ຄຳຖາມຈາກຜູ້ອ່ານ
ຖ້າຄລິດສະຕຽນຜູ້ໜຶ່ງຢ່າຮ້າງໂດຍບໍ່ມີເຫດຜົນຕາມຫຼັກພະຄຳພີແລ້ວໄປແຕ່ງດອງໃໝ່ ພີ່ນ້ອງໃນປະຊາຄົມຄວນເບິ່ງການແຕ່ງດອງເທື່ອທຳອິດແລະການແຕ່ງດອງໃໝ່ແນວໃດ?
ໃນກໍລະນີນີ້ ພີ່ນ້ອງໃນປະຊາຄົມຄວນເບິ່ງວ່າສາຍພົວພັນຜົວເມຍຜູ້ເກົ່າຈົບລົງແລ້ວ ແລະເມື່ອແຕ່ງດອງໃໝ່ກໍຄວນເບິ່ງວ່າເປັນຜົວເມຍໃໝ່. ແຕ່ເພື່ອຈະເຂົ້າໃຈເລື່ອງນີ້ຫຼາຍຂຶ້ນ ໃຫ້ເຮົາມາເບິ່ງສິ່ງທີ່ພະເຢຊູເວົ້າກ່ຽວກັບການຢ່າຮ້າງແລະການແຕ່ງດອງໃໝ່.
ໃນມັດທາຍ 19:9 ພະເຢຊູບອກວ່າມີແຕ່ເຫດຜົນດຽວເທົ່ານັ້ນທີ່ເຮັດໃຫ້ຜົວເມຍຢ່າຮ້າງກັນໄດ້. ເພິ່ນບອກວ່າ “ຄົນທີ່ຢ່າຮ້າງກັບເມຍແລ້ວໄປແຕ່ງດອງໃໝ່ກໍຖືວ່າລາວມີຊູ້ ເວັ້ນເສຍ ແຕ່ວ່າລາວຢ່າຮ້າງກັບເມຍຍ້ອນເມຍເຮັດຜິດສິນລະທຳທາງເພດ.” ຈາກຄຳເວົ້ານີ້ເຮັດໃຫ້ເຮົາຮູ້ສອງຢ່າງ ນັ້ນກໍຄື: (1) ການເຮັດຜິດສິນລະທຳທາງເພດເປັນເຫດຜົນດຽວທີ່ຜົວເມຍຢ່າຮ້າງກັນໄດ້. (2) ຖ້າຜູ້ຊາຍທີ່ຢ່າຮ້າງກັບເມຍໂດຍບໍ່ໄດ້ເປັນໄປຕາມຫຼັກພະຄຳພີແລ້ວໄປແຕ່ງດອງໃໝ່ກໍຖືວ່າລາວຫຼິ້ນຊູ້. a
ສິ່ງທີ່ພະເຢຊູເວົ້າໝາຍຄວາມວ່າ ຜູ້ເປັນຜົວທີ່ເຮັດຜິດສິນລະທຳທາງເພດແລະຢ່າຮ້າງກັບເມຍມີສິດໄປເອົາເມຍໃໝ່ຕາມຫຼັກພະຄຳພີບໍ? ບໍ່ສະເໝີໄປ ເພາະເມື່ອມີການຫຼິ້ນຊູ້ ຜູ້ເປັນເມຍທີ່ບໍ່ໄດ້ຫຼິ້ນຊູ້ ຈະເປັນຜູ້ຕັດສິນໃຈວ່າຈະໃຫ້ອະໄພຫຼືຕັດສາຍສຳພັນກັບຜົວຫຼືບໍ່. ຖ້າລາວຕັດສາຍສຳພັນແລະຢ່າຮ້າງໃຫ້ຖືກຕ້ອງຕາມກົດໝາຍ ທັງສອງຄົນກໍສາມາດແຕ່ງດອງໃໝ່ຕາມຫຼັກພະຄຳພີໄດ້.
ຖ້າເມຍໃຫ້ອະໄພແລະບໍ່ຢາກຕັດສາຍສຳພັນກັບຜົວແຕ່ຜູ້ເປັນຜົວພັດບໍ່ຍອມຮັບການໃຫ້ອະໄພຈາກເມຍແລະຢ່າຮ້າງພຽງແຕ່ຝ່າຍດຽວ ໃນກໍລະນີນີ້ ລາວກໍບໍ່ສາມາດແຕ່ງດອງໃໝ່ຕາມຫຼັກພະຄຳພີໄດ້ ຍ້ອນເມຍໄດ້ໃຫ້ອະໄພແລະບໍ່ຢາກຕັດສາຍສຳພັນກັບລາວ. ແຕ່ຖ້າລາວເລືອກທີ່ຈະແຕ່ງດອງໃໝ່ ລາວກໍຫຼິ້ນຊູ້ອີກເທື່ອໜຶ່ງ ແລະຜູ້ດູແລກໍຕ້ອງຕັ້ງຄະນະຕັດສິນຄວາມເພື່ອຕັດສິນຄວາມຜິດຂອງລາວອີກ.—1 ກຣ. 5:1, 2; 6:9, 10
ຖ້າຜູ້ເປັນຜົວໄປແຕ່ງດອງໃໝ່ໂດຍບໍ່ຖືກຕາມຫຼັກພະຄຳພີ ພີ່ນ້ອງໃນປະຊາຄົມຄວນເບິ່ງການແຕ່ງດອງເທື່ອທຳອິດແລະການແຕ່ງດອງໃໝ່ແນວໃດ? ຕາມຫຼັກພະຄຳພີແລ້ວ ສາຍພົວພັນຜົວເມຍຄົນເກົ່າຍັງມີຢູ່ບໍ? ຜູ້ທີ່ບໍ່ໄດ້ຫຼິ້ນຊູ້ມີສິດທີ່ຈະຕັດສິນໃຈວ່າຈະໃຫ້ອະໄພຫຼືຕັດສາຍສຳພັນບໍ? ພີ່ນ້ອງໃນປະຊາຄົມຈະເບິ່ງວ່າການແຕ່ງດອງໃໝ່ເປັນການຫຼິ້ນຊູ້ບໍ?
ເມື່ອກ່ອນ ປະຊາຄົມຈະເບິ່ງວ່າການແຕ່ງດອງໃໝ່ເປັນການຫຼິ້ນຊູ້ ຖ້າຜູ້ທີ່ບໍ່ໄດ້ຫຼິ້ນຊູ້ຍັງມີຊີວິດຢູ່ ບໍ່ໄດ້ແຕ່ງດອງໃໝ່ ແລະບໍ່ໄດ້ເຮັດຜິດສິນລະທຳທາງເພດ. ແຕ່ຕອນທີ່ພະເຢຊູເວົ້າເຖິງການຢ່າຮ້າງແລະການແຕ່ງດອງໃໝ່ເພິ່ນບໍ່ໄດ້ເວົ້າເຖິງຜູ້ທີ່ບໍ່ໄດ້ຫຼິ້ນຊູ້ ເພາະເພິ່ນບອກວ່າຜູ້ທີ່ຢ່າຮ້າງໂດຍບໍ່ໄດ້ເປັນໄປຕາມຫຼັກພະຄຳພີແລ້ວໄປແຕ່ງດອງໃໝ່ກໍເປັນການຫຼິ້ນຊູ້. ໃນກໍລະນີນີ້ພະເຢຊູບອກຢ່າງຈະແຈ້ງວ່າການຢ່າຮ້າງແລະການແຕ່ງດອງໃໝ່ເປັນການຫຼິ້ນຊູ້ ເຊິ່ງເຮັດໃຫ້ສາຍພົວພັນຜົວເມຍຄູ່ເກົ່າຈົບລົງ.
“ຄົນທີ່ຢ່າຮ້າງກັບເມຍແລ້ວໄປແຕ່ງດອງໃໝ່ກໍຖືວ່າລາວມີຊູ້ ເວັ້ນເສຍແຕ່ວ່າລາວຢ່າຮ້າງກັບເມຍຍ້ອນເມຍເຮັດຜິດສິນລະທຳທາງເພດ.”—ມທ. 19:9
ເມື່ອສາຍພົວພັນຜົວເມຍຈົບລົງຍ້ອນການຢ່າຮ້າງແລະການແຕ່ງດອງໃໝ່ ການໃຫ້ອະໄພຫຼືຕັດສາຍສຳພັນຈາກຜູ້ທີ່ບໍ່ໄດ້ຫຼິ້ນຊູ້ກໍບໍ່ມີຄວາມໝາຍຫຍັງ. ດັ່ງນັ້ນ ຜູ້ເປັນເມຍທີ່ບໍ່ໄດ້ຫຼິ້ນຊູ້ກໍບໍ່ຕ້ອງໜັກໃຈໃນເລື່ອງນີ້ແລ້ວ ແລະບໍ່ວ່າຜູ້ທີ່ບໍ່ໄດ້ຫຼິ້ນຊູ້ຈະຕາຍ ຈະແຕ່ງດອງໃໝ່ ຫຼືຈະເຮັດຜິດສິນລະທຳທາງເພດ ສິ່ງນີ້ກໍບໍ່ໄດ້ສົ່ງຜົນຕໍ່ວິທີທີ່ພີ່ນ້ອງໃນປະຊາຄົມເບິ່ງການແຕ່ງດອງໃໝ່ຂອງຜູ້ທີ່ຫຼິ້ນຊູ້. b
ຈາກຕົວຢ່າງສົມມຸດທາງເທິງ ເຮົາເຫັນວ່າຜູ້ເປັນຜົວໄດ້ຫຼິ້ນຊູ້ເຊິ່ງເຮັດໃຫ້ມີການຢ່າຮ້າງ. ແຕ່ຖ້າຜົວບໍ່ໄດ້ຫຼິ້ນຊູ້ ແຕ່ຢາກຢ່າຮ້າງແລ້ວໄປແຕ່ງດອງໃໝ່ເດ? ຫຼືຖ້າຜົວໄດ້ເຮັດຜິດສິນລະທຳທາງເພດຫຼັງຈາກທີ່ຢ່າຮ້າງ ແລ້ວໄປແຕ່ງດອງໃໝ່ທັງໆທີ່ເມຍໃຫ້ອະໄພລາວເດ? ບໍ່ວ່າຈະເປັນກໍລະນີໃດກໍຕາມ ຖ້າມີການຢ່າຮ້າງແລ້ວໄປແຕ່ງດອງໃໝ່ກໍຖືວ່າເປັນການຫຼິ້ນຊູ້ແລະເຮັດໃຫ້ສາຍພົວພັນຜົວເມຍຈົບລົງ. ການແຕ່ງດອງໃໝ່ຈະເປັນການສ້າງສາຍສຳພັນໃໝ່ທີ່ຖືກຕ້ອງຕາມກົດໝາຍ. ຫໍສັງເກດການ 15 ພະຈິກ 1979 ໜ້າ 32 (ພາສາອັງກິດ) ບອກວ່າ: “ເມື່ອລາວແຕ່ງດອງໃໝ່ແລ້ວ ລາວຈະກັບໄປສ້າງສາຍສຳພັນກັບເມຍເກົ່າບໍ່ໄດ້ ເພາະສາຍສຳພັນນັ້ນໄດ້ຈົບລົງແລ້ວຫຼັງຈາກທີ່ຢ່າຮ້າງ ຫຼິ້ນຊູ້ ແລະແຕ່ງດອງໃໝ່.
ການປັບປ່ຽນຄວາມເຂົ້າໃຈແບບນີ້ບໍ່ໄດ້ເຮັດໃຫ້ເຮົາເບິ່ງວ່າການແຕ່ງດອງບໍ່ແມ່ນເລື່ອງສັກສິດ ແລະການຫຼິ້ນຊູ້ບໍ່ແມ່ນຄວາມຜິດຮ້າຍແຮງ ເພາະຜູ້ທີ່ຢ່າຮ້າງແລ້ວໄປແຕ່ງດອງໃໝ່ໂດຍທີ່ບໍ່ຖືກຕ້ອງຕາມຫຼັກພະຄຳພີຈະຖືກຜູ້ດູແລຕັ້ງຄະນະຕັດສິນຄວາມເພື່ອຕັດສິນຄວາມຜິດຂອງລາວ. (ຖ້າຜູ້ທີ່ລາວແຕ່ງດອງນຳເປັນຄລິດສະຕຽນ ຜູ້ນັ້ນກໍຈະຖືກຕັດສິນຄືກັນ.) ເຖິງວ່າການແຕ່ງດອງໃໝ່ຈະບໍ່ແມ່ນການຫຼິ້ນຊູ້ ແຕ່ ຜູ້ທີ່ເຮັດແບບນີ້ກໍຕ້ອງລໍຖ້າຫຼາຍປີຊົ່ວຊິໄດ້ຮັບສິດທິພິເສດໃນປະຊາຄົມ ແລະເພື່ອພີ່ນ້ອງຈະເຊົາຄຽດໃຫ້ລາວແລະນັບຖືລາວ. ກ່ອນທີ່ຜູ້ດູແລຈະໃຫ້ສິດທິພິເສດລາວ ຜູ້ດູແລຄວນຄິດເຖິງຜູ້ທີ່ບໍ່ໄດ້ຫຼິ້ນຊູ້ເຊິ່ງຖືກທໍລະຍົດແລະລູກທີ່ຖືກປະຖິ້ມ.—ມລກີ. 2:14-16
ເມື່ອຄິດເຖິງຜົນເສຍຂອງການຢ່າຮ້າງແລະການແຕ່ງດອງໃໝ່ ຄລິດສະຕຽນທີ່ສະຫຼາດຄວນຮຽນແບບພະເຢໂຫວາໂດຍເບິ່ງວ່າການແຕ່ງດອງເປັນເລື່ອງສັກສິດ.—ຜູ້ປ. 5:4, 5; ຮຣ. 13:4
a ຕໍ່ໄປນີ້ເຮົາຈະສົມມຸດວ່າຜູ້ເປັນຜົວໄດ້ຫຼິ້ນຊູ້ ແລະເມຍບໍ່ໄດ້ຫຼິ້ນຊູ້. ແຕ່ຄຳເວົ້າຂອງພະເຢຊູທີ່ບອກໃນມາຣະໂກ 10:11, 12 ໃນເລື່ອງການຫຼິ້ນຊູ້ໃຊ້ໄດ້ທັງຜູ້ຍິງແລະຜູ້ຊາຍ.
b ນີ້ເປັນການປັບປ່ຽນຄວາມເຂົ້າໃຈທີ່ວ່າ ການແຕ່ງດອງໃໝ່ຈະຖືວ່າເປັນການຫຼິ້ນຊູ້ຖ້າຜູ້ທີ່ບໍ່ໄດ້ຫຼິ້ນຊູ້ຍັງມີຊີວິດຢູ່ ບໍ່ໄດ້ແຕ່ງດອງໃໝ່ ຫຼືບໍ່ໄດ້ເຮັດຜິດສິນລະທຳທາງເພດ.
