ບົດຄວາມສຶກສາທີ 16
ຮູ້ຄຸນຄ່າໃນຄ່າໄຖ່ຕໍ່ໆໄປ
“ລູກມະນຸດ . . . ສະລະຊີວິດເປັນຄ່າໄຖ່ໃຫ້ຄົນຈຳນວນຫຼາຍ.”—ມຣກ. 10:45
ເພງ 18 ຂອບໃຈສຳລັບຄ່າໄຖ່
ໃຈຄວາມສຳຄັນ *
1-2. ຄ່າໄຖ່ແມ່ນຫຍັງແລະເປັນຫຍັງຕ້ອງມີຄ່າໄຖ່?
ເມື່ອອາດາມທີ່ເປັນມະນຸດສົມບູນແບບໄດ້ເຮັດບາບ ລາວໄດ້ເຮັດໃຫ້ທັງຕົວລາວເອງແລະລູກຫຼານທີ່ຈະເກີດມາໃນອະນາຄົດເສຍໂອກາດທີ່ຈະມີຊີວິດຕະຫຼອດໄປ. ເນື່ອງຈາກອາດາມຕັ້ງໃຈທີ່ຈະເຮັດບາບ ລາວຈຶ່ງບໍ່ມີໂອກາດທີ່ຈະແກ້ໂຕ. ແຕ່ລູກຫຼານຂອງລາວເດ? ເຂົາເຈົ້າບໍ່ໄດ້ມີສ່ວນຮ່ວມກັບບາບທີ່ລາວເຮັດ. (ຣມ. 5:12, 14) ອາດາມສົມຄວນຕາຍຍ້ອນສິ່ງທີ່ລາວເຮັດ. ແຕ່ພະເຢໂຫວາຈະຊ່ອຍລູກຫຼານຂອງລາວໃຫ້ຫຼຸດພົ້ນຈາກບາບໄດ້ບໍ? ໄດ້ແທ້! ບໍ່ດົນຫຼັງຈາກທີ່ອາດາມເຮັດບາບ ພະເຢໂຫວາກໍໄດ້ບອກລ່ວງໜ້າເຖິງວິທີທີ່ເພິ່ນຈະຊ່ວຍເຫຼືອລູກຫຼານຂອງອາດາມຫຼາຍລ້ານຄົນໃຫ້ຫຼຸດພົ້ນຈາກບາບແລະຄວາມຕາຍ. (ຕົ້ນ. 3:15) ເມື່ອເຖິງເວລາ ພະເຢໂຫວາກໍໄດ້ສົ່ງພະເຢຊູລູກຊາຍຂອງເພິ່ນມາ “ສະລະຊີວິດເປັນຄ່າໄຖ່ໃຫ້ຄົນຈຳນວນຫຼາຍ.”—ມຣກ. 10:45; ຢຮ. 6:51
2 ຄ່າໄຖ່ແມ່ນຫຍັງ? ໃນພະຄຳພີພາກພາສາກຣີກຄຳວ່າ “ຄ່າໄຖ່” ມີຄວາມໝາຍວ່າ ສິ່ງທີ່ພະເຢຊູຈ່າຍເພື່ອໄຖ່ເອົາສິ່ງທີ່ອາດາມເຮັດເສຍໄປ. (1 ກຣ. 15:22) ເປັນຫຍັງຕ້ອງມີຄ່າໄຖ່? ຍ້ອນພະເຢໂຫວາເປັນພະເຈົ້າທີ່ຍຸຕິທຳ ເພິ່ນຈຶ່ງໄດ້ໃຫ້ກົດໝາຍທີ່ວ່າ “ຊີວິດແທນຊີວິດ.” (ອົບ. 21:23, 24) ອາດາມເຮັດໃຫ້ຊີວິດທີ່ສົມບູນແບບເສຍໄປ. ເພື່ອຈະຍຸຕິທຳ ພະເຢຊູກໍຕ້ອງໄດ້ສະລະຊີວິດທີ່ສົມບູນແບບຂອງເພິ່ນ. (ຣມ. 5:17) ດັ່ງນັ້ນ ພະເຢຊູຈຶ່ງກາຍມາເປັນ “ບິດາອົງຕະຫຼອດໄປເປັນນິດ” ສຳລັບທຸກຄົນທີ່ເຊື່ອໃນຄ່າໄຖ່.—ເອຊາ. 9:6; ຣມ. 3:23, 24
3. ຕາມໂຢຮັນ 14:31; 15:13 ເປັນຫຍັງພະເຢຊູຈຶ່ງເຕັມໃຈສະລະຊີວິດທີ່ສົມບູນແບບ?
3 ພະເຢຊູເຕັມໃຈສະລະຊີວິດຂອງເພິ່ນກໍຍ້ອນວ່າເພິ່ນຮັກພະເຢໂຫວາແລະຮັກພວກເຮົາຫຼາຍ. (ອ່ານໂຢຮັນ 14:31; 15:13) ຍ້ອນຄວາມຮັກ ພະເຢຊູຈຶ່ງຕັ້ງໃຈທີ່ຈະຮັກສາຄວາມສັດຊື່ຈົນຕາຍ ແລະເຮັດໃຫ້ຄວາມຕ້ອງການຂອງພະເຢໂຫວາສຳເລັດ. ການທີ່ພະເຢຊູເຮັດແບບນີ້ເຮັດໃຫ້ຄວາມຕ້ອງການຂອງພະເຢໂຫວາທີ່ມີຕໍ່ມະນຸດແລະແຜ່ນດິນໂລກຕັ້ງແຕ່ຕອນທຳອິດສຳເລັດເປັນຈິງ. ໃນບົດຄວາມນີ້ ເຮົາຈະມາເບິ່ງວ່າເປັນຫຍັງພະເຈົ້າຍອມໃຫ້ພະເຢຊູເຈິກັບຄວາມທຸກຫຼາຍຢ່າງກ່ອນທີ່ເພິ່ນຈະຕາຍ. ຈາກນັ້ນເຮົາຈະມາເບິ່ງຕົວຢ່າງຂອງຜູ້ຂຽນຄຳພີໄບເບິນຄົນໜຶ່ງທີ່ຮູ້ຄຸນຄ່າຢ່າງເລິກເຊິ່ງຕໍ່ຄ່າໄຖ່. ແລະສຸດທ້າຍເຮົາຈະມາເບິ່ງວ່າເຮົາຈະສະແດງໃຫ້ເຫັນແນວໃດວ່າເຮົາຮູ້ຄຸນຄ່າຕໍ່ຄ່າໄຖ່ ແລະເຮົາຈະຮູ້ຄຸນຄ່າຫຼາຍຂຶ້ນຕໍ່ຄ່າໄຖ່ທີ່ພະເຢໂຫວາແລະພະເຢຊູໄດ້ຈັດກຽມໃຫ້ເຮົາໄດ້ແນວໃດ.
ເປັນຫຍັງພະເຢຊູຈຶ່ງຕ້ອງເຈິກັບຄວາມທຸກ?
ໃຫ້ຄິດເຖິງຄວາມທຸກທໍລະມານທຸກຢ່າງທີ່ພະເຢຊູເຈິເພື່ອມາເປັນຄ່າໄຖ່ໃຫ້ກັບເຮົາ. (ເບິ່ງຂໍ້ 4)
4. ຂໍໃຫ້ອະທິບາຍວ່າພະເຢຊູຕາຍແນວໃດ.
4 ໃຫ້ຄິດເຖິງເຫດການມື້ສຸດທ້າຍກ່ອນທີ່ພະເຢຊູຈະຕາຍ. ທີ່ຈິງ ພະເຢຊູສາມາດເອີ້ນກອງທັບທູດສະຫວັນໃຫ້ມາຊ່ອຍເພິ່ນກໍໄດ້. ແຕ່ເພິ່ນຍອມໃຫ້ທະຫານໂຣມຈັບແລະທຸບຕີເພິ່ນຢ່າງໂຫດຮ້າຍ. (ມທ. 26:52-54; ຢຮ. 18:3; 19:1) ເຂົາເຈົ້າເອົາໄມ້ແສ້ຂ້ຽນເພິ່ນຈົນເນື້ອໜັງລອກອອກ. ຈາກນັ້ນເຂົາເຈົ້າຍັງໃຫ້ເພິ່ນແບກເສົາໄມ້ທີ່ໜັກໆ. ຕອນທີ່ພະເຢຊູເລີ່ມແບກເສົາໄປໄດ້ໄລຍະໜຶ່ງ ທະຫານໂຣມກໍໄດ້ສັ່ງໃຫ້ຜູ້ຊາຍຄົນໜຶ່ງມາແບກເສົາແທນເພິ່ນ. (ມທ. 27:32) ເມື່ອມາຮອດລານປະຫານ ພວກທະຫານກໍໄດ້ຕອກມືຕອກຕີນຂອງເພິ່ນຕິດກັບເສົາ. ເມື່ອທະຫານຕັ້ງເສົາຂຶ້ນ ບ່ອນທີ່ເພິ່ນຖືກຕອກກໍແຮ່ງເຈັບກວ່າເກົ່າອີກ. ໝູ່ແລະແມ່ຂອງເພິ່ນຮ້ອງໄຫ້ເສຍໃຈ ແຕ່ພວກຜູ້ນຳຊາວຢິວພັດພາກັນເຍາະເຍີ້ຍເພິ່ນ. (ລກ. 23:32-38; ຢຮ. 19:25) ເມື່ອເພິ່ນຖືກຄຶງແບບນີ້ມາຫຼາຍຊົ່ວໂມງ ຫົວໃຈຂອງເພິ່ນກໍເລີ່ມເຕັ້ນຍາກແລະຫາຍໃຈຝືດ. ກ່ອນທີ່ເພິ່ນຈະສິ້ນໃຈ ເພິ່ນໄດ້ເວົ້າຄຳສຸດທ້າຍທີ່ສະແດງເຖິງໄຊຊະນະ ຈາກນັ້ນຄໍເພິ່ນກໍພັບລົງແລ້ວກໍຕາຍ. (ມຣກ. 15:37; ລກ. 23:46; ຢຮ. 10:17, 18; 19:30) ຈັ່ງແມ່ນເປັນການຕາຍທີ່ເຈັບປວດ ທໍລະມານ ແລະໜ້າອັບອາຍຫຼາຍແທ້ໆ!
5. ສິ່ງໃດທີ່ເຮັດໃຫ້ພະເຢຊູໜັກໃຈຫຼາຍທີ່ສຸດ?
5 ເຖິງວ່າວິທີທີ່ພະເຢຊູຕາຍຈະເຮັດໃຫ້ເພິ່ນເຈັບປວດ ແຕ່ສິ່ງທີ່ເຮັດໃຫ້ເພິ່ນໜັກໃຈທີ່ສຸດກໍຄືເຫດຜົນທີ່ເຮັດໃຫ້ເພິ່ນຖືກປະຫານຊີວິດ. ເພິ່ນຖືກກ່າວຫາຢ່າງຜິດໆວ່າເປັນຜູ້ໝິ່ນປະໝາດພະເຈົ້າເຊິ່ງກໍຄືເປັນຜູ້ທີ່ບໍ່ນັບຖືພະເຈົ້າ. (ມທ. 26:64-66) ຂໍ້ກ່າວຫານີ້ເຮັດໃຫ້ເພິ່ນໜັກໃຈຫຼາຍຈົນເພິ່ນຫວັງວ່າພະເຢໂຫວາຈະຊ່ອຍເພິ່ນບໍ່ໃຫ້ຕາຍໃນຂໍ້ກ່າວຫານີ້. (ມທ. 26:38, 39, 42) ເປັນຫຍັງພະເຢໂຫວາຈຶ່ງຍອມໃຫ້ລູກຊາຍທີ່ເພິ່ນຮັກຕ້ອງມາເຈິກັບຄວາມທຸກແລະຕາຍ? ຂໍໃຫ້ເຮົາມາເບິ່ງນຳກັນສາມເຫດຜົນ.
6. ເປັນຫຍັງພະເຢຊູຈຶ່ງຕ້ອງຖືກຄຶງຢູ່ເທິງເສົາທໍລະມານ?
6 ເຫດຜົນທຳອິດ ພະເຢຊູຖືກຄຶງໄວ້ເທິງເສົາກໍເພື່ອຊ່ອຍຊາວຢິວໃຫ້ເປັນອິດສະຫຼະຈາກຄຳສາບແຊ່ງທີ່ພິເສດ. (ຄລຕ. 3:10, 13) ທີ່ເຂົາເຈົ້າຖືກສາບແຊ່ງພິເສດນີ້ ກໍຍ້ອນວ່າເຂົາເຈົ້າບໍ່ໄດ້ເຮັດຕາມກົດໝາຍທີ່ໄດ້ສັນຍາໄວ້ກັບພະເຈົ້າ. ແລະນີ້ເຮັດໃຫ້ເຂົາເຈົ້າມີໂທດເພີ່ມອີກ ນອກຈາກຈະມີໂທດທີ່ເປັນລູກຫຼານຂອງອາດາມ. (ຣມ. 5:12) ກົດໝາຍທີ່ພະເຢໂຫວາໃຫ້ກັບຊາວອິດສະຣາເອນກຳນົດວ່າຜູ້ທີ່ເຮັດຜິດຈະຕ້ອງຕາຍ. ຈາກນັ້ນ ຕ້ອງເອົາສົບຂອງລາວໄປຄຶງໄວ້ເທິງເສົາ. * (ບັນຍັດ. 21:22, 23; 27:26) ຍ້ອນພະເຢຊູຕາຍຢູ່ເທິງເສົາ ເພິ່ນຈຶ່ງເປີດໂອກາດໃຫ້ຊາວອິດສະຣາເອນທີ່ບໍ່ຍອມຮັບເພິ່ນສາມາດໄດ້ຮັບປະໂຫຍດຈາກຄ່າໄຖ່ຂອງເພິ່ນ.
7. ເຫດຜົນທີສອງທີ່ພະເຢໂຫວາຍອມໃຫ້ພະເຢຊູເຈິກັບຄວາມທຸກແມ່ນຫຍັງ?
7 ເຫດຜົນທີສອງທີ່ພະເຢໂຫວາຍອມໃຫ້ພະເຢຊູມາເຈິກັບຄວາມທຸກ ກໍເພື່ອຢາກຝຶກສອນເພິ່ນໃຫ້ເຮັດໜ້າທີ່ເປັນມະຫາປະໂລຫິດ. ພະເຢຊູຮູ້ວ່າເປັນເລື່ອງຍາກຫຼາຍທີ່ຈະເຊື່ອຟັງພະເຢໂຫວາເມື່ອຊີວິດຍາກລຳບາກ. ເພິ່ນຮູ້ສຶກກົດດັນຫຼາຍຈຶ່ງຂໍໃຫ້ພະເຢໂຫວາຊ່ອຍ “ພ້ອມທັງນ້ຳຕາໄຫຼ.” ຍ້ອນພະເຢຊູຜ່ານຄວາມທຸກຫຼາຍຢ່າງ ເພິ່ນຈຶ່ງເຂົ້າໃຈຄວາມຮູ້ສຶກຂອງເຮົາ ແລະ “ສາມາດຊ່ວຍ [ເຮົາ]” ເມື່ອເຮົາ “ຖືກທົດສອບ.” ເຮົາຮູ້ສຶກຂອບໃຈພະເຢໂຫວາຫຼາຍແທ້ໆທີ່ໄດ້ໃຫ້ເຮົາມີມະຫາປະໂລຫິດທີ່ເມດຕາ ແລະ “ເຫັນອົກເຫັນໃຈໃນຄວາມອ່ອນແອຂອງພວກເຮົາ.”—ຮຣ. 2:17, 18; 4:14-16; 5:7-10
8. ເຫດຜົນທີສາມທີ່ພະເຢໂຫວາຍອມໃຫ້ພະເຢຊູເຈິຄວາມຍາກລຳບາກຫຼາຍຢ່າງແມ່ນຫຍັງ?
8 ເຫດຜົນທີສາມທີ່ພະເຢໂຫວາຍອມໃຫ້ພະເຢຊູເຈິກັບຄວາມທຸກຫຼາຍຢ່າງ ກໍເພື່ອຕອບຄຳຖາມທີ່ສຳຄັນທີ່ວ່າ: ເມື່ອມະນຸດເຈິຄວາມຫຍຸ້ງຍາກລຳບາກຫຼາຍຢ່າງໃນຊີວິດ ເຂົາເຈົ້າຍັງຈະສັດຊື່ຕໍ່ພະເຢໂຫວາບໍ? ຊາຕານອ້າງວ່າມະນຸດຮັບໃຊ້ພະເຢໂຫວາກໍຍ້ອນວ່າເຂົາເຈົ້າໄດ້ຮັບສິ່ງດີໆຈາກເພິ່ນ. ມັນຍັງເວົ້າວ່າມະນຸດທຸກຄົນກໍຄືກັບອາດາມຫັ້ນແຫຼະທີ່ບໍ່ໄດ້ຮັກພະເຈົ້າແທ້ໆ. (ໂຢບ 1:9-11; 2:4, 5) ຍ້ອນພະເຢໂຫວາໝັ້ນໃຈໃນຕົວຂອງພະເຢຊູ ເພິ່ນຈຶ່ງຍອມໃຫ້ພະເຢຊູເຈິກັບການທົດສອບທີ່ໜັກສຸດໆເຊິ່ງບໍ່ມີມະນຸດຄົນໃດເຄີຍເຈິ. ພະເຢຊູໄດ້ຮັກສາຄວາມສັດຊື່ຕໍ່ພະເຢໂຫວາ ແລະໄດ້ພິສູດວ່າຊາຕານເປັນຜູ້ເວົ້າຕົວະ.
ຜູ້ຂຽນຄຳພີໄບເບິນຄົນໜຶ່ງຮູ້ຄຸນຄ່າຢ່າງເລິກເຊິ່ງຕໍ່ຄ່າໄຖ່
9. ອັກຄະສາວົກໂຢຮັນເປັນແບບຢ່າງໃຫ້ກັບເຮົາແນວໃດ?
9 ຄຳສອນເລື່ອງຄ່າໄຖ່ເຮັດໃຫ້ຄລິດສະຕຽນຫຼາຍຄົນມີຄວາມເຊື່ອທີ່ເຂັ້ມແຂງ. ເຂົາເຈົ້າຍັງປະກາດຕໍ່ໆໄປເຖິງວ່າຈະຖືກຕໍ່ຕ້ານ ແລະອົດທົນກັບຄວາມລຳບາກທຸກຮູບແບບຕະຫຼອດຊີວິດຂອງເຂົາເຈົ້າ. ໃຫ້ເຮົາມາເບິ່ງເລື່ອງຂອງອັກຄະສາວົກໂຢຮັນ. ເບິ່ງຄືວ່າລາວປະກາດຄວາມຈິງເລື່ອງພະຄລິດແລະຄ່າໄຖ່ຫຼາຍກວ່າ 60 ປີ. ຕອນທີ່ລາວອາຍຸເກືອບ 100 ປີ ຈັກກະພັດໂຣມໄດ້ເນລະເທດລາວໄປຢູ່ເກາະປັດໂມເພາະຄິດວ່າລາວເປັນໄພຕໍ່ສັງຄົມ. ລາວເຮັດຫຍັງຜິດ? ລາວເວົ້າ “ເລື່ອງພະເຈົ້າແລະປະກາດເລື່ອງພະເຢຊູ.” (ພນມ. 1:9) ໂຢຮັນເປັນແບບຢ່າງທີ່ດີໃຫ້ກັບເຮົາແທ້ໆໃນເລື່ອງຄວາມເຊື່ອແລະຄວາມອົດທົນ!
10. ປຶ້ມທີ່ໂຢຮັນຂຽນສະແດງໃຫ້ເຫັນແນວໃດວ່າລາວຮູ້ຄຸນຄ່າຕໍ່ຄ່າໄຖ່?
10 ໃນປຶ້ມທີ່ໂຢຮັນຂຽນສະແດງໃຫ້ເຫັນວ່າ ລາວຮັກພະເຢຊູແລະຮູ້ຄຸນຄ່າຕໍ່ຄ່າໄຖ່ຫຼາຍແທ້ໆ. ລາວໄດ້ເວົ້າເຖິງຄ່າໄຖ່ແລະປະໂຫຍດທີ່ຈະໄດ້ຮັບຈາກຄ່າໄຖ່ຫຼາຍກວ່າ 100 ເທື່ອ. ຕົວຢ່າງເຊັ່ນ ລາວຂຽນວ່າ: “ຖ້າຜູ້ໃດເຮັດບາບພວກເຮົາກໍມີຜູ້ຊ່ວຍທີ່ຢູ່ກັບພະເຈົ້າຜູ້ເປັນພໍ່ ເຊິ່ງຜູ້ຊ່ວຍນັ້ນກໍຄືພະເຢຊູຄລິດທີ່ເຊື່ອຟັງພະເຈົ້າ.” (1 ຢຮ. 2:1, 2) ແລະສິ່ງທີ່ໂຢຮັນຂຽນຍັງເນັ້ນເຖິງຄວາມສຳຄັນຂອງການ “ປະກາດເລື່ອງພະເຢຊູ.” (ພນມ. 19:10) ເຫັນໄດ້ແຈ້ງວ່າໂຢຮັນຮູ້ຄຸນຄ່າຕໍ່ຄ່າໄຖ່ຫຼາຍແທ້ໆ! ແລ້ວເຮົາຈະສະແດງໃຫ້ເຫັນແນວໃດວ່າເຮົາຮູ້ຄ່າຕໍ່ຄ່າໄຖ່?
ເຈົ້າຈະສະແດງໃຫ້ເຫັນແນວໃດວ່າເຈົ້າຮູ້ຄຸນຄ່າຕໍ່ຄ່າໄຖ່?
ຖ້າເຮົາຮູ້ຄຸນຄ່າຕໍ່ຄ່າໄຖ່ແທ້ໆ ເຮົາກໍຈະຕ້ານທານການລໍ້ໃຈໃຫ້ເຮັດຜິດ. (ເບິ່ງຂໍ້ 11) *
11. ສິ່ງໃດຈະຊ່ອຍເຮົາໃຫ້ຕ້ານທານການລໍ້ໃຈໄດ້?
11 ຕ້ານທານການລໍ້ໃຈໃຫ້ເຮັດຜິດ. ຖ້າເຮົາຮູ້ຄ່າຕໍ່ຄ່າໄຖ່ແທ້ໆ ເຮົາຈະບໍ່ຄິດວ່າ: ‘ຂ້ອຍບໍ່ຈຳເປັນຕ້ອງຕ້ານທານການລໍ້ໃຈໃຫ້ເຮັດຜິດດອກ ເພາະຖ້າຂ້ອຍເຮັດຜິດຂ້ອຍກໍຂໍພະເຢໂຫວາໃຫ້ອະໄພຂ້ອຍໄດ້.’ ແທນທີ່ຈະຄິດແບບນັ້ນ ເຮົາຄວນຄິດວ່າ: ‘ພະເຢໂຫວາແລະພະເຢຊູເຮັດບັກຫຼາຍໆຢ່າງເພື່ອຂ້ອຍ ແລະຂ້ອຍຈະເຮັດສິ່ງທີ່ບໍ່ດີແບບນີ້ໄດ້ແນວໃດ?’ ນອກຈາກນັ້ນ ເຮົາກໍສາມາດຂໍພະເຢໂຫວາໃຫ້ຊ່ອຍເຮົາບໍ່ “ໃຫ້ຍອມແພ້ຕໍ່ການລໍ້ໃຈ.”—ມທ. 6:13
12. ເຮົາຈະໃຊ້ຫຼັກການທີ່ຢູ່ໃນ 1 ໂຢຮັນ 3:16-18 ໄດ້ແນວໃດ?
12 ຮັກພີ່ນ້ອງ. ເມື່ອເຮົາຮັກພີ່ນ້ອງ ເຮົາກໍສະແດງໃຫ້ເຫັນວ່າເຮົາຮູ້ຄຸນຄ່າຕໍ່ຄ່າໄຖ່. ຍ້ອນຫຍັງ? ຍ້ອນພະເຢຊູບໍ່ໄດ້ສະລະຊີວິດເປັນຄ່າໄຖ່ເພື່ອເຮົາເທົ່ານັ້ນ ແຕ່ເພື່ອພີ່ນ້ອງຂອງເຮົານຳ. ຖ້າພະເຢຊູເຕັມໃຈຕາຍເພື່ອພີ່ນ້ອງ ກໍສະແດງວ່າເພິ່ນຮັກເຂົາເຈົ້າຫຼາຍ. (ອ່ານ 1 ໂຢຮັນ 3:16-18) ເຮົາສະແດງຄວາມຮັກຕໍ່ພີ່ນ້ອງໂດຍວິທີທີ່ເຮົາປະຕິບັດຕໍ່ເຂົາເຈົ້າ. (ອຟຊ. 4:29, 31–5:2) ຕົວຢ່າງເຊັ່ນ ເຮົາຊ່ວຍເຫຼືອພີ່ນ້ອງເມື່ອເຂົາເຈົ້າບໍ່ສະບາຍຫຼືເມື່ອເຂົາເຈົ້າເຈິກັບຄວາມຍາກລຳບາກຫຼາຍຢ່າງເຊິ່ງລວມເຖິງຕອນທີ່ເຂົາເຈົ້າເຈິກັບໄພທຳມະຊາດນຳ. ແຕ່ເຮົາຈະເຮັດແນວໃດຖ້າພີ່ນ້ອງເວົ້າຫຼືເຮັດບາງຢ່າງທີ່ເຮັດໃຫ້ເຮົາເສຍໃຈ?
13. ເປັນຫຍັງເຮົາຄວນໃຫ້ອະໄພພີ່ນ້ອງ?
13 ບາງເທື່ອເຈົ້າຮູ້ສຶກວ່າຍາກທີ່ຈະໃຫ້ອະໄພພີ່ນ້ອງບໍ? (ເລວີ. 19:18) ຖ້າເປັນແບບນັ້ນ ຂໍໃຫ້ເຮັດຕາມຄຳແນະນຳນີ້: “ຖ້າຜູ້ໃດມີສາເຫດຈະຈົ່ມໃຫ້ຄົນອື່ນ ກໍຂໍໃຫ້ອົດທົນຕໍ່ກັນແລະກັນ ແລະໃຫ້ອະໄພກັນຢ່າງໃຈກວ້າງຕໍ່ໄປ. ພວກເຈົ້າຕ້ອງເຕັມໃຈໃຫ້ອະໄພກັນຄືກັບທີ່ພະເຢໂຫວາເຕັມໃຈໃຫ້ອະໄພພວກເຈົ້າ.” (ກລຊ. 3:13) ທຸກເທື່ອທີ່ເຮົາໃຫ້ອະໄພພີ່ນ້ອງ ເຮົາກໍພິສູດໃຫ້ພະເຢໂຫວາເຫັນວ່າເຮົາຮູ້ຄຸນຄ່າຕໍ່ຄ່າໄຖ່ຫຼາຍແທ້ໆ. ເຮົາຈະຮູ້ຄຸນຄ່າຂອງຂວັນທີ່ມາຈາກພະເຈົ້າຫຼາຍຂຶ້ນໄດ້ແນວໃດ?
ເຮົາຈະຮູ້ຄຸນຄ່າຕໍ່ຄ່າໄຖ່ຫຼາຍຂຶ້ນໄດ້ແນວໃດ?
14. ວິທີໜຶ່ງທີ່ເຮົາຈະຮູ້ຄຸນຄ່າຕໍ່ຄ່າໄຖ່ຫຼາຍຂຶ້ນແມ່ນຫຍັງ?
14 ຂອບໃຈພະເຢໂຫວາທີ່ໃຫ້ຄ່າໄຖ່. ພີ່ນ້ອງຍິງຊື່ໂຈແອນນາອາຍຸ 83 ປີຢູ່ປະເທດອິນເດຍບອກວ່າ: “ຂ້ອຍຄິດວ່າເມື່ອຂ້ອຍອະທິດຖານເຖິງພະເຢໂຫວາທຸກໆມື້ ເປັນເລື່ອງສຳຄັນທີ່ຂ້ອຍຈະຂອບໃຈເພິ່ນທີ່ໃຫ້ມີຄ່າໄຖ່.” ເມື່ອເຈົ້າອະທິດຖານ ຂໍໃຫ້ຄິດເບິ່ງວ່າເຈົ້າໄດ້ເຮັດຫຍັງຜິດແດ່ໃນມື້ນັ້ນ ແລ້ວຂໍພະເຢໂຫວາໃຫ້ອະໄພເຈົ້າ. ແຕ່ຖ້າເຈົ້າເຮັດຜິດຮ້າຍແຮງ ເຈົ້າຕ້ອງໄປຂໍຄວາມຊ່ວຍເຫຼືອຈາກຜູ້ດູແລ. ເຂົາເຈົ້າຈະຕັ້ງໃຈຟັງເຈົ້າແລະໃຫ້ຄຳແນະນຳດ້ວຍຄວາມຮັກຈາກຫຼັກການໃນຄຳພີໄບເບິນ. ເຂົາເຈົ້າຈະອະທິດຖານກັບເຈົ້າແລະຂໍພະເຢໂຫວາໃຫ້ອະໄພເຈົ້າ ເພື່ອເຈົ້າຈະສາມາດກັບມາມີສາຍສຳພັນທີ່ດີກັບພະເຢໂຫວາອີກ.—ຢກບ. 5:14-16
15. ເປັນຫຍັງເຮົາຄວນໃຊ້ເວລາເພື່ອອ່ານແລະຄິດຕຶກຕອງກ່ຽວກັບເລື່ອງຄ່າໄຖ່?
15 ຄິດຕຶກຕອງກ່ຽວກັບຄ່າໄຖ່. ພີ່ນ້ອງຍິງຊື່ຣາຈະມານີອາຍຸ 73 ປີບອກວ່າ: “ເມື່ອຂ້ອຍອ່ານເລື່ອງຂອງພະເຢຊູຕອນທີ່ເພິ່ນເຈິກັບຄວາມທຸກຫຼາຍຢ່າງ ຂ້ອຍກໍນ້ຳຕາໄຫຼທຸກເທື່ອ.” ເຈົ້າກໍຈະຮູ້ສຶກແບບນີ້ຄືກັນເມື່ອເຈົ້າຄິດເບິ່ງວ່າ ພະເຢຊູຕ້ອງເຈິກັບຄວາມທຸກຫຼາຍສ່ຳໃດ. ເມື່ອເຈົ້າຄິດຕຶກຕອງກ່ຽວກັບຄ່າໄຖ່ຂອງພະເຢຊູ ເຈົ້າກໍແຮ່ງຈະຮັກເພິ່ນແລະຮັກພໍ່ຂອງເພິ່ນຫຼາຍຂຶ້ນ. ເພື່ອຈະຊ່ອຍເຈົ້າໃຫ້ຄິດຕຶກຕອງເລື່ອງຄ່າໄຖ່ຫຼາຍຂຶ້ນ ເຈົ້າສາມາດໃຊ້ຫົວຂໍ້ນີ້ໃນການສຶກສາສ່ວນຕົວ.
ພະເຢຊູໄດ້ກິນອາຫານງ່າຍໆກັບພວກລູກສິດເພື່ອຊ່ອຍເຂົາເຈົ້າໃຫ້ຮູ້ວິທີທີ່ຈະລະນຶກເຖິງການເສຍຊີວິດຂອງເພິ່ນ (ເບິ່ງຂໍ້ 16)
16. ການສອນຄົນອື່ນໃຫ້ຮູ້ເລື່ອງຄ່າໄຖ່ຊ່ອຍເຮົາແນວໃດ? (ເບິ່ງຮູບໜ້າປົກ)
16 ສອນຄົນອື່ນກ່ຽວກັບເລື່ອງຄ່າໄຖ່. ທຸກເທື່ອທີ່ເຮົາເວົ້າເລື່ອງຄ່າໄຖ່ກັບຄົນອື່ນ ຈະເຮັດໃຫ້ເຮົາຮູ້ຄຸນຄ່າຕໍ່ຄ່າໄຖ່ຫຼາຍຂຶ້ນ. ເຮົາມີວິດີໂອແລະປຶ້ມຕ່າງໆທີ່ຊ່ອຍເຮົາໃຫ້ສອນຄົນອື່ນໃຫ້ຮູ້ວ່າເປັນຫຍັງພະເຢຊູຈຶ່ງຕາຍເພື່ອເຮົາ. ຕົວຢ່າງເຊັ່ນ: ເຮົາສາມາດໃຊ້ປຶ້ມຂ່າວດີຈາກພະເຈົ້າ! ບົດ 4 ທີ່ມີຫົວຂໍ້ວ່າ “ພະເຢຊູຄລິດແມ່ນໃຜ?” ຫຼືເຮົາອາດຈະສະເໜີປຶ້ມຮຽນຄຳພີໄບເບິນແລ້ວໄດ້ຫຍັງ? ໃນບົດ 5 ທີ່ມີຫົວຂໍ້ວ່າ “ຄ່າໄຖ່ເປັນຂອງຂວັນທີ່ມີຄ່າຫຼາຍທີ່ສຸດຈາກພະເຈົ້າ.” ແລະນອກຈາກນັ້ນ ເຮົາຍັງສາມາດຮູ້ຄຸນຄ່າຕໍ່ຄ່າໄຖ່ຫຼາຍຂຶ້ນໂດຍການເຂົ້າຮ່ວມການປະຊຸມອະນຸສອນທຸກໆປີແລະເຊີນຄົນອື່ນໃຫ້ມາຮ່ວມນຳ. ຈັ່ງແມ່ນເປັນກຽດຫຼາຍແທ້ໆທີ່ພະເຢໂຫວາໃຫ້ເຮົາສອນຄົນອື່ນໃຫ້ຮຽນຮູ້ກ່ຽວກັບລູກຊາຍຂອງເພິ່ນ!
17. ເປັນຫຍັງຄ່າໄຖ່ຈຶ່ງເປັນຂອງຂວັນທີ່ດີທີ່ສຸດທີ່ພະເຈົ້າໃຫ້ມະນຸດ?
17 ແນ່ນອນວ່າເຮົາມີເຫດຜົນທີ່ດີທີ່ຈະຮູ້ຄຸນຄ່າໃນຄ່າໄຖ່ໃຫ້ຫຼາຍຂຶ້ນຕໍ່ໆໄປ. ຍ້ອນຄ່າໄຖ່ ເຮົາຈຶ່ງສາມາດມີສາຍສຳພັນທີ່ດີກັບພະເຢໂຫວາໄດ້ເຖິງວ່າເຮົາຈະເປັນຄົນບໍ່ສົມບູນແບບ. ຍ້ອນຄ່າໄຖ່ ແຜນການຂອງຊາຕານຈຶ່ງຖືກທຳລາຍ. (1 ຢຮ. 3:8) ຍ້ອນຄ່າໄຖ່ ຈຸດປະສົງຂອງພະເຢໂຫວາທີ່ມີຕໍ່ໂລກຕັ້ງແຕ່ທຳອິດຈະສຳເລັດເປັນຈິງ. ໂລກຈະກາຍເປັນສວນອຸທິຍານທີ່ສວຍງາມ. ໃນຕອນນັ້ນທຸກຄົນຈະຮັກແລະເຊື່ອຟັງພະເຢໂຫວາ. ດັ່ງນັ້ນ ໃນແຕ່ລະມື້ໃຫ້ເຮົາຊອກຫາວິທີທີ່ຈະສະແດງໃຫ້ເຫັນວ່າເຮົາຮູ້ຄຸນຄ່າຕໍ່ຄ່າໄຖ່ເຊິ່ງເປັນຂອງຂວັນທີ່ດີທີ່ສຸດທີ່ພະເຢໂຫວາໃຫ້ມະນຸດ!
ເພງ 20 ພະອົງເສຍສະລະລູກຊາຍສຸດທີ່ຮັກ
^ ຂໍ້ 5 ເປັນຫຍັງພະເຢຊູຕ້ອງທົນທຸກແລະຕາຍແບບທໍລະມານ? ເຮົາຈະໄດ້ຮັບຄຳຕອບໃນບົດຄວາມນີ້ ເຊິ່ງຈະຊ່ອຍເຮົາໃຫ້ຮູ້ຄຸນຄ່າໃນຄ່າໄຖ່ຫຼາຍຂຶ້ນ.
^ ຂໍ້ 6 ເປັນທຳນຽມຂອງຊາວໂຣມທີ່ຈະເອົານັກໂທດທີ່ຖືກຕັດສິນປະຫານຊີວິດຕອກໄວ້ເທິງເສົາທໍລະມານເພື່ອໃຫ້ຕາຍຢູ່ເທິງເສົານັ້ນ. ແລະພະເຢໂຫວາກໍຍອມໃຫ້ລູກຊາຍຂອງເພິ່ນຕາຍແບບນັ້ນ.
^ ຂໍ້ 55 ຄຳອະທິບາຍຮູບພາບ: ພີ່ນ້ອງຊາຍແຕ່ລະຄົນໄດ້ປະຕິເສດການລໍ້ໃຈໂດຍບໍ່ເບິ່ງຮູບທີ່ບໍ່ເໝາະສົມ ບໍ່ເອົາຢາສູບ ແລະບໍ່ຮັບເງິນສິນບົນ.
