ບົດຄວາມສຶກສາທີ 37
ໄວ້ວາງໃຈພະເຢໂຫວາຄືກັບແຊມຊັນ
“ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເອີ້ຍ ຂໍພະອົງຈື່ລູກ. ພະເຈົ້າເອີ້ຍ ຂໍໃຫ້ລູກມີເຫື່ອມີແຮງ.”—ຜຕສ. 16:28
ເພງ 30 ພະອົງເປັນພະເຈົ້າ ເປັນພໍ່ ແລະເພື່ອນຂອງຂ້ອຍ
ໃຈຄວາມສຳຄັນ a
1-2. ເປັນຫຍັງເຮົາຄວນສົນໃຈເລື່ອງຂອງແຊມຊັນ?
ເມື່ອໄດ້ຍິນຊື່ແຊມຊັນ ເຈົ້າຄິດເຖິງຫຍັງ? ເຈົ້າອາດຄິດເຖິງຄວາມແຂງແຮງຂອງລາວ. ແຕ່ແຊມຊັນກໍເຄີຍຕັດສິນໃຈຜິດພາດ ເຊິ່ງເຮັດໃຫ້ລາວເຈິກັບຄວາມເຈັບປວດຫຼາຍຢ່າງ. ເຖິງຈະເປັນແບບນັ້ນ ພະເຢໂຫວາກໍເລືອກທີ່ຈະເບິ່ງຄວາມສັດຊື່ຂອງລາວແລະສິ່ງທີ່ລາວເຮັດເພື່ອຮັບໃຊ້ເພິ່ນ. ດັ່ງນັ້ນ ເພິ່ນຈຶ່ງໃຫ້ຂຽນເລື່ອງຂອງລາວໄວ້ໃນຄຳພີໄບເບິນເພື່ອເປັນປະໂຫຍດສຳລັບເຮົາ.
2 ພະເຢໂຫວາໃຊ້ແຊມຊັນໃຫ້ເຮັດສິ່ງທີ່ໜ້າງຶດງໍ້ຫຼາຍຢ່າງເພື່ອຊ່ວຍພວກອິດສະຣາເອນປະຊາຊົນຂອງເພິ່ນ. ຫຼັງຈາກທີ່ລາວຕາຍໄປຫຼາຍຮ້ອຍປີແລ້ວ ພະເຢໂຫວາກໍດົນໃຈໃຫ້ອັກຄະສາວົກໂປໂລຂຽນຊື່ຂອງລາວໄວ້ໃນລາຍຊື່ຄົນທີ່ເປັນຕົວຢ່າງທີ່ດີໃນເລື່ອງຄວາມເຊື່ອ. (ຮຣ. 11:32-34) ຕົວຢ່າງຂອງລາວຍັງໃຫ້ກຳລັງໃຈເຮົານຳ. ລາວເພິ່ງພະເຢໂຫວາແມ່ນແຕ່ຕອນທີ່ລຳບາກ. ໃຫ້ເຮົາມາເບິ່ງວ່າເຮົາຈະໄດ້ບົດຮຽນຫຍັງຈາກແຊມຊັນ ແລະຕົວຢ່າງຂອງລາວໃຫ້ກຳລັງໃຈເຮົາແນວໃດ.
ແຊມຊັນໄວ້ວາງໃຈພະເຢໂຫວາ
3. ພະເຢໂຫວາໄດ້ມອບໝາຍໃຫ້ແຊມຊັນເຮັດຫຍັງ?
3 ຕອນທີ່ແຊມຊັນເກີດ ພວກຟີລິດສະຕີນປົກຄອງພວກອິດສະຣາເອນແລະກົດຂີ່ເຂົາເຈົ້າ. (ຜຕສ. 13:1) ພວກອິດສະຣາເອນຈຶ່ງມີຊີວິດທີ່ລຳບາກຫຼາຍແທ້ໆຍ້ອນພວກຟີລິດສະຕີນໂຫດຮ້າຍຫຼາຍ. ພະເຢໂຫວາຈຶ່ງເລືອກແຊມຊັນໃຫ້ “ເປັນຜູ້ນຳທີ່ຊ່ວຍພວກອິດສະຣາເອນໃຫ້ລອດຈາກມືຂອງພວກຟີລິດສະຕີນ.” (ຜຕສ. 13:5) ແຕ່ວຽກນີ້ກໍບໍ່ງ່າຍ. ດັ່ງນັ້ນເພື່ອແຊມຊັນຈະເຮັດວຽກທີ່ຍາກໆນີ້ໃຫ້ສຳເລັດ ລາວຕ້ອງໄວ້ວາງໃຈພະເຢໂຫວາ.
ແຊມຊັນໄວ້ວາງໃຈພະເຢໂຫວາແລະພ້ອມທີ່ຈະປັບໂຕ. ລາວໃຊ້ສິ່ງທີ່ລາວມີເພື່ອໃຫ້ຄວາມຕ້ອງການຂອງພະເຢໂຫວາສຳເລັດ (ເບິ່ງຂໍ້ 4-5)
4. ພະເຢໂຫວາໄດ້ຊ່ວຍແຊມຊັນໃຫ້ລອດຈາກພວກຟີລິດສະຕີນແນວໃດ? (ພວກຜູ້ຕັດສິນ 15:14-16)
4 ໃຫ້ເຮົາມາເບິ່ງຕົວຢ່າງໜຶ່ງທີ່ສະແດງໃຫ້ເຫັນວ່າແຊມຊັນໄວ້ວາງໃຈພະເຢໂຫວາ. ມີເທື່ອໜຶ່ງ ກອງທັບຟີລິດສະຕີນມາຈັບແຊມຊັນ ຕອນນັ້ນລາວຢູ່ເມືອງເລຮີເຊິ່ງອາດຢູ່ໃນເຂດຢູດາ. ພວກຢູດາທີ່ເປັນຄົນຊາດດຽວກັນກັບລາວຢ້ານຫຼາຍ ເຂົາເຈົ້າຈຶ່ງສົ່ງແຊມຊັນໃຫ້ພວກສັດຕູ. ເຂົາເຈົ້າເອົາເຊືອກໃໝ່ 2 ເສັ້ນມັດແຊມຊັນແລ້ວເອົາລາວໄປໃຫ້ພວກຟີລິດສະຕີນ. (ຜຕສ. 15:9-13) ແຕ່ “ພະເຢໂຫວາກໍໃຫ້ພະລັງຂອງເພິ່ນ” ກັບແຊມຊັນ ລາວຈຶ່ງດຶງເຊືອກທີ່ມັດຢູ່ນັ້ນຂາດ. ຈາກນັ້ນ ລາວກໍ “ແນມເຫັນກະດູກຄາງກະໄຕຂອງລາທີ່ຍັງໃໝ່ໆສົດໆຢູ່.” ລາວຈຶ່ງໃຊ້ກະດູກນັ້ນຂ້າພວກຟີລິດສະຕີນຕາຍ 1.000 ຄົນ.—ອ່ານພວກຜູ້ຕັດສິນ 15:14-16
5. ການທີ່ແຊມຊັນໃຊ້ກະດູກຄາງກະໄຕຂອງລາຕໍ່ສູ້ກັບພວກຟີລິດສະຕີນສະແດງໃຫ້ເຫັນແນວໃດວ່າລາວໄວ້ວາງໃຈພະເຢໂຫວາ?
5 ເປັນຫຍັງແຊມຊັນຈຶ່ງໃຊ້ກະດູກຄາງກະໄຕຂອງລາຕໍ່ສູ້ກັບພວກຟີລິດສະຕີນ? ມັນແປກແທ້ໆທີ່ລາວໃຊ້ສິ່ງນີ້ເປັນອາວຸດ. ລາວໃຊ້ສິ່ງນີ້ຍ້ອນລາວຮູ້ວ່າໄຊຊະນະບໍ່ໄດ້ຂຶ້ນຢູ່ກັບອາວຸດ ແຕ່ຂຶ້ນຢູ່ກັບການໄວ້ວາງໃຈພະເຢໂຫວາ. ລາວຈຶ່ງໃຊ້ສິ່ງທີ່ລາວຊອກໄດ້ໃນຕອນນັ້ນເພື່ອຈະເຮັດໃຫ້ຄວາມຕ້ອງການຂອງພະເຢໂຫວາສຳເລັດ. ເຮົາເຫັນວ່າການທີ່ລາວໄວ້ວາງໃຈພະເຢໂຫວາເຮັດໃຫ້ລາວຊະນະພວກສັດຕູໄດ້.
6. ເລື່ອງຂອງແຊມຊັນຊ່ວຍເຮົາແນວໃດຕອນທີ່ເຮົາໄດ້ຮັບວຽກມອບໝາຍ?
6 ພະເຢໂຫວາຈະໃຫ້ກຳລັງເຮົາຄືກັນເພື່ອຈະເຮັດວຽກມອບໝາຍຂອງເພິ່ນໃຫ້ສຳເລັດເຖິງວ່າວຽກນັ້ນອາດເບິ່ງຄືວ່າຍາກ. ເພິ່ນອາດຈະຊ່ວຍເຮົາໃນແບບທີ່ເຮົາຄິດບໍ່ເຖິງ. ດັ່ງນັ້ນ ໃຫ້ເຮົາໄວ້ວາງໃຈພະເຢໂຫວາຜູ້ທີ່ໃຫ້ກຳລັງແຊມຊັນ. ເພິ່ນຈະຊ່ວຍເຈົ້າໃຫ້ເຮັດຕາມສິ່ງທີ່ເພິ່ນຕ້ອງການ ຖ້າເຈົ້າໄວ້ວາງໃຈເພິ່ນສະເໝີ.—ສຸພາ. 16:3
7. ມີຕົວຢ່າງຫຍັງທີ່ສະແດງໃຫ້ເຫັນວ່າ ເປັນເລື່ອງສຳຄັນທີ່ເຮົາຈະຊອກຫາການຊີ້ນຳຈາກພະເຢໂຫວາ?
7 ພີ່ນ້ອງຫຼາຍຄົນທີ່ຊ່ວຍໃນໂຄງການກໍ່ສ້າງສະແດງໃຫ້ເຫັນວ່າເຂົາເຈົ້າໄວ້ວາງໃຈພະເຢໂຫວາແທ້ໆ. ແຕ່ກີ້ ຖ້າເຮົາຈຳເປັນຕ້ອງມີຫໍປະຊຸມແລະຕຶກຂອງອົງການ ສ່ວນຫຼາຍເຮົາຈະອອກແບບແລະສ້າງຕຶກເຫຼົ່ານັ້ນຂຶ້ນໃໝ່. ແຕ່ຕອນນີ້ ເນື່ອງຈາກອົງການຂອງເຮົາກ້າວໜ້າແລະມີຄົນໃໝ່ເພີ່ມຂຶ້ນຫຼາຍຈຶ່ງຕ້ອງມີການປັບປ່ຽນ. ພີ່ນ້ອງທີ່ນຳໜ້າໃນອົງການໄດ້ຂໍການຊີ້ນຳຈາກພະເຢໂຫວາແລະລອງໃຊ້ວິທີໃໝ່ ເຊັ່ນ ຊື້ຕຶກຕ່າງໆແລະປັບປຸງໃໝ່. ພີ່ນ້ອງໂຣເບີດທີ່ເຮັດວຽກໃນໂຄງການກໍ່ສ້າງຫຼາຍບ່ອນທົ່ວໂລກມາຫຼາຍປີແລ້ວບອກວ່າ: “ທຳອິດ ຫຼາຍຄົນຮູ້ສຶກວ່າຍາກຫຼາຍທີ່ຈະຍອມຮັບວິທີໃໝ່ ຍ້ອນມັນບໍ່ຄືກັບວິທີທີ່ເຮົາເຄີຍເຮັດມາຫຼາຍປີ. ແຕ່ພີ່ນ້ອງກໍເຕັມໃຈປັບປ່ຽນ ແລະເຮົາກໍເຫັນແຈ້ງວ່າພະເຢໂຫວາອວຍພອນວິທີໃໝ່ນີ້.” ນອກຈາກຕົວຢ່າງນີ້ແລ້ວ ເຮົາຍັງເຫັນອີກຫຼາຍຕົວຢ່າງທີ່ສະແດງວ່າພະເຢໂຫວາກຳລັງຊີ້ນຳຄົນຂອງເພິ່ນໃຫ້ເຮັດສິ່ງທີ່ເພິ່ນຕ້ອງການໃຫ້ສຳເລັດ. ເຮົາແຕ່ລະຄົນຄວນຖາມໂຕເອງຢູ່ເລື້ອຍໆວ່າ ‘ຂ້ອຍກຳລັງຊອກຫາການຊີ້ນຳຈາກພະເຢໂຫວາກ່ຽວກັບວຽກຮັບໃຊ້ຂອງຂ້ອຍບໍ? ແລະຂ້ອຍເຕັມໃຈທີ່ຈະປັບປ່ຽນບໍ?’
ແຊມຊັນຮັບເອົາສິ່ງທີ່ພະເຢໂຫວາກຽມໃຫ້ລາວ
8. ຕອນທີ່ແຊມຊັນຫິວນ້ຳ ລາວໄດ້ເຮັດຫຍັງ?
8 ເຈົ້າອາດຈະຈື່ເລື່ອງທີ່ໜ້າງຶດງໍ້ອື່ນໆອີກທີ່ແຊມຊັນໄດ້ເຮັດ. ລາວຂ້າໂຕສິງດ້ວຍມືເປົ່າ ແລະລາວໄປເມືອງອາຊະກາໂລນແລະຂ້າພວກຟີລິດສະຕີນ 30 ຄົນ. (ຜຕສ. 14:5, 6, 19) ແຊມຊັນຮູ້ວ່າທຸກສິ່ງທີ່ລາວເຮັດບໍ່ແມ່ນຍ້ອນກຳລັງຂອງລາວເອງ ແຕ່ຍ້ອນພະເຢໂຫວາເປັນຜູ້ຊ່ວຍລາວ. ເຮົາເຫັນເລື່ອງນີ້ໄດ້ແຈ້ງຕອນທີ່ລາວຂ້າພວກຟີລິດສະຕີນ 1.000 ຄົນ ແລ້ວລາວກໍຫິວນ້ຳແຮງ. ແທນທີ່ລາວຈະພະຍາຍາມຊອກນ້ຳກິນດ້ວຍໂຕເອງ ລາວໄດ້ອະທິດຖານຂໍໃຫ້ພະເຢໂຫວາຊ່ວຍ.—ຜຕສ. 15:18
9. ພະເຢໂຫວາໄດ້ເຮັດແນວໃດຕອນທີ່ແຊມຊັນອະທິດຖານຂໍຄວາມຊ່ວຍເຫຼືອ? (ພວກຜູ້ຕັດສິນ 15:19)
9 ພະເຢໂຫວາຕອບຄຳອະທິດຖານຂອງແຊມຊັນໂດຍເຮັດການອັດສະຈັນໃຫ້ມີນ້ຳອອກບໍ່ ແລ້ວແຊມຊັນກໍກິນນ້ຳຢູ່ຫັ້ນ. ເມື່ອກິນແລ້ວ “ລາວກໍມີແຮງແລະສົດຊື່ນຂຶ້ນ.” (ອ່ານພວກຜູ້ຕັດສິນ 15:19) ອາດເປັນໄປໄດ້ວ່ານ້ຳອອກບໍ່ນັ້ນຍັງມີຢູ່ອີກຫຼາຍປີຈົນຮອດຕອນທີ່ຜູ້ພະຍາກອນຊາມູເອນໄດ້ຮັບການດົນໃຈໃຫ້ຂຽນປຶ້ມພວກຜູ້ຕັດສິນ. ທຸກເທື່ອທີ່ພວກອິດສະຣາເອນເຫັນນ້ຳອອກບໍ່ນັ້ນ ມັນອາດຈະເຕືອນເຂົາເຈົ້າວ່າ ເຂົາເຈົ້າຕ້ອງໄວ້ວາງໃຈພະເຢໂຫວາສະເໝີເມື່ອຕ້ອງການຄວາມຊ່ວຍເຫຼືອ.
ຄືກັບແຊມຊັນທີ່ມີແຮງແລະສົດຊື່ນຂຶ້ນຍ້ອນກິນນ້ຳທີ່ພະເຢໂຫວາໃຫ້ ຖ້າເຮົາຢາກມີຄວາມເຊື່ອທີ່ເຂັ້ມແຂງແລະສັດຊື່ຕໍ່ໆໄປ ເຮົາກໍຕ້ອງຮັບເອົາສິ່ງທີ່ພະເຢໂຫວາກຽມໃຫ້ເຮົາ (ເບິ່ງຂໍ້ 10)
10. ເຮົາຕ້ອງເຮັດຫຍັງຖ້າຢາກໃຫ້ພະເຢໂຫວາຊ່ວຍ? (ເບິ່ງຮູບ)
10 ເຮົາກໍຄືກັນ ບໍ່ວ່າເຮົາຈະມີຄວາມສາມາດຫຼາຍສ່ຳໃດຫຼືເຮັດວຽກຮັບໃຊ້ພະເຢໂຫວາຫຼາຍຢ່າງມາແລ້ວກໍຕາມ ເຮົາກໍຍັງຕ້ອງຂໍໃຫ້ພະເຢໂຫວາຊ່ວຍຢູ່. ເຮົາຕ້ອງຈຽມໂຕແລະຍອມຮັບວ່າເຮົາຈະເຮັດວຽກຮັບໃຊ້ສຳເລັດກໍຕໍ່ເມື່ອເຮົາໄວ້ວາງໃຈພະເຢໂຫວາ. ຄືກັບແຊມຊັນ ລາວມີແຮງແລະສົດຊື່ນຂຶ້ນກໍຍ້ອນລາວກິນນ້ຳທີ່ພະເຢໂຫວາກຽມໃຫ້. ຖ້າເຮົາຢາກມີຄວາມເຊື່ອທີ່ເຂັ້ມແຂງແລະສັດຊື່ຕໍ່ໆໄປ ເຮົາກໍຕ້ອງຮັບເອົາສິ່ງຕ່າງໆທີ່ພະເຢໂຫວາກຽມໃຫ້ເຮົາ.—ມທ. 11:28
11. ເຮົາຕ້ອງເຮັດຫຍັງເພື່ອຈະໃຫ້ພະເຢໂຫວາຊ່ວຍ? ຂໍໃຫ້ເລົ່າຕົວຢ່າງຂອງພີ່ນ້ອງຄົນໜຶ່ງ.
11 ໃຫ້ເຮົາມາເບິ່ງຕົວຢ່າງຂອງພີ່ນ້ອງທີ່ຊື່ອາເລັກຊີຢູ່ປະເທດຣັດເຊຍທີ່ອົດທົນກັບການຂົ່ມເຫງທີ່ໜັກໆ. ອັນໃດຊ່ວຍລາວໃຫ້ອົດທົນໄດ້ຕອນທີ່ເຈິກັບເລື່ອງເຫຼົ່ານັ້ນ? ອາເລັກຊີກັບເມຍນະມັດສະການພະເຢໂຫວາ ອ່ານແລະສຶກສາຄຳພີໄບເບິນເປັນປະຈຳ. ອາເລັກຊີບອກວ່າ: “ຂ້ອຍພະຍາຍາມສຶກສາສ່ວນຕົວເປັນປະຈຳແລະອ່ານຄຳພີໄບເບິນທຸກໆມື້. ຂ້ອຍກັບເມຍອ່ານພະຄຳພີປະຈຳວັນແລະອະທິດຖານຫາພະເຢໂຫວານຳກັນທຸກໆເຊົ້າ.” ເຮົາຮຽນຫຍັງໄດ້ຈາກເລື່ອງນີ້? ເຮົາຕ້ອງເພິ່ງພະເຢໂຫວາສະເໝີ ບໍ່ແມ່ນເພິ່ງໂຕເອງ. ເຮົາຈະເຮັດແບບນີ້ໄດ້ແນວໃດ? ເຮົາຕ້ອງເຮັດສິ່ງທີ່ເສີມສ້າງຄວາມເຊື່ອເປັນປະຈຳ ເຊັ່ນ: ອ່ານແລະສຶກສາຄຳພີໄບເບິນ ອະທິດຖານ ໄປປະຊຸມ ແລະໄປປະກາດ. ຖ້າເຮົາເຮັດສິ່ງເຫຼົ່ານີ້ ພະເຢໂຫວາກໍຈະອວຍພອນຄວາມພະຍາຍາມຂອງເຮົາ. ຄືກັບທີ່ພະເຢໂຫວາໃຫ້ກຳລັງແຊມຊັນ ເພິ່ນກໍຈະໃຫ້ກຳລັງເຮົາຄືກັນ.
ແຊມຊັນບໍ່ຍອມແພ້
12. ແຊມຊັນຕັດສິນໃຈຜິດພາດແນວໃດ? ສາຍສຳພັນທີ່ແຊມຊັນມີຕໍ່ເດລີລາຕ່າງຈາກຜູ້ຍິງຟີລິດສະຕີນຄົນອື່ນໆແນວໃດ?
12 ແຊມຊັນກໍເປັນຄົນບໍ່ສົມບູນແບບຄືກັບເຮົາ ບາງເທື່ອລາວກໍຕັດສິນໃຈຜິດພາດ. ມີເທື່ອໜຶ່ງລາວຕັດສິນໃຈຜິດພາດຈົນເກີດຜົນເສຍຫາຍຮ້າຍແຮງ. ຫຼັງຈາກແຊມຊັນຮັບໃຊ້ເປັນຜູ້ຕັດສິນໄດ້ໄລຍະໜຶ່ງ ລາວກໍ “ຫຼົງຮັກຜູ້ຍິງຄົນໜຶ່ງທີ່ຢູ່ຮ່ອມພູໂສເຣັກ. ຜູ້ຍິງຄົນນັ້ນຊື່ເດລີລາ.” (ຜຕສ. 16:4) ກ່ອນໜ້ານີ້ແຊມຊັນຢາກແຕ່ງດອງກັບຜູ້ຍິງຄົນຟີລິດສະຕີນ ມັນເປັນແບບນັ້ນເພາະ “ເລື່ອງນີ້ມາຈາກພະເຢໂຫວາ” ຍ້ອນເພິ່ນ “ຫາໂອກາດຈັດການພວກຟີລິດສະຕີນ.” ຕໍ່ມາ ລາວໄປພັກຢູ່ເຮືອນຂອງໂສເພນີຄົນໜຶ່ງຢູ່ເມືອງຄາຊາໃນເຂດຂອງພວກຟີລິດສະຕີນ. ຕອນນັ້ນ ພະເຢໂຫວາໄດ້ໃຫ້ກຳລັງແຊມຊັນເພື່ອດຶງປະຕູເມືອງອອກແລ້ວແບກໃສ່ບ່າໄປ ເຊິ່ງເຮັດໃຫ້ເມືອງນັ້ນບໍ່ມີປະຕູປົກປ້ອງ. (ຜຕສ. 14:1-4; 16:1-3) ຕອນນີ້ແຊມຊັນຢາກແຕ່ງດອງກັບເດລີລາ. ແຕ່ກໍລະນີຂອງເດລີລາຕ່າງຈາກຜູ້ຍິງຟີລິດສະຕີນຄົນອື່ນໆຍ້ອນລາວອາດເປັນຄົນອິດສະຣາເອນ ແລະແຊມຊັນເຮັດຕາມຄວາມຄິດຂອງໂຕເອງ. ດັ່ງນັ້ນຈຶ່ງບໍ່ໄດ້ເປີດໂອກາດໃຫ້ແຊມຊັນໄດ້ຈັດການກັບພວກຟີລິດສະຕີນ.
13. ເດລີລາເຮັດບໍ່ດີກັບແຊມຊັນແນວໃດ?
13 ເດລີລາທໍລະຍົດແຊມຊັນຍ້ອນລາວໄດ້ເງິນຫຼາຍຈາກພວກຟີລິດສະຕີນ. ບາງເທື່ອອາດຈະເປັນຍ້ອນແຊມຊັນຮັກເດລີລາຫຼາຍຈົນບໍ່ໄດ້ສົງໄສເຈຕະນາຂອງລາວ. ເດລີລາຖາມຊູຊີແຊມຊັນຕະຫຼອດວ່າ ລາວໄດ້ກຳລັງຫຼາຍຂະໜາດນີ້ມາຈາກໃສ? ໃນທີ່ສຸດ ແຊມຊັນກໍຍອມບອກເດລີລາ. ຄວາມຜິດພາດຂອງແຊມຊັນເຮັດໃຫ້ລາວຕ້ອງສູນເສຍກຳລັງແລະເຮັດໃຫ້ພະເຢໂຫວາບໍ່ຢູ່ກັບລາວໄລຍະໜຶ່ງ.—ຜຕສ. 16:16-20
14. ເມື່ອແຊມຊັນເຊື່ອເດລີລາ ລາວເຈິບັນຫາຫຍັງ?
14 ແຊມຊັນຕ້ອງເຈິເລື່ອງທີ່ບໍ່ດີແບບນີ້ຍ້ອນລາວເຊື່ອເດລີລາຫຼາຍກວ່າເຊື່ອພະເຢໂຫວາ. ແຊມຊັນຖືກພວກຟີລິດສະຕີນຈັບໄປ ຖືກຈົກຕາອອກທັງສອງເບື້ອງ ແລະຖືກຂັງໄວ້ໃນເມືອງຄາຊາ ເຊິ່ງເປັນບ່ອນທີ່ແຊມຊັນເຮັດໃຫ້ພວກຟີລິດສະຕີນອັບອາຍ. ເຂົາເຈົ້າຈຶ່ງແກ້ແຄ້ນລາວຄືນໂດຍໃຫ້ລາວເຮັດວຽກຄືກັບທາດໃຫ້ເປັນຄົນໝູນເຄື່ອງໂມ້ຢູ່ໃນຄຸກ. ຕໍ່ມາ ພວກຟີລິດສະຕີນໄດ້ຈັດງານລ້ຽງເພື່ອມອບເຄື່ອງບູຊາບັກຫຼາຍໆໃຫ້ພະດາໂກນ ຍ້ອນເຂົາເຈົ້າເຊື່ອວ່າພະດາໂກນຊ່ວຍເຂົາເຈົ້າໃຫ້ຈັບແຊມຊັນໄດ້. ຈາກນັ້ນ ເຂົາເຈົ້າກໍເອົາແຊມຊັນອອກມາຈາກຄຸກ ແລ້ວ “ເຍາະເຍີ້ຍ” ລາວເພື່ອເຮັດໃຫ້ເຂົາເຈົ້າມ່ວນຊື່ນ.—ຜຕສ. 16:21-25
ພະເຢໂຫວາໃຫ້ກຳລັງແຊມຊັນເພື່ອຈັດການພວກຟີລິດສະຕີນ (ເບິ່ງຂໍ້ 15)
15. ແຊມຊັນສະແດງໃຫ້ເຫັນແນວໃດວ່າລາວໄວ້ວາງໃຈພະເຢໂຫວາໄດ້ອີກ? (ພວກຜູ້ຕັດສິນ 16:28-30) (ເບິ່ງຮູບໜ້າປົກ)
15 ເຖິງວ່າແຊມຊັນຈະເຮັດຜິດຮ້າຍແຮງ ແຕ່ລາວກໍບໍ່ຍອມແພ້. ລາວຍັງຊອກຫາໂອກາດເພື່ອເຮັດຕາມຄວາມຕ້ອງການຂອງພະເຢໂຫວາທີ່ຈະຈັດການກັບພວກຟີລິດສະຕີນ. (ອ່ານພວກຜູ້ຕັດສິນ 16:28-30) ລາວອ້ອນວອນພະເຢໂຫວາວ່າ “ໃຫ້ລູກໄດ້ແກ້ແຄ້ນພວກຟີລິດສະຕີນ.” ແລ້ວພະເຢໂຫວາກໍຕອບຄຳອະທິດຖານຂອງແຊມຊັນໂດຍໃຫ້ລາວມີກຳລັງທີ່ຫຼາຍກວ່າປົກກະຕິອີກເທື່ອໜຶ່ງ. ຜົນກໍຄື ແຊມຊັນສາມາດຈັດການກັບພວກຟີລິດສະຕີນໄດ້ຫຼາຍກວ່າທຸກເທື່ອທີ່ລາວເຄີຍເຮັດຜ່ານມາ.
16. ເຮົາໄດ້ຮຽນຫຍັງຈາກຄວາມຜິດພາດຂອງແຊມຊັນ?
16 ເຖິງວ່າແຊມຊັນຈະໄດ້ຮັບຜົນທີ່ບໍ່ດີຈາກຄວາມຜິດພາດຂອງລາວ ແຕ່ລາວກໍຍັງບໍ່ເຊົາເຮັດຕາມຄວາມຕ້ອງການຂອງພະເຢໂຫວາ. ຄ້າຍຄືກັນ ຖ້າເຮົາເຮັດຜິດພາດ ຖືກຕັກເຕືອນ ຫຼືສູນເສຍສິດທິພິເສດ ເຮົາຕ້ອງບໍ່ຍອມແພ້. ຂໍໃຫ້ຈື່ໄວ້ວ່າ ພະເຢໂຫວາພ້ອມຈະໃຫ້ອະໄພເຮົາ. (ເພງ. 103:8-10) ເຖິງວ່າເຮົາຈະເຮັດຜິດພາດ ແຕ່ພະເຢໂຫວາກໍຍັງໃຊ້ເຮົາຢູ່ຄືກັບທີ່ເພິ່ນເຄີຍໃຊ້ແຊມຊັນ.
ເຖິງວ່າແຊມຊັນອາດຈະຮູ້ສຶກເສຍໃຈທີ່ເຮັດຜິດພາດ ແຕ່ລາວກໍບໍ່ຍອມແພ້. ເຮົາກໍຕ້ອງບໍ່ຍອມແພ້ຄືກັນ (ເບິ່ງຂໍ້ 17-18)
17-18. ຕົວຢ່າງຂອງໄມເຄິນໃຫ້ກຳລັງໃຈເຮົາແນວໃດ? (ເບິ່ງຮູບ)
17 ໃຫ້ເຮົາມາເບິ່ງຕົວຢ່າງຂອງໄວລຸ້ນຄົນໜຶ່ງທີ່ຊື່ໄມເຄິນ. ລາວເປັນຜູ້ຊ່ວຍວຽກຮັບໃຊ້ແລະເປັນໄພໂອເນຍປະຈຳ. ລາວເຮັດວຽກຮັບໃຊ້ຫຼາຍຢ່າງ ແຕ່ເສຍດາຍທີ່ລາວເຮັດຜິດ ລາວຈຶ່ງສູນເສຍສິດທິພິເສດໃນປະຊາຄົມ. ໄມເຄິນບອກວ່າ: “ຕອນນັ້ນທຸກຢ່າງກຳລັງໄປໄດ້ດີ ແຕ່ມັນກໍພັງທະລາຍໄປໝົດ. ຂ້ອຍເຮັດຫຍັງບໍ່ໄດ້ອີກແລ້ວໃນວຽກຮັບໃຊ້. ເຖິງຂ້ອຍຮູ້ວ່າພະເຢໂຫວາຈະບໍ່ຖິ້ມຂ້ອຍ ແຕ່ຂ້ອຍກໍຍັງສົງໄສວ່າ ຂ້ອຍຈະກັບມາໃກ້ຊິດກັບພະເຢໂຫວາໄດ້ຄືເກົ່າບໍ? ແລະຂ້ອຍຈະຮັບໃຊ້ໄດ້ຫຼາຍຄືກັບທີ່ເຄີຍເຮັດບໍ?”
18 ເປັນຕາດີໃຈທີ່ໄມເຄິນບໍ່ຍອມແພ້. ລາວບອກວ່າ: “ຂ້ອຍໄດ້ພະຍາຍາມທີ່ຈະກັບມາໃກ້ຊິດກັບພະເຢໂຫວາອີກ. ຂ້ອຍອະທິດຖານລະບາຍຄວາມໃນໃຈກັບພະເຢໂຫວາເປັນປະຈຳ ສຶກສາສ່ວນຕົວ ແລະຄິດຕຶກຕອງ.” ຕໍ່ມາ ໄມເຄິນກໍໄດ້ຮັບສິດທິພິເສດໃນປະຊາຄົມອີກເທື່ອໜຶ່ງ. ຕອນນີ້ລາວຮັບໃຊ້ເປັນຜູ້ດູແລແລະເປັນໄພໂອເນຍປະຈຳ. ລາວເລົ່າອີກວ່າ: “ຂ້ອຍໄດ້ຮັບການຊ່ວຍເຫຼືອແລະໄດ້ກຳລັງໃຈຫຼາຍແທ້ໆໂດຍສະເພາະຈາກຜູ້ດູແລ. ເລື່ອງນີ້ເຮັດໃຫ້ຂ້ອຍຮູ້ວ່າພະເຢໂຫວາຍັງຮັກຂ້ອຍຢູ່. ຂ້ອຍກັບມາຮັບໃຊ້ໃນປະຊາຄົມອີກເທື່ອໜຶ່ງແລະບໍ່ມີຫຍັງມາລົບກວນໃຈຂ້ອຍອີກ. ປະສົບການນີ້ສອນຂ້ອຍວ່າ ພະເຢໂຫວາຈະໃຫ້ອະໄພທຸກຄົນທີ່ກັບໃຈແທ້ໆ.” ຄ້າຍຄືກັນ ເຖິງວ່າເຮົາຈະເຮັດຜິດ ແຕ່ຖ້າເຮົາພະຍາຍາມເຮັດທຸກສິ່ງທີ່ເຮັດໄດ້ເພື່ອປັບປຸງໂຕເອງແລະເພິ່ງພະເຢໂຫວາຢູ່ສະເໝີ ເຮົາກໍໝັ້ນໃຈໄດ້ເລີຍວ່າ ພະເຢໂຫວາຈະໃຊ້ເຮົາແລະອວຍພອນເຮົາແນ່ນອນໃນວຽກທີ່ເຮົາເຮັດ.—ເພງ. 86:5; ສຸພາ. 28:13
19. ເລື່ອງຂອງແຊມຊັນໃຫ້ກຳລັງໃຈເຈົ້າແນວໃດ?
19 ໃນບົດຄວາມນີ້ເຮົາໄດ້ຮຽນເຫດການບາງຢ່າງທີ່ໜ້າຕື່ນເຕັ້ນໃນຊີວິດຂອງແຊມຊັນ. ລາວເປັນຄົນບໍ່ສົມບູນແບບ ແຕ່ລາວກໍບໍ່ເຊົາຮັບໃຊ້ພະເຢໂຫວາ. ເຖິງວ່າລາວຈະເຮັດຜິດພາດເລື່ອງເດລີລາ ແຕ່ພະເຢໂຫວາບໍ່ໝົດຫວັງໃນໂຕລາວແລະຍັງໃຊ້ລາວເຮັດວຽກທີ່ສຳຄັນ. ພະເຢໂຫວາຍັງເຫັນວ່າລາວເປັນຄົນທີ່ມີຄວາມເຊື່ອຫຼາຍແທ້ໆແລະໃຫ້ຂຽນຊື່ຂອງລາວໄວ້ໃນລາຍຊື່ຂອງຄົນທີ່ສັດຊື່ໃນເຮັບເຣີບົດ 11. ເຮົາໄດ້ກຳລັງໃຈຫຼາຍແທ້ໆທີ່ຮູ້ວ່າ ເຮົາກຳລັງຮັບໃຊ້ພະເຢໂຫວາພະເຈົ້າທີ່ຮັກເຮົາແລະຢາກຊ່ວຍເຮົາໃຫ້ເຂັ້ມແຂງ ໂດຍສະເພາະຕອນທີ່ເຮົາເຈິກັບບັນຫາແລະຕ້ອງການຄວາມຊ່ວຍເຫຼືອຈາກເພິ່ນ. ໃຫ້ເຮົາເຮັດຄືກັບແຊມຊັນ ໃຫ້ເຮົາອ້ອນວອນພະເຢໂຫວາວ່າ “ຂໍພະອົງຈື່ລູກ. ຂໍໃຫ້ລູກມີເຫື່ອມີແຮງອີກ.”—ຜຕສ. 16:28
ເພງ 3 ເປັນກຳລັງ ຄວາມຫວັງ ແລະຄວາມໝັ້ນໃຈຂອງເຮົາ
a ແຊມຊັນເປັນຊື່ຂອງຄົນໃນຄຳພີໄບເບິນທີ່ຫຼາຍຄົນຮູ້ຈັກ ແມ່ນແຕ່ຄົນທີ່ບໍ່ຮູ້ຈັກຄຳພີໄບເບິນຫຼາຍກໍຮູ້ເລື່ອງຂອງລາວ. ເລື່ອງຂອງລາວຖືກເອົາມາເຮັດເປັນໜັງແລະຢູ່ໃນເນື້ອເພງ. ເລື່ອງຂອງລາວບໍ່ໄດ້ເປັນພຽງຕົວລະຄອນທີ່ເຮັດໃຫ້ມ່ວນຊື່ໆແຕ່ເຮົາຈະໄດ້ຮຽນຫຼາຍຢ່າງຈາກຜູ້ຊາຍຄົນນີ້ທີ່ມີຄວາມເຊື່ອເຂັ້ມແຂງ.
