ບົດຄວາມສຶກສາທີ 16
“ລາວຈະຟື້ນຄືນຈາກຕາຍ”!
“ພະເຢຊູບອກ [ມາທາ] ວ່າ: ‘ລາວຈະຄືນມາຈາກຕາຍ.’”—ຢຮ. 11:23
ເພງ 151 ພະອົງຈະເອີ້ນ
ໃຈຄວາມສຳຄັນ a
1. ເດັກນ້ອຍຊາຍຄົນໜຶ່ງໄດ້ເວົ້າຫຍັງທີ່ສະແດງວ່າລາວໝັ້ນໃຈໃນຄວາມຫວັງເລື່ອງການຄືນມາຈາກຕາຍ?
ເດັກນ້ອຍຊາຍຜູ້ໜຶ່ງທີ່ຊື່ມັດທິວເຈັບປ່ວຍຮ້າຍແຮງແລະຕ້ອງໄດ້ຜ່າຕັດຫຼາຍເທື່ອ. ຕອນລາວອາຍຸໄດ້ 7 ປີ ລາວແລະຄອບຄົວໄດ້ເບິ່ງລາຍການໂທລະທັດ JW. ໃນຕອນທ້າຍຂອງລາຍການ ລາວໄດ້ເຫັນມິວສິກວິດີໂອກ່ຽວກັບການຕ້ອນຮັບຄົນທີ່ຄືນມາຈາກຕາຍ. b ຫຼັງຈາກເບິ່ງລາຍການຈົບ ມັດທິວກໍຍ່າງໄປຈັບມືພໍ່ແມ່ແລະເວົ້າກັບເຂົາເຈົ້າວ່າ: “ເຫັນບໍ ອີ່ພໍ່ອີ່ແມ່ ຖ້າລູກຕາຍ ລູກກໍຈະຖືກປຸກໃຫ້ມີຊີວິດອີກ ບໍ່ເປັນຫຍັງເດີ້! ດຽວເຮົາກໍຈະໄດ້ເຈິກັນອີກ.” ເຈົ້ານຶກພາບອອກບໍວ່າ ພໍ່ແມ່ຄູ່ນີ້ຈະມີຄວາມສຸກຫຼາຍສ່ຳໃດທີ່ເຫັນວ່າລູກຊາຍໝັ້ນໃຈໃນຄວາມຫວັງເລື່ອງການຄືນມາຈາກຕາຍ?
2-3. ເປັນຫຍັງຈຶ່ງເປັນເລື່ອງດີທີ່ຈະຄິດເຖິງຄຳສັນຍາເລື່ອງການຄືນມາຈາກຕາຍ?
2 ເປັນເລື່ອງດີທີ່ຈະຄິດກ່ຽວກັບຄຳສັນຍາໃນຄຳພີໄບເບິນເລື່ອງການຄືນມາຈາກຕາຍເປັນໄລຍະໆ. (ຢຮ. 5:28, 29) ຍ້ອນຫຍັງ? ເພາະເຮົາອາດຈະເຈັບປ່ວຍຮ້າຍແຮງຕອນໃດກໍໄດ້ ຫຼືຄົນທີ່ເຮົາຮັກອາດຕາຍກະທັນຫັນກໍໄດ້. (ຜູ້ປ. 9:11; ຢກບ. 4:13, 14) ຄວາມຫວັງເລື່ອງການຄືນມາຈາກຕາຍຈະຊ່ວຍເຮົາໃຫ້ອົດທົນກັບເລື່ອງນີ້ໄດ້. (1ທຊ. 4:13) ຄຳພີໄບເບິນຮັບຮອງກັບເຮົາວ່າ ພະເຢໂຫວາຮູ້ຈັກເຮົາດີແລະຮັກເຮົາຫຼາຍ. (ລກ. 12:7) ເພິ່ນຄືຊິຮູ້ຈັກເຮົາດີແທ້ໆຈຶ່ງຈະປຸກເຮົາໃຫ້ມີນິດໄສແລະຄວາມຊົງຈຳແບບເກົ່າ. ຍ້ອນພະເຢໂຫວາຮັກເຮົາຫຼາຍ ເພິ່ນຈຶ່ງໃຫ້ເຮົາມີໂອກາດທີ່ຈະມີຊີວິດຕະຫຼອດໄປ. ແລະເຖິງວ່າເຮົາຈະຕ້ອງຕາຍ ເພິ່ນກໍຈະປຸກເຮົາໃຫ້ກັບມາມີຊີວິດອີກ.
3 ໃນບົດຄວາມນີ້ເຮົາຈະມາເບິ່ງວ່າ ເປັນຫຍັງເຮົາຈຶ່ງເຊື່ອຄຳສັນຍາເລື່ອງການຄືນມາຈາກຕາຍໄດ້. ແລ້ວຫຼັງຈາກນັ້ນ ເຮົາຈະມາເບິ່ງເລື່ອງໜຶ່ງໃນຄຳພີໄບເບິນທີ່ເສີມຄວາມເຊື່ອເຮົາແລະກ່ຽວຂ້ອງກັບຂໍ້ພະຄຳພີຫຼັກທີ່ບອກວ່າ “ລາວຈະຄືນມາຈາກຕາຍ.” (ຢຮ. 11:23) ແລ້ວສຸດທ້າຍເຮົາຈະມາເບິ່ງວ່າ ເຮົາຕ້ອງເຮັດຫຍັງເພື່ອຈະໝັ້ນໃຈໃນຄວາມຫວັງເລື່ອງການຄືນມາຈາກຕາຍຫຼາຍຂຶ້ນ?
ເປັນຫຍັງເຮົາຈຶ່ງເຊື່ອຄຳສັນຍາເລື່ອງການຄືນມາຈາກຕາຍໄດ້?
4. ເພື່ອຈະເຊື່ອຄຳສັນຍາຂອງຜູ້ໃດຜູ້ໜຶ່ງໄດ້ ເຮົາຕ້ອງໝັ້ນໃຈໃນເລື່ອງຫຍັງ? ຂໍຍົກຕົວຢ່າງ.
4 ເພື່ອຈະເຊື່ອຄຳສັນຍາຂອງຜູ້ໃດຜູ້ໜຶ່ງໄດ້ ເຮົາຕ້ອງໝັ້ນໃຈວ່າຜູ້ທີ່ໃຫ້ສັນຍາຢາກເຮັດ ແລະສາມາດທີ່ຈະເຮັດຕາມຄຳສັນຍານັ້ນໄດ້. ຂໍໃຫ້ຄິດເຖິງຕົວຢ່າງຕໍ່ໄປນີ້: ສົມມຸດວ່າເຮືອນຂອງເຈົ້າໄດ້ຮັບຜົນກະທົບຮ້າຍແຮງຈາກພາຍຸ. ແລ້ວມີໝູ່ຄົນໜຶ່ງມາຫາແລະສັນຍາກັບເຈົ້າວ່າ “ຂ້ອຍຈະສ້າງເຮືອນໃຫ້ເຈົ້າໃໝ່ເດີ້.” ລາວຕັ້ງໃຈຈະຊ່ວຍເຈົ້າ ແລະເຈົ້າກໍໝັ້ນໃຈວ່າລາວຢາກຈະຊ່ວຍເຈົ້າແທ້ໆ. ເຈົ້າຮູ້ວ່າໝູ່ຜູ້ນີ້ເປັນຊ່າງທີ່ເກັ່ງຫຼາຍແລະມີເຄື່ອງມືຄົບ. ເຈົ້າຈຶ່ງເຊື່ອວ່າລາວຈະເຮັດຕາມຄຳສັນຍາໄດ້. ແລ້ວເຈົ້າຄິດແນວໃດກ່ຽວກັບຄຳສັນຍາຂອງພະເຈົ້າເລື່ອງການຄືນມາຈາກຕາຍ? ເພິ່ນຢາກຈະເຮັດແບບນັ້ນບໍ? ແລະເພິ່ນສາມາດເຮັດແບບນັ້ນແທ້ໆບໍ?
5-6. ເປັນຫຍັງເຮົາຈຶ່ງໝັ້ນໃຈໄດ້ວ່າພະເຢໂຫວາຢາກ ປຸກຄົນທີ່ຕາຍໄປແລ້ວໃຫ້ກັບມາມີຊີວິດອີກ?
5 ພະເຢໂຫວາຢາກ ຈະປຸກຄົນຕາຍໃຫ້ຟື້ນຄືນມາມີຊີວິດອີກເທື່ອໜຶ່ງບໍ? ແມ່ນແລ້ວ. ເພິ່ນໄດ້ດົນໃຈຜູ້ຂຽນຄຳພີໄບເບິນຫຼາຍຄົນໃຫ້ບັນທຶກຄຳສັນຍາເລື່ອງການຄືນມາຈາກຕາຍ. (ອຊຢ. 26:19; ໂອ. 13:14; ພນມ. 20:11-13) ບໍ່ວ່າພະເຢໂຫວາຈະສັນຍາເລື່ອງຫຍັງ ເພິ່ນກໍຈະເຮັດໃຫ້ເກີດຂຶ້ນແທ້ທັງໝົດ. (ຢຊ. 23:14) ທີ່ຈິງ ພະເຢໂຫວາຢາກຈະປຸກທຸກຄົນທີ່ຕາຍໃຫ້ຟື້ນຄືນມາແທ້ໆ! ເປັນຫຍັງເຮົາຈຶ່ງເວົ້າແບບນັ້ນໄດ້?
6 ໃຫ້ເຮົາມາເບິ່ງຄຳເວົ້າຂອງໂຢບນຳກັນ. ລາວໝັ້ນໃຈວ່າເຖິງວ່າລາວຈະຕາຍໄປ ແຕ່ພະເຢໂຫວາກໍຢາກຈະປຸກລາວໃຫ້ກັບມາມີຊີວິດອີກແທ້ໆ. (ໂຢບ 14:14, 15) ພະເຢໂຫວາຮູ້ສຶກແບບດຽວກັນນີ້ກັບຜູ້ຮັບໃຊ້ຂອງເພິ່ນທຸກຄົນທີ່ໄດ້ຕາຍໄປແລ້ວ. ແລະເພິ່ນກໍຄິດຮອດເຂົາເຈົ້າແທ້ໆ. ເພິ່ນຢາກໃຫ້ເຂົາເຈົ້າກັບມາມີຊີວິດອີກເທື່ອໜຶ່ງ ມີສຸຂະພາບແຂງແຮງ ແລະມີຄວາມສຸກ. ແລ້ວອີກຫຼາຍພັນລ້ານຄົນທີ່ຕາຍໄປແລ້ວແຕ່ຍັງບໍ່ໄດ້ຮູ້ຈັກພະເຢໂຫວາເດ? ພະເຢໂຫວາກໍຢາກຈະປຸກເຂົາເຈົ້າໃຫ້ມີຊີວິດອີກຄືກັນ. (ກຈກ. 24:15) ເພິ່ນຢາກໃຫ້ເຂົາເຈົ້າມີໂອກາດທີ່ຈະໄດ້ເປັນໝູ່ກັບເພິ່ນແລະໄດ້ຊີວິດຕະຫຼອດໄປຢູ່ເທິງໂລກ. (ຢຮ. 3:16) ເຫັນໄດ້ວ່າພະເຢໂຫວາຢາກປຸກຄົນທີ່ຕາຍໄປແລ້ວໃຫ້ກັບມາມີຊີວິດອີກເທື່ອໜຶ່ງແທ້ໆ!
7-8. ເປັນຫຍັງເຮົາຈຶ່ງໝັ້ນໃຈໄດ້ວ່າ ພະເຢໂຫວາມີຄວາມສາມາດ ແລະອຳນາດ ທີ່ຈະປຸກຄົນຕາຍໃຫ້ຟື້ນຄືນມາ?
7 ແລ້ວພະເຢໂຫວາມີຄວາມສາມາດ ແລະອຳນາດ ທີ່ຈະປຸກຄົນທີ່ຕາຍໃຫ້ຟື້ນຄືນມາບໍ? ມີແທ້! ເພິ່ນເປັນພະເຈົ້າ “ຜູ້ມີລິດເດດສູງສຸດ.” (ພນມ. 1:8) ເພິ່ນຈຶ່ງມີອຳນາດທີ່ຈະກຳຈັດທຸກຢ່າງທີ່ເປັນສັດຕູຂອງເພິ່ນເຊິ່ງລວມເຖິງຄວາມຕາຍ. (1ກຣ. 15:26) ເມື່ອເຮົາຮູ້ແບບນີ້ ເຮົາຮູ້ສຶກໄດ້ກຳລັງໃຈແລະສະບາຍໃຈຫຼາຍແທ້ໆ. ໃຫ້ເຮົາມາເບິ່ງຕົວຢ່າງຂອງພີ່ນ້ອງຍິງຄົນໜຶ່ງທີ່ຊື່ເອັມມາ ອາໂນ. ລາວກັບຄອບຄົວເຈິການທົດສອບຄວາມເຊື່ອທີ່ໜັກຫຼາຍໃນລະຫວ່າງສົງຄາມໂລກຄັ້ງທີ II. ເອັມມາປອບໃຈລູກສາວທີ່ສູນເສຍໝູ່ຮັກໝູ່ແພງຫຼາຍຄົນໃນຄ້າຍກັກຂັງຂອງພວກນາຊີວ່າ: “ຖ້າຄົນທີ່ຕາຍໄປບໍ່ມີໂອກາດກັບຄືນມາມີຊີວິດອີກ ກໍສະແດງວ່າຄວາມຕາຍມີອຳນາດຫຼາຍກວ່າພະເຈົ້າແມ່ນບໍ?” ເຮົາຮູ້ດີວ່າ ບໍ່ມີໃຜຫຼືອັນໃດມີອຳນາດຫຼາຍກວ່າພະເຢໂຫວາອີກແລ້ວ! ຍ້ອນພະເຢໂຫວາມີພະລັງອຳນາດສູງສຸດແລະເປັນຜູ້ສ້າງຊີວິດ ເຮົາ ເພິ່ນຕ້ອງມີຄວາມສາມາດທີ່ຈະເຮັດໃຫ້ຄົນທີ່ຕາຍໄປກັບມາມີຊີວິດອີກ ແນ່ນອນ.
8 ອີກເຫດຜົນໜຶ່ງທີ່ເຮົາຈະຮູ້ວ່າພະເຢໂຫວາສາມາດປຸກຄົນຕາຍໃຫ້ຟື້ນຄືນມາໄດ້ອີກກໍຄື: ເພິ່ນມີຄວາມຈຳທີ່ບໍ່ຈຳກັດ. ເພິ່ນສາມາດເອີ້ນຊື່ດວງດາວໄດ້ທຸກດວງ. (ອຊຢ. 40:26) ແລະເພິ່ນກໍຈື່ທຸກຄົນທີ່ຕາຍໄປແລ້ວໄດ້. (ໂຢບ 14:13; ລກ. 20:37, 38) ເພິ່ນເຖິງຂັ້ນຈື່ລາຍລະອຽດທັງໝົດທີ່ກ່ຽວກັບຄົນທີ່ເພິ່ນຈະປຸກໃຫ້ຄືນມາ ເຊັ່ນ: ເພິ່ນຈື່ລະຫັດພັນທຸກຳຂອງເຂົາເຈົ້າໄດ້ ຈື່ໄດ້ວ່າເຂົາເຈົ້າມີຮູບຮ່າງໜ້າຕາແນວໃດ ແລະມີນິດໄສແບບໃດ ຈື່ໄດ້ວ່າເຂົາເຈົ້າເຈິຫຍັງມາແດ່ໃນຊີວິດ ແລະເພິ່ນຈື່ໄດ້ໝົດວ່າເຂົາເຈົ້າມີຄວາມຊົງຈຳແນວໃດແດ່.
9. ເປັນຫຍັງເຈົ້າຈຶ່ງເຊື່ອຄຳສັນຍາຂອງພະເຢໂຫວາເລື່ອງການຄືນມາຈາກຕາຍ?
9 ເຮົາເຫັນໄດ້ເລີຍວ່າເຮົາເຊື່ອຄຳສັນຍາຂອງພະເຢໂຫວາເລື່ອງການຄືນມາຈາກຕາຍໄດ້ ເພາະເຮົາຮູ້ວ່າເພິ່ນຢາກປຸກຄົນທີ່ຕາຍໃຫ້ຟື້ນຄືນມາ ແລະເພິ່ນມີຄວາມສາມາດແລະອຳນາດທີ່ຈະເຮັດແບບນັ້ນໄດ້. ຕໍ່ໄປນີ້ໃຫ້ເຮົາມາເບິ່ງອີກເຫດຜົນໜຶ່ງທີ່ເຮັດໃຫ້ເຮົາເຊື່ອຄຳສັນຍານີ້ຂອງພະເຢໂຫວາ ນັ້ນກໍຄື ເພິ່ນເຄີຍປຸກຄົນໃຫ້ຄືນມາຈາກຕາຍມາແລ້ວ. ໃນສະໄໝທີ່ຂຽນຄຳພີໄບເບິນພະເຢໂຫວາໄດ້ໃຫ້ອຳນາດນີ້ກັບຜູ້ຮັບໃຊ້ຂອງເພິ່ນບາງຄົນທີ່ຈະປຸກຄົນຕາຍໃຫ້ຟື້ນຄືນມາໄດ້ ແລະພະເຢຊູກໍໄດ້ອຳນາດນີ້ຄືກັນ. ໃຫ້ເຮົາມາເບິ່ງເຫດການໜຶ່ງທີ່ພະເຢຊູເຮັດໃນໂຢຮັນບົດ 11.
ພະເຢຊູສູນເສຍໝູ່ທີ່ຮັກ
10. ມີຫຍັງເກີດຂຶ້ນຕອນທີ່ພະເຢຊູຢູ່ອີກຟາກໜຶ່ງຂອງແມ່ນ້ຳຈໍແດນ? ແລ້ວເພິ່ນເຮັດແນວໃດ? (ໂຢຮັນ 11:1-3)
10 ອ່ານໂຢຮັນ 11:1-3. ຂໍໃຫ້ຄິດເຖິງເຫດການທີ່ເກີດຂຶ້ນຢູ່ບ້ານເບັດທານີໃນທ້າຍປີ ຄ.ສ 32. ພະເຢຊູມີໝູ່ສະໜິດຢູ່ບ້ານນີ້. ເຂົາເຈົ້າມີອ້າຍເອື້ອຍນ້ອງນຳກັນຢູ່ສາມຄົນຄື: ລາຊະໂຣ ມາທາ ແລະມາຣີ. (ລກ. 10:38-42) ແຕ່ລາຊະໂຣບໍ່ສະບາຍແຮງແລະມາທາກັບມາຣີກໍກັງວົນເລື່ອງນີ້ຫຼາຍ. ທັງສອງຄົນເລີຍສົ່ງຄົນໄປບອກພະເຢຊູທີ່ຢູ່ອີກຟາກໜຶ່ງຂອງແມ່ນ້ຳຈໍແດນ ເຊິ່ງຖ້າພະເຢຊູຈະມາທີ່ບ້ານນີ້ກໍຕ້ອງໃຊ້ເວລາຍ່າງປະມານສອງມື້. (ຢຮ. 10:40) ແຕ່ວ່າໜ້າເສຍດາຍ ຕອນທີ່ຄົນສົ່ງຂ່າວໄດ້ເຈິພະເຢຊູລາຊະໂຣກໍຕາຍແລ້ວ. ເຖິງເພິ່ນຮູ້ວ່າໝູ່ຮັກຂອງເພິ່ນຫາກໍຕາຍ ແຕ່ເພິ່ນກໍຍັງຢູ່ບ່ອນນີ້ອີກສອງມື້ຈຶ່ງຄ່ອຍໄປບ້ານເບັດທານີ. ກ່ອນທີ່ພະເຢຊູຈະໄປຮອດບ້ານເບັດທານີ ລາຊະໂຣກໍຕາຍໄປໄດ້ສີ່ມື້ແລ້ວ. ທີ່ເປັນແບບນີ້ກໍຍ້ອນເພິ່ນຕັ້ງໃຈຈະເຮັດບາງຢ່າງເພື່ອໝູ່ຂອງເພິ່ນ ແລະເຮັດໃຫ້ພະເຈົ້າໄດ້ຮັບການຍ້ອງຍໍສັນລະເສີນ.—ຢຮ. 11:4, 6, 11, 17
11. ໃນເລື່ອງນີ້ເຮົາໄດ້ບົດຮຽນຫຍັງກ່ຽວກັບການເປັນໝູ່?
11 ເລື່ອງນີ້ເຮັດໃຫ້ເຮົາໄດ້ຮຽນຮູ້ວ່າການເປັນໝູ່ທີ່ດີຄວນຈະເປັນແນວໃດ. ຕອນທີ່ມາທາແລະມາຣີສົ່ງຂ່າວໄປຫາພະເຢຊູ ເຂົາເຈົ້າບໍ່ໄດ້ຂໍໃຫ້ພະເຢຊູມາທີ່ເບັດທານີ. ເຂົາເຈົ້າພຽງແຕ່ບອກວ່າໝູ່ຮັກຂອງເພິ່ນບໍ່ສະບາຍຫຼາຍ. (ຢຮ. 11:3) ແລະຕອນທີ່ລາຊະໂຣຕາຍໄປແລ້ວ ພະເຢຊູບໍ່ຈຳເປັນຕ້ອງໄປເບັດທານີເພື່ອຈະໄປປຸກລາວໃຫ້ຟື້ນຄືນມາ. ເພິ່ນພຽງແຕ່ປຸກລາຊະໂຣຈາກບ່ອນທີ່ເພິ່ນຢູ່ກໍໄດ້ ແຕ່ເພິ່ນກໍເລືອກທີ່ຈະໄປບ່ອນນັ້ນເພື່ອຢູ່ເປັນໝູ່ມາທາແລະມາຣີ. ແລ້ວເຈົ້າເດ ເຈົ້າມີໝູ່ທີ່ພ້ອມຈະຊ່ວຍໂດຍທີ່ເຈົ້າບໍ່ຕ້ອງຮ້ອງຂໍບໍ? ຖ້າມີ ເຈົ້າກໍຮູ້ວ່າເຈົ້າໝາຍເພິ່ງລາວໄດ້ “ໃນເວລາລຳບາກ.” (ສຸພາ. 17:17, ລ.ມ.) ສ່ວນເຮົາ ເຮົາກໍຕ້ອງຮຽນແບບພະເຢຊູນຳໂດຍເປັນໝູ່ທີ່ດີກັບຄົນອື່ນ. ຕອນນີ້ໃຫ້ເຮົາມາເບິ່ງວ່າ ມີຫຍັງເກີດຂຶ້ນອີກ.
12. ພະເຢຊູສັນຍາເລື່ອງຫຍັງກັບມາທາ? ແລະເປັນຫຍັງລາວຈຶ່ງເຊື່ອຄຳສັນຍາຂອງເພິ່ນໄດ້? (ໂຢຮັນ 11:23-26)
12 ອ່ານໂຢຮັນ 11:23-26. ເມື່ອມາທາຮູ້ວ່າພະເຢຊູກຳລັງຈະຮອດເບັດທານີ ລາວກໍຮີບຟ້າວອອກໄປຫາເພິ່ນແລ້ວບອກວ່າ: “ນາຍເອີຍ ຖ້າທ່ານຢູ່ທີ່ນີ້ລາວຄືຊິບໍ່ຕາຍ.” (ຢຮ. 11:21) ທີ່ມາທາເວົ້າແບບນີ້ກໍຖືກ ເພາະຕອນທີ່ລາຊະໂຣຍັງບໍ່ຕາຍ ພະເຢຊູສາມາດປິ່ນປົວລາວໃຫ້ເຊົາເຈັບປ່ວຍໄດ້ແທ້. ແຕ່ເພິ່ນຢາກເຮັດສິ່ງທີ່ໜ້າອັດສະຈັນຫຼາຍກວ່ານັ້ນອີກ. ເພິ່ນສັນຍາກັບມາທາວ່າ: “ລາວຈະຄືນມາຈາກຕາຍ.” ແລ້ວເພິ່ນຍັງບອກເຫດຜົນທີ່ຊ່ວຍໃຫ້ມາທາເຊື່ອຄຳສັນຍາຂອງເພິ່ນວ່າ “ຂ້ອຍແມ່ນຜູ້ທີ່ປຸກຄົນຕາຍໃຫ້ຟື້ນແລະໃຫ້ພວກເຂົາມີຊີວິດ.” ພະເຢໂຫວາໃຫ້ພະລັງອຳນາດກັບພະເຢຊູທີ່ຈະປຸກຄົນຕາຍ. ກ່ອນໜ້ານັ້ນ ເພິ່ນປຸກເດັກນ້ອຍຜູ້ຍິງຄົນໜຶ່ງໃຫ້ຟື້ນຄືນມາຫຼັງຈາກທີ່ລາວຫາກໍຕາຍໄດ້ບໍ່ດົນ. ແລ້ວກໍມີອີກເທື່ອໜຶ່ງທີ່ເພິ່ນປຸກຜູ້ຊາຍຄົນໜຶ່ງ ເຊິ່ງລາວຫາກໍຕາຍໃນມື້ດຽວກັນ. (ລກ. 7:11-15; 8:49-55) ພະເຢຊູຈະປຸກຄົນທີ່ຕາຍມາແລ້ວສີ່ມື້ໄດ້ບໍ ແຖມສົບກໍເລີ່ມເນົ່າແລ້ວ?
“ລາຊະໂຣ ອອກມາ!”
ພະເຢຊູເຂົ້າໃຈຄວາມຮູ້ສຶກຂອງໝູ່ທີ່ກຳລັງເສຍໃຈ (ເບິ່ງຂໍ້ 13-14)
13. ຕາມໂຢຮັນ 11:32-35 ເມື່ອພະເຢຊູເຫັນມາຣີແລະຄົນອື່ນໆຮ້ອງໄຫ້ ເພິ່ນເຮັດແນວໃດ? (ເບິ່ງຮູບພາບ)
13 ອ່ານໂຢຮັນ 11:32-35. ລອງຄິດເບິ່ງມີຫຍັງເກີດຂຶ້ນຕໍ່ຈາກນັ້ນ. ມາຣີກໍອອກໄປຫາພະເຢຊູ. ລາວເວົ້າຄືກັນກັບມາທາວ່າ “ນາຍເອີຍ ຖ້າທ່ານຢູ່ທີ່ນີ້ລາວຄືຊິບໍ່ຕາຍ.” ມາຣີກັບຄົນອື່ນກຳລັງເສຍໃຈຫຼາຍ. ເມື່ອພະເຢຊູເຫັນເຂົາເຈົ້າຮ້ອງໄຫ້ ເພິ່ນກໍຮ້ອງໄຫ້ກັບເຂົາເຈົ້າຍ້ອນຮູ້ສຶກອີ່ຕົນເຂົາເຈົ້າຫຼາຍ. ເພິ່ນຮູ້ດີວ່າ ເມື່ອຄົນທີ່ເຮົາຮັກຕາຍຈາກໄປມັນຮູ້ສຶກເຈັບປວດຫຼາຍສ່ຳໃດ. ເພິ່ນຕ້ອງຢາກກຳຈັດຕົ້ນເຫດທີ່ເຮັດໃຫ້ເຂົາເຈົ້າຮ້ອງໄຫ້ແທ້ໆ!
14. ການທີ່ພະເຢຊູຮ້ອງໄຫ້ກັບມາຣີເຮັດໃຫ້ເຮົາຮູ້ຫຍັງກ່ຽວກັບພະເຢໂຫວາ?
14 ການທີ່ພະເຢຊູຮ້ອງໄຫ້ກັບມາຣີເຮັດໃຫ້ເຮົາຮູ້ວ່າ ພະເຢໂຫວາເປັນພະເຈົ້າທີ່ເຂົ້າໃຈຄວາມຮູ້ສຶກແລະອີ່ຕົນເຮົາ. ເປັນຫຍັງຄືເວົ້າແບບນັ້ນ? ຄືກັບທີ່ເຮົາໄດ້ເຫັນໃນບົດຄວາມກ່ອນ ທຸກຢ່າງທີ່ພະເຢຊູເຮັດກໍເຮັດໃຫ້ເຮົາເຫັນວ່າພະເຢໂຫວາຄິດແລະຮູ້ສຶກແນວໃດ. (ຢຮ. 12:45) ດັ່ງນັ້ນ ເມື່ອເຮົາອ່ານແລະຮູ້ວ່າພະເຢຊູເຂົ້າໃຈຄວາມຮູ້ສຶກຂອງໝູ່ທີ່ກຳລັງໂສກເສົ້າເສຍໃຈຈົນເຮັດໃຫ້ເພິ່ນຮ້ອງໄຫ້ ມັນກໍເຮັດໃຫ້ເຮົາຮູ້ວ່າພະເຢໂຫວາກໍຮູ້ສຶກແບບນັ້ນຄືກັນເມື່ອເພິ່ນເຫັນວ່າເຮົາຮ້ອງໄຫ້. (ເພງ. 56:8) ເມື່ອເຈົ້າເຫັນວ່າພະເຢໂຫວາເປັນພະເຈົ້າທີ່ອ່ອນໂຍນແລະເຂົ້າໃຈຄວາມຮູ້ສຶກຂອງເຈົ້າ ເຈົ້າກໍຢາກໃກ້ຊິດກັບເພິ່ນຫຼາຍຂຶ້ນແມ່ນບໍ?
ພະເຢຊູສະແດງວ່າເພິ່ນມີພະລັງອຳນາດທີ່ຈະປຸກຄົນຕາຍໃຫ້ຟື້ນ (ເບິ່ງຂໍ້ 15-16)
15. ຕາມໂຢຮັນ 11:41-44 ເກີດຫຍັງຂຶ້ນຢູ່ອຸໂມງຝັງສົບຂອງລາຊະໂຣ? (ເບິ່ງຮູບພາບ)
15 ອ່ານໂຢຮັນ 11:41-44. ເມື່ອພະເຢຊູມາຮອດອຸໂມງຝັງສົບຂອງລາຊະໂຣ ເພິ່ນກໍບອກໃຫ້ກິ້ງຫີນທີ່ອັດປາກຖ້ຳອອກ. ແຕ່ມາທາບໍ່ຢາກໃຫ້ເຮັດແບບນັ້ນແລະບອກວ່າ ປານນີ້ສົບຄືຊິເໝັນແລ້ວ. ແຕ່ພະເຢຊູບອກລາວວ່າ: “ຂ້ອຍເຄີຍບອກເຈົ້າແລ້ວບໍ່ແມ່ນບໍວ່າ ຖ້າເຈົ້າເຊື່ອ ເຈົ້າຈະໄດ້ເຫັນລິດເດດຂອງພະເຈົ້າ?” (ຢຮ. 11:39, 40) ແລ້ວພະເຢຊູກໍເງີຍໜ້າຂຶ້ນຟ້າແລະອະທິດຖານເຖິງພະເຢໂຫວາຕໍ່ໜ້າທຸກຄົນ. ເພິ່ນຢາກໃຫ້ພະເຢໂຫວາໄດ້ຮັບການສັນລະເສີນຈາກສິ່ງທີ່ເພິ່ນກຳລັງຈະເຮັດ. ຈາກນັ້ນເພິ່ນກໍຮ້ອງສຽງດັງວ່າ: “ລາຊະໂຣ ອອກມາ!” ແລ້ວລາຊະໂຣກໍຍ່າງອອກມາຈາກອຸໂມງຝັງສົບ! ພະເຢຊູເຮັດສິ່ງທີ່ບາງຄົນຄິດວ່າບໍ່ມີທາງເປັນໄປໄດ້.
16. ເຫດການໃນໂຢຮັນບົດ 11 ຊ່ວຍເຮົາແນວໃດໃຫ້ໝັ້ນໃຈໃນຄວາມຫວັງເລື່ອງການຄືນຈາກຕາຍຫຼາຍຂຶ້ນ?
16 ເຫດການໃນໂຢຮັນບົດ 11 ເຮັດໃຫ້ເຮົາໝັ້ນໃຈໃນເລື່ອງການຟື້ນຄືນຈາກຕາຍຫຼາຍຂຶ້ນ. ເປັນຫຍັງຈຶ່ງເວົ້າແບບນັ້ນ? ຈື່ໄດ້ບໍວ່າ ພະເຢຊູສັນຍາກັບມາທາວ່າ “ລາວຈະຄືນມາຈາກຕາຍ.” (ຢຮ. 11:23) ພະເຢຊູກໍເປັນຄືກັບພະເຢໂຫວາ ເພິ່ນຢາກປຸກຄົນໃຫ້ຄືນມາຈາກຕາຍ ແລະເພິ່ນເອງກໍມີທັງຄວາມສາມາດແລະອຳນາດທີ່ຈະເຮັດຕາມທີ່ສັນຍາໄດ້. ການທີ່ພະເຢຊູຮ້ອງໄຫ້ເຮັດໃຫ້ເຮົາເຫັນວ່າ ເພິ່ນຢາກປຸກຄົນຕາຍໃຫ້ຟື້ນຄືນມາແລະຢາກກຳຈັດຄວາມຕາຍທີ່ເຮັດໃຫ້ເຮົາທຸກຄົນເປັນທຸກ. ຕອນທີ່ລາຊະໂຣຍ່າງອອກຈາກອຸໂມງຝັງສົບ ເຮັດໃຫ້ເຮົາເຫັນວ່າ ພະເຢຊູມີພະລັງອຳນາດແລະມີຄວາມສາມາດທີ່ຈະປຸກຄົນຕາຍໃຫ້ຟື້ນຄືນມາໄດ້. ນອກຈາກນັ້ນ ຂໍໃຫ້ເຮົາຄິດເຖິງຄຳເວົ້າທີ່ພະເຢຊູເວົ້າກັບມາທາວ່າ “ຂ້ອຍເຄີຍບອກເຈົ້າແລ້ວບໍ່ແມ່ນບໍວ່າ ຖ້າເຈົ້າເຊື່ອ ເຈົ້າຈະໄດ້ເຫັນ ລິດເດດຂອງພະເຈົ້າ?” (ຢຮ. 11:40) ດັ່ງນັ້ນ ເຮົາມີເຫດຜົນໜັກແໜ້ນແທ້ໆທີ່ຈະເຊື່ອວ່າຄຳສັນຍາຂອງພະເຢໂຫວາເລື່ອງການຄືນມາຈາກຕາຍຈະເກີດຂຶ້ນແທ້ແນ່ນອນ. ແຕ່ເຮົາຕ້ອງເຮັດອັນໃດເພື່ອໃຫ້ໂຕເອງໝັ້ນໃຈໃນເລື່ອງຄວາມຫວັງນີ້ຫຼາຍຂຶ້ນ?
ເຮົາຕ້ອງເຮັດແນວໃດເພື່ອຈະໝັ້ນໃຈຫຼາຍຂຶ້ນໃນຄວາມຫວັງເລື່ອງການຄືນມາຈາກຕາຍ?
17. ເຮົາຄວນຄິດເຖິງຫຍັງແດ່ຕອນທີ່ອ່ານເລື່ອງການຄືນມາຈາກຕາຍໃນຄຳພີໄບເບິນ?
17 ອ່ານແລະຄິດຕຶກຕອງເລື່ອງການຄືນມາຈາກຕາຍໃນອະດີດ. ຄຳພີໄບເບິນເວົ້າເຖິງການຄືນມາຈາກຕາຍຂອງມະນຸດ 8 ຄົນເທິງໂລກ. c ລອງສຶກສາແລະຄົ້ນຄວ້າແຕ່ລະເລື່ອງເບິ່ງແມ້. ຕອນທີ່ເຈົ້າເຮັດແບບນັ້ນ ໃຫ້ຈື່ໄວ້ວ່າທັງ 8 ຄົນເຄີຍມີຊີວິດຢູ່ແທ້ໆ. ແລ້ວເບິ່ງວ່າເຈົ້າໄດ້ບົດຮຽນຫຍັງຈາກເລື່ອງຂອງເຂົາເຈົ້າ ຈາກນັ້ນໃຫ້ຄິດວ່າແຕ່ລະເລື່ອງຊ່ວຍເຈົ້າໃຫ້ເຫັນແນວໃດວ່າ ພະເຢໂຫວາຢາກປຸກເຂົາເຈົ້າໃຫ້ມີຊີວິດອີກແລະເພິ່ນມີຄວາມສາມາດແລະມີອຳນາດທີ່ຈະເຮັດແບບນັ້ນແທ້ໆ. ທີ່ສຳຄັນທີ່ສຸດ ໃຫ້ສຶກສາແລະຄົ້ນຄວ້າກ່ຽວກັບການຄືນມາຈາກຕາຍຂອງພະເຢຊູ. ໃຫ້ຈື່ໄວ້ວ່າມີພະຍານຫຼາຍຮ້ອຍຄົນທີ່ເຫັນພະເຢຊູເຊິ່ງຄືນມາຈາກຕາຍແລ້ວ ແລະການຄືນມາຈາກຕາຍຂອງເພິ່ນຊ່ວຍເຮົາໃຫ້ໝັ້ນໃຈໃນການຄືນມາຈາກຕາຍທີ່ຈະເກີດຂຶ້ນໃນອະນາຄົດ.—1ກຣ. 15:3-6, 20-22
18. ເຈົ້າຈະໄດ້ຮັບປະໂຫຍດແນວໃດຈາກເພງກ່ຽວກັບຄວາມຫວັງເລື່ອງການຄືນມາຈາກຕາຍ? (ເບິ່ງໄຂເງື່ອນ)
18 ຟັງແລະຮ້ອງເພງນະມັດສະການພະເຈົ້າທີ່ກ່ຽວກັບຄວາມຫວັງເລື່ອງການຄືນມາຈາກຕາຍ. d (ອຟຊ. 5:19) ເພງເຫຼົ່ານີ້ຊ່ວຍເຈົ້າໃຫ້ໝັ້ນໃຈຫຼາຍຂຶ້ນໃນຄວາມຫວັງເລື່ອງການຄືນມາຈາກຕາຍ ແລະເຮັດໃຫ້ມີຄວາມເຊື່ອທີ່ເຂັ້ມແຂງຂຶ້ນ. ໃຫ້ຟັງແລະຊ້ອມຮ້ອງເພງເຫຼົ່ານີ້ເລື້ອຍໆ. ຈາກນັ້ນ ກໍລອງລົມກັນກ່ຽວກັບຄວາມໝາຍຂອງເນື້ອເພງໃນການນະມັດສະການປະຈຳຄອບຄົວ. ພະຍາຍາມຈື່ເນື້ອໃນໃຫ້ໄດ້ແລະໃຫ້ຄິດເຖິງມັນຢູ່ເລື້ອຍໆ. ແລ້ວຖ້າຄົນທີ່ເຈົ້າຮັກຕາຍຈາກໄປຫຼືເຈົ້າເອງຕ້ອງເຈິກັບການທົດສອບທີ່ອາດເຮັດໃຫ້ຕ້ອງຕາຍ ພະລັງບໍລິສຸດຂອງພະເຢໂຫວາຈະຊ່ວຍເຈົ້າໃຫ້ຈື່ເພງເຫຼົ່ານີ້ໄດ້ ເຊິ່ງຈະເຮັດໃຫ້ເຈົ້າເຂັ້ມແຂງແລະມີກຳລັງໃຈ.
19. ເຮົາອາດນຶກພາບອັນໃດໄດ້ແດ່ກ່ຽວກັບການຄືນມາຈາກຕາຍ? (ເບິ່ງຂອບ “ ເຈົ້າຈະຖາມຫຍັງເຂົາເຈົ້າ?”)
19 ນຶກພາບໂຕເອງຢູ່ໃນໂລກໃໝ່. ພະເຢໂຫວາໃຫ້ເຮົາມີຄວາມສາມາດທີ່ຈະນຶກພາບໂຕເອງໃນໂລກໃໝ່ໄດ້. ພີ່ນ້ອງຍິງຄົນໜຶ່ງບອກວ່າ: “ຂ້ອຍມັກນຶກພາບໂຕເອງໃນໂລກໃໝ່. ຂ້ອຍໃຊ້ເວລາຫຼາຍທີ່ຈະເຮັດແບບນັ້ນ ເຖິງຂະໜາດທີ່ຂ້ອຍຮູ້ສຶກວ່າໄດ້ກິ່ນດອກກຸຫຼາບກຳລັງບານເຕັມສວນອຸທິຍານ.” ໃຫ້ເຈົ້າລອງນຶກພາບວ່າ ຖ້າເຈົ້າມີໂອກາດເຈິກັບຜູ້ຮັບໃຊ້ຂອງພະເຈົ້າໃນສະໄໝອະດີດ ເຈົ້າຢາກເຈິໃຜເປັນພິເສດບໍ ແລະເຈົ້າຢາກຖາມຫຍັງລາວ? ນອກຈາກນັ້ນ ໃຫ້ນຶກພາບວ່າເຈົ້າໄດ້ເຈິກັບຄົນທີ່ເຈົ້າຮັກທີ່ຄືນມາຈາກຕາຍນຳ. ໃຫ້ລອງຄິດເຖິງພາບເຫດການຕອນນັ້ນຢ່າງລະອຽດ. ລອງນຶກພາບວ່າຕອນທີ່ເຈົ້າໄດ້ເຈິກັບລາວເທື່ອທຳອິດເຈົ້າຈະຮູ້ສຶກແນວໃດ? ເຈົ້າຈະເວົ້າຫຍັງກັບລາວກ່ອນ? ເຈົ້າຈະກອດລາວບໍ? ເຈົ້າຈະຮ້ອງໄຫ້ບໍ? ບໍ່ວ່າເຈົ້າຈະເຮັດຫຍັງໃນຕອນນັ້ນ ເຈົ້າຈະມີຄວາມສຸກຫຼາຍແທ້ໆທີ່ໄດ້ເຈິລາວ.
20. ເຮົາຄວນຕັ້ງໃຈທີ່ຈະເຮັດຫຍັງ?
20 ເຮົາຂອບໃຈພະເຢໂຫວາຫຼາຍແທ້ໆສຳລັບຄຳສັນຍາເລື່ອງການຄືນມາຈາກຕາຍ! ເຮົາໝັ້ນໃຈວ່າຄຳສັນຍານີ້ຈະເກີດຂຶ້ນແທ້ແນ່ນອນ ຍ້ອນພະເຢໂຫວາຢາກປຸກຄົນຕາຍໃຫ້ຄືນມາແລະເພິ່ນກໍມີອຳນາດກັບຄວາມສາມາດທີ່ຈະເຮັດແບບນັ້ນ. ໃຫ້ເຮົາພະຍາຍາມເຮັດສິ່ງຕ່າງໆເພື່ອຈະໝັ້ນໃຈຫຼາຍຂຶ້ນໃນຄວາມຫວັງນີ້. ຖ້າເຮົາເຮັດແບບນັ້ນ ເຮົາຈະສະໜິດກັບພະເຢໂຫວາຫຼາຍຂຶ້ນ. ເພິ່ນສັນຍາກັບພວກເຮົາທຸກຄົນວ່າ ‘ຄົນທີ່ເຈົ້າຮັກຈະ ຄືນມາຈາກຕາຍ.’
ເພງ 147 ຄຳສັນຍາເລື່ອງຊີວິດຕະຫຼອດໄປ
a ຖ້າຄົນທີ່ເຈົ້າຮັກຕາຍຈາກໄປ ຄຳສັນຍາເລື່ອງການຄືນມາຈາກຕາຍຈະໃຫ້ກຳລັງໃຈເຈົ້າຫຼາຍແທ້ໆ. ແຕ່ເຈົ້າຈະອະທິບາຍໃຫ້ຄົນອື່ນຟັງໄດ້ແນວໃດວ່າ ເປັນຫຍັງເຈົ້າຈຶ່ງເຊື່ອໃນຄຳສັນຍານີ້? ແລ້ວເຈົ້າຈະເຮັດແນວໃດເພື່ອຈະໝັ້ນໃຈໃນຄຳສັນຍານີ້ຫຼາຍຂຶ້ນ? ບົດຄວາມນີ້ຈະຊ່ວຍພວກເຮົາທຸກຄົນໃຫ້ມີຄວາມໝັ້ນໃຈຫຼາຍຂຶ້ນໃນຄວາມຫວັງເລື່ອງການຄືນມາຈາກຕາຍ.
b ເພງຈາກມິວສິກວິດີໂອທີ່ມີຊື່ວ່າ “ຈວນຈະເຖິງຢູ່ແລ້ວແຄ່ເອື້ອມມື” ຢູ່ໃນລາຍການໂທລະທັດເດືອນພະຈິກ ປີ 2016 (ພາສາໄທ)
c ເຫດການເຫຼົ່ານີ້ຢູ່ໃນ 1 ກະສັດ 17:17-24; 2 ກະສັດ 4:32-37; 13:20, 21; ລູກາ 7:11-15; 8:41-56; ໂຢຮັນ 11:38-44; ກິດຈະການ 9:36-42; 20:7-12
d ຂໍໃຫ້ເບິ່ງເພງຕໍ່ໄປນີ້ໃນປຶ້ມ “ຮ້ອງເພງຢ່າງມີຄວາມສຸກ”: “ນຶກພາບເມື່ອທຸກສິ່ງກາຍເປັນສິ່ງໃໝ່” (ເພງທີ 139), “ຈ້ອງເບິ່ງທີ່ລາງວັນ” (ເພງທີ 144) ແລະ “ພະອົງຈະເອີ້ນ” (ເພງທີ 151). ແລະຂໍໃຫ້ຟັງເພງມິວສິກວິດີໂອໃນເວັບໄຊ jw.org ເພງ “ຈວນຈະເຖິງຢູ່ແລ້ວແຄ່ເອື້ອມມື”, “ວັນທີ່ໂລກໃໝ່ຈະມາ” ແລະເພງ “ລອງນຶກດູ” (ພາສາໄທ)
