ບົດຄວາມສຶກສາທີ 38
ໄວລຸ້ນ ເຈົ້າຢາກມີຊີວິດແບບໃດ?
“ຄວາມເຂົ້າໃຈຈະຄຸ້ມຄອງລູກ.”—ສຸພາ. 2:11, ລ.ມ.
ເພງ 135 ພະເຢໂຫວາເຊີນຢ່າງອົບອຸ່ນວ່າ ລູກຂອງເຮົາຈົ່ງມີປັນຍາເຖີດ
ໃຈຄວາມສຳຄັນ a
1. ເຢໂຮອາດ ອຸດຊີຢາ ແລະໂຢຊີຢາເຈິເລື່ອງຫຍັງທີ່ຍາກຫຼາຍ?
ໃຫ້ນຶກພາບວ່າຈະເປັນແນວໃດຖ້າເຈົ້າຕ້ອງເປັນກະສັດປົກຄອງຄົນຂອງພະເຢໂຫວາຕອນທີ່ຍັງເປັນເດັກນ້ອຍ. ເຈົ້າຈະໃຊ້ອຳນາດແນວໃດ? ຄຳພີໄບເບິນເວົ້າເຖິງຫຼາຍຄົນທີ່ເປັນກະສັດຂອງຢູດາຕັ້ງແຕ່ອາຍຸຍັງນ້ອຍ ເຊັ່ນ: ເຢໂຮອາດເປັນກະສັດຕອນອາຍຸ 7 ປີ ອຸດຊີຢາເປັນກະສັດຕອນອາຍຸ 16 ປີ ແລະ ໂຢຊີຢາເປັນກະສັດຕອນອາຍຸ 8 ປີ. ເຂົາເຈົ້າຄືຊິເຈິກັບວຽກທີ່ຍາກແທ້ໆ. ເຖິງຈະເປັນແນວນັ້ນ ພະເຢໂຫວາແລະຄົນອື່ນໆກໍຊ່ວຍເຂົາເຈົ້າໃຫ້ເຮັດສິ່ງທີ່ຖືກຕ້ອງໄດ້.
2. ເປັນຫຍັງເຮົາຕ້ອງສົນໃຈເລື່ອງຂອງເຢໂຮອາດ ອຸດຊີຢາ ແລະໂຢຊີຢາ?
2 ເຖິງເຮົາຈະບໍ່ໄດ້ເປັນກະສັດຫຼືລາຊີນີ ແຕ່ເຮົາກໍໄດ້ບົດຮຽນຫຼາຍຢ່າງຈາກເລື່ອງຂອງເຢໂຮອາດ ອຸດຊີຢາ ແລະໂຢຊີຢາ. ເຂົາເຈົ້າຕັດສິນໃຈແບບທີ່ສະຫຼາດໃນຫຼາຍເລື່ອງ ແຕ່ກໍມີບາງເລື່ອງທີ່ເຂົາເຈົ້າຕັດສິນໃຈແບບບໍ່ສະຫຼາດ. ຈາກຕົວຢ່າງຂອງເຂົາເຈົ້າ ເຮົາຈະເຫັນວ່າເປັນຫຍັງເຮົາຕ້ອງເລືອກໝູ່ທີ່ດີ ເປັນຄົນຖ່ອມສະເໝີ ແລະຊອກຫາການຊີ້ນຳຈາກພະເຢໂຫວາຕໍ່ໆໄປ.
ເລືອກໝູ່ທີ່ດີ
ໃນທຸກມື້ນີ້ເຮົາກໍຮຽນແບບເຢໂຮອາດໄດ້ໃນເລື່ອງການຟັງຄຳແນະນຳຂອງໝູ່ທີ່ດີ (ເບິ່ງຂໍ້ 3, 7) c
3. ເຢໂຮຢາດາໄດ້ຊ່ວຍກະສັດເຢໂຮອາດໃຫ້ຕັດສິນໃຈແບບທີ່ສະຫຼາດແນວໃດ?
3 ຕັດສິນໃຈແບບທີ່ສະຫຼາດຄືກັບເຢໂຮອາດ. ຕອນທີ່ກະສັດເຢໂຮອາດອາຍຸຍັງນ້ອຍ ລາວໄດ້ຕັດສິນໃຈແບບທີ່ສະຫຼາດ. ເນື່ອງຈາກລາວບໍ່ມີພໍ່ ລາວຈຶ່ງເຮັດຕາມຄຳແນະນຳຂອງປະໂລຫິດໃຫຍ່ເຢໂຮຢາດາ. ເຢໂຮຢາດາໄດ້ສອນລາວຄືກັບສອນລູກຂອງໂຕເອງ. ການສອນແບບນີ້ຈຶ່ງເຮັດໃຫ້ເຢໂຮອາດເລືອກທີ່ຈະນຳໜ້າໃນການນະມັດສະການທີ່ບໍລິສຸດແລະຮັບໃຊ້ພະເຢໂຫວາເຕັມທີ. ນອກຈາກນັ້ນ ເຢໂຮອາດຍັງໄດ້ກຽມໃຫ້ມີການແປງວິຫານຂອງພະເຢໂຫວາ.—2ຂຄ. 24:1, 2, 4, 13, 14
4. ເຮົາຈະໄດ້ຮັບປະໂຫຍດຫຍັງຖ້າເຮົາເຕັມໃຈເຊື່ອຟັງຄຳສັ່ງຂອງພະເຢໂຫວາ? (ສຸພາສິດ 2:1, 10-12)
4 ຖ້າພໍ່ແມ່ຫຼືຄົນອື່ນໆສອນເຈົ້າໃຫ້ຮັກພະເຢໂຫວາແລະໃຊ້ຊີວິດຕາມຫຼັກການຂອງເພິ່ນ ເຈົ້າກໍໄດ້ຮັບການສອນທີ່ດີເຊິ່ງເປັນຄືກັບຂອງຂວັນທີ່ມີຄ່າ. (ອ່ານສຸພາສິດ 2:1, 10-12) ພໍ່ແມ່ອາດໃຊ້ຫຼາຍວິທີເພື່ອສອນເຈົ້າ. ໃຫ້ເຮົາມາເບິ່ງຕົວຢ່າງຂອງຄັດຢາ ເຊິ່ງພໍ່ຂອງລາວສອນລາວໃຫ້ຕັດສິນໃຈແບບທີ່ສະຫຼາດ. ທຸກເຊົ້າຕອນທີ່ພໍ່ລາວໄປສົ່ງຢູ່ໂຮງຮຽນ ເຂົາເຈົ້າໄດ້ລົມກັນກ່ຽວກັບຂໍ້ຄຳພີປະຈຳວັນ. ຄັດຢາເລົ່າວ່າ: “ຍ້ອນພໍ່ລົມກັບຂ້ອຍທຸກໆມື້ ມັນຈຶ່ງຊ່ວຍຂ້ອຍໃຫ້ຮັບມືກັບບັນຫາທີ່ຂ້ອຍເຈິໃນມື້ນັ້ນໄດ້.” ແຕ່ຖ້າເຈົ້າຮູ້ສຶກອຶດອັດຍ້ອນກົດທີ່ພໍ່ແມ່ຕັ້ງຂຶ້ນ ທັງໆທີ່ກົດນັ້ນອາດມາຈາກຫຼັກການທີ່ຢູ່ໃນຄຳພີໄບເບິນເດ ເຈົ້າຈະເຮັດແນວໃດ? ແລະອັນໃດຈະຊ່ວຍເຈົ້າໃຫ້ເຮັດຕາມກົດທີ່ພໍ່ແມ່ຕັ້ງຂຶ້ນມາ? ພີ່ນ້ອງຄົນໜຶ່ງຊື່ອານາຊະຕະເຊຍບອກວ່າ ພໍ່ແມ່ໃຊ້ເວລາອະທິບາຍກັບລາວວ່າເປັນຫຍັງຈຶ່ງຕັ້ງກົດບາງຢ່າງຂຶ້ນມາ. ລາວບອກວ່າ: “ນີ້ຊ່ວຍຂ້ອຍໃຫ້ເຂົ້າໃຈວ່າພໍ່ແມ່ບໍ່ໄດ້ຕັ້ງກົດເພື່ອຄວບຄຸມຂ້ອຍ ແຕ່ເພື່ອປົກປ້ອງຂ້ອຍຍ້ອນເພິ່ນຮັກຂ້ອຍ.”
5. ສິ່ງທີ່ເຈົ້າເຮັດສົ່ງຜົນຕໍ່ພະເຢໂຫວາແລະພໍ່ແມ່ຂອງເຈົ້າແນວໃດ? (ສຸພາສິດ 22:6; 23:15, 24, 25)
5 ເມື່ອເຈົ້າເອົາຄຳແນະນຳໃນຄຳພີໄບເບິນໄປໃຊ້ ເຈົ້າຈະເຮັດໃຫ້ພໍ່ແມ່ມີຄວາມສຸກ ແລະທີ່ສຳຄັນເຈົ້າຈະເຮັດໃຫ້ພະເຢໂຫວາມີຄວາມສຸກແລະໃກ້ຊິດກັບເພິ່ນຫຼາຍຂຶ້ນ. (ອ່ານສຸພາສິດ 22:6; 23:15, 24, 25) ເຈົ້າເຫັນແລ້ວແມ່ນບໍວ່າ ມີເຫດຜົນຫຼາຍຢ່າງທີ່ເຮົາຄວນຮຽນແບບເຢໂຮອາດຕອນທີ່ອາຍຸຍັງນ້ອຍ?
6. ຫຼັງຈາກເຢໂຮຢາດາຕາຍ ເຢໂຮອາດຟັງຄຳແນະນຳຂອງໃຜ? ແລະຜົນເປັນແນວໃດ? (2 ຂ່າວຄາວ 24:17, 18)
6 ຮຽນຈາກການຕັດສິນໃຈທີ່ບໍ່ສະຫຼາດຂອງເຢໂຮອາດ. ຫຼັງຈາກເຢໂຮຢາດາຕາຍ ເຢໂຮອາດກໍຄົບໝູ່ບໍ່ດີທີ່ພາລາວເຮັດຜິດ. (ອ່ານ 2 ຂ່າວຄາວ 24:17, 18) ລາວຟັງຄວາມຂອງພວກເຈົ້ານາຍຂອງຢູດາທີ່ບໍ່ຮັກພະເຢໂຫວາ. ເຈົ້າອາດຄິດວ່າລາວບໍ່ຄວນຄົບຫາກັບຄົນເຫຼົ່ານັ້ນຍ້ອນເຂົາເຈົ້າເປັນຄົນບໍ່ດີ. (ສຸພາ. 1:10) ແຕ່ລາວພັດຟັງຄວາມເຂົາເຈົ້າແລະເອີ້ນເຂົາເຈົ້າວ່າໝູ່. ທີ່ຈິງ ເຊຄາຣີຢາທີ່ເປັນພີ່ນ້ອງຂອງລາວໄດ້ເຕືອນລາວແລ້ວ ແຕ່ລາວກໍບໍ່ຟັງແລະຍັງສັ່ງຄົນໃຫ້ໄປຂ້າເຊຄາຣີຢາຊ້ຳ. (2ຂຄ. 24:20, 21; ມທ. 23:35) ເຢໂຮອາດເຮັດສິ່ງທີ່ຊົ່ວແລະບໍ່ສະຫຼາດ. ຊີວິດຂອງລາວເລີ່ມຕົ້ນດີ ແຕ່ຈົບລົງດ້ວຍການທໍລະຍົດພະເຈົ້າແລະການຂ້າຄົນ. ໃນທີ່ສຸດຄົນຮັບໃຊ້ຂອງລາວກໍຂ້າລາວ. (2ຂຄ. 24:22-25) ຖ້າເຢໂຮອາດຍັງເຊື່ອຟັງພະເຢໂຫວາແລະເຮັດຕາມຄຳແນະນຳຂອງຄົນທີ່ຮັກເພິ່ນ ຊີວິດຂອງລາວຄືຊິບໍ່ເປັນແບບນີ້. ເຈົ້າໄດ້ບົດຮຽນຫຍັງຈາກການຕັດສິນໃຈທີ່ບໍ່ສະຫຼາດຂອງເຢໂຮອາດ?
7. ເຈົ້າຄວນເລືອກໃຜເປັນໝູ່? (ເບິ່ງຮູບ)
7 ບົດຮຽນໜຶ່ງທີ່ເຮົາໄດ້ຮັບຈາກການຕັດສິນໃຈທີ່ບໍ່ສະຫຼາດຂອງເຢໂຮອາດແມ່ນ ເຮົາຕ້ອງເລືອກໝູ່ທີ່ຈະພາເຮົາເຮັດສິ່ງທີ່ຖືກຕ້ອງ. ເຮົາຕ້ອງເປັນໝູ່ກັບຄົນທີ່ຮັກພະເຢໂຫວາແລະຄົນທີ່ຢາກເຮັດໃຫ້ເພິ່ນມີຄວາມສຸກ. ເຮົາບໍ່ຄວນເປັນໝູ່ກັບຄົນລຸ້ນດຽວກັນເທົ່ານັ້ນ. ຂໍໃຫ້ຈື່ໄວ້ວ່າເຢໂຮອາດສະໜິດກັບເຢໂຮຢາດາຫຼາຍ ເຖິງວ່າເຢໂຮຢາດາຈະມີອາຍຸຫຼາຍກວ່າລາວ. ດັ່ງນັ້ນ ເມື່ອຄິດເຖິງຄົນທີ່ເຈົ້າເລືອກເປັນໝູ່ໃຫ້ຖາມໂຕເອງວ່າ: ‘ເຂົາເຈົ້າຊ່ວຍຂ້ອຍໃຫ້ມີຄວາມເຊື່ອໃນພະເຢໂຫວາຫຼາຍຂຶ້ນບໍ? ເຂົາເຈົ້າເຮັດໃຫ້ຂ້ອຍຢາກໃຊ້ຊີວິດຕາມຫຼັກການຂອງເພິ່ນບໍ? ເຂົາເຈົ້າເວົ້າກ່ຽວກັບພະເຢໂຫວາແລະຄວາມຈິງໃນຄຳພີໄບເບິນບໍ? ເຂົາເຈົ້າມີແຕ່ຍ້ອງຂ້ອຍບໍ ຫຼືກ້າເຕືອນຂ້ອຍເມື່ອຂ້ອຍເຮັດຜິດ?’ (ສຸພາ. 27:5, 6, 17) ຖ້າຄົນທີ່ເຈົ້າເລືອກເປັນໝູ່ບໍ່ຮັກພະເຢໂຫວາ ເຈົ້າກໍບໍ່ຄວນຫຼິ້ນນຳເຂົາເຈົ້າ. ແຕ່ຖ້າໝູ່ຂອງເຈົ້າຮັກພະເຢໂຫວາ ຂໍໃຫ້ຫຼິ້ນນຳເຂົາເຈົ້າຕໍ່ໆໄປ ຍ້ອນເຂົາເຈົ້າຈະຊ່ວຍເຈົ້າໃຫ້ຮັກພະເຢໂຫວາຄືກັນ.—ສຸພາ. 13:20
8. ເຮົາຄວນຄິດເຖິງຫຍັງແດ່ຕອນທີ່ໃຊ້ສື່ສັງຄົມອອນລາຍ?
8 ໃນທຸກມື້ນີ້ ເຮົາມັກໃຊ້ສື່ສັງຄົມອອນລາຍເພື່ອຕິດຕໍ່ກັບໝູ່ແລະຄົນໃນຄອບຄົວ. ແຕ່ຫຼາຍຄົນພັດໃຊ້ເພື່ອເຮັດໃຫ້ຄົນອື່ນປະທັບໃຈໂຕເອງ. ເຂົາເຈົ້າໂພດສ໌ຮູບແລະວິດີໂອຕອນທີ່ຊື້ບາງຢ່າງຫຼືກຳລັງເຮັດຫຍັງບາງຢ່າງ. ຖ້າເຈົ້າໃຊ້ສື່ສັງຄົມອອນລາຍ ໃຫ້ຖາມໂຕເອງວ່າ: ‘ຂ້ອຍໃຊ້ມັນເພື່ອເຮັດໃຫ້ຄົນອື່ນປະທັບໃຈຂ້ອຍບໍ? ຂ້ອຍໃຊ້ມັນເພື່ອໃຫ້ກຳລັງໃຈຄົນອື່ນ ຫຼືຢາກໃຫ້ຄົນອື່ນສົນໃຈຂ້ອຍບໍ? ຂ້ອຍມັກເບິ່ງສິ່ງທີ່ຄົນອື່ນໂພດສ໌ໃນສື່ສັງຄົມອອນລາຍຈົນຂ້ອຍຢາກຈະຄິດ ເວົ້າ ຫຼືເຮັດຄືກັບເຂົາເຈົ້າບໍທັງໆທີ່ຮູ້ວ່າມັນບໍ່ດີ?’ ພີ່ນ້ອງນາທານ ນໍທີ່ເຄີຍເປັນສະມາຊິກຄະນະກຳມະການປົກຄອງແນະນຳວ່າ ‘ບໍ່ຕ້ອງພະຍາຍາມເຮັດໃຫ້ທຸກຄົນພໍໃຈ ເພາະມັນເປັນໄປບໍ່ໄດ້. ແຕ່ໃຫ້ເຈົ້າເຮັດໃຫ້ພະເຢໂຫວາພໍໃຈ ແລ້ວຄົນທີ່ຮັກພະເຢໂຫວາຈະພໍໃຈໃນສິ່ງທີ່ເຈົ້າເຮັດ.’
ເປັນຄົນຖ່ອມສະເໝີ
9. ພະເຢໂຫວາໄດ້ຊ່ວຍອຸດຊີຢາແນວໃດ? (2 ຂ່າວຄາວ 26:1-5)
9 ຕັດສິນໃຈແບບທີ່ສະຫຼາດຄືກັບອຸດຊີຢາ. ຕອນທີ່ອຸດຊີຢາຍັງນ້ອຍລາວເປັນຄົນຖ່ອມ. ລາວຮຽນຮູ້ທີ່ຈະ “ຢ້ານຢຳພະເຈົ້າທ່ຽງແທ້.” ລາວມີຊີວິດຢູ່ຈົນຮອດອາຍຸ 68 ປີ ແລະພະເຢໂຫວາກໍອວຍພອນລາວເກືອບຕະຫຼອດຊີວິດຂອງລາວ. (ອ່ານ 2 ຂ່າວຄາວ 26:1-5) ອຸດຊີຢາຕໍ່ສູ້ຊະນະພວກສັດຕູຈຳນວນຫຼາຍແລະເຮັດໃຫ້ເມືອງເຢຣູຊາເລັມໄດ້ຮັບການປົກປ້ອງຢ່າງດີ. (2ຂຄ. 26:6-15) ອຸດຊີຢາຕ້ອງມີຄວາມສຸກຫຼາຍແທ້ໆທີ່ພະເຢໂຫວາຊ່ວຍລາວໃຫ້ປະສົບຜົນສຳເລັດ.—ຜູ້ປ. 3:12, 13
10. ເກີດຫຍັງຂຶ້ນກັບອຸດຊີຢາ?
10 ຮຽນຈາກການຕັດສິນໃຈທີ່ບໍ່ສະຫຼາດຂອງອຸດຊີຢາ. ກະສັດອຸດຊີຢາລຶ້ງກັບການໃຫ້ຄົນອື່ນເຮັດຕາມຄຳສັ່ງຂອງລາວ. ນິດໄສແບບນີ້ອາດເຮັດໃຫ້ລາວຄິດວ່າ ລາວຢາກເຮັດຫຍັງກໍໄດ້ຕາມທີ່ລາວຢາກເຮັດໂດຍບໍ່ສົນໃຈຄຳສັ່ງຂອງພະເຢໂຫວາ. ມີມື້ໜຶ່ງ ອຸດຊີຢາເຂົ້າໄປໃນວິຫານຂອງພະເຢໂຫວາເພື່ອເຜົາເຄື່ອງຫອມຢູ່ເທິງແທ່ນບູຊາທັງໆທີ່ກະສັດບໍ່ມີສິດເຮັດແບບນັ້ນ. (2ຂຄ. 26:16-18) ປະໂລຫິດໃຫຍ່ອາຊາຣີຢາພະຍາຍາມຫ້າມລາວ ແຕ່ລາວກໍບໍ່ຟັງແລະຍັງໃຈຮ້າຍຫຼາຍ. ເປັນຕາເສຍດາຍທີ່ອຸດຊີຢາຮັບໃຊ້ພະເຢໂຫວາຢ່າງສັດຊື່ມາຕະຫຼອດ ແຕ່ການບໍ່ເຊື່ອຟັງເທື່ອນີ້ເຮັດໃຫ້ລາວຕ້ອງຖືກລົງໂທດໃຫ້ເປັນຂີ້ທູດ. (2ຂຄ. 26:19-21) ຖ້າອຸດຊີຢາຖ່ອມໂຕສະເໝີ ຊີວິດຂອງລາວຄືຊິບໍ່ເປັນແບບນີ້.
ແທນທີ່ເຮົາຈະອວດຄວາມສຳເລັດຂອງໂຕເອງ ເຮົາຄວນຍົກຍ້ອງສັນລະເສີນພະເຢໂຫວາທີ່ຊ່ວຍເຮົາໃຫ້ເຮັດແບບນັ້ນໄດ້ (ເບິ່ງຂໍ້ 11) d
11. ສິ່ງໃດຈະຊ່ວຍເຮົາໃຫ້ເປັນຄົນຖ່ອມຢູ່ສະເໝີ? (ເບິ່ງຮູບ)
11 ຕອນທີ່ອຸດຊີຢາມີອຳນາດຫຼາຍ ລາວບໍ່ໄດ້ເຫັນຄຸນຄ່າສິ່ງຕ່າງໆທີ່ພະເຢໂຫວາເຄີຍເຮັດເພື່ອລາວ. ບົດຮຽນແມ່ນຫຍັງ? ເຮົາຕ້ອງຈື່ໄວ້ສະເໝີວ່າສິ່ງດີໆແລະວຽກຮັບໃຊ້ທີ່ເຮົາເຮັດທັງໝົດມາຈາກພະເຢໂຫວາ. ແທນທີ່ເຮົາຈະອວດເລື່ອງຄວາມສາມາດຂອງໂຕເອງ ເຮົາຄວນຍົກຍ້ອງພະເຢໂຫວາທີ່ຊ່ວຍເຮົາໃຫ້ເຮັດແບບນັ້ນໄດ້. b (1ກຣ. 4:7) ເຮົາຕ້ອງຍອມຮັບວ່າເຮົາເປັນມະນຸດທີ່ບໍ່ສົມບູນແບບແລະຕ້ອງໄດ້ຮັບຄຳແນະນຳຕະຫຼອດ. ພີ່ນ້ອງຊາຍຄົນໜຶ່ງທີ່ອາຍຸປະມານ 60 ປີບອກວ່າ: “ຂ້ອຍຕ້ອງຮຽນຮູ້ທີ່ຈະບໍ່ໃຈຮ້າຍແລະບໍ່ທໍ້ໃຈເມື່ອຄົນອື່ນໃຫ້ຄຳແນະນຳຕອນທີ່ຂ້ອຍເຮັດຜິດ. ແຕ່ຂ້ອຍຈະພະຍາຍາມແກ້ໄຂໂຕເອງແລະພະຍາຍາມກ້າວໜ້າຕໍ່ໆໄປ.” ຖ້າເຮົາຢ້ານຢຳພະເຢໂຫວາແລະເປັນຄົນຖ່ອມສະເໝີ ເຮົາກໍຈະມີຊີວິດທີ່ມີຄວາມສຸກ.—ສຸພາ. 22:4
ຊອກຫາພະເຢໂຫວາຕໍ່ໆໄປ
12. ຕອນທີ່ໂຢຊີຢາເປັນໄວລຸ້ນ ລາວໄດ້ຊອກຫາພະເຢໂຫວາແນວໃດ? (2 ຂ່າວຄາວ 34:1-3)
12 ຕັດສິນໃຈແບບທີ່ສະຫຼາດຄືກັບໂຢຊີຢາ. ໂຢຊີຢາເລີ່ມຊອກຫາພະເຢໂຫວາຕອນທີ່ລາວເປັນໄວລຸ້ນ. ລາວຢາກຮຽນຮູ້ກ່ຽວກັບພະເຢໂຫວາແລະເຮັດຕາມຄວາມຕ້ອງການຂອງເພິ່ນ. ແຕ່ຊີວິດຂອງລາວກໍບໍ່ງ່າຍ ຍ້ອນຕອນນັ້ນຄົນສ່ວນຫຼາຍນະມັດສະການພະເຈົ້າປອມ. ດັ່ງນັ້ນ ໂຢຊີຢາຕ້ອງມີຄວາມກ້າຫານຫຼາຍແທ້ໆເພື່ອຈະກຳຈັດພະເຈົ້າປອມ. ແລ້ວລາວກໍໄດ້ລົງມືເຮັດ. ກ່ອນທີ່ໂຢຊີຢາຈະຮອດ 20 ປີ ລາວເລີ່ມກຳຈັດການນະມັດສະການປອມໃຫ້ໝົດໄປຈາກແຜ່ນດິນຂອງລາວ.—ອ່ານ 2 ຂ່າວຄາວ 34:1-3
13. ເມື່ອເຈົ້າອຸທິດຕົວໃຫ້ພະເຢໂຫວາ ຊີວິດຂອງເຈົ້າຈະເປັນແນວໃດ?
13 ເຖິງຈະເປັນໄວລຸ້ນ ເຈົ້າກໍຮຽນແບບໂຢຊີຢາໄດ້ໂດຍຕັ້ງໃຈຮຽນຮູ້ກ່ຽວກັບພະເຢໂຫວາແລະຄຸນລັກສະນະທີ່ດີຂອງເພິ່ນ. ການເຮັດແບບນີ້ຈະຊ່ວຍເຈົ້າໃຫ້ຢາກອຸທິດຕົວໃຫ້ພະເຢໂຫວາ. ການອຸທິດຕົວຈະສົ່ງຜົນແນວໃດຕໍ່ຊີວິດຂອງເຈົ້າໃນແຕ່ລະມື້? ລຸກເຊິ່ງຮັບບັບເຕມາຕອນອາຍຸ 14 ປີບອກວ່າ: “ຕັ້ງແຕ່ນີ້ໄປ ຂ້ອຍຈະໃຫ້ວຽກຮັບໃຊ້ພະເຢໂຫວາເປັນສິ່ງສຳຄັນທີ່ສຸດໃນຊີວິດຂອງຂ້ອຍ ແລະຈະຕັ້ງໃຈເຮັດໃຫ້ເພິ່ນມີຄວາມສຸກ.” (ມຣກ. 12:30) ຖ້າເຈົ້າເຮັດຄືກັບລຸກ ຊີວິດຂອງເຈົ້າກໍຈະມີຄວາມສຸກຄືກັນ.
14. ໄວລຸ້ນບາງຄົນຮຽນແບບກະສັດໂຢຊີຢາແນວໃດ? ຂໍໃຫ້ຍົກຕົວຢ່າງ.
14 ຜູ້ຮັບໃຊ້ຂອງພະເຢໂຫວາທີ່ເປັນໄວລຸ້ນອາດຈະເຈິບັນຫາຫຍັງແດ່? ໂຈຮັນເຊິ່ງຮັບບັບເຕມາຕອນອາຍຸ 12 ປີເລົ່າວ່າ ໝູ່ຢູ່ໂຮງຮຽນກົດດັນລາວໃຫ້ລອງສູບຢາສູບໄຟຟ້າ. ເພື່ອຈະອົດທົນກັບແຮງກົດດັນນັ້ນໄດ້ ໂຈຮັນຕ້ອງເຕືອນໂຕເອງຢູ່ຕະຫຼອດວ່າການສູບຢາສູບໄຟຟ້າສົ່ງຜົນເສຍແນວໃດຕໍ່ສຸຂະພາບແລະສາຍສຳພັນຂອງລາວກັບພະເຢໂຫວາ. ເຣໂຊເຊິ່ງຮັບບັບເຕມາຕອນອາຍຸ 14 ປີໄດ້ເວົ້າເຖິງສິ່ງທີ່ຊ່ວຍລາວໃຫ້ຮັບມືກັບບັນຫາທີ່ລາວເຈິຢູ່ໂຮງຮຽນ. ລາວເລົ່າວ່າ: “ຂ້ອຍພະຍາຍາມຄິດເຖິງຄຳເຕືອນທີ່ຢູ່ໃນຄຳພີໄບເບິນແລະຄິດເຖິງພະເຢໂຫວາ ເຊັ່ນ ຕອນທີ່ຮຽນວິຊາປະຫວັດສາດ ຂ້ອຍພະຍາຍາມຄິດເຖິງເລື່ອງໃນຄຳພີໄບເບິນແລະຄຳພະຍາກອນຕ່າງໆທີ່ກ່ຽວຂ້ອງກັບເລື່ອງທີ່ກຳລັງຮຽນ. ຕອນທີ່ລົມກັບຄົນອື່ນ ຂ້ອຍພະຍາຍາມຄິດເຖິງຂໍ້ຄຳພີເພື່ອຈະເວົ້າໃຫ້ເຂົາເຈົ້າຟັງ.” ບັນຫາທີ່ເຈົ້າເຈິອາດຈະຕ່າງຈາກບັນຫາທີ່ກະສັດໂຢຊີຢາເຈິ ແຕ່ເຈົ້າກໍສາມາດຕັດສິນໃຈແບບທີ່ສະຫຼາດໄດ້ແລະສັດຊື່ຄືລາວໄດ້. ການອົດທົນກັບບັນຫາທີ່ເຈົ້າເຈິຕອນທີ່ເປັນໄວລຸ້ນຈະກຽມເຈົ້າໃຫ້ພ້ອມສຳລັບບັນຫາທີ່ເຈົ້າຈະເຈິໃນອະນາຄົດ.
15. ສິ່ງໃດຊ່ວຍໂຢຊີຢາໃຫ້ຮັບໃຊ້ພະເຢໂຫວາຢ່າງສັດຊື່? (2 ຂ່າວຄາວ 34:14, 18-21)
15 ຕອນກະສັດໂຢຊີຢາອາຍຸ 26 ປີລາວເລີ່ມເຮັດວຽກແປງວິຫານ. ຕອນທີ່ກຳລັງແປງວິຫານ ມີຄົນເຫັນ “ປຶ້ມກົດໝາຍຂອງພະເຢໂຫວາທີ່ເພິ່ນໃຫ້ຜ່ານທາງໂມເຊ.” ເມື່ອກະສັດໂຢຊີຢາໄດ້ຟັງການອ່ານປຶ້ມກົດໝາຍນັ້ນ ລາວກໍເຮັດຕາມທັນທີ. (ອ່ານ 2 ຂ່າວຄາວ 34:14, 18-21) ເຈົ້າຢາກອ່ານຄຳພີໄບເບິນເປັນປະຈຳບໍ? ຖ້າເຈົ້າກຳລັງເຮັດຢູ່ ເຈົ້າມັກບໍ? ເຈົ້າຈື່ຂໍ້ຄຳພີທີ່ຊ່ວຍເຈົ້າເປັນສ່ວນໂຕບໍ? ລຸກທີ່ເວົ້າເຖິງກ່ອນໜ້ານີ້ໄດ້ຈົດຈຸດຕ່າງໆທີ່ລາວສົນໃຈຈາກການອ່ານຄຳພີໄບເບິນ. ຖ້າເຈົ້າເຮັດຄືກັບລາວ ມັນກໍຈະຊ່ວຍເຈົ້າໃຫ້ຈື່ຂໍ້ຄຳພີຫຼືບົດຮຽນທີ່ເຈົ້າໄດ້ຈາກການອ່ານຄຳພີໄບເບິນ. ແຮ່ງເຈົ້າຮູ້ຈັກແລະຮັກຄຳພີໄບເບິນ ເຈົ້າກໍແຮ່ງຈະຮັບໃຊ້ພະເຢໂຫວາຫຼາຍຂຶ້ນ. ຄືກັບທີ່ປຶ້ມກົດໝາຍຂອງພະເຢໂຫວາຊ່ວຍໂຢຊີຢາໃຫ້ເຮັດສິ່ງທີ່ຖືກຕ້ອງ ຄຳພີໄບເບິນກໍຈະຊ່ວຍເຈົ້າໃຫ້ເຮັດສິ່ງທີ່ຖືກຕ້ອງໄດ້ຄືກັນ.
16. ເປັນຫຍັງໂຢຊີຢາຈຶ່ງເຮັດຜິດຮ້າຍແຮງ ແລະເຮົາໄດ້ບົດຮຽນຫຍັງ?
16 ຮຽນຈາກການຕັດສິນໃຈທີ່ບໍ່ສະຫຼາດຂອງໂຢຊີຢາ. ຕອນໂຢຊີຢາອາຍຸ 39 ປີ ລາວເຮັດຜິດພາດຈົນເຮັດໃຫ້ລາວຕາຍ. ລາວໝັ້ນໃຈໃນໂຕເອງແທນທີ່ຈະຂໍການຊີ້ນຳຈາກພະເຢໂຫວາ. (2ຂຄ. 35:20-25) ບົດຮຽນສຳລັບເຮົາແມ່ນ ບໍ່ວ່າເຮົາຈະອາຍຸສ່ຳໃດຫຼືຮຽນຄຳພີໄບເບິນມາດົນປານໃດແລ້ວ ເຮົາຕ້ອງຊອກຫາພະເຢໂຫວາແລະເພິ່ງເພິ່ນສະເໝີ. ການຊອກຫາພະເຢໂຫວາລວມເຖິງການອະທິດຖານຂໍການຊີ້ນຳຈາກເພິ່ນເປັນປະຈຳ ສຶກສາຄຳພີໄບເບິນ ແລະຟັງຄຳແນະນຳຈາກຄລິດສະຕຽນທີ່ມີຄວາມເຊື່ອເຂັ້ມແຂງ. ຖ້າເຮົາເຮັດແບບນັ້ນ ເຮົາກໍຈະບໍ່ເຮັດຜິດພາດຮ້າຍແຮງ ແລະຊີວິດຂອງເຮົາຈະມີຄວາມສຸກຫຼາຍຂຶ້ນ.—ຢກບ. 1:25
ໄວລຸ້ນ ເຈົ້າສາມາດມີຊີວິດທີ່ມີຄວາມສຸກໄດ້
17. ເຮົາໄດ້ບົດຮຽນຫຍັງຈາກເລື່ອງຂອງກະສັດ 3 ອົງຂອງຢູດາ?
17 ຕອນທີ່ເປັນໄວລຸ້ນ ມີເລື່ອງທີ່ໜ້າຕື່ນເຕັ້ນຫຼາຍເລື່ອງທີ່ເຈົ້າສາມາດເຮັດໄດ້. ເລື່ອງຂອງເຢໂຮອາດ ອຸດຊີຢາ ແລະໂຢຊີຢາສະແດງໃຫ້ເຫັນວ່າໄວລຸ້ນສາມາດຕັດສິນໃຈແບບທີ່ສະຫຼາດໄດ້ແລະໃຊ້ຊີວິດໃນແບບທີ່ພະເຢໂຫວາພໍໃຈໄດ້. ເຖິງວ່າກະສັດ 3 ອົງນີ້ໄດ້ເຮັດຜິດພາດແລ້ວເຮັດໃຫ້ເຂົາເຈົ້າເຈິເລື່ອງທີ່ບໍ່ດີ ແຕ່ຖ້າເຈົ້າຮຽນແບບຕົວຢ່າງທີ່ດີຂອງເຂົາເຈົ້າແລະບໍ່ເຮັດຜິດພາດຄືກັບທີ່ເຂົາເຈົ້າເຮັດ ເຈົ້າກໍຈະມີຊີວິດທີ່ມີຄວາມສຸກ.
ຕອນທີ່ດາວິດອາຍຸຍັງນ້ອຍ ລາວໃກ້ຊິດກັບພະເຢໂຫວາ. ລາວເຮັດໃຫ້ເພິ່ນພໍໃຈແລະຊີວິດຂອງລາວກໍມີຄວາມສຸກ (ເບິ່ງຂໍ້ 18)
18. ມີຕົວຢ່າງຂອງໃຜແດ່ໃນພະຄຳພີທີ່ສະແດງໃຫ້ເຫັນວ່າເຈົ້າກໍສາມາດມີຊີວິດທີ່ມີຄວາມສຸກໄດ້? (ເບິ່ງຮູບ)
18 ຄຳພີໄບເບິນມີເລື່ອງຂອງໄວລຸ້ນຄົນອື່ນໆທີ່ໃກ້ຊິດກັບພະເຢໂຫວາເຊິ່ງເພິ່ນພໍໃຈເຂົາເຈົ້າແລະຊີວິດຂອງເຂົາເຈົ້າກໍມີຄວາມສຸກ. ດາວິດເປັນຜູ້ໜຶ່ງໃນນັ້ນ. ລາວເລືອກຮັບໃຊ້ພະເຢໂຫວາຕັ້ງແຕ່ອາຍຸຍັງນ້ອຍ ແລະຕໍ່ມາລາວກໍເປັນກະສັດທີ່ພັກດີ. ເຖິງວ່າບາງເທື່ອລາວເຮັດຜິດພາດ ແຕ່ພະເຢໂຫວາກໍຖືວ່າດາວິດເປັນຜູ້ຮັບໃຊ້ທີ່ສັດຊື່. (1ກສ. 3:6; 9:4, 5; 14:8) ຖ້າເຈົ້າຮຽນເລື່ອງຂອງດາວິດ ຕົວຢ່າງຂອງລາວຈະຊ່ວຍເຈົ້າໃຫ້ຮັບໃຊ້ພະເຢໂຫວາຢ່າງສັດຊື່ໄດ້. ເຈົ້າອາດຈະຮຽນເລື່ອງຂອງມາຣະໂກຫຼືຕີໂມທຽວກໍໄດ້. ເຈົ້າຈະເຫັນວ່າເຂົາເຈົ້າຮັບໃຊ້ພະເຢໂຫວາຕັ້ງແຕ່ອາຍຸຍັງນ້ອຍແລະຮັບໃຊ້ເພິ່ນຢ່າງສັດຊື່ຕໍ່ໆໄປ. ການຕັດສິນໃຈຂອງເຂົາເຈົ້າເຮັດໃຫ້ພະເຢໂຫວາມີຄວາມສຸກແລະເຂົາເຈົ້າກໍມີຄວາມສຸກຄືກັນ.
19. ເຈົ້າຢາກມີຊີວິດແບບໃດ?
19 ຊີວິດຂອງເຈົ້າຈະເປັນແບບໃດກໍຂຶ້ນຢູ່ກັບວ່າຕອນນີ້ເຈົ້າໃຊ້ຊີວິດແນວໃດ. ຖ້າເຈົ້າໄວ້ວາງໃຈພະເຢໂຫວາແລະບໍ່ເພິ່ງຄວາມເຂົ້າໃຈຂອງໂຕເອງ ເພິ່ນກໍຈະຊ່ວຍເຈົ້າໃຫ້ຕັດສິນໃຈແບບທີ່ສະຫຼາດ. (ສຸພາ. 20:24) ເຈົ້າເອງກໍຈະມີຊີວິດທີ່ດີແລະມີຄວາມສຸກ. ຂໍໃຫ້ຈື່ໄວ້ວ່າພະເຢໂຫວາເຫັນຄ່າສິ່ງທີ່ເຈົ້າເຮັດເພື່ອເພິ່ນ. ບໍ່ມີຫຍັງຈະດີໄປກວ່າການໃຊ້ຊີວິດເພື່ອຮັບໃຊ້ພະເຢໂຫວາພໍ່ທີ່ຮັກຂອງເຮົາທີ່ຢູ່ໃນສະຫວັນ.
ເພງ 144 ຈ້ອງເບິ່ງທີ່ລາງວັນ
a ເຈົ້າທີ່ເປັນໄວລຸ້ນ ພະເຢໂຫວາຮູ້ວ່າບາງເທື່ອກໍບໍ່ງ່າຍທີ່ເຈົ້າຈະເຮັດສິ່ງທີ່ຖືກຕ້ອງແລະໃກ້ຊິດກັບເພິ່ນສະເໝີ. ເຈົ້າຈະຕັດສິນໃຈແບບທີ່ສະຫຼາດແລະເຮັດໃຫ້ພະເຢໂຫວາພໍໃຈໄດ້ແນວໃດ? ໃຫ້ເຮົາມາເບິ່ງຕົວຢ່າງຂອງໄວລຸ້ນ 3 ຄົນທີ່ເປັນກະສັດຂອງຢູດາ ແລະເຮົາຈະຮຽນຫຍັງໄດ້ແດ່ຈາກການຕັດສິນໃຈຂອງເຂົາເຈົ້າ.
b ເບິ່ງຂອບ: “ຢ່າ ‘ເຮັດເປັນຄົນຖ່ອມ’” ໃນບົດຄວາມ “ການເປັນຄົນດັງໃນໂລກອອນລາຍສຳຄັນສ່ຳໃດ?” ໃນເວັບໄຊ jw.org (ພາສາໄທ)
