ຄຳຖາມຈາກຜູ້ອ່ານ
ຄລິດສະຕຽນຄວນມີປືນ ເຊັ່ນ: ປືນສັ້ນຫຼືປືນຍາວເອົາໄວ້ປ້ອງກັນຕົວເມື່ອຖືກຄົນອື່ນທຳຮ້າຍບໍ?
ເມື່ອເວົ້າເຖິງການເລືອກວິທີປ້ອງກັນຕົວ ຄລິດສະຕຽນຈະເຮັດຕາມຫຼັກການໃນຄຳພີໄບເບິນ. ຫຼັກການເຫຼົ່ານີ້ສະແດງໃຫ້ເຫັນວ່າເປັນເລື່ອງຜິດຖ້າຈະໃຊ້ອາວຸດ ເຊັ່ນ: ປືນສັ້ນຫຼືປືນຊະນິດອື່ນໆເພື່ອປ້ອງກັນຕົວເມື່ອຖືກທຳຮ້າຍ ໃຫ້ເຮົາມາເບິ່ງຈຸດຕ່າງໆຕໍ່ໄປນີ້ທີ່ຈະຊ່ວຍໃຫ້ເຮົາຕັດສິນໃຈຢ່າງຖືກຕ້ອງ.
ພະເຢໂຫວາຖືວ່າຊີວິດມະນຸດສັກສິດ. ດາວິດຜູ້ຂຽນພະທຳຄຳເພງບອກວ່າ ພະເຢໂຫວາເປັນ “ບໍ່ເກີດແຫ່ງຊີວິດ.” (ຄຳເພງ 36:9, ລ.ມ.) ດັ່ງນັ້ນ ຖ້າຄລິດສະຕຽນຕັດສິນໃຈຈະປ້ອງກັນຕົວເອງຫຼືຊັບສິນ ເຂົາເຈົ້າຈະເຮັດທຸກຢ່າງທີ່ເຮັດໄດ້ເພື່ອຈະບໍ່ມີຄວາມຜິດຖານຂ້າຄົນເພາະເຮັດໃຫ້ໃຜຕ້ອງຕາຍ.—ພະບັນຍັດ 22:8; ຄຳເພງ 51:14
ທີ່ຈິງ ສິ່ງຂອງທຸກຢ່າງທີ່ຄົນເຮົາໃຊ້ເພື່ອປ້ອງກັນຕົວອາດເຮັດໃຫ້ຄົນອື່ນຕາຍໄດ້ ແຕ່ຖ້າເປັນປືນກໍມີໂອກາດເຮັດໃຫ້ຄົນອື່ນຕາຍໄດ້ງ່າຍກວ່າບໍ່ວ່າຍ້ອນຕັ້ງໃຈຫຼືອຸບັດຕິເຫດ. * (ເບິ່ງໄຂເງື່ອນ) ນອກຈາກນັ້ນ ຄົນທີ່ມາທຳຮ້າຍກໍຮູ້ສຶກຕຶງຄຽດຢູ່ແລ້ວ ເມື່ອຄົນນັ້ນເຫັນເຮົາຖືປືນ ສະຖານະການກໍແຮ່ງອັນຕະລາຍແລະອາດເຮັດໃຫ້ມີຄົນຕາຍໄດ້.
ໃນຄືນກ່ອນທີ່ພະເຍຊູຈະຕາຍເພິ່ນບອກໃຫ້ລູກສິດເອົາດາບໄປນຳ ແຕ່ບໍ່ແມ່ນເພື່ອໃຫ້ເຂົາເຈົ້າເອົາໄວ້ປ້ອງກັນຕົວ. (ລືກາ 22:36, 38) ແຕ່ພະເຍຊູຕ້ອງການສອນບົດຮຽນວ່າ ສາວົກຂອງເພິ່ນຕ້ອງບໍ່ໃຊ້ຄວາມຮຸນແຮງເຖິງວ່າຈະປະເຊີນໜ້າກັບຝູງຄົນທີ່ໃຊ້ອາວຸດ. (ລືກາ 22:52) ຕອນທີ່ເປໂຕຖອດດາບອອກມາທຳຮ້າຍຄົນຮັບໃຊ້ຄົນໜຶ່ງຂອງປະໂລຫິດ ພະເຍຊູສັ່ງເປໂຕວ່າ: “ຈົ່ງເອົາດາບຂອງທ່ານໃສ່ໄວ້ໃນຝັກ.” ຈາກນັ້ນ ພະເຍຊູກໍເວົ້າເຖິງຫຼັກການທີ່ຄລິດສະຕຽນທຸກມື້ນີ້ຕ້ອງນຳເອົາໄປໃຊ້ເຊັ່ນກັນທີ່ວ່າ: “ເພາະວ່າຄົນທັງປວງທີ່ຖືເອົາດາບຈະຈິບຫາຍດ້ວຍດາບ.”—ມັດທາຍ 26:51, 52
ມີເກ 4:3 ບອກລ່ວງໜ້າວ່າປະຊາຊົນຂອງພະເຈົ້າ ‘ຈະເອົາດາບຂອງເຂົາຕີເປັນໝາກສົບແລະເອົາຫອກຕີເປັນພ້າ.’ ຄລິດສະຕຽນແທ້ຮູ້ວ່າຕ້ອງຮັກສາສັນຕິສຸກ. ເຂົາເຈົ້າເຮັດຕາມຄຳສັ່ງຂອງພະເຈົ້າທີ່ໃຫ້ຜ່ານທາງອັກຄະສາວົກໂປໂລທີ່ວ່າ: “ຢ່າທຳຊົ່ວຕອບແທນຊົ່ວແກ່ຜູ້ໜຶ່ງຜູ້ໃດສັກເທື່ອ.” ແລະ “ຈົ່ງມີຄວາມສຸກສຳລານ [ສັນຕິສຸກ] ກັນກັບຄົນທັງປວງ.” (ໂລມ 12:17, 18) ເຖິງວ່າໂປໂລປະສົບກັບຄວາມລຳບາກແລະອັນຕະລາຍຈາກ “ໂຈນຜູ້ຮ້າຍ” ແຕ່ລາວກໍບໍ່ເຄີຍຝ່າຝືນຫຼັກການໃນຄຳພີໄບເບິນເພື່ອປ້ອງກັນຕົວ. (2 ໂກລິນໂທ 11:26, ລ.ມ.) ລາວວາງໃຈໃນພະເຢໂຫວາແລະຮູ້ວ່າຄຳແນະນຳທີ່ສຸຂຸມຂອງຄຳພີໄບເບິນນັ້ນ “ປະເສີດກວ່າເຄື່ອງອາວຸດທຳເສິກ.”—ຜູ້ເທສະໜາປ່າວປະກາດ 9:18
ສຳລັບຄລິດສະຕຽນແລ້ວ ຊີວິດມີຄ່າຫຼາຍກວ່າຊັບສົມບັດ. ເຮົາຮູ້ວ່າ: “ເຖິງຈະມີຊັບສົມບັດມາກມາຍ ແຕ່ມັນກໍຊື້ຊີວິດບໍ່ໄດ້.” (ລືກາ 12:15, ລ.ມ.) ດັ່ງນັ້ນ ຖ້າເວົ້າດີໆກັບໂຈນທີ່ມີປືນແຕ່ລາວຍັງບໍ່ຟັງ ໃຫ້ເຮັດຕາມຄຳແນະນຳຂອງພະເຍຊູທີ່ວ່າ: “ຢ່າຕໍ່ສູ້ກັບຄົນທີ່ເຮັດຊົ່ວກັບເຈົ້າ” ເຊິ່ງອາດໝາຍເຖິງໃຫ້ສິ່ງຂອງທີ່ລາວຕ້ອງການ. (ມັດທາຍ 5:39, 40, ລ.ມ.; ລືກາ 6:29) * (ເບິ່ງໄຂເງື່ອນ) ແນ່ນອນວ່າວິທີທີ່ດີທີ່ສຸດຄືການປ້ອງກັນບໍ່ໃຫ້ເກີດເຫດການ ນັ້ນຂຶ້ນ. ພວກໂຈນອາດບໍ່ຢາກປົ້ນເຮົາຖ້າເຮົາເຮັດຕາມຄຳແນະນຳໃນຄຳພີໄບເບິນໂດຍບໍ່ “ໂອ້ອວດຊັບສົມບັດ” (1 ໂຢຮັນ 2:16, ລ.ມ.) ແລະຖ້າຄົນອື່ນໆຮູ້ວ່າເຮົາເປັນພະຍານພະເຢໂຫວາທີ່ຮັກສັນຕິສຸກ ນັ້ນກໍເປັນການປ້ອງກັນຕົວເຮົາເຊັ່ນກັນ.—ສຸພາສິດ 18:10
ຄລິດສະຕຽນນັບຖືສະຕິຮູ້ສຶກຜິດຊອບຂອງຄົນອື່ນ. (ໂລມ 14:21) ພີ່ນ້ອງບາງຄົນອາດຈະຕົກໃຈຫຼືຮັບບໍ່ໄດ້ ຖ້າພີ່ນ້ອງຄົນໜຶ່ງມີປືນເພື່ອເອົາໄວ້ປ້ອງກັນຕົວ. ເຖິງວ່າເຮົາອາດມີສິດຕາມກົດໝາຍທີ່ຈະມີປືນໄດ້ ແຕ່ຖ້າເຮົາຮັກພີ່ນ້ອງ ເຮົາຈະບໍ່ເຮັດສິ່ງທີ່ຮູ້ວ່າພີ່ນ້ອງຈະຮັບບໍ່ໄດ້.—1 ໂກລິນໂທ 10:32, 33; 13:4, 5
ຄລິດສະຕຽນຢາກເປັນຕົວຢ່າງທີ່ດີໃຫ້ຄົນອື່ນ. (2 ໂກລິນໂທ 4:2; 1 ເປໂຕ 5:2, 3) ຖ້າຄລິດສະຕຽນຄົນໜຶ່ງມີປືນເພື່ອເອົາໄວ້ປ້ອງກັນຕົວເມື່ອຖືກທຳຮ້າຍ ຜູ້ເຖົ້າແກ່ຈະໃຫ້ຄຳແນະນຳຈາກຄຳພີໄບເບິນ. ຖ້າລາວຍັງຄິດຈະເກັບປືນໄວ້ ລາວຈະເປັນຕົວຢ່າງທີ່ບໍ່ດີ ເຊິ່ງຈະເຮັດໃຫ້ລາວບໍ່ສາມາດເຮັດໜ້າທີ່ມອບໝາຍຫຼືມີສິດທິພິເສດໃນປະຊາຄົມໄດ້. ຫຼັກການດຽວກັນນີ້ໃຊ້ກັບຄລິດສະຕຽນທີ່ເຮັດອາຊີບທີ່ຕ້ອງຈັບອາວຸດນຳອີກ ອາດຈະດີກວ່າຖ້າລາວຫາວຽກອື່ນເຮັດ. *—ເບິ່ງໄຂເງື່ອນ
ຄລິດສະຕຽນຕ້ອງຕັດສິນໃຈວ່າຈະປ້ອງກັນຕົວເອງ ຄອບຄົວ ແລະຊັບສິນແນວໃດ ລວມທັງເລື່ອງຈະເຮັດວຽກຫຍັງນຳ. ແຕ່ເມື່ອຕັດສິນໃຈໃນເລື່ອງນີ້ ຕ້ອງຄິດເຖິງຫຼັກການໃນຄຳພີໄບເບິນ. ຄລິດສະຕຽນທີ່ມີສາຍສຳພັນໃກ້ຊິດກັບພະເຢໂຫວາຮູ້ວ່າພະອົງເປັນພະເຈົ້າທີ່ສະຫຼາດສຸຂຸມທີ່ສຸດ ແລະພະອົງໃຫ້ຫຼັກການເຫຼົ່ານີ້ຍ້ອນຮັກພວກເຮົາ. ດ້ວຍເຫດນີ້ເຂົາເຈົ້າຈຶ່ງເລືອກທີ່ຈະບໍ່ມີປືນເພື່ອເອົາໄວ້ປ້ອງກັນຕົວເມື່ອຖືກຄົນອື່ນທຳຮ້າຍ. ເຂົາເຈົ້າຮູ້ວ່າຖ້າວາງໃຈໃນພະເຢໂຫວາແລະໃຊ້ຫຼັກການໃນຄຳພີໄບເບິນ ເຂົາເຈົ້າກໍຈະມີຄວາມປອດໄພແທ້ຕະຫຼອດໄປ.—ຄຳເພງ 97:10; ສຸພາສິດ 1:33; 2:6, 7
^ ຂໍ້ 3 ຄລິດສະຕຽນອາດຕັດສິນໃຈຊື້ປືນ (ປືນສັ້ນຫຼືປືນຍາວ) ເພື່ອເອົາໄວ້ລ່າສັດມາເປັນອາຫານຫຼືເພື່ອປ້ອງກັນຕົວຈາກສັດປ່າ ແຕ່ເມື່ອບໍ່ໄດ້ໃຊ້ກໍຄວນເອົາລູກປືນອອກຫຼືຖອດຊິ້ນສ່ວນຂອງປືນ ແລ້ວເກັບໄວ້ໃນບ່ອນທີ່ປອດໄພແລະລ໋ອກກະແຈ. ຖ້າໃນເຂດທີ່ມີກົດໝາຍຫ້າມບໍ່ໃຫ້ມີປືນໄວ້ໃນຄອບຄອງ ໃນບ່ອນທີ່ລັດຖະບານຈຳກັດຫຼືຄວບຄຸມການຄອບຄອງປືນ ຄລິດສະຕຽນກໍຄວນເຊື່ອຟັງກົດໝາຍນັ້ນ.—ໂລມ 13:1
^ ຂໍ້ 6 ເພື່ອຈະຮູ້ວິທີປ້ອງກັນຕົວບໍ່ໃຫ້ຖືກຂົ່ມຂືນ ຂໍໃຫ້ອ່ານບົດຄວາມ “ວິທີປ້ອງກັນຕົວບໍ່ໃຫ້ຖືກຂົ່ມຂືນ” ຕື່ນເຖີດ! 8 ມີນາ 1993 (ບໍ່ມີໃນພາສາລາວ)
^ ຂໍ້ 2 ສຳລັບຂໍ້ມູນເພີ່ມຕື່ມກ່ຽວກັບອາຊີບທີ່ຕ້ອງມີປືນເບິ່ງຫໍສັງເກດການ 1 ພະຈິກ 2005 ແລະ 15 ມັງກອນ 1984 ໜ້າ 24-26. (ບໍ່ມີໃນພາສາລາວ)