ບົດຄວາມສຶກສາທີ 18
ໃຫ້ກຳລັງໃຈກັນໃນການປະຊຸມປະຈຳປະຊາຄົມ
“ໃຫ້ພວກເຮົາສົນໃຈກັນ . . . ໃຫ້ກຳລັງໃຈກັນ.”—ຮຣ. 10:24, 25
ເພງ 88 ຂໍໃຫ້ເຮົາຮູ້ທາງຂອງພະອົງ
ໃຈຄວາມສຳຄັນ a
1. ເປັນຫຍັງເຮົາຈຶ່ງອອກຄວາມຄິດເຫັນຢູ່ການປະຊຸມປະຈຳປະຊາຄົມ?
ເປັນຫຍັງເຮົາຈຶ່ງເຂົ້າຮ່ວມການປະຊຸມປະຈຳປະຊາຄົມ? ເຫດຜົນທີ່ສຳຄັນຢ່າງໜຶ່ງກໍຄືເພື່ອສັນລະເສີນພະເຢໂຫວາ. (ເພງ. 26:12; 111:1) ນອກຈາກນັ້ນ ການເຂົ້າຮ່ວມການປະຊຸມປະຈຳປະຊາຄົມຈະເຮັດໃຫ້ເຮົາມີໂອກາດໄດ້ໃຫ້ກຳລັງໃຈກັນໃນສະໄໝທີ່ຍາກລຳບາກແບບນີ້. (1ທຊ. 5:11) ແລະເມື່ອເຮົາອອກຄວາມຄິດເຫັນ ມັນກໍແຮ່ງຈະເຮັດໃຫ້ເຮົາມີໂອກາດໄດ້ສັນລະເສີນພະເຢໂຫວາແລະເຮັດໃຫ້ຄົນອື່ນໄດ້ກຳລັງໃຈ.
2. ເຮົາມີໂອກາດໃດແດ່ທີ່ຈະອອກຄວາມຄິດເຫັນໃນການປະຊຸມປະຈຳປະຊາຄົມ?
2 ທຸກອາທິດເຮົາມີໂອກາດອອກຄວາມຄິດເຫັນໃນການປະຊຸມ ເຊັ່ນ: ໃນການປະຊຸມທ້າຍອາທິດ ເຮົາມີໂອກາດໄດ້ຕອບໃນສ່ວນການສຶກສາຫໍສັງເກດການ. ໃນການປະຊຸມກາງອາທິດ ເຮົາມີໂອກາດໄດ້ຕອບໃນສ່ວນຄວາມຮູ້ທີ່ມີຄ່າຈາກພະເຈົ້າແລະການສຶກສາຄຳພີໄບເບິນປະຈຳປະຊາຄົມລວມເຖິງສ່ວນອື່ນໆທີ່ສາມາດອອກຄວາມຄິດເຫັນໄດ້.
3. ເປັນຫຍັງຈຶ່ງບໍ່ງ່າຍທີ່ເຮົາຈະອອກຄວາມຄິດເຫັນໃນການປະຊຸມ? ແລະເຮັບເຣີ 10:24, 25 ຈະຊ່ວຍເຮົາແນວໃດ?
3 ເຮົາທຸກຄົນຢາກສັນລະເສີນພະເຢໂຫວາແລະເຮັດໃຫ້ພີ່ນ້ອງໄດ້ກຳລັງໃຈ. ແຕ່ບາງເທື່ອກໍບໍ່ງ່າຍຍ້ອນເຮົາອາດບໍ່ກ້າອອກຄວາມຄິດເຫັນ ຫຼືເມື່ອເຮົາຍົກມືແຕ່ພີ່ນ້ອງທີ່ນຳສ່ວນອາດບໍ່ໄດ້ເອີ້ນເຮົາເລື້ອຍໆຕາມທີ່ເຮົາຕ້ອງການ. ແລ້ວອັນໃດຈະຊ່ວຍເຮົາໃຫ້ຮັບມືກັບບັນຫາເຫຼົ່ານີ້? ຈົດໝາຍຂອງໂປໂລທີ່ຂຽນເຖິງຄົນເຮັບເຣີຈະຊ່ວຍເຮົາໃຫ້ໄດ້ຮັບຄຳຕອບ. ຕອນທີ່ໂປໂລເວົ້າເຖິງຄວາມສຳຄັນຂອງການປະຊຸມ ລາວບອກວ່າເຮົາຄວນສົນໃຈໄປທີ່ການ “ໃຫ້ກຳລັງໃຈກັນ.” (ອ່ານເຮັບເຣີ 10:24, 25) ເມື່ອເຮົາຮູ້ວ່າພີ່ນ້ອງຈະໄດ້ກຳລັງໃຈເຖິງວ່າເຮົາຈະອອກຄວາມຄິດເຫັນແບບງ່າຍໆມັນກໍເຮັດໃຫ້ເຮົາກ້າຫານຫຼາຍຂຶ້ນທີ່ຈະອອກຄວາມຄິດເຫັນ. ແລະຖ້າພີ່ນ້ອງທີ່ນຳສ່ວນບໍ່ຄ່ອຍເອີ້ນເຮົາ ເຮົາກໍມີຄວາມສຸກທີ່ຄົນອື່ນສາມາດອອກຄວາມຄິດເຫັນໃນການປະຊຸມ.—1ປຕ. 3:8
4. ເຮົາຈະເບິ່ງສາມຈຸດຫຍັງແດ່ໃນບົດຄວາມນີ້?
4 ໃນບົດຄວາມນີ້ເຮົາຈະມາເບິ່ງວ່າ ຖ້າເຮົາຢູ່ໃນປະຊາຄົມນ້ອຍໆ ທີ່ບໍ່ຄ່ອຍມີຄົນຕອບ ເຮົາຈະໃຫ້ກຳລັງໃຈກັນໄດ້ແນວໃດ. ແລະຖ້າເຮົາຢູ່ໃນປະຊາຄົມທີ່ໃຫຍ່ ທີ່ມີຄົນຍົກມືຕອບຫຼາຍ ເຮົາຈະໃຫ້ກຳລັງໃຈກັນໄດ້ແນວໃດ. ແລະຈຸດສຸດທ້າຍເຮົາຈະມາເບິ່ງວ່າ ເຮົາຈະໃຫ້ກຳລັງໃຈຄົນອື່ນໄດ້ແນວໃດຈາກຄຳຕອບ ຂອງເຮົາ.
ໃຫ້ກຳລັງໃຈກັນໃນປະຊາຄົມນ້ອຍໆ
5. ເຮົາຈະໃຫ້ກຳລັງໃຈກັນໄດ້ແນວໃດຖ້າເຮົາຢູ່ໃນປະຊາຄົມທີ່ນ້ອຍໆ?
5 ຖ້າເຮົາຢູ່ໃນປະຊາຄົມນ້ອຍໆທີ່ບໍ່ຄ່ອຍມີຄົນຫຼາຍ ຜູ້ນຳອາດຈະຖ້າໜ້ອຍໜຶ່ງກ່ອນຈະມີຄົນອອກຄວາມຄິດເຫັນ. ການປະຊຸມແບບນີ້ອາດຈະໃຊ້ເວລາດົນແລະອາດຈະເຮັດໃຫ້ຄົນທີ່ມາຮ່ວມການປະຊຸມບໍ່ໄດ້ຮັບກຳລັງໃຈ. ແລ້ວເຈົ້າຈະເຮັດແນວໃດໄດ້ແດ່? ຂໍໃຫ້ເຈົ້າພະຍາຍາມຍົກມືຕອບເລື້ອຍໆ. ການເຮັດແບບນີ້ກໍຈະກະຕຸ້ນຄົນອື່ນໃຫ້ຢາກອອກຄວາມຄິດເຫັນຫຼາຍຂຶ້ນ.
6-7. ອັນໃດຈະຊ່ວຍເຈົ້າໃຫ້ກ້າອອກຄວາມຄິດເຫັນຫຼາຍຂຶ້ນ?
6 ແລ້ວເຈົ້າຈະເຮັດແນວໃດຖ້າເຈົ້າບໍ່ກ້າອອກຄວາມຄິດເຫັນ? ຫຼາຍຄົນເຄີຍເປັນແບບເຈົ້າ. ແຕ່ເພື່ອເຈົ້າຈະໃຫ້ກຳລັງໃຈພີ່ນ້ອງຫຼາຍຂຶ້ນໄດ້ ລອງຄິດເບິ່ງວ່າມີວິທີຫຍັງແດ່ທີ່ເຮັດໃຫ້ເຈົ້າກ້າອອກຄວາມຄິດເຫັນຫຼາຍຂຶ້ນ.
7 ຫໍສັງເກດການ bຫຼາຍສະບັບເຄີຍມີຄຳແນະນຳທີ່ເປັນປະໂຫຍດກ່ຽວກັບເລື່ອງນີ້ ເຊັ່ນ: ໃຫ້ກຽມການປະຊຸມຢ່າງດີ. (ສຸພາ. 21:5) ຖ້າເຈົ້າເຂົ້າໃຈເນື້ອໃນເປັນຢ່າງດີ ເຈົ້າແຮ່ງຈະກ້າຕອບຫຼາຍຂຶ້ນ. ນອກຈາກນັ້ນ ໃຫ້ຕອບສັ້ນໆ. (ສຸພາ. 15:23; 17:27) ການຕອບສັ້ນໆຈະຊ່ວຍເຈົ້າໃຫ້ຢ້ານໜ້ອຍລົງ. ເຈົ້າອາດຈະຕອບໜຶ່ງຫຼືສອງປະໂຫຍກກໍໄດ້. ຄຳຕອບແບບນີ້ຈະເຮັດໃຫ້ພີ່ນ້ອງເຂົ້າໃຈກວ່າຄຳຕອບແບບຍາວໆທີ່ເນັ້ນຫຼາຍຈຸດຫຼາຍເກີນໄປ. ຖ້າເຈົ້າຕອບສັ້ນໆເປັນຄຳເວົ້າຂອງເຈົ້າເອງ ກໍສະແດງວ່າເຈົ້າກຽມໂຕມາຢ່າງດີແລະເຂົ້າໃຈເນື້ອໃນເປັນຢ່າງດີຄືກັນ.
8. ພະເຢໂຫວາຮູ້ສຶກແນວໃດທີ່ເຈົ້າພະຍາຍາມຢ່າງເຕັມທີ?
8 ສົມມຸດວ່າເຈົ້າລອງເຮັດຕາມຄຳແນະນຳບາງຢ່າງແລ້ວ ແຕ່ເຈົ້າກໍຍັງບໍ່ກ້າທີ່ຈະຕອບຫຼາຍກວ່າໜຶ່ງຫຼືສອງເທື່ອເດ? ໃຫ້ໝັ້ນໃຈວ່າພະເຢໂຫວາເຫັນຄ່າທີ່ເຈົ້າພະຍາຍາມທີ່ສຸດເທົ່າທີ່ເຈົ້າຈະເຮັດໄດ້ເພື່ອຈະອອກຄວາມຄິດເຫັນ. (ລກ. 21:1-4) ເພິ່ນບໍ່ໄດ້ຂໍໃຫ້ເຈົ້າເຮັດສິ່ງທີ່ເກີນຄວາມສາມາດຂອງເຈົ້າ. (ຟລປ. 4:5) ໃຫ້ລອງຄິດເບິ່ງວ່າ ເຈົ້າຈະເຮັດໄດ້ສ່ຳໃດ ຕັ້ງເປົ້າໝາຍ ແລະອະທິດຖານຂໍໃຫ້ເພິ່ນຊ່ວຍເຈົ້າເພື່ອຈະບໍ່ຕື່ນເຕັ້ນຫຼາຍເກີນໄປ. ເປົ້າໝາຍທຳອິດຂອງເຈົ້າອາດຈະເປັນການອອກຄວາມຄິດເຫັນສັ້ນໆໜຶ່ງເທື່ອ.
ໃຫ້ກຳລັງໃຈກັນໃນປະຊາຄົມໃຫຍ່
9. ໃນປະຊາຄົມທີ່ໃຫຍ່ ເປັນຫຍັງການອອກຄວາມຄິດເຫັນຈຶ່ງບໍ່ແມ່ນເລື່ອງງ່າຍ?
9 ຖ້າເຈົ້າຢູ່ໃນປະຊາຄົມທີ່ມີຜູ້ປະກາດຫຼາຍ ເຈົ້າກໍອາດຈະເຈິກັບບັນຫາອີກຢ່າງໜຶ່ງ. ອາດມີພີ່ນ້ອງຍົກມືຫຼາຍຈົນເຮັດໃຫ້ເຈົ້າບໍ່ຄ່ອຍໄດ້ຕອບ. ໃຫ້ເຮົາມາເບິ່ງປະສົບການຂອງພີ່ນ້ອງດານຽວ. c ລາວມັກອອກຄວາມຄິດເຫັນຫຼາຍຍ້ອນຮູ້ສຶກວ່າ ການອອກຄວາມຄິດເຫັນເປັນຄືກັບການນະມັດສະການພະເຢໂຫວາ ແລະກໍເປັນວິທີທີ່ລາວຈະໄດ້ໃຫ້ກຳລັງໃຈຄົນອື່ນ ແລະເຮັດໃຫ້ຄວາມຈິງໃນຄຳພີໄບເບິນເຂົ້າເຖິງຫົວໃຈຂອງລາວ. ແຕ່ເມື່ອລາວຍ້າຍໄປຢູ່ໃນປະຊາຄົມທີ່ໃຫຍ່ກວ່າ ລາວກໍໄດ້ຕອບໜ້ອຍລົງ. ບາງເທື່ອລາວຍົກມືຫຼາຍຮອບແຕ່ກໍບໍ່ໄດ້ຕອບເລີຍ. ດານຽວບອກວ່າ “ຂ້ອຍຮູ້ສຶກທໍ້ໃຈ. ມັນເປັນຄືກັບຂ້ອຍບໍ່ໄດ້ຮັບສິດທິພິເສດເລີຍ. ແລະເມື່ອເຈິແບບນີ້ເລື້ອຍໆຂ້ອຍກໍອົດຄິດບໍ່ໄດ້ວ່າ ເຂົາເຈົ້າຕັ້ງໃຈບໍ່ໃຫ້ຂ້ອຍອອກຄວາມຄິດເຫັນບໍ?”
10. ອັນໃດຈະຊ່ວຍໃຫ້ເຈົ້າມີໂອກາດໄດ້ຕອບຫຼາຍຂຶ້ນ?
10 ເຈົ້າເຄີຍຮູ້ສຶກຄືດານຽວບໍ? ຖ້າແມ່ນ ເຈົ້າກໍອາດຈະຮູ້ສຶກຢາກຍອມແພ້ແລະມີແຕ່ຢາກນັ່ງຟັງຊື່ໆ. ແຕ່ຂໍຢ່າເຊົາອອກຄວາມພະຍາຍາມທີ່ຈະອອກຄວາມຄິດເຫັນ. ແລ້ວເຈົ້າຈະເຮັດຫຍັງໄດ້ແດ່? ການກຽມຄຳຕອບໄວ້ຫຼາຍໆຂໍ້ໃນແຕ່ລະສ່ວນຂອງການປະຊຸມຈະເປັນປະໂຫຍດຫຼາຍ. ຖ້າຂໍ້ທຳອິດຜູ້ນຳສ່ວນບໍ່ໄດ້ເອີ້ນເຈົ້າ ເຈົ້າກໍຍັງມີໂອກາດຕອບຂໍ້ອື່ນໆໄດ້. ຕອນທີ່ກຽມຫໍສັງເກດການໃຫ້ເຈົ້າລອງຄິດເບິ່ງວ່າ ແຕ່ລະຂໍ້ກ່ຽວຂ້ອງກັນແນວໃດກັບເລື່ອງຫຼັກຂອງບົດຄວາມ. ຖ້າເຮັດແບບນັ້ນ ເຈົ້າກໍຈະມີຄວາມຄິດເຫັນດີໆທີ່ຈະເອົາມາຕອບ. ນອກຈາກນັ້ນ ເຈົ້າອາດກຽມຄຳຕອບທີ່ມີຄຳສອນເລິກເຊິ່ງ ເຊິ່ງອາດຈະບໍ່ຄ່ອຍມີໃຜຕອບ. (1ກຣ. 2:10) ແຕ່ຖ້າເຈົ້າເຮັດຕາມຄຳແນະນຳເຫຼົ່ານີ້ແລ້ວ ເຈົ້າຍັງບໍ່ໄດ້ຕອບຈັກເທື່ອ ເຈົ້າຈະເຮັດແນວໃດ? ເຈົ້າອາດຈະເຂົ້າໄປຫາຜູ້ນຳສ່ວນກ່ອນການປະຊຸມແລ້ວບອກລາວວ່າເຈົ້າຢາກຕອບຂໍ້ໃດ.
11. ຟີລິບປອຍ 2:4 ກະຕຸ້ນເຮົາໃຫ້ເຮັດຫຍັງ?
11 ອ່ານຟີລິບປອຍ 2:4. ໂປໂລສະໜັບສະໜູນພີ່ນ້ອງຄລິດສະຕຽນໃຫ້ເຫັນແກ່ຜົນປະໂຫຍດຂອງຄົນອື່ນນຳ. ແລ້ວເຮົາຈະເອົາຂໍ້ນີ້ມາໃຊ້ກັບການປະຊຸມໄດ້ແນວໃດ? ເຮົາຕ້ອງຈື່ໄວ້ວ່າ ພີ່ນ້ອງຄົນອື່ນໆໃນປະຊາຄົມກໍຢາກອອກຄວາມຄິດເຫັນຄືກັນ.
ເວລາທີ່ເຮົາລົມກັບໝູ່ ເຮົາກໍຢາກໃຫ້ໝູ່ໄດ້ເວົ້ານຳ. ຄ້າຍກັນ ເຮົາກໍຢາກໃຫ້ຄົນອື່ນໄດ້ອອກຄວາມຄິດເຫັນຢູ່ທີ່ການປະຊຸມຄືກັນ. (ເບິ່ງຂໍ້ 12)
12. ວິທີໜຶ່ງທີ່ເຮົາຈະໃຫ້ກຳລັງໃຈກັນໃນການປະຊຸມແມ່ນຫຍັງ? (ເບິ່ງຮູບພາບ)
12 ລອງຄິດແບບນີ້ ຕອນທີ່ເຈົ້າລົມກັບໝູ່ ເຈົ້າຈະເວົ້າຢູ່ແຕ່ຝ່າຍດຽວຈົນໝູ່ບໍ່ມີໂອກາດໄດ້ເວົ້າບໍ? ເຈົ້າຄືຊິບໍ່ຢາກເຮັດແບບນັ້ນແນ່ນອນ. ເຈົ້າຢາກໃຫ້ໝູ່ໄດ້ເວົ້ານຳ. ໃນການປະຊຸມກໍຄືກັນ ເຮົາຢາກໃຫ້ທຸກຄົນມີໂອກາດອອກຄວາມຄິດເຫັນ. ທີ່ຈິງ ວິທີທີ່ດີທີ່ສຸດຢ່າງໜຶ່ງທີ່ເຮົາຈະໃຫ້ກຳລັງໃຈພີ່ນ້ອງໄດ້ກໍຄື ໃຫ້ໂອກາດເຂົາເຈົ້າເວົ້າເຖິງຄວາມເຊື່ອຂອງຕົວເອງ. (1ກຣ. 10:24) ໃຫ້ເຮົາມາເບິ່ງນຳກັນວ່າເຮົາຈະເຮັດແບບນັ້ນໄດ້ແນວໃດ.
13.ເຮົາຈະເຮັດຫຍັງໄດ້ແດ່ເພື່ອໃຫ້ພີ່ນ້ອງຄົນອື່ນມີໂອກາດອອກຄວາມຄິດເຫັນຫຼາຍຂຶ້ນ?
13 ຢ່າງໜຶ່ງທີ່ເຮົາເຮັດໄດ້ກໍຄື ພະຍາຍາມອອກຄວາມຄິດເຫັນແບບສັ້ນໆ ເພື່ອຈະໃຫ້ຄົນອື່ນມີໂອກາດໄດ້ອອກຄວາມຄິດເຫັນຫຼາຍຂຶ້ນ. ຜູ້ດູແລກັບພີ່ນ້ອງທີ່ມີປະສົບການຄວນເປັນຕົວຢ່າງທີ່ດີໃນເລື່ອງນີ້. ເຖິງວ່າເຈົ້າຈະຕອບສັ້ນໆແຕ່ກໍພະຍາຍາມຢ່າຕອບຫຼາຍຈຸດເກີນໄປ. ຖ້າເຈົ້າຕອບທຸກຈຸດໃນຂໍ້ນີ້ໄປໝົດແລ້ວ ຄົນອື່ນໆກໍບໍ່ຮູ້ວ່າຈະຕອບອັນໃດ. ໃຫ້ເຮົາມາເບິ່ງຂໍ້ນີ້ເປັນຕົວຢ່າງ. ລອງສັງເກດວ່າຂໍ້ນີ້ມີຄຳແນະນຳຢູ່ສອງຢ່າງຄື: ຕອບແບບສັ້ນໆແລະຢ່າຕອບຫຼາຍຈຸດເກີນໄປ. ດັ່ງນັ້ນ ຖ້າຜູ້ນຳເອີ້ນເຈົ້າໃຫ້ຕອບຂໍ້ນີ້ເປັນຄົນທຳອິດ ໃຫ້ເຈົ້າຕອບຈຸດດຽວກໍພໍ.
ຕອນໃດທີ່ເຮົາເລືອກທີ່ຈະບໍ່ຍົກມືຕອບ? (ເບິ່ງຂໍ້ 14) f
14. ອັນໃດຈະຊ່ວຍເຮົາໃຫ້ຕັດສິນໃຈວ່າຈະຍົກມືຫຼາຍປານໃດ? (ເບິ່ງຮູບພາບ)
14 ນອກຈາກນັ້ນ ໃຫ້ເຈົ້າຄິດໃຫ້ດີວ່າຈະຕອບຫຼາຍປານໃດ. ຖ້າເຈົ້າຍົກມືຫຼາຍເກີນໄປ ຜູ້ນຳສ່ວນກໍອາດຈະຮູ້ສຶກວ່າຖືກກົດດັນວ່າຕ້ອງເອີ້ນເຈົ້າທັງໆທີ່ເຈົ້າກໍຕອບໄປແລ້ວ ແລະບາງຄົນຍັງບໍ່ມີໂອກາດໄດ້ຕອບເທື່ອ. ແລະນີ້ອາດຈະເຮັດໃຫ້ພີ່ນ້ອງຄົນອື່ນຮູ້ສຶກທໍ້ຈົນບໍ່ຢາກຍົກມື.—ຜູ້ປ. 3:7
15. (ກ) ຖ້າຜູ້ນຳສ່ວນບໍ່ໄດ້ເອີ້ນເຮົາຕອບ ເຮົາຄວນຮູ້ສຶກແນວໃດ? (ຂ) ຜູ້ນຳສ່ວນຈະຄິດເຖິງຄວາມຮູ້ສຶກຂອງທຸກຄົນໄດ້ແນວໃດ? (ເບິ່ງຂອບ “ ຄຳແນະນຳສຳລັບຜູ້ທີ່ນຳສ່ວນການປະຊຸມ”)
15 ເມື່ອມີພີ່ນ້ອງຫຼາຍຄົນຍົກມືຕອບ ເຮົາອາດບໍ່ໄດ້ຕອບຫຼາຍແບບທີ່ເຮົາຕ້ອງການ. ແລະບາງເທື່ອຜູ້ນຳສ່ວນອາດຈະບໍ່ໄດ້ເອີ້ນເຮົາຕອບເລີຍດ້ວຍຊ້ຳ ເຊິ່ງອາດຈະເຮັດໃຫ້ເຮົາຮູ້ສຶກຜິດຫວັງ. ແຕ່ເຮົາບໍ່ຄວນຮູ້ສຶກວ່າລາວບໍ່ມັກເຮົາ.—ຜູ້ປ. 7:9
16. ເຮົາຈະໃຫ້ກຳລັງໃຈຄົນທີ່ອອກຄວາມຄິດເຫັນໄດ້ແນວໃດ?
16 ຖ້າເຈົ້າບໍ່ໄດ້ຕອບຫຼາຍແບບທີ່ເຈົ້າຕ້ອງການ ກໍຂໍໃຫ້ຕັ້ງໃຈຟັງຄົນອື່ນຕອບ ແລະຊົມເຊີຍເຂົາເຈົ້າຫຼັງຈາກຈົບການປະຊຸມ. ພີ່ນ້ອງອາດຈະໄດ້ກຳລັງໃຈທີ່ເຈົ້າຊົມເຊີຍເຂົາເຈົ້າຄືກັບທີ່ເຂົາເຈົ້າໄດ້ຮັບກຳລັງໃຈເມື່ອຟັງເຈົ້າອອກຄວາມຄິດເຫັນ. (ສຸພາ. 10:21) ການຊົມເຊີຍພີ່ນ້ອງກໍເປັນອີກວິທີໜຶ່ງທີ່ເຮົາຈະໃຫ້ກຳລັງໃຈກັນແລະກັນ.
ອີກວິທີໜຶ່ງທີ່ເຮົາຈະໃຫ້ກຳລັງໃຈກັນຢູ່ການປະຊຸມ
17. (ກ) ພໍ່ແມ່ຈະຊ່ວຍລູກໃຫ້ກຽມຄຳຕອບທີ່ເໝາະສົມກັບອາຍຸຂອງລາວໄດ້ແນວໃດ? (ຂ) ແບບທີ່ເຮົາເຫັນໃນວິດີໂອ ສີ່ຂັ້ນຕອນໃນການກຽມຄຳຕອບມີຫຍັງແດ່? (ເບິ່ງໄຂເງື່ອນ)
17 ຖ້າເຈົ້າເປັນພໍ່ແມ່ ໃຫ້ຊ່ວຍລູກກຽມຕົວອອກຄວາມຄິດເຫັນແບບທີ່ເໝາະກັບອາຍຸຂອງລາວ. (ມທ. 21:16) ບາງເທື່ອເນື້ອເລື່ອງໃນການປະຊຸມອາດເປັນເລື່ອງຍາກ ເຊັ່ນ ເລື່ອງບັນຫາຄອບຄົວຫຼືເລື່ອງສິນລະທຳ. ແຕ່ກໍຈະມີຂໍ້ໜຶ່ງຫຼືສອງຂໍ້ໃນບົດຄວາມນັ້ນທີ່ເດັກນ້ອຍຈະອອກຄວາມຄິດເຫັນໄດ້. ນອກຈາກນັ້ນ ໃຫ້ຊ່ວຍລູກເຂົ້າໃຈວ່າເປັນຫຍັງລາວອາດບໍ່ໄດ້ຖືກເອີ້ນທຸກເທື່ອທີ່ຍົກມື. ການອະທິບາຍໃຫ້ລູກເຂົ້າໃຈເລື່ອງນີ້ຈະຊ່ວຍໃຫ້ລູກບໍ່ຜິດຫວັງຕອນທີ່ຜູ້ນຳເອີ້ນຄົນອື່ນແທນທີ່ຈະເອີ້ນລາວ.—1ຕມ. 6:18 d
18. ເຮົາຈະບໍ່ເຮັດໃຫ້ຄົນອື່ນສົນໃຈທີ່ຕົວເຮົາຫຼາຍເກີນໄປໄດ້ແນວໃດຕອນທີ່ອອກຄວາມຄິດເຫັນ? (ສຸພາສິດ 27:2)
18 ເຮົາທຸກຄົນສາມາດກຽມຄຳຕອບທີ່ເປັນການສັນລະເສີນພະເຢໂຫວາແລະໃຫ້ກຳລັງໃຈພີ່ນ້ອງຄົນອື່ນໆ. (ສຸພາ. 25:11) ບາງເທື່ອເຮົາອາດເລົ່າປະສົບການສ່ວນໂຕສັ້ນໆໄດ້ ແຕ່ເຮົາບໍ່ຄວນເຮັດໃຫ້ຄົນອື່ນສົນໃຈທີ່ໂຕເຮົາຫຼາຍເກີນໄປ. (ອ່ານສຸພາສິດ 27:2; 2ກຣ. 10:18) ເຮົາຄວນພະຍາຍາມໃຫ້ພີ່ນ້ອງສົນໃຈໄປທີ່ພະເຢໂຫວາ ຄຳພີໄບເບິນ ແລະຜູ້ຮັບໃຊ້ຂອງເພິ່ນ. (ພນມ. 4:11) ບາງຄັ້ງໃນບົດຄວາມສຶກສາ ຖ້າມີຄຳຖາມສ່ວນໂຕ ເຈົ້າກໍຄວນຄິດວ່າຈະຕອບແນວໃດ ເຊັ່ນ ຄຳຖາມໃນຂໍ້ຕໍ່ໄປນີ້.
19. (ກ) ຜົນຈະເປັນແນວໃດຖ້າເຮົາຄິດເຖິງປະໂຫຍດຂອງພີ່ນ້ອງທຸກຄົນທີ່ເຂົ້າຮ່ວມການປະຊຸມ? (ໂຣມ 1:11, 12) (ຂ) ເຈົ້າມັກຫຍັງໃນເລື່ອງການອອກຄວາມຄິດເຫັນ?
19 ບໍ່ມີກົດຕາຍໂຕວ່າຕ້ອງອອກຄວາມຄິດເຫັນແບບໃດ ແຕ່ເຮົາພະຍາຍາມຕອບໃນແບບທີ່ໃຫ້ກຳລັງໃຈກັນ. ນີ້ອາດໝາຍເຖິງເຮົາຕ້ອງຕອບຫຼາຍຂຶ້ນອີກໜ້ອຍໜຶ່ງ ຫຼືຖ້າເຮົາບໍ່ໄດ້ຕອບຫຼາຍໃນແບບທີ່ເຮົາຕ້ອງການ ເຮົາກໍຄວນດີໃຈທີ່ໃຫ້ໂອກາດຄົນອື່ນໄດ້ຕອບ. ຖ້າເຮົາຄິດເຖິງປະໂຫຍດຂອງພີ່ນ້ອງທີ່ເຂົ້າຮ່ວມການປະຊຸມ ເຮົາທຸກຄົນກໍຈະໃຫ້ກຳລັງໃຈກັນແລະກັນ.—ອ່ານໂຣມ 1:11, 12
ເພງ 93 ຂໍອວຍພອນການປະຊຸມຂອງເຮົາ
a ເຮົາໃຫ້ກຳລັງໃຈກັນໄດ້ຕອນທີ່ເຮົາອອກຄວາມຄິດເຫັນຢູ່ການປະຊຸມ. ແຕ່ບາງຄົນອາດຮູ້ສຶກບໍ່ກ້າທີ່ຈະອອກຄວາມຄິດເຫັນ. ສ່ວນຄົນອື່ນໆກໍມັກອອກຄວາມຄິດເຫັນແລະຢາກໃຫ້ຜູ້ນຳເອີ້ນລາວຕະຫຼອດ. ບໍ່ວ່າເຈົ້າຈະຢູ່ກຸ່ມໃດ ເຮົາຈະສົນໃຈຄວາມຮູ້ສຶກຂອງຄົນອື່ນໄດ້ແນວໃດເພື່ອເຮົາຈະໃຫ້ກຳລັງໃຈທຸກຄົນໄດ້ ແລະເຮົາຈະອອກຄວາມຄິດເຫັນເພື່ອກະຕຸ້ນກັນໃຫ້ມີຄວາມຮັກແລະເຮັດຄວາມດີໄດ້ແນວໃດ. ເຮົາຈະສຶກສານຳກັນໃນບົດຄວາມນີ້.
b ຄຳແນະນຳເພີ່ມເຕີມໃຫ້ເບິ່ງຫໍສັງເກດການສະບັບເດືອນມັງກອນ 2019 ໜ້າ 8-13.
c ຊື່ສົມມຸດ
d ໃຫ້ເບິ່ງວິດີໂອມາເປັນໝູ່ກັບພະເຢໂຫວານຳກັນ—ກຽມຄຳຕອບຂອງລູກ ໃນເວັບໄຊ jw.org (ພາສາໄທ)
e ເບິ່ງຫໍສັງເກດການ 15 ກໍລະກົດ 2013 ໜ້າ 32 ແລະຫໍສັງເກດການ 1 ກັນຍາ 2003 ໜ້າ 21-22 (ພາສາໄທ)
f ຄຳອະທິບາຍຮູບພາບ: ພີ່ນ້ອງຊາຍຄົນໜຶ່ງທີ່ຢູ່ໃນປະຊາຄົມໃຫຍ່ ລາວບໍ່ໄດ້ຍົກມືເພາະລາວໄດ້ອອກຄວາມຄິດເຫັນແລ້ວແລະຢາກໃຫ້ຄົນອື່ນໄດ້ອອກຄວາມຄິດເຫັນນຳ.
