຢໂຫວາວ່າ “ເປັນພະເຈົ້າທີ່ມີຄວາມເມດຕາ ໃຈດີ ບໍ່ໃຈຮ້າຍງ່າຍ ມີຄວາມຮັກທີ່ໝັ້ນຄົງຫຼາຍທີ່ສຸດ ແລະເວົ້າແຕ່ຄວາມຈິງ.”
4. ຄົນທີ່ອົດທົນຈະເປັນແນວໃດຕອນທີ່ລາວຕ້ອງອົດທົນລໍຖ້າ?
4 ຢ່າງທີສອງ ຄົນທີ່ອົດທົນຈະລໍຖ້າແບບໃຈເຢັນໆ. ຖ້າລາວຕ້ອງລໍຖ້າດົນໆເກີນທີ່ລາວຄິດໄວ້ ລາວຈະພະຍາຍາມບໍ່ຫງຸດຫງິດຫຼືອາລົມເສຍ. (ມທ. 18:26, 27) ມີຫຼາຍສະຖານະການທີ່ເຮົາຕ້ອງອົດທົນລໍຖ້າແບບໃຈເຢັນໆ. ຕົວຢ່າງເຊັ່ນ: ຕອນທີ່ຄົນອື່ນເວົ້າກັບເຮົາ ເຮົາຕ້ອງຕັ້ງໃຈຟັງໂດຍບໍ່ເວົ້າແຊກ. (ໂຢບ 36:2) ແລະເຮົາອາດຕ້ອງໄດ້ອົດທົນຕອນທີ່ເຮົາຊ່ວຍນັກສຶກສາໃຫ້ເຂົ້າໃຈຄຳສອນໃນຄຳພີໄບເບິນຫຼືຊ່ວຍລາວໃຫ້ເຊົານິດໄສທີ່ບໍ່ດີບາງຢ່າງ.
5. ມີຫຍັງອີກທີ່ສະແດງວ່າເຮົາເປັນຄົນອົດທົນ?
5 ຢ່າງທີສາມ ຄົນທີ່ອົດທົນຈະບໍ່ເຮັດຫຍັງແບບຟ້າວຟັ່ງໂດຍທີ່ບໍ່ໄດ້ຄິດກ່ອນ. ກໍແມ່ນຢູ່ວ່າ ບາງທີການລົງມືເຮັດທັນທີມັນເປັນສິ່ງທີ່ດີ. ແຕ່ຖ້າເປັນເລື່ອງສຳຄັນ ຄົນທີ່ອົດທົນຈະບໍ່ຟ້າວລົງມືເຮັດຫຍັງໂດຍທີ່ບໍ່ໄດ້ວາງແຜນກ່ອນ ແລະລາວຈະໃຊ້ເວລາໃຫ້ຫຼາຍພໍທີ່ຈະວາງແຜນວ່າຕ້ອງເຮັດຫຍັງແດ່ ແລະຕອນທີ່ລາວເຮັດສິ່ງນັ້ນ ລາວຈະບໍ່ຟ້າວເຮັດພໍແລ້ວມືແລ້ວຕີນເທົ່ານັ້ນ.
6. ຄົນທີ່ອົດທົນຈະເປັນແນວໃດຕອນທີ່ເຈິບັນຫາຫຼືຄວາມຍາກລຳບາກ?
6 ຢ່າງທີສີ່ ຄົນທີ່ອົດທົນຈະບໍ່ຈົ່ມຕອນທີ່ເຈິບັນຫາຫຼືຄວາມຍາກລຳບາກ. ຕອນທີ່ເຮົາເຈິບັນຫາຫຼືຄວາມຍາກລຳບາກ ມັນບໍ່ແມ່ນເລື່ອງຜິດທີ່ເຮົາຈະລະບາຍຄວາມຮູ້ສຶກໃຫ້ໝູ່ສະໜິດຟັງວ່າເຮົາຮູ້ສຶກແນວໃດ. ແຕ່ຄົນທີ່ອົດທົນຈະພະຍາຍາມຄິດໃນແງ່ບວກແລະພະຍາຍາມຮັບໃຊ້ພະເຢໂຫວາຢ່າງມີຄວາມສຸກຕໍ່ໆໄປເຖິງວ່າຈະເຈິບັນຫາ. (ກລຊ. 1:11) ຄລິດສະຕຽນຕ້ອງສະແດງວ່າເປັນຄົນອົດທົນໂດຍເຮັດຕາມ 4 ຢ່າງທີ່ເວົ້າມານີ້. ຕໍ່ຈາກນີ້ເຮົາຈະມາເບິ່ງວ່າມີເຫດຜົນຫຍັງແດ່ທີ່ເຮົາຄວນເຮັດແບບນັ້ນ.
ເປັນຫຍັງການເປັນຄົນອົດທົນຈຶ່ງສຳຄັນຫຼາຍ
ຄືກັບຊາວໄຮ່ຊາວນາທີ່ອົດທົນລໍຖ້າແລະໝັ້ນໃຈວ່າຈະໄດ້ເກັບກ່ຽວຜົນເມື່ອເຖິງເວລາ ເຮົາກໍອົດທົນລໍຖ້າແລະໝັ້ນໃຈວ່າພະເຢໂຫວາຈະເຮັດໃຫ້ຄຳສັນຍາຂອງເພິ່ນເກີດຂຶ້ນແທ້ຕາມເວລາທີ່ເພິ່ນກຳນົດໄວ້ (ເບິ່ງຂໍ້ 7)
7. ຕາມຢາໂກໂບ 5:7, 8 ເປັນຫຍັງການເປັນຄົນອົດທົນຈຶ່ງສຳຄັນຫຼາຍ? (ເບິ່ງຮູບພາບ)
7 ເປັນເລື່ອງສຳຄັນທີ່ເຮົາຈະເປັນຄົນອົດທົນ ເພາະມັນຈະຊ່ວຍເຮົາໃຫ້ລອດໄດ້. ເຮົາຕ້ອງອົດທົນລໍຖ້າພະເຢໂຫວາເຮັດໃຫ້ຄຳສັນຍາຂອງເພິ່ນເກີດຂຶ້ນແທ້ຄືກັບຜູ້ຮັບໃຊ້ໃນອະດີດເຄີຍອົດທົນມາແລ້ວ. (ຮຣ. 6:11, 12) ຄຳພີໄບເບິນປຽບເຮົາເປັນຄືກັບຊາວໄຮ່ຊາວນາ. (ອ່ານຢາໂກໂບ 5:7, 8) ຊາວໄຮ່ຊາວນາຈະດຸໝັ່ນໃນການປູກແລະຫົດນ້ຳ. ເຖິງເຂົາເຈົ້າບໍ່ຮູ້ວ່າສິ່ງທີ່ເຂົາເຈົ້າປູກນັ້ນຈະງອກຂຶ້ນຕອນໃດ ແຕ່ເຂົາເຈົ້າກໍອົດທົນລໍຖ້າແລະໝັ້ນໃຈວ່າຈະໄດ້ເກັບກ່ຽວຜົນແທ້ໆ. ຄ້າຍຄືກັນ ໃນທຸກມື້ນີ້ເຮົາກໍພະຍາຍາມດຸໝັ່ນຫ້າວຫັນໃນການຮັບໃຊ້ແລະເຮັດກິດຈະກຳຂອງຄລິດສະຕຽນເຖິງວ່າເຮົາຈະ “ບໍ່ຮູ້ວ່າຜູ້ເປັນນາຍຂອງພວກເຮົາຈະມາມື້ໃດ.” (ມທ. 24:42) ແຕ່ເຮົາກໍອົດທົນລໍຖ້າແລະໝັ້ນໃຈວ່າພະເຢໂຫວາຈະເຮັດໃຫ້ຄຳສັນຍາຂອງເພິ່ນເກີດຂຶ້ນແທ້ຕາມເວລາທີ່ເພິ່ນກຳນົດໄວ້. ແຕ່ຖ້າມື້ໃດເຮົາເລີ່ມບໍ່ມີຄວາມອົດທົນ ເຮົາອາດບໍ່ຢາກລໍຖ້າພະເຢໂຫວາອີກຕໍ່ໄປ ແລ້ວກໍຄ່ອຍໆຫ່າງອອກຈາກແນວທາງຂອງເພິ່ນແລະເລີ່ມຊອກຫາສິ່ງທີ່ເຮົາຄິດວ່າຈະເຮັດໃຫ້ເຮົາມີຄວາມສຸກໃນຕອນນີ້ເທົ່ານັ້ນ. ດັ່ງນັ້ນ ເຮົາຕ້ອງອົດທົນຈົນເຖິງທີ່ສຸດເພື່ອຈະໄດ້ຮັບການຊ່ວຍໃຫ້ລອດ.—ມກ. 7:7; ມທ. 24:13
8. ການເປັນຄົນອົດທົນຊ່ວຍເຮົາໃຫ້ມີຄວາມສຳພັນທີ່ດີກັບຄົນອື່ນແນວໃດ? (ໂກໂລຊາຍ 3:12, 13)
8 ການເປັນຄົນອົດທົນຈະຊ່ວຍເຮົາໃຫ້ມີຄວາມສຳພັນທີ່ດີກັບຄົນອື່ນ ຊ່ວຍເຮົາໃຫ້ຕັ້ງໃຈຟັງເມື່ອຄົນອື່ນເວົ້າ. (ຢກບ. 1:19) ຖ້າເຮົາເປັນຄົນອົດທົນ ເຮົາຈະຢູ່ກັບຄົນອື່ນຢ່າງສະຫງົບສຸກ. ເຮົາຈະບໍ່ເວົ້າຫຼືເຮັດຫຍັງໂດຍບໍ່ຄິດແມ່ນແຕ່ຕອນທີ່ຮູ້ສຶກເຄັ່ງຕຶງ ແລະເຖິງວ່າຄົນອື່ນຈະເຮັດໃຫ້ເຮົາຮູ້ສຶກເຈັບ ເຮົາກໍຈະບໍ່ໃຈຮ້າຍງ່າຍຫຼືພະຍາຍາມຕອບໂຕ້ ແຕ່ເຮົາຈະ “ອົດທົນຕໍ່ກັນແລະກັນ ແລະໃຫ້ອະໄພກັນຢ່າງໃຈກວ້າງຕໍ່ໄປ.”—ອ່ານໂກໂລຊາຍ 3:12, 13
9. ການເປັນຄົນອົດທົນຈະຊ່ວຍເຮົາແນວໃດຕອນທີ່ຕ້ອງຕັດສິນໃຈ? (ສຸພາສິດ 21:5)
9 ການເປັນຄົນອົດທົນຍັງຊ່ວຍເຮົາໃຫ້ຕັດສິນໃຈໄດ້ດີຂຶ້ນ. ຖ້າເຮົາເປັນຄົນອົດທົນ ເຮົາຈະບໍ່ຟ້າວຕັດສິນໃຈໂດຍທີ່ບໍ່ໄດ້ຄິດກ່ອນ ແລະຈະໃຊ້ເວລາຄົ້ນຄວ້າແລະຄິດເບິ່ງວ່າຈະຕັດສິນໃຈແບບໃດໄດ້ແດ່ ແລ້ວກໍເລືອກສິ່ງດີທີ່ສຸດ. (ອ່ານສຸພາສິດ 21:5) ຕົວຢ່າງເຊັ່ນ: ຖ້າເຮົາກຳລັງຊອກວຽກ ເມື່ອມີຄົນສະເໜີວຽກໃຫ້ ເຮົາອາດຈະຮັບວຽກນັ້ນທັນທີໂດຍບໍ່ໄດ້ຄິດວ່າມັນຈະເຮັດໃຫ້ເຮົາຂາດປະຊຸມຫຼືຮັບໃຊ້ໄດ້ໜ້ອຍລົງບໍ? ແຕ່ຖ້າເຮົາເປັນຄົນອົດທົນ ເຮົາຈະໃຊ້ເວລາຄິດກ່ອນຕັດສິນໃຈ ເຊັ່ນ: ເຮົາຈະຄິດວ່າຖ້າເຮັດວຽກນີ້ເຮົາຕ້ອງເດີນທາງໄກບໍ? ເຮົາຕ້ອງເຮັດວຽກຈັກຊົ່ວໂມງ? ຫຼືວຽກນີ້ຈະສົ່ງຜົນຕໍ່ຄອບຄົວຂອງເຮົາແລະສາຍສຳພັນຂອງເຮົາກັບພະເຢໂຫວາບໍ? ເຮົາເຫັນໄດ້ວ່າການເປັນຄົນອົດທົນຈະຊ່ວຍເຮົາບໍ່ໃຫ້ຕັດສິນໃຈຜິດພາດ.
ເຮົາຈະເປັນຄົນທີ່ອົດທົນຫຼາຍຂຶ້ນໄດ້ແນວໃດ?
10. ເຮົາຈະເປັນຄົນອົດທົນຫຼາຍຂຶ້ນແລະມີນິດໄສແບບນີ້ຕໍ່ໆໄປໄດ້ແນວໃດ?
10 ອະທິດຖານຂໍໃຫ້ມີຄວາມອົດທົນຫຼາຍຂຶ້ນ. ຄວາມອົດທົນເປັນສ່ວນໜຶ່ງຂອງຜົນທີ່ເກີດຈາກພະລັງຂອງພະເຈົ້າ. (ຄລຕ. 5:22, 23) ດັ່ງນັ້ນ ຖ້າເຮົາຢາກເປັນຄົນອົດທົນ ເຮົາກໍຕ້ອງອະທິດຖານຂໍພະລັງຈາກເພິ່ນ ແລະເມື່ອເຮົາເຈິກັບສະຖານະການທີ່ທົດສອບຄວາມອົດທົນ ໃຫ້ເຮົາ “ຂໍຕໍ່ໄປເລື້ອຍໆ” ແລ້ວພະເຢໂຫວາຈະຊ່ວຍເຮົາໃຫ້ອົດທົນໄດ້. (ລກ. 11:9, 13) ເຮົາຍັງສາມາດອະທິດຖານໃຫ້ພະເຢໂຫວາຊ່ວຍເຮົາໃຫ້ເບິ່ງໃນແບບທີ່ເພິ່ນເບິ່ງ. ນອກຈາກນັ້ນ ຫຼັງຈາກອະທິດຖານແລ້ວໆເຮົາກໍຕ້ອງພະຍາຍາມສຸດຄວາມສາມາດທີ່ຈະອົດທົນໃຫ້ໄດ້ໃນແຕ່ລະມື້. ແຮ່ງເຮົາອະທິດຖານແລະພະຍາຍາມສະແດງຄວາມອົດທົນ ພະເຢໂຫວາກໍແຮ່ງຈະຊ່ວຍເຮົາໃຫ້ເປັນຄົນອົດທົນຫຼາຍຂຶ້ນ ແລ້ວເຮົາກໍຈະມີນິດໄສທີ່ອົດທົນ.
11-12. ພະເຢໂຫວາສະແດງຄວາມອົດທົນແນວໃດ?
11 ຄິດຕຶກຕອງຕົວຢ່າງໃນຄຳພີໄບເບິນ. ຄຳພີໄບເບິນມີຕົວຢ່າງຂອງຫຼາຍຄົນທີ່ສະແດງຄວາມອົດທົນ. ຖ້າເຮົາຄິດຕຶກຕອງກ່ຽວກັບຕົວຢ່າງຂອງເຂົາເຈົ້າ ເຮົາກໍຮູ້ວິທີທີ່ຈະສະແດງຄວາມອົດທົນ. ກ່ອນທີ່ເຮົາຈະລົມກັນກ່ຽວກັບຕົວຢ່າງເຫຼົ່ານັ້ນ ໃຫ້ເຮົາມາເບິ່ງຕົວຢ່າງຂອງພະເຢໂຫວາເຊິ່ງເປັນຕົວຢ່າງທີ່ດີທີ່ສຸດໃນເລື່ອງການສະແດງຄວາມອົດທົນ.
12 ໃນສວນເອເດນ ຊາຕານໃສ່ຮ້າຍພະເຢໂຫວາແລະທຳລາຍຊື່ສຽງຂອງເພິ່ນໂດຍເຮັດໃຫ້ເອວາສົງໄສວ່າ ພະເຢໂຫວາເປັນຜູ້ປົກຄອງທີ່ຍຸຕິທຳແລະຮັກມະນຸດແທ້ໆບໍ? ແຕ່ພະເຢໂຫວາບໍ່ໄດ້ທຳລາຍຊາຕານທັນທີ. ເພິ່ນໄດ້ສະແດງຄວາມອົດທົນແລະຄວບຄຸມຕົວເອງໂດຍໃຫ້ເວລາພິສູດວ່າການປົກຄອງຂອງເພິ່ນດີທີ່ສຸດ. ແຕ່ໃນລະຫວ່າງນັ້ນພະເຢໂຫວາຕ້ອງໄດ້ອົດທົນຫຼາຍແທ້ໆກັບການຖືກໃສ່ຮ້າຍ. ນອກຈາກນັ້ນ ພະເຢໂຫວາຍັງໄດ້ອົດທົນເພື່ອໃຫ້ຫຼາຍຄົນມີໂອກາດທີ່ຈະມີຊີວິດຕະຫຼອດໄປ. (2ປຕ. 3:9, 15) ຜົນກໍຄື ຫຼາຍລ້ານຄົນໄດ້ມາຮູ້ຈັກພະເຢໂຫວາ. ຖ້າເຮົາຄິດວ່າການທີ່ພະເຢໂຫວາອົດທົນມີປະໂຫຍດຫຍັງແດ່ ມັນກໍງ່າຍຂຶ້ນທີ່ເຮົາຈະອົດທົນລໍຖ້າມື້ທີ່ພະເຢໂຫວາຈະທຳລາຍໂລກຊົ່ວນີ້.
ຄວາມອົດທົນຈະຊ່ວຍເຮົາບໍ່ໃຫ້ໃຈຮ້າຍງ່າຍຕອນທີ່ຖືກຍົວະໃຫ້ໃຈຮ້າຍ (ເບິ່ງຂໍ້ 13)
13. ພະເຢຊູຮຽນແບບຄວາມອົດທົນຂອງພະເຢໂຫວາໄດ້ຢ່າງສົມບູນແບບແນວໃດ? (ເບິ່ງຮູບພາບ)
13 ຕອນທີ່ພະເຢຊູຢູ່ເທິງໂລກນີ້ ເພິ່ນໄດ້ຮຽນແບບຄວາມອົດທົນຂອງພະເຢໂຫວາໄດ້ຢ່າງສົມບູນແບບ. ເພິ່ນຕ້ອງໄດ້ອົດທົນຫຼາຍແທ້ໆໂດຍສະເພາະເມື່ອເຈິກັບຄູສອນສາສະໜາແລະພວກຟາຣິຊາຍທີ່ໜ້າຊື່ໃຈຄົດ. (ຢຮ. 8:25-27) ຄືກັບພໍ່ຂອງເພິ່ນ ພະເຢຊູບໍ່ໄດ້ໃຈຮ້າຍງ່າຍ. ເພິ່ນບໍ່ໄດ້ຕອບໂຕ້ເມື່ອຖືກດ່າຫຼືຖືກຍົວະໃຫ້ໃຈຮ້າຍ. (1ປຕ. 2:23) ນອກຈາກນັ້ນ ພະເຢຊູຍັງອົດທົນກັບຄວາມລຳບາກໂດຍບໍ່ຈົ່ມ. ນີ້ເຮັດໃຫ້ເຮົາເຂົ້າໃຈວ່າ ເປັນຫຍັງຄຳພີໄບເບິນບອກໃຫ້ເຮົາ “ສັງເກດເບິ່ງພະເຢຊູໃຫ້ດີ . . . ເພິ່ນອົດທົນກັບຄຳເວົ້າດູຖູກຢຽດຫຍາມຂອງຄົນບາບ.” (ຮຣ. 12:2, 3) ເຮົາກໍຄືກັນ ຖ້າພະເຢໂຫວາຊ່ວຍ ເຮົາກໍຈະອົດທົນກັບຄວາມຍາກລຳບາກທຸກຮູບແບບທີ່ເຮົາເຈິໄດ້ແນ່ນອນ.
ຖ້າເຮົາອົດທົນຄືກັບອັບຣາຮາມ ເຮົາກໍໝັ້ນໃຈໄດ້ເລີຍວ່າພະເຢໂຫວາຈະໃຫ້ລາງວັນກັບເຮົາໃນຕອນນີ້ແລະຫຼາຍກວ່ານັ້ນອີກໃນໂລກໃໝ່ທີ່ເພິ່ນສັນຍາໄວ້ (ເບິ່ງຂໍ້ 14)
14. ເຮົາໄດ້ຮຽນຫຍັງຈາກຄວາມອົດທົນຂອງອັບຣາຮາມ? (ເຮັບເຣີ 6:15) (ເບິ່ງຮູບພາບ)
14 ພວກເຮົາຫຼາຍຄົນຫວັງທີ່ຈະເຫັນຈຸດຈົບຂອງໂລກຊົ່ວນີ້ ແຕ່ຕອນນີ້ເຮົາກໍຢ້ານວ່າເຮົາຈະບໍ່ໄດ້ຢູ່ຈົນເຫັນມື້ນັ້ນ. ແຕ່ສິ່ງໃດຈະຊ່ວຍເຮົາໃຫ້ອົດທົນຕໍ່ໆໄປໄດ້? ໃຫ້ເຮົາຄິດເຖິງຕົວຢ່າງຂອງອັບຣາຮາມ. ພະເຢໂຫວາສັນຍາກັບອັບຣາຮາມວ່າ: “ລູກຫຼານຂອງເຈົ້າຈະກາຍເປັນຊາດໃຫຍ່” ເຖິງຕອນນັ້ນອັບຣາຮາມອາຍຸ 75 ປີແລ້ວແລະຍັງບໍ່ມີລູກ. (ປຖກ. 12:1-4) ອັບຣາຮາມໄດ້ເຫັນຄຳສັນຍານີ້ເກີດຂຶ້ນແທ້ບໍ? ລາວໄດ້ເຫັນຢູ່ ແຕ່ບໍ່ໄດ້ເຫັນທັງໝົດ. ຫຼັງຈາກຂ້າມແມ່ນ້ຳເອິຟາຣາດແລະຕ້ອງລໍຖ້າອີກ 25 ປີ ອັບຣາຮາມຈຶ່ງໄດ້ເຫັນລູກຊາຍຂອງລາວເກີດມານັ້ນກໍຄືອີຊາກເຊິ່ງເປັນເລື່ອງທີ່ອັດສະຈັນຫຼາຍ. ຫຼັງຈາກ 60 ປີ ລາວໄດ້ເຫັນຫຼານຊາຍ 2 ຄົນເກີດມາ ນັ້ນກໍຄືເອຊາວກັບຢາໂຄບ. (ອ່ານເຮັບເຣີ 6:15) ອັບຣາຮາມບໍ່ໄດ້ເຫັນລູກຫຼານຂອງລາວກາຍເປັນຊາດໃຫຍ່ແລະບໍ່ໄດ້ເຂົ້າໄປຢູ່ແຜ່ນດິນທີ່ພະເຈົ້າສັນຍາໄວ້. ແຕ່ອັບຣາຮາມໄດ້ມີສາຍສຳພັນທີ່ໃກ້ຊິດກັບພະເຢໂຫວາ. (ຢກບ. 2:23) ແລະໃນອະນາຄົດຕອນທີ່ລາວຄືນມາຈາກຕາຍ ລາວຄືຊິຕື່ນເຕັ້ນດີໃຈທີ່ໄດ້ຮູ້ວ່າຄວາມເຊື່ອແລະຄວາມອົດທົນຂອງລາວເຮັດໃຫ້ທຸກຊາດໄດ້ຮັບພອນ! (ປຖກ. 22:18) ເຮົາໄດ້ບົດຮຽນຫຍັງ? ເຮົາອາດຈະບໍ່ໄດ້ເຫັນຄຳສັນຍາຂອງພະເຢໂຫວາທັງໝົດເກີດຂຶ້ນແທ້ໃນຕອນນີ້. ແຕ່ຖ້າເຮົາອົດທົນຄືກັບອັບຣາຮາມ ເຮົາກໍໝັ້ນໃຈໄດ້ເລີຍວ່າພະເຢໂຫວາຈະໃຫ້ລາງວັນກັບເຮົາໃນຕອນນີ້ ແລະຈະໃຫ້ຫຼາຍກວ່ານັ້ນອີກໃນໂລກໃໝ່ທີ່ເພິ່ນສັນຍາໄວ້.—ມຣກ. 10:29, 30
15. ເຮົາອາດຈະຄິດເຖິງເລື່ອງຫຍັງແດ່ຕອນທີ່ສຶກສາສ່ວນຕົວ?
15 ຄຳພີໄບເບິນມີຕົວຢ່າງຂອງຫຼາຍຄົນທີ່ເປັນຄົນອົດທົນ. (ຢກບ. 5:10) ອາດຈະເປັນເລື່ອງດີຖ້າເຈົ້າສຶກສາເລື່ອງຂອງເຂົາເຈົ້າ b ເຊັ່ນ: ເຖິງວ່າດາວິດຈະໄດ້ຮັບການແຕ່ງຕັ້ງໃຫ້ເປັນກະສັດຕັ້ງແຕ່ອາຍຸຍັງນ້ອຍ ແຕ່ລາວກໍຍັງລໍຖ້າອີກຫຼາຍປີຊົ່ວຊິໄດ້ເປັນກະສັດແທ້ໆ. ນອກຈາກນັ້ນ ຍັງມີຕົວຢ່າງຂອງຊີເມໂອນແລະຂອງອານານຳ. ຕອນທີ່ເຂົາເຈົ້າລໍຖ້າເມຊີອາຕາມຄຳສັນຍາ ເຂົາເຈົ້າຍັງຮັບໃຊ້ພະເຢໂຫວາຢ່າງສັດຊື່. (ລກ. 2:25, 36-38) ໃນລະຫວ່າງທີ່ເຈົ້າສຶກສາຕົວຢ່າງຂອງຄົນທີ່ສະແດງຄວາມອົດທົນ ຂໍໃຫ້ຖາມຕົວເອງວ່າ: ສິ່ງໃດຊ່ວຍລາວໃຫ້ເປັນຄົນອົດທົນ? ລາວໄດ້ຮັບປະໂຫຍດຫຍັງຈາກການເປັນຄົນອົດທົນ? ແລ້ວຂ້ອຍຈະຮຽນແບບລາວໄດ້ແນວໃດ? ນອກຈາກນັ້ນ ເຈົ້າອາດຈະໄດ້ຮັບປະໂຫຍດຈາກການສຶກສາຕົວຢ່າງຂອງຄົນທີ່ບໍ່ໄດ້ສະແດງຄວາມອົດທົນນຳ. (1ຊມ. 13:8-14) ເຈົ້າອາດຖາມຕົວເອງວ່າ: ສິ່ງໃດເຮັດໃຫ້ລາວເປັນຄົນບໍ່ອົດທົນ ແລະລາວໄດ້ຮັບຜົນເສຍຫຍັງແດ່?
16. ເຮົາໄດ້ຮັບປະໂຫຍດຫຍັງແດ່ຈາກການເປັນຄົນອົດທົນ?
16 ໃຫ້ຄິດເຖິງປະໂຫຍດຂອງການເປັນຄົນອົດທົນ. ເມື່ອເຮົາອົດທົນ ເຮົາກໍມີຄວາມສຸກຫຼາຍຂຶ້ນແລະສະຫງົບໃຈຫຼາຍຂຶ້ນ. ການເປັນຄົນອົດທົນຊ່ວຍເຮົາໃຫ້ມີສຸຂະພາບຮ່າງກາຍແລະສຸຂະພາບຈິດທີ່ດີ. ນອກຈາກນັ້ນ ເມື່ອເຮົາອົດທົນກັບຄົນອື່ນ ເຮົາກໍຈະມີສາຍສຳພັນທີ່ດີກັບເຂົາເຈົ້າ ແລະປະຊາຄົມກໍຈະເປັນນ້ຳໜຶ່ງໃຈດຽວກັນຫຼາຍຂຶ້ນ. ຖ້າມີບາງຄົນເຮັດໃຫ້ເຮົາໃຈຮ້າຍ ການທີ່ເຮົາເປັນຄົນບໍ່ຄຽດງ່າຍຈະເຮັດໃຫ້ເລື່ອງນັ້ນບໍ່ກາຍເປັນເລື່ອງໃຫຍ່. (ເພງ. 37:8; ສຸພາ. 14:29) ທີ່ສຳຄັນທີ່ສຸດ ເມື່ອເຮົາເປັນຄົນອົດທົນ ເຮົາກໍກຳລັງຮຽນແບບພະເຢໂຫວາພໍ່ໃນສະຫວັນຂອງເຮົາແລະເຮັດໃຫ້ເຮົາໃກ້ຊິດກັບເພິ່ນຫຼາຍຂຶ້ນ.
17. ເຮົາຄວນຕັ້ງໃຈທີ່ຈະເຮັດຫຍັງ?
17 ຄວາມອົດທົນເປັນຄຸນລັກສະນະທີ່ດີແລະເປັນປະໂຫຍດກັບເຮົາທຸກຄົນ. ເຖິງວ່າບໍ່ແມ່ນເລື່ອງງ່າຍທີ່ເຮົາຈະອົດທົນໄດ້ຕະຫຼອດ ແຕ່ຍ້ອນພະເຢໂຫວາຊ່ວຍເຮົາ ເຮົາຈຶ່ງສາມາດອົດທົນໄດ້ຫຼາຍຂຶ້ນເລື້ອຍໆ. ໃນຂະນະທີ່ເຮົາລໍຖ້າໃຫ້ໂລກໃໝ່ມາຮອດ ເຮົາກໍໝັ້ນໃຈໄດ້ເລີຍວ່າ “ພະເຢໂຫວາເຝົ້າເບິ່ງຄົນທີ່ນັບຖືເພິ່ນ ແລະຄົນທີ່ລໍຖ້າຄວາມຮັກທີ່ໝັ້ນຄົງຂອງເພິ່ນ.” (ເພງ. 33:18, ລ.ມ.) ດັ່ງນັ້ນ ຂໍໃຫ້ເຮົາທຸກຄົນຕັ້ງໃຈທີ່ຈະປູກຝັງຄວາມອົດທົນຕໍ່ໆໄປ.
ເພງ 41 ຂໍຟັງຄຳອະທິດຖານຂອງເຮົາ
a ຄົນສ່ວນຫຼາຍໃນທຸກມື້ນີ້ບໍ່ຄ່ອຍມີຄວາມອົດທົນ. ແຕ່ຄຳພີໄບເບິນບອກໃຫ້ເຮົາປູກຝັງຄວາມອົດທົນ. ໃນບົດຄວາມນີ້ເຮົາຈະມາເບິ່ງວ່າເປັນຫຍັງຄຸນລັກສະນະນີ້ຈຶ່ງສຳຄັນ ແລະເຮົາຈະອົດທົນຫຼາຍຂຶ້ນໄດ້ແນວໃດ.
b ເພື່ອຈະຊອກຫາຕົວຢ່າງໃນຄຳພີໄບເບິນກ່ຽວກັບຄວາມອົດທົນ ລອງເຂົ້າໄປເບິ່ງໃນຄູ່ມືຄົ້ນຄວ້າສຳລັບພະຍານພະເຢໂຫວາ ໄປທີ່ຫົວຂໍ້ “ອາລົມຄວາມຮູ້ສຶກ ຄຸນລັກສະນະ ແລະພຶດຕິກຳ” ຈາກນັ້ນໄປທີ່ຫົວຂໍ້ “ຄວາມອົດທົນ.” (ພາສາໄທ)
