ບົດຄວາມສຶກສາທີ 34
ຮຽນຈາກຄຳພະຍາກອນໃນຄຳພີໄບເບິນ
“ຄົນທີ່ຮູ້ຈັກຄິດຈະເຂົ້າໃຈ.”—ດນອ. 12:10
ເພງ 98 ພະຄຳພີຂຽນຂຶ້ນໂດຍການດົນໃຈຈາກພະເຈົ້າ
ໃຈຄວາມສຳຄັນ a
1. ເຈົ້າຈະຮູ້ສຶກມ່ວນກັບການສຶກສາຄຳພະຍາກອນໃນຄຳພີໄບເບິນໄດ້ແນວໃດ?
ພີ່ນ້ອງຊາຍທີ່ຍັງໜຸ່ມຄົນໜຶ່ງທີ່ຊື່ເບັນບອກວ່າ “ຂ້ອຍມັກສຶກສາຄຳພະຍາກອນໃນຄຳພີໄບເບິນ.” ເຈົ້າຮູ້ສຶກຄືກັບລາວບໍ? ຫຼືເຈົ້າຮູ້ສຶກວ່າຄຳພະຍາກອນໃນຄຳພີໄບເບິນເຂົ້າໃຈຍາກໂພດ? ຫຼືເຈົ້າອາດເຖິງຂັ້ນຮູ້ສຶກວ່າການສຶກສາຄຳພະຍາກອນໃນຄຳພີໄບເບິນໜ້າເບື່ອ? ແຕ່ຖ້າເຈົ້າຮູ້ເຫດຜົນວ່າເປັນຫຍັງພະເຢໂຫວາຈຶ່ງໃຫ້ມີຄຳພະຍາກອນໃນຄຳພີໄບເບິນ ເຈົ້າອາດຈະເລີ່ມມັກກໍໄດ້.
2. ເຮົາຈະຮຽນຫຍັງໃນບົດຄວາມນີ້?
2 ໃນບົດຄວາມນີ້ເຮົາຈະມາເບິ່ງວ່າເປັນຫຍັງເຮົາຄວນສຶກສາຄຳພະຍາກອນໃນຄຳພີໄບເບິນ ແລະເບິ່ງວ່າສິ່ງໃດຈະຊ່ວຍເຮົາໃຫ້ເຂົ້າໃຈຄຳພະຍາກອນເຫຼົ່ານັ້ນ. ຈາກນັ້ນເຮົາຈະມາເບິ່ງວ່າ ການເຂົ້າໃຈຄຳພະຍາກອນ 2 ເລື່ອງໃນປຶ້ມດານີເອນເປັນປະໂຫຍດກັບເຮົາແນວໃດໃນຕອນນີ້.
ເປັນຫຍັງເຮົາຄວນສຶກສາຄຳພະຍາກອນໃນຄຳພີໄບເບິນ?
3. ເຮົາຕ້ອງເຮັດຫຍັງເພື່ອຈະເຂົ້າໃຈຄຳພະຍາກອນໃນຄຳພີໄບເບິນ?
3 ເຮົາຕ້ອງຂໍຄວາມຊ່ວຍເຫຼືອຖ້າເຮົາຢາກເຂົ້າໃຈຄຳພະຍາກອນໃນຄຳພີໄບເບິນ. ຂໍໃຫ້ຄິດເຖິງຕົວຢ່າງປຽບທຽບນີ້: ສົມມຸດວ່າເຈົ້າກຳລັງຈະເດີນທາງໄປໃນບ່ອນທີ່ເຈົ້າບໍ່ເຄີຍໄປ. ແຕ່ໝູ່ທີ່ໄປນຳເຈົ້າຮູ້ຈັກບ່ອນນັ້ນດີ. ລາວຮູ້ວ່າເຈົ້າກັບລາວຢູ່ຈຸດໃດແລະຮູ້ວ່າທາງແຕ່ລະເສັ້ນຈະໄປຮອດໃສ. ເຈົ້າຄືຊິດີໃຈຫຼາຍແທ້ໆທີ່ມີໝູ່ຮ່ວມເດີນທາງໄປກັບເຈົ້າ! ຄ້າຍຄືກັນ ພະເຢໂຫວາຮູ້ດີວ່າເຮົາຢູ່ຈຸດໃດຂອງຊ່ວງເວລາແລະຮູ້ວ່າຈະເກີດຫຍັງຂຶ້ນໃນອະນາຄົດ. ດັ່ງນັ້ນ ຖ້າເຮົາຢາກເຂົ້າໃຈຄຳພະຍາກອນໃນຄຳພີໄບເບິນ ເຮົາກໍຕ້ອງຖ່ອມໃຈຂໍຄວາມຊ່ວຍເຫຼືອຈາກເພິ່ນ.—ດນອ. 2:28; 2ປຕ. 1:19, 20
ການສຶກສາຄຳພະຍາກອນໃນຄຳພີໄບເບິນຊ່ວຍເຮົາໃຫ້ກຽມພ້ອມສຳລັບສິ່ງທີ່ຈະເກີດຂຶ້ນໃນອະນາຄົດ (ເບິ່ງຂໍ້ 4)
4. ເປັນຫຍັງພະເຢໂຫວາຈຶ່ງໃຫ້ມີຄຳພະຍາກອນໃນຄຳພີໄບເບິນ? (ເຢເຣມີ 29:11) (ເບິ່ງຮູບພາບ)
4 ຄືກັບພໍ່ແມ່ທີ່ຮັກລູກ ພະເຢໂຫວາກໍຢາກໃຫ້ເຮົາມີອະນາຄົດທີ່ດີແລະມີຄວາມສຸກ. (ອ່ານເຢເຣມີ 29:11) ແຕ່ພະເຢໂຫວາຕ່າງຈາກພໍ່ແມ່ທີ່ເປັນມະນຸດ ເພາະເພິ່ນຮູ້ວ່າຈະເກີດຫຍັງຂຶ້ນໃນອະນາຄົດແລະເພິ່ນບອກໄດ້ຢ່າງຖືກຕ້ອງສະເໝີ. ພະເຢໂຫວາໃຫ້ມີຄຳພະຍາກອນຫຼາຍເລື່ອງໃນຄຳພີໄບເບິນເພື່ອໃຫ້ເຮົາຮູ້ວ່າຈະມີເຫດການທີ່ສຳຄັນຫຍັງແດ່ເກີດຂຶ້ນ. (ອຊຢ. 46:10) ດັ່ງນັ້ນ ຄຳພະຍາກອນໃນຄຳພີໄບເບິນຈຶ່ງເປັນຄືກັບຂອງຂວັນຈາກພໍ່ທີ່ຮັກຂອງເຮົາທີ່ຢູ່ໃນສະຫວັນ. ແຕ່ເຮົາຈະໝັ້ນໃຈໄດ້ແນວໃດວ່າສິ່ງທີ່ຄຳພີໄບເບິນບອກລ່ວງໜ້າຈະເກີດຂຶ້ນແທ້?
5. ໄວລຸ້ນໄດ້ບົດຮຽນຫຍັງຈາກຕົວຢ່າງຂອງແມັກຊ໌?
5 ໃນຫຼາຍປະເທດ ໄວລຸ້ນພະຍານທີ່ຢູ່ໂຮງຮຽນຈະຢູ່ກັບຄົນທີ່ນັບຖືຄຳພີໄບເບິນໜ້ອຍໜຶ່ງຫຼືບໍ່ນັບຖືຄຳພີໄບເບິນເລີຍ. ດັ່ງນັ້ນ ສິ່ງທີ່ເຂົາເຈົ້າເວົ້າແລະເຮັດອາດຈະເຮັດໃຫ້ໄວລຸ້ນພະຍານຂອງເຮົາສົງໄສກ່ຽວກັບຄວາມເຊື່ອຂອງເຂົາເຈົ້າ. ໃຫ້ເຮົາມາເບິ່ງຕົວຢ່າງຂອງພີ່ນ້ອງຊາຍຄົນໜຶ່ງທີ່ຊື່ແມັກຊ໌. ລາວເລົ່າວ່າ “ຕອນທີ່ຂ້ອຍເປັນໄວລຸ້ນ ຂ້ອຍເລີ່ມສົງໄສວ່າສາສະໜາທີ່ພໍ່ແມ່ສອນເປັນສາສະໜາແທ້ຫຼືບໍ່ ແລະຄຳພີໄບເບິນມາຈາກພະເຈົ້າແທ້ບໍ?” ພໍ່ແມ່ຂອງແມັກຊ໌ໄດ້ເຮັດແນວໃດ? ແມັກຊ໌ເວົ້າວ່າ “ເມື່ອຂ້ອຍເວົ້າແບບນັ້ນ ພໍ່ແມ່ກໍຮູ້ສຶກບໍ່ສະບາຍໃຈ ແຕ່ກໍບໍ່ໄດ້ສະແດງອາການຕົກໃຈອອກມາ.” ເຂົາເຈົ້າໄດ້ໃຊ້ຄຳພີໄບເບິນຕອບຂໍ້ສົງໄສຂອງລາວ ແລະແມັກຊ໌ກໍໄດ້ລົງມືເຮັດຫຍັງບາງຢ່າງຄືກັນ. ແມັກຊ໌ບອກວ່າ “ຂ້ອຍໄດ້ສຶກສາຄົ້ນຄວ້າຄຳພະຍາກອນໃນຄຳພີໄບເບິນດ້ວຍໂຕເອງ ແລ້ວເອົາເລື່ອງນັ້ນໄປລົມກັບໄວລຸ້ນຄົນອື່ນໃນປະຊາຄົມ.” ຜົນເປັນແນວໃດ? ແມັກຊ໌ເວົ້າວ່າ “ຕັ້ງແຕ່ນັ້ນມາ ຂ້ອຍກໍໝັ້ນໃຈວ່າຄຳພີໄບເບິນມາຈາກພະເຈົ້າ.”
6. ຖ້າເຈົ້າສົງໄສວ່າສິ່ງທີ່ຂຽນໄວ້ໃນຄຳພີໄບເບິນເປັນຄວາມຈິງຫຼືບໍ່ ເຈົ້າຕ້ອງເຮັດຫຍັງ? ແລະຍ້ອນຫຍັງ?
6 ຖ້າເຈົ້າເລີ່ມສົງໄສຄືກັນກັບແມັກຊ໌ວ່າສິ່ງທີ່ຢູ່ໃນຄຳພີໄບເບິນເປັນຄວາມຈິງຫຼືບໍ່ ເຈົ້າກໍບໍ່ຕ້ອງຮູ້ສຶກຜິດ. ແຕ່ໃຫ້ເຈົ້າລົງມືເຮັດຫຍັງບາງຢ່າງທັນທີ. ຄວາມສົງໄສເປັນຄືກັບຂີ້ໝ້ຽງ. ຖ້າເຮົາປ່ອຍໄວ້ ມັນກໍອາດຈະຄ່ອຍໆກັດກິນຫຼືທຳລາຍສິ່ງທີ່ມີຄ່າໄດ້ ແລະເພື່ອທີ່ເຮົາຈະກຳຈັດ “ຂີ້ໝ້ຽງ” ທີ່ກັດກິນຄວາມເຊື່ອຂອງເຮົາ ເຮົາກໍຕ້ອງເລີ່ມໂດຍການຖາມໂຕເອງວ່າ ‘ຂ້ອຍເຊື່ອສິ່ງທີ່ຄຳພີໄບເບິນບອກກ່ຽວກັບອະນາຄົດບໍ?’ ຖ້າເຈົ້າຍັງບໍ່ແນ່ໃຈ ກໍໃຫ້ສຶກສາຄົ້ນຄວ້າຄຳພະຍາກອນໃນຄຳພີໄບເບິນທີ່ເກີດຂຶ້ນແລ້ວ. ແລ້ວເຈົ້າຈະເຮັດແບບນັ້ນໄດ້ແນວໃດ?
ສິ່ງທີ່ຈະຊ່ວຍໃຫ້ເຂົ້າໃຈຄຳພະຍາກອນໃນຄຳພີໄບເບິນ
ເພື່ອເຮົາຈະໄວ້ວາງໃຈພະເຢໂຫວາຄືກັບດານີເອນ ເຮົາຕ້ອງສຶກສາຄຳພະຍາກອນໃນຄຳພີໄບເບິນຢ່າງລະອຽດ ມີຄວາມຖ່ອມ ແລະມີແຮງກະຕຸ້ນທີ່ຖືກຕ້ອງ (ເບິ່ງຂໍ້ 7)
7. ດານີເອນເປັນຕົວຢ່າງແນວໃດໃນການສຶກສາຄົ້ນຄວ້າຄຳພະຍາກອນໃນຄຳພີໄບເບິນ? (ດານີເອນ 12:10) (ເບິ່ງຮູບພາບ)
7 ດານີເອນເປັນຕົວຢ່າງທີ່ດີໃຫ້ກັບເຮົາທຸກຄົນໃນການສຶກສາຄົ້ນຄວ້າຄຳພະຍາກອນໃນຄຳພີໄບເບິນ. ລາວສຶກສາຄົ້ນຄວ້າຄຳພະຍາກອນໃນຄຳພີໄບເບິນດ້ວຍແຮງກະຕຸ້ນທີ່ຖືກຕ້ອງ ນັ້ນກໍຄື: ຍ້ອນລາວຢາກຮູ້ຈັກຄວາມຈິງ. ນອກຈາກນັ້ນ ດານີເອນຍັງມີຄວາມຖ່ອມນຳ. ລາວຍອມຮັບວ່າ ມີແຕ່ພະເຢໂຫວາເທົ່ານັ້ນທີ່ຈະຊ່ວຍຄົນທີ່ຮູ້ຈັກເພິ່ນແລະໃຊ້ຊີວິດຕາມມາດຕະຖານຂອງເພິ່ນໃຫ້ເຂົ້າໃຈຄຳພະຍາກອນໃນຄຳພີໄບເບິນ. (ດນອ. 2:27, 28; ອ່ານດານີເອນ 12:10) ດານີເອນຍັງສະແດງໃຫ້ເຫັນວ່າລາວເປັນຄົນຖ່ອມໂດຍຂໍຄວາມຊ່ວຍເຫຼືອຈາກພະເຢໂຫວາ. (ດນອ. 2:18) ບໍ່ພຽງແຕ່ເທົ່ານັ້ນ ດານີເອນຍັງໄດ້ສຶກສາຄົ້ນຄວ້າຄຳພະຍາກອນໃນຄຳພີໄບເບິນຢ່າງລະອຽດນຳ. ລາວໄດ້ຄົ້ນຄວ້າຂໍ້ພະຄຳພີຕ່າງໆທີ່ລາວມີໃນສະໄໝນັ້ນ. (ຢເຣ. 25:11, 12; ດນອ. 9:2) ແລ້ວເຈົ້າຈະຮຽນແບບດານີເອນແນວໃດ?
8. ບາງຄົນສຶກສາຄຳພະຍາກອນໃນຄຳພີໄບເບິນຍ້ອນຫຍັງ? ແຕ່ເຮົາຄວນສຶກສາດ້ວຍແຮງກະຕຸ້ນແບບໃດ?
8 ກວດເບິ່ງແຮງກະຕຸ້ນຂອງໂຕເອງ. ແຮງກະຕຸ້ນທີ່ເຈົ້າສຶກສາຄຳພະຍາກອນໃນຄຳພີໄບເບິນແມ່ນຍ້ອນຢາກຮູ້ຈັກຄວາມຈິງບໍ? ຖ້າແມ່ນ ພະເຢໂຫວາຈະຊ່ວຍເຈົ້າ. (ຢຮ. 4:23, 24; 14:16, 17) ແຕ່ບາງຄົນສຶກສາຄົ້ນຄວ້າຄຳພະຍາກອນໃນຄຳພີໄບເບິນຍ້ອນເຫດຜົນອື່ນ. ເຂົາເຈົ້າຢາກຈະພິສູດວ່າຄຳພີໄບເບິນບໍ່ໄດ້ມາຈາກພະເຢໂຫວາເພື່ອທີ່ເຂົາເຈົ້າຈະໄດ້ຕັດສິນໃຈເອົາເອງວ່າອັນໃດຖືກອັນໃດຜິດແລະເຮັດໃນສິ່ງທີ່ໂຕເອງຢາກເຮັດ. ແຕ່ເຮົາຕ້ອງບໍ່ເປັນແບບນັ້ນ. ເຮົາຕ້ອງສຶກສາຄົ້ນຄວ້າຄຳພະຍາກອນໃນຄຳພີໄບເບິນດ້ວຍແຮງກະຕຸ້ນທີ່ຖືກຕ້ອງ. ນອກຈາກນັ້ນ ຍັງມີຄຸນລັກສະນະທີ່ສຳຄັນອີກຢ່າງໜຶ່ງທີ່ຈະຊ່ວຍເຮົາໃຫ້ເຂົ້າໃຈຄຳພະຍາກອນໃນຄຳພີໄບເບິນ.
9. ເຮົາຕ້ອງມີຄຸນລັກສະນະຫຍັງເພື່ອຈະເຂົ້າໃຈຄຳພະຍາກອນໃນຄຳພີໄບເບິນ? ຂໍໃຫ້ອະທິບາຍ.
9 ມີຄວາມຖ່ອມ. ພະເຢໂຫວາສັນຍາວ່າຈະຊ່ວຍຄົນຖ່ອມ. (ຢກບ. 4:6) ດັ່ງນັ້ນ ເຮົາຈຶ່ງຕ້ອງອະທິດຖານຂໍໃຫ້ພະເຢໂຫວາຊ່ວຍເຮົາໃຫ້ເຂົ້າໃຈຄຳພະຍາກອນໃນຄຳພີໄບເບິນ. ນອກຈາກນັ້ນ ເຮົາຕ້ອງຍອມຮັບຄວາມຊ່ວຍເຫຼືອຈາກທາດທີ່ສັດຊື່ແລະສຸຂຸມທີ່ພະເຢໂຫວາໄດ້ໃຊ້ເພື່ອໃຫ້ຄວາມຮູ້ທີ່ເສີມຄວາມເຊື່ອກັບເຮົາຕາມເວລາທີ່ເໝາະສົມ. (ລກ. 12:42) ພະເຢໂຫວາເປັນພະເຈົ້າທີ່ມີລະບຽບ. ນີ້ຈຶ່ງມີເຫດຜົນທີ່ເຮົາຈະເຊື່ອວ່າເພິ່ນຈະໃຊ້ແຕ່ຊ່ອງທາງນີ້ເທົ່ານັ້ນເພື່ອຈະຊ່ວຍເຮົາໃຫ້ເຂົ້າໃຈຄວາມຈິງໃນຄຳພີໄບເບິນ.—1ກຣ. 14:33; ອຟຊ. 4:4-6
10. ເຈົ້າໄດ້ຮຽນຫຍັງຈາກປະສົບການຂອງເອັດສະເທີ?
10 ສຶກສາຄົ້ນຄວ້າຢ່າງລະອຽດ. ໃຫ້ເລືອກຄຳພະຍາກອນເລື່ອງໜຶ່ງທີ່ເຈົ້າສົນໃຈເປັນພິເສດແລະສຶກສາເລື່ອງນັ້ນຢ່າງລະອຽດ. ເອັດສະເທີທີ່ເວົ້າເຖິງໃນບົດຄວາມກ່ອນໜ້ານັ້ນໄດ້ເຮັດແບບນີ້. ລາວສົນໃຈຄຳພະຍາກອນທີ່ເວົ້າເຖິງເມຊີອາ. ລາວເວົ້າວ່າ “ຕອນຂ້ອຍອາຍຸ 15 ປີ ຂ້ອຍໄດ້ເລີ່ມຄົ້ນຄວ້າເພື່ອໃຫ້ໂຕເອງໝັ້ນໃຈວ່າຄຳພະຍາກອນເຫຼົ່ານີ້ທັງໝົດຂຽນຂຶ້ນກ່ອນພະເຢຊູມາເກີດແທ້.” ສິ່ງທີ່ໄດ້ອ່ານຈາກມ້ວນໜັງສືທະເລຕາຍກໍແຮ່ງເຮັດໃຫ້ລາວໝັ້ນໃຈເລື່ອງນີ້ຫຼາຍຂຶ້ນ. ລາວເລົ່າວ່າ “ມ້ວນໜັງສືທະເລຕາຍບາງມ້ວນຂຽນຂຶ້ນກ່ອນສະໄໝພະເຢຊູ. ດັ່ງນັ້ນ ຄຳພະຍາກອນທີ່ຢູ່ໃນມ້ວນໜັງສືເຫຼົ່ານັ້ນກໍຕ້ອງມາຈາກພະເຈົ້າແທ້ໆ.” ເອັດສະເທີຍອມຮັບວ່າ “ຂ້ອຍຕ້ອງໃຊ້ເວລາອ່ານຫຼາຍຮອບຊົ່ວຊິເຂົ້າໃຈ.” ແຕ່ລາວກໍດີໃຈທີ່ໄດ້ພະຍາຍາມເຮັດແບບນັ້ນ. ຫຼັງຈາກທີ່ເອັດສະເທີໄດ້ສຶກສາຄຳພະຍາກອນຢ່າງລະອຽດຖີ່ຖ້ວນແລ້ວ ລາວກໍບອກວ່າ “ຂ້ອຍເຫັນເລີຍວ່າຄຳພີໄບເບິນເປັນຄວາມຈິງ!”
11. ເປັນຫຍັງຈຶ່ງເປັນເລື່ອງດີທີ່ເຮົາຈະເຮັດໃຫ້ໂຕເອງໝັ້ນໃຈວ່າຄຳພີໄບເບິນເປັນຄວາມຈິງ?
11 ເມື່ອເຮົາເຫັນວ່າຄຳພະຍາກອນໃນຄຳພີໄບເບິນເກີດຂຶ້ນແທ້ ກໍແຮ່ງເຮັດໃຫ້ເຮົາໄວ້ວາງໃຈພະເຢໂຫວາເຕັມທີແລະໝັ້ນໃຈວ່າຄຳແນະນຳຂອງເພິ່ນດີທີ່ສຸດສະເໝີ. ນອກຈາກນັ້ນ ຄຳພະຍາກອນໃນຄຳພີໄບເບິນຍັງຊ່ວຍເຮົາໃຫ້ມີຄວາມຫວັງໃນອະນາຄົດແລະຄິດໃນແງ່ບວກບໍ່ວ່າເຮົາຈະເຈິບັນຫາຫຍັງກໍຕາມໃນຕອນນີ້. ໃຫ້ເຮົາມາເບິ່ງຄຳພະຍາກອນ 2 ເລື່ອງຂອງດານີເອນທີ່ກຳລັງເກີດຂຶ້ນແທ້ໃນຕອນນີ້. ການເຂົ້າໃຈຄຳພະຍາກອນເຫຼົ່ານີ້ຈະຊ່ວຍເຮົາໃຫ້ຕັດສິນໃຈໄດ້ຢ່າງສະຫຼາດ.
ຄຳພະຍາກອນກ່ຽວກັບຮູບປັ້ນທີ່ມີຕີນເປັນເຫຼັກປົນກັບດິນດາກມີຜົນຕໍ່ເຈົ້າແນວໃດ?
12. ຕີນຂອງຮູບປັ້ນທີ່ມີ “ເຫຼັກປົນກັບດິນດາກທີ່ອ່ອນໆ” ໝາຍເຖິງຫຍັງ? (ດານີເອນ 2:41-43)
12 ອ່ານດານີເອນ 2:41-43. ກະສັດເນບູກາດເນັດຊາຝັນເຫັນຮູບປັ້ນທີ່ມີຕີນເປັນ “ເຫຼັກປົນກັບດິນດາກທີ່ອ່ອນໆ.” ເມື່ອເຮົາສົມທຽບຄຳພະຍາກອນນີ້ກັບຄຳພະຍາກອນອື່ນໆທີ່ຢູ່ໃນປຶ້ມດານີເອນແລະພະນິມິດ ເຮົາກໍເຂົ້າໃຈວ່າສ່ວນທີ່ເປັນຕີນຂອງຮູບປັ້ນໝາຍເຖິງມະຫາອຳນາດອັງກິດ-ອາເມຣິກາ ເຊິ່ງເປັນການປົກຄອງທີ່ມີອຳນາດຫຼາຍທີ່ສຸດໃນສະໄໝຂອງເຮົາ. ດານີເອນເວົ້າເຖິງມະຫາອຳນາດນີ້ວ່າ “ອານາຈັກນີ້ກໍຈະມີສ່ວນທີ່ເຂັ້ມແຂງແລະມີສ່ວນທີ່ອ່ອນແອ.” ເປັນຫຍັງຈຶ່ງມີສ່ວນທີ່ອ່ອນແອ? ກໍຍ້ອນວ່າປະຊາຊົນທົ່ວໄປເຊິ່ງເປັນຄືກັບດິນດາກທີ່ອ່ອນໆເຮັດໃຫ້ອຳນາດທີ່ເຂັ້ມແຂງຄືກັບເຫຼັກຂອງມະຫາອຳນາດນີ້ອ່ອນລົງ. b
13. ເຮົາໄດ້ຮຽນຄວາມຈິງທີ່ສຳຄັນຫຍັງແດ່ຈາກການເຂົ້າໃຈຄຳພະຍາກອນເລື່ອງນີ້?
13 ເຮົາໄດ້ຮຽນຄວາມຈິງທີ່ສຳຄັນຫຼາຍເລື່ອງຈາກຄວາມຝັນກ່ຽວກັບຮູບປັ້ນ ໂດຍສະເພາະໃນສ່ວນຕີນຂອງຮູບປັ້ນນັ້ນ. ຢ່າງທີໜຶ່ງທີ່ເຮົາໄດ້ຮຽນກໍຄື: ມະຫາອຳນາດອັງກິດ-ອາເມຣິກາເຂັ້ມແຂງແລະມີອຳນາດຍ້ອນມະຫາອຳນາດນີ້ຢູ່ໃນກຸ່ມປະເທດທີ່ຊະນະໃນສົງຄາມໂລກຄັ້ງທີ I ແລະຄັ້ງທີ II ແຕ່ມະຫາອຳນາດນີ້ກໍອ່ອນແອແລະຈະອ່ອນແອລົງເລື້ອຍໆຍ້ອນປະຊາຊົນຂັດແຍ້ງກັນເອງແລະຕໍ່ຕ້ານອຳນາດການປົກຄອງ. ຢ່າງທີສອງທີ່ເຮົາໄດ້ຮຽນກໍຄື: ມະຫາອຳນາດອັງກິດ-ອາເມຣິກາຈະເປັນມະຫາອຳນາດສຸດທ້າຍທີ່ປົກຄອງໂລກນີ້ກ່ອນທີ່ການປົກຄອງຂອງພະເຈົ້າຈະມາທຳລາຍການປົກຄອງທັງໝົດຂອງມະນຸດ. ເຖິງວ່າບາງເທື່ອຈະມີຊາດອື່ນໆພະຍາຍາມຕໍ່ສູ້ກັບອັງກິດ-ອາເມຣິກາ ແຕ່ຊາດເຫຼົ່ານັ້ນກໍບໍ່ສາມາດມາແທນທີ່ມະຫາອຳນາດນີ້ໄດ້. ເຮົາຮູ້ວ່າອັງກິດແລະອາເມຣິກາຈະເປັນມະຫາອຳນາດສຸດທ້າຍກໍຍ້ອນ “ຫີນ” ເຊິ່ງໝາຍເຖິງການປົກຄອງຂອງພະເຈົ້າຈະມາທຳລາຍສ່ວນຕີນຂອງຮູບປັ້ນນັ້ນ.—ດນອ. 2:34, 35, 44, 45
14. ການເຂົ້າໃຈຄຳພະຍາກອນກ່ຽວກັບຕີນຂອງຮູບປັ້ນຊ່ວຍເຮົາໃຫ້ຕັດສິນໃຈຢ່າງສະຫຼາດແນວໃດ?
14 ເຈົ້າໝັ້ນໃຈບໍວ່າຄຳພະຍາກອນຂອງດານີເອນທີ່ເວົ້າກ່ຽວກັບສ່ວນຕີນຂອງຮູບປັ້ນທີ່ມີເຫຼັກປົນກັບດິນດາກເປັນເລື່ອງຈິງ? ຖ້າເຈົ້າໝັ້ນໃຈແບບນັ້ນ ມັນກໍຈະສົ່ງຜົນຕໍ່ການໃຊ້ຊີວິດຂອງເຈົ້າ. ເຈົ້າຈະບໍ່ພະຍາຍາມຊອກຫາວັດຖຸເງິນຄຳຫຼາຍເກີນໄປ ຍ້ອນເຈົ້າຮູ້ວ່າອີກບໍ່ດົນໂລກຊົ່ວນີ້ຈະຖືກທຳລາຍ. (ລກ. 12:16-21; 1ຢຮ. 2:15-17) ນອກຈາກນັ້ນ ການເຂົ້າໃຈຄຳພະຍາກອນເລື່ອງນີ້ຈະຊ່ວຍເຈົ້າໃຫ້ເຫັນວ່າການປະກາດແລະການສອນຄຳພີໄບເບິນສຳຄັນສ່ຳໃດ. (ມທ. 6:33; 28:18-20) ດັ່ງນັ້ນ ຫຼັງຈາກທີ່ເຈົ້າສຶກສາຄົ້ນຄວ້າຄຳພະຍາກອນນີ້ແລ້ວໃຫ້ຖາມໂຕເອງວ່າ ‘ການຕັດສິນໃຈເລື່ອງຕ່າງໆໃນຊີວິດຂອງຂ້ອຍສະແດງໃຫ້ເຫັນບໍວ່າຂ້ອຍໝັ້ນໃຈວ່າການປົກຄອງຂອງພະເຈົ້າຈະທຳລາຍການປົກຄອງທັງໝົດຂອງມະນຸດ?’
ຄຳພະຍາກອນກ່ຽວກັບ “ກະສັດທິດເໜືອແລະກະສັດທິດໃຕ້” ມີຜົນຕໍ່ເຈົ້າແນວໃດ?
15. ໃຜເປັນ “ກະສັດທິດເໜືອ” ແລະ “ກະສັດທິດໃຕ້” ໃນທຸກມື້ນີ້? (ດານີເອນ 11:40)
15 ອ່ານດານີເອນ 11:40. ປຶ້ມດານີເອນບົດ 11 ເວົ້າເຖິງກະສັດ 2 ອົງເຊິ່ງກໍຄືອຳນາດທາງການເມືອງທີ່ຂັດແຍ້ງກັນເພື່ອຈະປົກຄອງໂລກນີ້. ເມື່ອເຮົາສົມທຽບຄຳພະຍາກອນນີ້ກັບຄຳພະຍາກອນອື່ນໆໃນຄຳພີໄບເບິນ ເຮົາກໍຮູ້ວ່າ “ກະສັດທິດເໜືອ” ໃນທຸກມື້ນີ້ແມ່ນຣັດເຊຍແລະຊາດພັນທະມິດ. ສ່ວນ “ກະສັດທິດໃຕ້” ແມ່ນມະຫາອຳນາດໂລກອັງກິດ-ອາເມຣິກາ. c
ເຮົາຈະມີຄວາມເຊື່ອຫຼາຍຂຶ້ນແລະບໍ່ກັງວົນເກີນໄປຖ້າເຮົາຈື່ໄວ້ວ່າ ການທີ່ “ກະສັດທິດເໜືອ” ກັບ “ກະສັດທິດໃຕ້” ຕໍ່ສູ້ກັນເຮັດໃຫ້ຄຳພະຍາກອນໃນຄຳພີໄບເບິນເກີດຂຶ້ນແທ້ (ເບິ່ງຂໍ້ 16-18)
16. ຄົນຂອງພະເຈົ້າທີ່ຢູ່ໃນເຂດປົກຄອງຂອງ “ກະສັດທິດເໜືອ” ເຈິກັບບັນຫາຫຍັງແດ່?
16 ຄົນຂອງພະເຈົ້າທີ່ຢູ່ໃນເຂດການປົກຄອງຂອງ “ກະສັດທິດເໜືອ” ເຈິກັບການຂົ່ມເຫງໂດຍກົງຈາກການປົກຄອງນີ້. ພະຍານພະເຢໂຫວາບາງຄົນຖືກຕີແລະຖືກຈັບເຂົ້າຄຸກຍ້ອນຄວາມເຊື່ອ. ແຕ່ແທນທີ່ພີ່ນ້ອງຈະຢ້ານການຂົ່ມເຫງທີ່ມາຈາກ “ກະສັດທິດເໜືອ” ເຂົາເຈົ້າພັດແຮ່ງມີຄວາມເຊື່ອຫຼາຍຂຶ້ນ. ຍ້ອນຫຍັງ? ຍ້ອນເຂົາເຈົ້າຮູ້ວ່າການຂົ່ມເຫງປະຊາຊົນຂອງພະເຈົ້າໄດ້ເກີດຂຶ້ນແທ້ຕາມທີ່ດານີເອນພະຍາກອນໄວ້. d (ດນອ. 11:41) ນອກຈາກນັ້ນ ການຮູ້ເລື່ອງນີ້ຊ່ວຍເຮົາໃຫ້ໝັ້ນໃຈໃນຄວາມຫວັງແລະຕັ້ງໃຈທີ່ຈະສັດຊື່ຕໍ່ພະເຢໂຫວາຕໍ່ໆໄປ.
17. ຄົນຂອງພະເຈົ້າທີ່ຢູ່ໃນເຂດການປົກຄອງຂອງ “ກະສັດທິດໃຕ້” ເຈິກັບບັນຫາຫຍັງແດ່?
17 ໃນອະດີດ “ກະສັດທິດໃຕ້” ກໍຂົ່ມເຫງຄົນຂອງພະເຈົ້າຄືກັນ. ຕົວຢ່າງ: ໃນລະຫວ່າງສົງຄາມໂລກຄັ້ງທີ I ແລະ ຄັ້ງທີ II ພະຍານພະເຢໂຫວາຫຼາຍຄົນຖືກຈັບເຂົ້າຄຸກຍ້ອນຮັກສາຄວາມເປັນກາງ ເຊັ່ນ ເຂົາເຈົ້າບໍ່ຍອມເປັນທະຫານ ແລະເດັກນ້ອຍບາງຄົນກໍຖືກໄລ່ອອກຈາກໂຮງຮຽນຍ້ອນບໍ່ເຄົາລົບທຸງຊາດ. ຫຼັງຈາກຊ່ວງເວລານັ້ນຈົນຮອດທຸກມື້ນີ້ ຄົນຂອງພະເຢໂຫວາທີ່ຢູ່ໃນເຂດປົກຄອງຂອງ “ກະສັດທິດໃຕ້” ກໍເຈິການທົດສອບອີກແບບໜຶ່ງ ເຊັ່ນ ໃນລະຫວ່າງການເລືອກຕັ້ງ ພີ່ນ້ອງບາງຄົນອາດຮູ້ສຶກຢາກເລືອກເຂົ້າຂ້າງພັກການເມືອງໃດໜຶ່ງ ຫຼືຮູ້ສຶກມັກຜູ້ສະໝັກເລືອກຕັ້ງຄົນໃດຄົນໜຶ່ງເປັນພິເສດ. ເຖິງວ່າລາວອາດຈະບໍ່ໄດ້ປ່ອນບັດເລືອກຕັ້ງ ແຕ່ລາວອາດຈະເລືອກເຂົ້າຂ້າງຝ່າຍໃດຝ່າຍໜຶ່ງໃນໃຈກໍໄດ້. ດັ່ງນັ້ນ ເພື່ອເຮົາຈະຮັກສາຄວາມເປັນກາງແທ້ໆເຮົາຕ້ອງລະວັງບໍ່ພຽງແຕ່ສິ່ງທີ່ເຮົາເຮັດ ແຕ່ຕ້ອງລະວັງສິ່ງທີ່ເຮົາຄິດແລະຮູ້ສຶກນຳ!—ຢຮ. 15:18, 19; 18:36
18. ເຮົາຄວນຮູ້ສຶກແນວໃດເມື່ອເຫັນ “ກະສັດທິດເໜືອ” ແລະ “ກະສັດທິດໃຕ້” ຕໍ່ສູ້ກັນ? (ເບິ່ງຮູບພາບ)
18 ຄົນທີ່ບໍ່ເຊື່ອໃນຄຳພະຍາກອນໃນຄຳພີໄບເບິນອາດຮູ້ສຶກກັງວົນເມື່ອເຫັນ “ກະສັດທິດເໜືອ” ກັບ “ກະສັດທິດໃຕ້” ຕໍ່ສູ້ກັນ ເພາະກະສັດທັງ 2 ອົງນີ້ມີອາວຸດນິວເຄຼຍຫຼາຍພໍທີ່ຈະທຳລາຍທຸກຊີວິດຢູ່ໃນໂລກນີ້ໄດ້. (ດນອ. 11:40) ແຕ່ເຮົາຮູ້ວ່າພະເຢໂຫວາຈະບໍ່ຍອມໃຫ້ເລື່ອງນີ້ເກີດຂຶ້ນ. (ອຊຢ. 45:18) ດັ່ງນັ້ນ ແທນທີ່ພວກເຮົາຈະຮູ້ສຶກກັງວົນເມື່ອເຫັນ “ກະສັດທິດເໜືອ” ຕໍ່ສູ້ກັບ “ກະສັດທິດໃຕ້” ເຮົາພັດມີຄວາມເຊື່ອຫຼາຍຂຶ້ນ ເພາະມັນເຮັດໃຫ້ເຮົາໝັ້ນໃຈວ່າຈຸດຈົບຂອງໂລກຊົ່ວນີ້ໃກ້ຈະມາຮອດແລ້ວ.
ຕັ້ງໃຈສຶກສາຄຳພະຍາກອນໃນຄຳພີໄບເບິນຕໍ່ໆໄປ
19. ເຮົາຄວນເຂົ້າໃຈເລື່ອງຫຍັງກ່ຽວກັບຄຳພະຍາກອນໃນຄຳພີໄບເບິນ?
19 ເຮົາບໍ່ຮູ້ວ່າຄຳພະຍາກອນບາງເລື່ອງໃນຄຳພີໄບເບິນຈະເກີດຂຶ້ນແທ້ແນວໃດ. ແມ່ນແຕ່ຜູ້ພະຍາກອນດານີເອນກໍຍັງບໍ່ເຂົ້າໃຈທັງໝົດກ່ຽວກັບສິ່ງທີ່ລາວຂຽນໃນຄຳພີໄບເບິນ. (ດນອ. 12:8, 9) ແຕ່ເຖິງວ່າເຮົາຈະບໍ່ຮູ້ວ່າຄຳພະຍາກອນໃນຄຳພີໄບເບິນຈະເກີດຂຶ້ນແທ້ແນວໃດ ແຕ່ກໍບໍ່ໄດ້ໝາຍຄວາມວ່າມັນຈະບໍ່ເປັນຄວາມຈິງ. ເຮົາໝັ້ນໃຈໄດ້ວ່າພະເຢໂຫວາຈະຊ່ວຍເຮົາໃຫ້ເຂົ້າໃຈສິ່ງທີ່ເຮົາຈຳເປັນຕ້ອງຮູ້ໃນເວລາທີ່ເໝາະສົມຄືກັບທີ່ເພິ່ນເຄີຍເຮັດໃນອະດີດ.—ອມ. 3:7
20. ເຮົາຈະໄດ້ເຫັນຄຳພະຍາກອນໃນຄຳພີໄບເບິນເລື່ອງໃດແດ່ເກີດຂຶ້ນແທ້? ແລະເຮົາຄວນເຮັດຫຍັງຕໍ່ໆໄປ?
20 ຕອນທີ່ມີການປະກາດວ່າ “ສະຫງົບສຸກແລະປອດໄພແລ້ວ!” (1ທຊ. 5:3) ອຳນາດທາງການເມືອງກໍຈະໂຈມຕີສາສະໜາປອມແລະທຳລາຍມັນໃຫ້ສິ້ນຊາກ. (ພນມ. 17:16, 17) ຈາກນັ້ນ ອຳນາດທາງການເມືອງກໍຈະໂຈມຕີຄົນຂອງພະເຈົ້າ. (ເອເຊກ. 38:18, 19) ແລ້ວສົງຄາມອາມາເຄໂດນກໍຈະເລີ່ມຕົ້ນຂຶ້ນ. (ພນມ. 16:14, 16) ເຮົາໝັ້ນໃຈໄດ້ວ່າເຫດການທັງໝົດຈະເກີດຂຶ້ນໃນໄວໆນີ້. ແຕ່ໃນລະຫວ່າງນັ້ນ ໃຫ້ເຮົາສະແດງຄວາມຂອບໃຈຕໍ່ພະເຢໂຫວາພໍ່ທີ່ຮັກຂອງເຮົາໃນສະຫວັນໂດຍຕັ້ງໃຈສຶກສາຄຳພະຍາກອນໃນຄຳພີໄບເບິນແລະຊ່ວຍຄົນອື່ນໃຫ້ເຮັດແບບນັ້ນຄືກັນ.
ເພງ 95 ແສງສະຫວ່າງທີ່ແຮງກ້າຂຶ້ນ
a ບໍ່ວ່າສະພາບການຂອງໂລກຈະຮ້າຍແຮງສ່ຳໃດ ແຕ່ເຮົາກໍໝັ້ນໃຈໄດ້ວ່າອີກບໍ່ດົນສິ່ງຕ່າງໆຈະດີຂຶ້ນ. ເຮົາຈະມີຄວາມໝັ້ນໃຈແບບນັ້ນໄດ້ໂດຍການສຶກສາຄຳພະຍາກອນໃນຄຳພີໄບເບິນ. ໃນບົດຄວາມນີ້ເຮົາຈະມາເບິ່ງເຫດຜົນທີ່ເຮົາຄວນສຶກສາຄຳພະຍາກອນໃນຄຳພີໄບເບິນ ແລະເຮົາຍັງຈະມາເບິ່ງຄຳພະຍາກອນ 2 ເລື່ອງທີ່ດານີເອນຂຽນໄວ້. ນອກຈາກນັ້ນ ເຮົາຈະມາເບິ່ງອີກວ່າການເຂົ້າໃຈຄຳພະຍາກອນເຫຼົ່ານັ້ນເປັນປະໂຫຍດກັບເຮົາແນວໃດ.
