ບົດຄວາມສຶກສາທີ 17
ພະເຢໂຫວາຮັກເຮົາຫຼາຍແທ້ໆ!
“ພະເຢໂຫວາຮັກປະຊາຊົນຂອງພະອົງ.”—2 ຂ່າວ. 2:11, ລ.ມ.
ເພງ 108 ຄວາມຮັກທີ່ໝັ້ນຄົງຂອງພະເຈົ້າ
ໃຈຄວາມສຳຄັນ *
ພະເຢໂຫວາພໍ່ທີ່ຢູ່ໃນສະຫວັນ “ຮັກ” ເຮົາແຕ່ລະຄົນ (ເບິ່ງຂໍ້ 1)
1. ພະເຢໂຫວາເຫັນຫຍັງໃນໂຕເຮົາ?
ພະເຢໂຫວາ “ຮັກປະຊາຊົນຂອງພະອົງ.” (2 ຂ່າວ. 2:11, ລ.ມ.) ນີ້ເຮັດໃຫ້ເຮົາດີໃຈຫຼາຍແທ້ໆ! ພະເຢໂຫວາເຫັນຈຸດດີໃນໂຕເຮົາ ເຫັນສິ່ງທີ່ເຮົາເຮັດໄດ້ ແລະຢາກໃຫ້ເຮົາເປັນໝູ່ກັບເພິ່ນ. ຖ້າເຮົາສັດຊື່ຕໍ່ເພິ່ນສະເໝີ ເພິ່ນກໍຈະເປັນໝູ່ກັບເຮົາຕະຫຼອດໄປ!—ຢຮ. 6:44
2. ເປັນຫຍັງພີ່ນ້ອງບາງຄົນຈຶ່ງບໍ່ໝັ້ນໃຈວ່າພະເຢໂຫວາຮັກເຂົາເຈົ້າ?
2 ບາງຄົນອາດຄິດວ່າ: ‘ຂ້ອຍຮູ້ວ່າພະເຢໂຫວາຮັກປະຊາຊົນຂອງເພິ່ນ ແຕ່ຂ້ອຍຈະຮູ້ໄດ້ແນວໃດວ່າເພິ່ນຮັກຂ້ອຍເປັນສ່ວນໂຕ?’ ເປັນຫຍັງບາງຄົນຈຶ່ງຄິດແບບນັ້ນ? ອັອກຊານາ * ເຊິ່ງເຄີຍເຈິເລື່ອງທີ່ບໍ່ດີຕອນຍັງນ້ອຍບອກວ່າ: “ຂ້ອຍມີຄວາມສຸກຫຼາຍຕອນທີ່ຮັບບັບເຕມາແລະເລີ່ມເປັນໄພໂອເນຍ. ແຕ່ 15 ປີຕໍ່ມາຂ້ອຍພັດຄິດເຖິງເລື່ອງທີ່ບໍ່ດີທີ່ເຄີຍເຈິຕອນຍັງນ້ອຍອີກ. ນີ້ເຮັດໃຫ້ຂ້ອຍເລີ່ມຄິດວ່າ ພະເຢໂຫວາຄືຊິບໍ່ພໍໃຈຂ້ອຍແລະບໍ່ຮັກຂ້ອຍແລ້ວ.” ພີ່ນ້ອງຍິງຊື່ຢົວເຊິ່ງເປັນໄພໂອເນຍກໍເຄີຍເຈິເລື່ອງທີ່ບໍ່ດີຫຼາຍຢ່າງຕອນຍັງນ້ອຍຄືກັນ. ລາວບອກວ່າ: “ຂ້ອຍອຸທິດຊີວິດໃຫ້ພະເຢໂຫວາຍ້ອນຂ້ອຍຢາກເຮັດໃຫ້ເພິ່ນດີໃຈ ແຕ່ຂ້ອຍກໍບໍ່ໝັ້ນໃຈວ່າເພິ່ນຮັກຂ້ອຍແທ້ໆບໍ.”
3. ເຮົາຈະຮຽນຫຍັງໃນບົດຄວາມນີ້?
3 ຄືກັບພີ່ນ້ອງສອງຄົນທີ່ເວົ້າເຖິງກ່ອນໜ້ານີ້ ເຈົ້າຮັກພະເຢໂຫວາຫຼາຍ ແຕ່ເຈົ້າອາດບໍ່ໝັ້ນໃຈວ່າເພິ່ນຮັກເຈົ້າແທ້ບໍ. ເປັນຫຍັງເຮົາຕ້ອງໝັ້ນໃຈວ່າພະເຢໂຫວາຮັກແລະສົນໃຈເຮົາແທ້ໆ? ແລະເຮົາຈະເຮັດແນວໃດຖ້າເຮົາບໍ່ໝັ້ນໃຈວ່າພະເຢໂຫວາຮັກເຮົາ? ໃຫ້ເຮົາມາເບິ່ງຄຳຕອບນຳກັນ.
ເປັນເລື່ອງອັນຕະລາຍຖ້າບໍ່ໝັ້ນໃຈວ່າພະເຢໂຫວາຮັກເຮົາ
4. ເປັນຫຍັງຈຶ່ງເປັນອັນຕະລາຍຖ້າບໍ່ໝັ້ນໃຈວ່າພະເຢໂຫວາຮັກເຮົາ?
4 ຄວາມຮັກເປັນແຮງກະຕຸ້ນທີ່ມີພະລັງຫຼາຍ. ຖ້າເຮົາໝັ້ນໃຈວ່າພະເຢໂຫວາຮັກແລະຊ່ວຍເຫຼືອເຮົາ ເຮົາກໍຈະຮັບໃຊ້ເພິ່ນສຸດຊີວິດເຖິງວ່າເຮົາຈະມີຄວາມຫຍຸ້ງຍາກຫຼາຍປານໃດກໍຕາມ. ແຕ່ຖ້າເຮົາບໍ່ໝັ້ນໃຈວ່າພະເຢໂຫວາຮັກເຮົາ ‘ເຫື່ອແຮງຂອງເຮົາກໍຈະໜ້ອຍ.’ (ສຸພາ. 24:10) ເມື່ອເຮົາທໍ້ໃຈແລະບໍ່ໝັ້ນໃຈວ່າພະເຢໂຫວາຮັກເຮົາຫຼືບໍ່ ເຮົາກໍຈະຕ້ານທານການໂຈມຕີຂອງຊາຕານບໍ່ໄດ້.—ອຟຊ. 6:16
5. ການທີ່ຄິດວ່າພະເຢໂຫວາບໍ່ຮັກ ສົ່ງຜົນຕໍ່ພີ່ນ້ອງແນວໃດ?
5 ພີ່ນ້ອງບາງຄົນມີຄວາມເຊື່ອອ່ອນລົງຍ້ອນເຂົາເຈົ້າເລີ່ມຄິດວ່າພະເຢໂຫວາບໍ່ຮັກແລະບໍ່ສົນໃຈເຂົາເຈົ້າ. ຜູ້ດູແລຄົນໜຶ່ງທີ່ຊື່ເຈມບອກວ່າ: “ເຖິງວ່າຂ້ອຍຈະຮັບໃຊ້ຢູ່ເບເທນແລະມີຄວາມສຸກທີ່ໄດ້ປະກາດກັບປະຊາຄົມທີ່ໃຊ້ພາສາອື່ນ ແຕ່ຂ້ອຍກໍຍັງບໍ່ແນ່ໃຈວ່າພະເຢໂຫວາຈະພໍໃຈກັບສິ່ງທີ່ຂ້ອຍເຮັດໃຫ້ເພິ່ນຫຼືບໍ່. ບາງເທື່ອຂ້ອຍເຖິງຂັ້ນຄິດວ່າພະເຢໂຫວາຈະຟັງຄຳອະທິດຖານຂອງຂ້ອຍບໍ.” ເອວາເຊິ່ງເປັນຜູ້ຮັບໃຊ້ເຕັມເວລາບອກວ່າ: “ເປັນເລື່ອງອັນຕະລາຍຫຼາຍເມື່ອເຮົາບໍ່ໝັ້ນໃຈວ່າພະເຢໂຫວາຮັກເຮົາ ເພາະມັນສົ່ງຜົນຕໍ່ທຸກສິ່ງທີ່ເຮົາເຮັດໃນການຮັບໃຊ້ພະເຢໂຫວາ. ແລະຍັງເຮັດໃຫ້ເຮົາບໍ່ຢາກເຮັດສິ່ງທີ່ເສີມຄວາມເຊື່ອ ແລະບໍ່ມີຄວາມສຸກໃນການຮັບໃຊ້ພະເຢໂຫວາ.” ໄມເຄິນທີ່ເປັນໄພໂອເນຍປະຈຳແລະເປັນຜູ້ດູແລບອກວ່າ: “ຖ້າເຈົ້າບໍ່ໝັ້ນໃຈວ່າພະເຢໂຫວາຮັກແລະຫ່ວງໃຍເຈົ້າ ເຈົ້າກໍຈະຄ່ອຍໆຫ່າງອອກຈາກເພິ່ນ.”
6. ເຮົາຕ້ອງເຮັດຫຍັງຖ້າເຮົາເລີ່ມຄິດວ່າພະເຢໂຫວາບໍ່ຮັກເຮົາ?
6 ຈາກປະສົບການຂອງພີ່ນ້ອງສະແດງໃຫ້ເຫັນວ່າ ຖ້າເຮົາຄິດວ່າພະເຢໂຫວາບໍ່ຮັກເຮົາມັນກໍຈະເປັນອັນຕະລາຍຕໍ່ຄວາມເຊື່ອຂອງເຮົາ. ຄັນຊັ້ນເຮົາຄວນເຮັດແນວໃດຖ້າຮູ້ສຶກວ່າພະເຢໂຫວາບໍ່ຮັກເຮົາ? ເຮົາຕ້ອງເຊົາຄິດແບບນີ້ທັນທີ. ຈາກນັ້ນ ໃຫ້ຂໍພະເຢໂຫວາຊ່ອຍເຮົາໃຫ້ກຳຈັດຄວາມຄິດໃນແງ່ລົບອອກໄປ ແລ້ວເອົາ ‘ສັນຕິສຸກຂອງພະເຈົ້າທີ່ຈະປົກປ້ອງຫົວໃຈແລະຄວາມຄິດ’ ຂອງເຮົາມາໃສ່ແທນ. (ຟລປ. 4:6, 7) ຂໍໃຫ້ຈື່ໄວ້ວ່າບໍ່ໄດ້ມີແຕ່ເຈົ້າຜູ້ດຽວທີ່ຄິດແບບນັ້ນ ເພາະພີ່ນ້ອງຄົນອື່ນໆກໍຄິດແບບນີ້ຄືກັນ. ແມ່ນແຕ່ຜູ້ຮັບໃຊ້ຂອງພະເຢໂຫວາໃນສະໄໝກ່ອນກໍຍັງຕ້ອງຕໍ່ສູ້ກັບຄວາມຮູ້ສຶກແບບນີ້. ໃຫ້ເຮົາມາເບິ່ງວ່າເຮົາໄດ້ບົດຮຽນຫຍັງຈາກເລື່ອງຂອງອັກຄະສາວົກໂປໂລ.
ເຮົາໄດ້ຮຽນຫຍັງຈາກເລື່ອງຂອງໂປໂລ?
7. ໂປໂລມີບັນຫາຫຍັງແດ່?
7 ບາງເທື່ອເຈົ້າຮູ້ສຶກໜັກໃຈຍ້ອນມີວຽກມອບໝາຍຫຼາຍໂພດແລະຮູ້ສຶກວ່າມັນຍາກທີ່ຈະເຮັດບໍ? ຖ້າແມ່ນ ເຈົ້າກໍຈະເຂົ້າໃຈຄວາມຮູ້ສຶກຂອງໂປໂລ. ໂປໂລບໍ່ໄດ້ກັງວົນນຳປະຊາຄົມດຽວ ແຕ່ລາວກັງວົນກັບ “ທຸກໆປະຊາຄົມ.” (2 ກຣ. 11:23-28) ເຈົ້າເປັນພະຍາດຊ້ຳເຮື້ອເຊິ່ງເຮັດໃຫ້ເຈົ້າບໍ່ມີຄວາມສຸກບໍ? ໂປໂລກໍຮູ້ສຶກເຈັບປວດຍ້ອນ “ໜາມຢູ່ໃນຮ່າງກາຍ” ເຊິ່ງອາດຈະເປັນບັນຫາສຸຂະພາບທີ່ລາວຢາກກຳຈັດອອກໄປ. (2 ກຣ. 12:7-10) ບາງເທື່ອເຈົ້າຮູ້ສຶກທໍ້ໃຈຍ້ອນຄວາມບໍ່ສົມບູນແບບຂອງຕົວເອງບໍ? ໂປໂລກໍເຄີຍຮູ້ສຶກແບບນີ້ຄືກັນ ລາວເວົ້າວ່າຕົວເອງ “ເປັນຕາໜ້າສົມເພດ” ຍ້ອນລາວຕ້ອງຕໍ່ສູ້ກັບຄວາມບໍ່ສົມບູນແບບຂອງຕົວເອງ.—ຣມ. 7:21-24
8. ສິ່ງໃດຊ່ອຍໂປໂລໃຫ້ອົດທົນໄດ້ເຖິງວ່າຈະມີບັນຫາຫຼາຍຢ່າງ?
8 ເຖິງວ່າໂປໂລຈະຕ້ອງອົດທົນກັບບັນຫາຫຼາຍຢ່າງ ແຕ່ລາວກໍຍັງຮັບໃຊ້ພະເຢໂຫວາຕໍ່ໆໄປ. ສິ່ງໃດຊ່ອຍລາວໃຫ້ເຮັດແບບນັ້ນໄດ້? ເຖິງວ່າລາວຈະຮູ້ດີວ່າຕົວເອງບໍ່ສົມບູນແບບ ແຕ່ລາວກໍເຊື່ອໃນເລື່ອງຄ່າໄຖ່ຂອງພະເຢຊູ. ລາວໝັ້ນໃຈໃນຄຳສັນຍາຂອງພະເຢຊູທີ່ວ່າ: “ທຸກຄົນ ທີ່ສະແດງຄວາມເຊື່ອໃນ [ພະເຢຊູ] . . . ຈະມີຊີວິດຕະຫຼອດໄປ.” (ຢຮ. 3:16; ຣມ. 6:23) ແນ່ນອນວ່າໂປໂລກໍເປັນຜູ້ໜຶ່ງທີ່ສະແດງຄວາມເຊື່ອໃນຄ່າໄຖ່ຂອງພະເຢຊູ. ດັ່ງນັ້ນ ລາວຈຶ່ງໝັ້ນໃຈວ່າພະເຢໂຫວາພ້ອມທີ່ຈະໃຫ້ອະໄພຄົນທີ່ເຮັດບາບຮ້າຍແຮງຖ້າເຂົາເຈົ້າກັບໃຈແທ້ໆ.—ເພງ. 86:5
9. ເຮົາໄດ້ບົດຮຽນຫຍັງຈາກຄຳເວົ້າຂອງໂປໂລທີ່ຢູ່ໃນຄາລາເຕຍ 2:20?
9 ໂປໂລຍັງເຊື່ອວ່າພະເຢໂຫວາຮັກລາວຫຼາຍແທ້ໆ ເພາະລາວຮູ້ວ່າເພິ່ນສົ່ງພະເຢຊູມາຕາຍເພື່ອລາວ. (ອ່ານຄາລາເຕຍ 2:20) ຂໍໃຫ້ສັງເກດສິ່ງທີ່ໂປໂລເວົ້າທີ່ວ່າ: “ລູກຂອງພະເຈົ້າ . . . ຮັກຂ້ອຍ ແລະສະລະຊີວິດເພື່ອຂ້ອຍ.” ໂປໂລບໍ່ໄດ້ຮູ້ສຶກວ່າຕົວເອງເຮັດບໍ່ດີຫຼາຍຢ່າງຈົນພະເຢໂຫວາບໍ່ຮັກລາວ ແລະບໍ່ໄດ້ຄິດວ່າ: ‘ເປັນຫຍັງພະເຢໂຫວາຈຶ່ງຮັກແຕ່ພີ່ນ້ອງຄົນອື່ນໆ ແຕ່ວ່າບໍ່ໄດ້ຮັກຂ້ອຍ.’ ໂປໂລໄດ້ເຕືອນພີ່ນ້ອງໃນເມືອງໂຣມວ່າ: “ພະຄລິດມາຕາຍແທນພວກເຮົາທັງໆທີ່ເຮົາ ຍັງເປັນຄົນບາບຢູ່.” (ຣມ. 5:8) ນີ້ສະແດງວ່າບໍ່ມີຫຍັງທີ່ຈະມາຂັດຂວາງຄວາມຮັກຂອງພະເຢໂຫວາທີ່ສະແດງຕໍ່ເຮົາໄດ້!
10. ເຮົາໄດ້ບົດຮຽນຫຍັງຈາກສິ່ງທີ່ຂຽນໄວ້ໃນໂຣມ 8:38, 39?
10 ອ່ານໂຣມ 8:38, 39. ໂປໂລໝັ້ນໃຈແທ້ໆວ່າຄວາມຮັກຂອງພະເຈົ້າໝັ້ນຄົງບໍ່ປ່ຽນແປງ. ລາວຂຽນວ່າ ບໍ່ມີຫຍັງທີ່ຈະ “ຂັດຂວາງຄວາມຮັກທີ່ພະເຈົ້າສະແດງ ຕໍ່ພວກເຮົາ.” ລາວຮູ້ວ່າພະເຢໂຫວາອົດທົນກັບຊາດອິດສະຣາເອນຫຼາຍແທ້ໆ. ແລະລາວກໍຮູ້ວ່າພະເຢໂຫວາຈະສະແດງຄວາມເມດຕາຕໍ່ລາວ. ເຮົາອາດສະຫຼຸບຄຳເວົ້າຂອງໂປໂລໄດ້ວ່າ: ‘ຕັ້ງແຕ່ພະເຢໂຫວາສົ່ງພະເຢຊູລູກຊາຍຂອງເພິ່ນມາຕາຍເພື່ອຂ້ອຍ ຂ້ອຍກໍໝັ້ນໃຈໄດ້ເລີຍວ່າເພິ່ນຮັກຂ້ອຍແທ້ໆ.’—ຣມ. 8:32
ສິ່ງທີ່ສຳຄັນສຳລັບພະເຢໂຫວາກໍຄື ສິ່ງທີ່ເຮົາເຮັດໃນຕອນນີ້ ແລະຈະເຮັດໃນອະນາຄົດ ບໍ່ແມ່ນຄວາມຜິດທີ່ເຮົາເຄີຍເຮັດໃນອະດີດ (ເບິ່ງຂໍ້ 11) *
11. ຕາມ 1 ຕີໂມທຽວ 1:12-15 ເຖິງວ່າໂປໂລຈະເຮັດຜິດຮ້າຍແຮງ ແຕ່ເປັນຫຍັງລາວຈຶ່ງໝັ້ນໃຈວ່າພະເຢໂຫວາຮັກລາວ?
11 ອ່ານ 1 ຕີໂມທຽວ 1:12-15. ໂປໂລອາດຮູ້ສຶກຜິດຫຼາຍແທ້ໆເມື່ອຄິດເຖິງສິ່ງທີ່ລາວເຄີຍເຮັດກ່ອນທີ່ຈະມາເປັນຄລິດສະຕຽນ. ດັ່ງນັ້ນ ຈຶ່ງບໍ່ແມ່ນເລື່ອງແປກທີ່ລາວເວົ້າໃຫ້ຕົວເອງວ່າ ໃນບັນດາຄົນບາບ ລາວ “ຊົ່ວທີ່ສຸດ.” ກ່ອນທີ່ໂປໂລຈະຮຽນຄວາມຈິງ ລາວໄດ້ຂົ່ມເຫງຄລິດສະຕຽນໃນເມືອງຕ່າງໆ ລາວໄດ້ເອົາບາງຄົນເຂົ້າຄຸກ ແລະໄດ້ເຮັດໃຫ້ເຂົາເຈົ້າຖືກປະຫານຊີວິດ. (ກຈກ. 26:10, 11) ລອງນຶກພາບວ່າໂປໂລຊິຮູ້ສຶກແນວໃດເມື່ອເຫັນຄລິດສະຕຽນບາງຄົນທີ່ພໍ່ແມ່ຂອງເຂົາເຈົ້າຖືກຂ້າຍ້ອນລາວ. ໂປໂລຄືຊິຮູ້ສຶກເສຍໃຈກັບສິ່ງທີ່ລາວເຮັດຫຼາຍແທ້ໆ. ແຕ່ລາວກໍຮູ້ວ່າລາວບໍ່ສາມາດປ່ຽນແປງອະດີດໄດ້. ລາວຍອມຮັບວ່າພະຄລິດຕາຍເພື່ອລາວ ແລະລາວກໍຂຽນວ່າ: “ຂ້ອຍໄດ້ເຮັດໜ້າທີ່ນີ້ກໍຍ້ອນຄວາມກະລຸນາທີ່ຍິ່ງໃຫຍ່ຂອງພະເຈົ້າ.” (1 ກຣ. 15:3, 10) ເຮົາໄດ້ບົດຮຽນຫຍັງ? ເຮົາຕ້ອງໝັ້ນໃຈວ່າພະເຢຊູຕາຍເພື່ອເຮົາ ແລະເຮັດໃຫ້ເຮົາມີໂອກາດທີ່ຈະມີສາຍສຳພັນທີ່ໃກ້ຊິດກັບພະເຢໂຫວາ. (ກຈກ. 3:19) ດັ່ງນັ້ນ ສິ່ງສຳຄັນສຳລັບພະເຢໂຫວາກໍຄື ສິ່ງທີ່ເຮົາເຮັດໃນຕອນນີ້ ແລະຈະເຮັດໃນອະນາຄົດ ບໍ່ແມ່ນຄວາມຜິດທີ່ເຮົາເຄີຍເຮັດໃນອະດີດ ບໍ່ວ່າຕອນນັ້ນເຮົາຈະເປັນພະຍານພະເຢໂຫວາແລ້ວຫຼືບໍ່.—ເອຊາ. 1:18
12. 1 ໂຢຮັນ 3:19, 20 ຊ່ອຍເຮົາໄດ້ແນວໃດຖ້າເຮົາຮູ້ສຶກວ່າຕົວເອງບໍ່ມີຄ່າແລະບໍ່ດີພໍ?
12 ເມື່ອຄິດກ່ຽວກັບເລື່ອງທີ່ພະເຢຊູຕາຍເພື່ອລົບລ້າງບາບຂອງເຮົາ ເຈົ້າອາດຈະຄິດວ່າ ‘ຂ້ອຍບໍ່ຄູ່ຄວນ1 ໂຢຮັນ 3:19, 20) ເມື່ອເຮົາເລີ່ມຄິດແບບນັ້ນຂໍໃຫ້ເຮົາຈື່ວ່າ “ພະເຈົ້າໃຫຍ່ກວ່າໃຈຂອງພວກເຮົາ.” ພະເຢໂຫວາຈະຍັງຮັກແລະໃຫ້ອະໄພເຮົາ ເຖິງວ່າເຮົາຈະຮູ້ສຶກວ່າເພິ່ນບໍ່ຮັກແລະບໍ່ຢາກໃຫ້ອະໄພເຮົາກໍຕາມ. ເຮົາຕ້ອງພະຍາຍາມເຮັດໃຫ້ຕົວເອງໝັ້ນໃຈວ່າພະເຢໂຫວາຮັກເຮົາ. ເພື່ອຈະເຮັດແບບນັ້ນໄດ້ເຮົາຕ້ອງສຶກສາຄຳພີໄບເບິນເລື້ອຍໆ ອະທິດຖານເຖິງພະເຢໂຫວາເປັນປະຈຳ ແລະຄົບຫາກັບພີ່ນ້ອງ. ເປັນຫຍັງການເຮັດແບບນີ້ຈຶ່ງສຳຄັນ?
ກັບຂອງຂວັນທີ່ມີຄ່ານີ້.’ ເປັນຫຍັງເຮົາອາດຮູ້ສຶກແບບນັ້ນ? ຍ້ອນເຮົາບໍ່ສົມບູນແບບ ຫົວໃຈຂອງເຮົາອາດຈະຕຳໜິຕົວເຮົາເອງ ແລະເຮັດໃຫ້ເຮົາຮູ້ສຶກວ່າບໍ່ມີຄ່າແລະບໍ່ດີພໍ. (ອ່ານການສຶກສາຄຳພີໄບເບິນ ການອະທິດຖານ ແລະຄົບຫາກັບພີ່ນ້ອງຊ່ອຍເຮົາແນວໃດ?
13. ການສຶກສາຄຳພີໄບເບິນຊ່ອຍເຮົາແນວໃດ? (ເບິ່ງຂອບ “ ການສຶກສາຄຳພີໄບເບິນຊ່ອຍເຂົາເຈົ້າແນວໃດ?”)
13 ການສຶກສາຄຳພີໄບເບິນທຸກມື້ ຈະຊ່ອຍເຈົ້າໃຫ້ຮູ້ຈັກພະເຢໂຫວາດີຂຶ້ນເລື້ອຍໆ ແລ້ວເຈົ້າກໍຈະເຂົ້າໃຈວ່າພະເຢໂຫວາຮັກເຈົ້າຫຼາຍສ່ຳໃດ. ຖ້າເຈົ້າຄິດຕຶກຕອງສິ່ງທີ່ອ່ານໃນຄຳພີໄບເບິນທຸກໆມື້ ເຈົ້າກໍຈະເຫັນວິທີທີ່ຈະປັບຄວາມຄິດແລະຄວາມຕ້ອງການທີ່ຜິດໆໄດ້. (2 ຕມ. 3:16) ຜູ້ດູແລຄົນໜຶ່ງຊື່ເຄວິນເຊິ່ງຮູ້ສຶກວ່າຕົວເອງບໍ່ມີຄ່າບອກວ່າ: “ການອ່ານແລະຄິດຕຶກຕອງກ່ຽວກັບຄຳເພງບົດ 103 ຊ່ອຍຂ້ອຍໃຫ້ປັບຄວາມຄິດ ແລະຮູ້ວ່າພະເຢໂຫວາຮູ້ສຶກແນວໃດກັບຂ້ອຍແທ້ໆ.” ເອວາທີ່ເວົ້າເຖິງກ່ອນໜ້ານີ້ບອກວ່າ: “ໃນຕອນແລງຂ້ອຍມັກຈະຄິດຕຶກຕອງເຖິງຄວາມຮູ້ສຶກຂອງພະເຢໂຫວາ. ການເຮັດແບບນີ້ຊ່ອຍຂ້ອຍໃຫ້ມີຄວາມສະຫງົບໃຈແລະມີຄວາມເຊື່ອຫຼາຍຂຶ້ນ.”
14. ການອະທິດຖານຈະຊ່ອຍເຮົາແນວໃດ?
14 ອະທິດຖານເລື້ອຍໆ. (1 ທຊ. 5:17) ຖ້າເຈົ້າຢາກເປັນໝູ່ກັບໃຜຄົນໜຶ່ງ ເຈົ້າກໍຕ້ອງລົມກັບລາວເລື້ອຍໆແລະບອກລາວໃຫ້ຮູ້ວ່າເຈົ້າຮູ້ສຶກແນວໃດ. ເພື່ອຈະເປັນໝູ່ກັບພະເຢໂຫວາເຮົາກໍຕ້ອງເຮັດແບບນີ້ຄືກັນ. ເມື່ອເຮົາບອກຄວາມຄິດ ຄວາມຮູ້ສຶກ ແລະຄວາມກັງວົນໃຫ້ພະເຢໂຫວາຟັງຕອນທີ່ອະທິດຖານ ກໍສະແດງໃຫ້ເຫັນວ່າເຮົາໄວ້ໃຈພະເຢໂຫວາແລະໝັ້ນໃຈວ່າເພິ່ນຮັກເຮົາ. (ເພງ. 94:17-19; 1 ຢຮ. 5:14, 15) ຢົວທີ່ເວົ້າເຖິງກ່ອນໜ້ານີ້ບອກວ່າ: “ຂ້ອຍຈະບໍ່ພຽງແຕ່ບອກພະເຢໂຫວາໃຫ້ຮູ້ວ່າຂ້ອຍເຮັດຫຍັງແດ່ໃນມື້ນັ້ນ ແຕ່ຂ້ອຍຈະບອກເພິ່ນໃຫ້ຮູ້ວ່າຂ້ອຍຄິດແລະຮູ້ສຶກແນວໃດແທ້ໆ. ການເຮັດແບບນີ້ຊ່ອຍຂ້ອຍໃຫ້ຮູ້ວ່າພະເຢໂຫວາບໍ່ໄດ້ເປັນຄືກັບຫົວໜ້າທີ່ບໍ່ສົນໃຈລູກນ້ອງ ແຕ່ເພິ່ນເປັນຄືກັບພໍ່ທີ່ຮັກແລະສົນໃຈລູກຫຼາຍແທ້ໆ.”—ເບິ່ງຂອບ “ ເຈົ້າເຄີຍອ່ານບໍ?”
15. ພະເຢໂຫວາສະແດງຄວາມສົນໃຈຕໍ່ເຮົາເປັນສ່ວນຕົວແນວໃດ?
15 ຄົບຫາກັບພີ່ນ້ອງ. ພີ່ນ້ອງເປັນຂອງຂວັນຈາກພະເຢໂຫວາ. (ຢກບ. 1:17) ພະເຢໂຫວາສະແດງຄວາມສົນໃຈຕໍ່ເຮົາເປັນສ່ວນຕົວໂດຍໃຫ້ເຮົາມີພີ່ນ້ອງໃນປະຊາຄົມ ທີ່ “ຮັກກັນຢູ່ສະເໝີ.” (ສຸພາ. 17:17, ລ.ມ.) ໃນຈົດໝາຍທີ່ໂປໂລຂຽນໄປເຖິງພີ່ນ້ອງໃນເມືອງໂກໂລຊາຍ ລາວໄດ້ເວົ້າເຖິງພີ່ນ້ອງທີ່ຊ່ວຍເຫຼືອລາວແລະບອກວ່າເຂົາເຈົ້າເປັນຜູ້ທີ່ “ໃຫ້ກຳລັງໃຈ” ລາວຫຼາຍ. (ກລຊ. 4:10, 11) ແມ່ນແຕ່ພະເຢຊູເອງກໍຍັງຕ້ອງການແລະເຫັນຄ່າຄວາມຊ່ວຍເຫຼືອທີ່ໄດ້ຮັບຈາກໝູ່ ທັງໝູ່ທີ່ເປັນທູດສະຫວັນແລະມະນຸດ.—ລກ. 22:28, 43
16. ພີ່ນ້ອງຊ່ອຍເຮົາໃຫ້ສະໜິດກັບພະເຢໂຫວາໄດ້ແນວໃດ?
16 ເຈົ້າໄດ້ຮັບປະໂຫຍດແນວໃດຈາກຂອງຂວັນທີ່ພະເຢໂຫວາໃຫ້ເຊິ່ງກໍຄືພີ່ນ້ອງ? ເມື່ອເຮົາເລົ່າເລື່ອງທີ່ອຸກໃຈໃຫ້ກັບພີ່ນ້ອງທີ່ມີຄວາມເຊື່ອເຂັ້ມແຂງຟັງ ກໍບໍ່ໄດ້ໝາຍຄວາມວ່າຄວາມເຊື່ອຂອງເຮົາອ່ອນລົງ ແຕ່ນັ້ນເປັນການຊ່ວຍເຫຼືອເຮົາ. ພີ່ນ້ອງເຈມທີ່ເວົ້າເຖິງກ່ອນໜ້ານີ້ບອກວ່າ: “ການເປັນໝູ່ກັບພີ່ນ້ອງທີ່ມີຄວາມເຊື່ອເຂັ້ມແຂງຊ່ອຍຂ້ອຍໄດ້ຫຼາຍແທ້ໆ. ເມື່ອຂ້ອຍເລີ່ມຄິດໃນແງ່ລົບແລະຢາກລະບາຍຄວາມຮູ້ສຶກ ພີ່ນ້ອງກໍຕັ້ງໃຈຟັງຂ້ອຍຢ່າງອົດທົນແລະບອກຂ້ອຍວ່າເຂົາເຈົ້າຮັກຂ້ອຍ. ການທີ່ເຂົາເຈົ້າເຮັດແບບນັ້ນໄດ້ເຮັດໃຫ້ຂ້ອຍຮູ້ວ່າ ພະເຢໂຫວາຮັກແລະສົນໃຈຂ້ອຍເປັນສ່ວນຕົວ.” ເປັນເລື່ອງສຳຄັນຫຼາຍແທ້ໆທີ່ເຮົາຈະສະໜິດກັບພີ່ນ້ອງຕໍ່ໆໄປ!
ພະເຢໂຫວາຮັກເຮົາຕະຫຼອດໄປ
17-18. ເຮົາຕ້ອງເຊື່ອຟັງໃຜ ແລະຍ້ອນຫຍັງ?
17 ຊາຕານຢາກໃຫ້ເຮົາເຊົາເຮັດສິ່ງທີ່ຖືກຕ້ອງ. ມັນຍັງຢາກເຮັດໃຫ້ເຮົາຄິດວ່າພະເຢໂຫວາບໍ່ຮັກເຮົາ ແລະຄິດວ່າເຮົາບໍ່ມີຄ່າພໍທີ່ພະເຢໂຫວາຈະຊ່ວຍເຫຼືອ. ແຕ່ເຮົາຮູ້ວ່າສິ່ງເຫຼົ່ານັ້ນບໍ່ແມ່ນຄວາມຈິງເລີຍ.
18 ພະເຢໂຫວາຮັກເຈົ້າ ແລະເຈົ້າກໍມີຄ່າຕໍ່ເພິ່ນຫຼາຍແທ້ໆ. ຖ້າເຈົ້າເຊື່ອຟັງພະເຢໂຫວາ ເຈົ້າກໍຈະ “ເປັນທີ່ຮັກຂອງພະອົງ” ຕະຫຼອດໄປຄືກັບທີ່ພະເຢຊູເປັນ. (ຢຮ. 15:10) ດັ່ງນັ້ນ ຂໍໃຫ້ເຮົາຢ່າເຊື່ອຊາຕານ ແລະຢ່າຟັງຫົວໃຈທີ່ຕຳໜິເຮົາເຊິ່ງເຮັດໃຫ້ເຮົາຮູ້ສຶກວ່າບໍ່ມີຄ່າແລະບໍ່ດີພໍ ແຕ່ໃຫ້ຟັງພະເຢໂຫວາຜູ້ທີ່ເຫັນຈຸດດີໃນໂຕເຮົາແຕ່ລະຄົນ. ແລະຂໍໃຫ້ໝັ້ນໃຈວ່າພະເຢໂຫວາ “ຮັກປະຊາຊົນຂອງພະອົງ” ເຊິ່ງລວມເຖິງເຈົ້ານຳ!
ເພງ 141 ຊີວິດເປັນສິ່ງມະຫັດສະຈັນ
^ ຂໍ້ 5 ພີ່ນ້ອງບາງຄົນຮູ້ສຶກວ່າຍາກທີ່ຈະເຊື່ອວ່າພະເຢໂຫວາຮັກເຂົາເຈົ້າ. ໃນບົດຄວາມນີ້ເຮົາຈະມາເບິ່ງວ່າ ເປັນຫຍັງເຮົາໝັ້ນໃຈໄດ້ວ່າພະເຢໂຫວາຮັກເຮົາແຕ່ລະຄົນເປັນສ່ວນໂຕ ແລະເຮົາຈະເຮັດແນວໃດຖ້າເຮົາບໍ່ໝັ້ນໃຈວ່າພະເຢໂຫວາຮັກເຮົາ?
^ ຂໍ້ 2 ຊື່ສົມມຸດ
^ ຂໍ້ 67 ຄຳອະທິບາຍຮູບພາບ: ກ່ອນທີ່ໂປໂລຈະຮຽນຄວາມຈິງ ລາວໄດ້ຂົ່ມເຫງຄລິດສະຕຽນຫຼາຍຄົນ ແລະໄດ້ເອົາເຂົາເຈົ້າເຂົ້າຄຸກ. ເມື່ອໂປໂລຍອມຮັບວ່າພະເຢຊູໄດ້ເຮັດຫຼາຍຢ່າງເພື່ອລາວ ລາວກໍໄດ້ປ່ຽນແປງຕົວເອງແລະໃຫ້ກຳລັງໃຈພີ່ນ້ອງເຊິ່ງພີ່ນ້ອງບາງຄົນກໍເປັນຄົນໃນຄອບຄົວຂອງຜູ້ທີ່ລາວເຄີຍຂົ່ມເຫງ.