ພະອົງຈະຊ່ວຍໃຫ້ແຜນການທຸກຢ່າງຂອງເຈົ້າສຳເລັດ
“ຈົ່ງຫາຄວາມສະໜຸກຂອງເຈົ້າໃນພະເຢໂຫວາ ແລະພະອົງຈະໂຜດແກ່ເຈົ້າຕາມທີ່ໃຈເຈົ້າຂໍ.”—ຄຳເພງ 37:4
ເພງ: 135, 81
1. ຄົນໜຸ່ມສາວຕ້ອງຕັດສິນໃຈຫຍັງກ່ຽວກັບອະນາຄົດ ແລະສິ່ງໃດຈະຊ່ວຍເຂົາເຈົ້າບໍ່ໃຫ້ກັງວົນເກີນໄປ? (ເບິ່ງຮູບທຳອິດ)
ເຈົ້າທີ່ເປັນຄົນໜຸ່ມສາວອາດເຫັນດີນຳວ່າຖ້າຄິດຈະເດີນທາງ ເຈົ້າຕ້ອງວາງແຜນກ່ອນວ່າຈະໄປໃສ. ຊີວິດເຮົາກໍຄືກັບການເດີນທາງ ດັ່ງນັ້ນ ຕອນທີ່ເປັນໄວຮຸ່ນນີ້ແຫຼະເປັນເວລາທີ່ຈະຕ້ອງວາງແຜນຊີວິດ. ແນ່ນອນວ່າການວາງແຜນແບບນັ້ນອາດບໍ່ແມ່ນເລື່ອງງ່າຍ. ເຮເຕີ້ເຊິ່ງເປັນໄວຮຸ່ນບອກວ່າ: “ເປັນຕາກັງວົນແທ້ໆ ຕອນທີ່ຕ້ອງຕັດສິນໃຈວ່າຈະເຮັດແນວໃດກັບຊີວິດ.” ຖ້າເຈົ້າຮູ້ສຶກແບບນີ້ ຂໍໃຫ້ຈື່ຄຳເວົ້າຂອງພະເຢໂຫວາທີ່ວ່າ: “ຢ່າຊູ່ອຸກໃຈ ເຫດວ່າຝ່າຍເຮົາເຮົາເປັນພະເຈົ້າຂອງເຈົ້າ. ເຮົາຈະໃຫ້ເຈົ້າມີແຮງຂຶ້ນ. ຈິງຢູ່ເຮົາຈະຊ່ອຍເຈົ້າ.”—ເອຊາອີ 41:10
2. ເຈົ້າໝັ້ນໃຈໄດ້ແນວໃດວ່າພະເຢໂຫວາຢາກໃຫ້ເຈົ້າວາງແຜນອະນາຄົດໃຫ້ດີແລະມີຄວາມສຸກ?
2 ພະເຢໂຫວາຢາກໃຫ້ເຈົ້າວາງແຜນອະນາຄົດໃຫ້ດີ. (ຜູ້ເທສະໜາປ່າວປະກາດ 12:1; ມັດທາຍ 6:20) ພະອົງຢາກໃຫ້ເຈົ້າມີຄວາມສຸກ ເຈົ້າໝັ້ນໃຈໄດ້ເມື່ອເຈົ້າສັງເກດສິ່ງຕ່າງໆທີ່ພະອົງສ້າງ ກິນແນວແຊບໆ ແລະຟັງສຽງມ່ວນໆ. ພະເຢໂຫວາຍັງເບິ່ງແຍງເຮົາໃນທາງອື່ນໆອີກເຊັ່ນ: ໃຫ້ຄຳແນະນຳແລະສອນເຮົາເພື່ອຈະມີຊີວິດທີ່ດີທີ່ສຸດ. ພະອົງບໍ່ມັກຄົນທີ່ບໍ່ຍອມເຮັດຕາມຄຳແນະນຳ ພະອົງເວົ້າກັບຄົນພວກນີ້ວ່າ: ‘ພວກເຈົ້າໄດ້ເລືອກເອົາການທີ່ເຮົາບໍ່ຊອບໃຈ . . . ນີ້ແນະພວກຂ້າໃຊ້ຂອງເຮົາຈະຊົມຊື່ນຍິນດີແລະພວກເຈົ້າຈະລັກອາຍ. ນີ້ແນະພວກຂ້າໃຊ້ຂອງເຮົາຈະລຳເພງຍິນດີຍ້ອນຄວາມສຸກໃຈ.’ (ເອຊາອີ 65:12-14) ຖ້າເຮົາເລືອກໃຊ້ຊີວິດຢ່າງສະຫຼາດ ເຮົາກໍເຮັດໃຫ້ພະເຢໂຫວາໄດ້ຮັບຄຳສັນລະເສີນ.—ສຸພາສິດ 27:11
ແຜນການທີ່ຈະເຮັດໃຫ້ເຈົ້າມີຄວາມສຸກ
3. ພະເຢໂຫວາຢາກໃຫ້ເຈົ້າວາງແຜນຊີວິດແບບໃດ?
3 ພະເຢໂຫວາສະເໜີແຜນຊີວິດແບບໃດໃຫ້ເຈົ້າ? ເພື່ອຈະມີຄວາມສຸກ ເຈົ້າຕ້ອງຮູ້ຈັກພະເຢໂຫວາແລະຮັບໃຊ້ພະອົງ ເພາະພະອົງສ້າງມະນຸດມາໃຫ້ເປັນແບບນີ້. (ຄຳເພງ 128:1; ມັດທາຍ 5:3) ສັດມີພຽງແຕ່ກິນ ດື່ມ ແລະອອກແມ່ແພ່ລູກ. ແຕ່ພະອົງຢາກໃຫ້ເຈົ້າວາງແຜນຊີວິດໃນວິທີທີ່ມີຄວາມສຸກແລະມີຄວາມໝາຍ. ຜູ້ສ້າງເຈົ້າເປັນ “ພະເຈົ້າແຫ່ງຄວາມຮັກ” “ພະເຈົ້າຜູ້ມີຄວາມສຸກ” ຜູ້ສ້າງມະນຸດ “ຕາມຮູບຂອງພະອົງເອງ.” (2 ໂກລິນໂທ 13:11; 1 ຕີໂມເຕ 1:11; ຕົ້ນເດີມ 1:27) ເຈົ້າຈະມີຄວາມສຸກເມື່ອຮຽນແບບພະເຈົ້າແຫ່ງຄວາມຮັກ. ຄຳພີໄບເບິນບອກວ່າ: “ການປະທານໃຫ້ກໍເປັນເຫດໃຫ້ມີຄວາມສຸກຫຼາຍກວ່າການຮັບເອົາ.” (ກິດຈະການ 20:35) ເຈົ້າເຄີຍຮູ້ສຶກຄືກັບຂໍ້ຄຳພີນີ້ບໍ? ນີ້ເປັນຄວາມຈິງ ພະເຢໂຫວາຈຶ່ງຢາກໃຫ້ເຈົ້າວາງແຜນຊີວິດໂດຍເນັ້ນເລື່ອງການໃຫ້ຄວາມຮັກຕໍ່ຄົນອື່ນໆແລະຕໍ່ພະອົງ.—ອ່ານມັດທາຍ 22:36-39
ເຈົ້າຈະມີຄວາມສຸກເມື່ອເຈົ້າສະແດງຄວາມຮັກ
4, 5. ສິ່ງໃດທີ່ເຮັດໃຫ້ພະເຍຊູມີຄວາມສຸກ?
4 ພະເຍຊູຄລິດໄດ້ວາງຕົວຢ່າງທີ່ສົມບູນແບບໃຫ້ເຈົ້າທີ່ເປັນຄົນໜຸ່ມ. ຕອນຍັງນ້ອຍ ເພິ່ນອາດໄດ້ຫຼິ້ນແລະມີຄວາມມ່ວນຊື່ນຄືກັບທີ່ຄຳພີໄບເບິນບອກວ່າ: “ມີເວລາຫົວ” ແລະ “ມີເວລາເຕັ້ນຍິນດີ.” (ຜູ້ເທສະໜາປ່າວປະກາດ 3:4) ແຕ່ພະເຍຊູຍັງສຶກສາພະຄຳພີເພື່ອຈະສະໜິດກັບພະເຢໂຫວານຳ. ຕອນພະເຍຊູອາຍຸ 12 ປີ ພວກອາຈານໃນວິຫານຮູ້ສຶກປະຫຼາດໃຈໃນ ‘ສະຕິປັນຍາແລະຄຳຕອບຂອງເພິ່ນ.’—ລືກາ 2:42, 46, 47
5 ເມື່ອໃຫຍ່ຂຶ້ນ ພະເຍຊູມີຄວາມສຸກຫຼາຍທີ່ໄດ້ເຮັດໃນສິ່ງທີ່ພະເຈົ້າຢາກໃຫ້ເຮັດ. ຕົວຢ່າງເຊັ່ນ: ພະເຈົ້າຢາກໃຫ້ພະເຍຊູ “ປະກາດຂ່າວດີກັບຄົນຈົນ” ແລະ “ປະກາດແກ່ຄົນຕາບອດວ່າເຂົາຈະມອງເຫັນ.” (ລືກາ 4:18, ລ.ມ.) ຄຳເພງ 40:8 ບອກຄວາມຮູ້ສຶກຂອງພະເຍຊູວ່າ: “ພະເຈົ້າເຈົ້າຂ້າ ຂ້ານ້ອຍມີຄວາມສະໜຸກຈະກະທຳການຕາມທີ່ຊອບໃຈພະອົງ.” ພະເຍຊູມີຄວາມສຸກທີ່ໄດ້ສອນຜູ້ຄົນກ່ຽວກັບພໍ່ຂອງເພິ່ນ. (ອ່ານລືກາ 10:21) ຫຼັງຈາກລົມກັບຍິງຄົນໜຶ່ງເລື່ອງການນະມັດສະການແທ້ ພະເຍຊູບອກລູກສິດວ່າ: “ອາຫານຂອງເຮົາເປັນອັນທີ່ເຮົາກະທຳຕາມນໍ້າໃຈຂອງພະເຈົ້າທີ່ໄດ້ໃຊ້ເຮົາມາ ແລະໃຫ້ກິດຈະການຂອງພະເຈົ້າສຳເລັດແລ້ວ.” (ໂຢຮັນ 4:31-34) ພະເຍຊູມີຄວາມສຸກທີ່ໄດ້ສະແດງຄວາມຮັກຕໍ່ພະເຈົ້າແລະຄົນອື່ນໆ ຖ້າເຈົ້າເຮັດແບບນີ້ ເຈົ້າກໍຈະມີຄວາມສຸກຄືກັນ.
6. ເປັນຫຍັງຈຶ່ງດີທີ່ຈະລົມກັບພີ່ນ້ອງເລື່ອງແຜນຊີວິດຂອງເຈົ້າ?
6 ພີ່ນ້ອງຫຼາຍຄົນເປັນໄພໂອເນຍຕັ້ງແຕ່ອາຍຸຍັງນ້ອຍແລະເຂົາເຈົ້າມີຄວາມສຸກຫຼາຍ. ເຈົ້າລົມເລື່ອງແຜນການຂອງເຈົ້າກັບພີ່ນ້ອງເຫຼົ່ານັ້ນໄດ້ບໍ? ຄຳພີໄບເບິນບອກວ່າ: “ມີທີ່ປຶກສາຫຼາຍຄົນແຜນການກໍສຳເລັດ ໄຮ້ທີ່ປຶກສາແລ້ວແຜນການກໍຫຼົ້ມຈົມ.” (ສຸພາສິດ 15:22, ທ.ປ.) ເຂົາເຈົ້າອາດບອກເຈົ້າວ່າຖ້າເປັນໄພໂອເນຍ ນັ້ນກໍເປັນການສຶກສາທີ່ດີທີ່ສຸດຢ່າງໜຶ່ງທີ່ຈະຊ່ວຍເຈົ້າໄປຕະຫຼອດຊີວິດ. ພະເຍຊູຮຽນຫຼາຍສິ່ງຈາກພໍ່ຕອນຢູ່ເທິງສະຫວັນ ຕອນທີ່ຮັບໃຊ້ຢູ່ເທິງໂລກເພິ່ນກໍຍັງຮຽນຮູ້ຕໍ່ໆໄປ ເຊັ່ນ: ເພິ່ນໄດ້ຮຽນຮູ້ສິ່ງທີ່ເຮັດໃຫ້ມີຄວາມສຸກນັ້ນຄືການປະກາດກັບຄົນອື່ນໆແລະຮັກສາຄວາມສັດຊື່ເຖິງວ່າຈະຍາກລຳບາກ. (ອ່ານເອຊາອີ 50:4; ເຫບເລີ 5:8; 12:2) ໃຫ້ເຮົາມາເບິ່ງນຳກັນວ່າເປັນຫຍັງການຮັບໃຊ້ເຕັມເວລາຈຶ່ງເຮັດໃຫ້ມີຄວາມສຸກ.
ເປັນຫຍັງການສອນຄົນເຂົ້າມາເປັນລູກສິດຈຶ່ງເປັນວຽກທີ່ດີທີ່ສຸດ?
7. ເປັນຫຍັງພີ່ນ້ອງໄວຮຸ່ນຫຼາຍຄົນມັກການສອນຄົນໃຫ້ເຂົ້າມາເປັນລູກສິດ?
7 ພະເຍຊູບອກເຮົາໄປ ‘ກະທຳໃຫ້ [ຄົນ] ເປັນລູກສິດ.’ (ມັດທາຍ 28:19, 20) ຖ້າເຈົ້າວາງແຜນຈະເຮັດວຽກນີ້ເປັນວຽກຫຼັກ ເຈົ້າຈະມີຊີວິດທີ່ມີຄວາມສຸກທີ່ໄດ້ສັນລະເສີນພະເຈົ້າ ວຽກນີ້ຄືກັບວຽກທົ່ວໆໄປ ເຈົ້າຕ້ອງໃຊ້ເວລາເພື່ອຈະເກັ່ງ. ພີ່ນ້ອງທີໂມທີເປັນໄພໂອເນຍຕັ້ງແຕ່ຍັງເປັນໄວຮຸ່ນເລົ່າວ່າ: “ຂ້ອຍມັກຮັບໃຊ້ພະເຢໂຫວາແບບເຕັມເວລາເພາະເປັນວິທີທີ່ຂ້ອຍຈະສະແດງວ່າຂ້ອຍຮັກພະອົງ. ທຳອິດຂ້ອຍບໍ່ມີນັກສຶກສາເລີຍ ແຕ່ເມື່ອຍ້າຍໄປເຂດອື່ນບໍ່ເຖິງ 1 ເດືອນ ຂ້ອຍກໍໄດ້ສຶກສາກັບຫຼາຍຄົນແລະມີຄົນໜຶ່ງມາປະຊຸມ. ຈາກນັ້ນ ຂ້ອຍກໍເຂົ້າໂຮງຮຽນພະຄຳພີສຳລັບຊາຍໂສດ 2 ເດືອນແລ້ວກໍໄດ້ຮັບວຽກມອບໝາຍໃໝ່ ແລະມີນັກສຶກສາ 4 ຄົນ. ຂ້ອຍຮັກການສອນຜູ້ຄົນຫຼາຍເພາະຂ້ອຍເຫັນພະລັງບໍລິສຸດກຳລັງປ່ຽນແປງຊີວິດເຂົາເຈົ້າ.” * (ເບິ່ງໄຂເງື່ອນ)—1 ເທຊະໂລນີກ 2:19
8. ພີ່ນ້ອງໄວຮຸ່ນບາງຄົນໄດ້ເຮັດຫຍັງເພື່ອປະກາດກັບຜູ້ຄົນຫຼາຍຂຶ້ນ?
8 ພີ່ນ້ອງໄວຮຸ່ນບາງຄົນຮຽນພາສາຕ່າງປະເທດ ເຊັ່ນ: ເຈຄ໋ອບ ຈາກອາເມຣິກາເໜືອເລົ່າວ່າ: “ຕອນອາຍຸ 7 ປີ ໝູ່ໃນຫ້ອງຮຽນສ່ວນຫຼາຍເປັນຄົນຫວຽດນາມ. ຂ້ອຍຢາກເວົ້າເລື່ອງພະເຢໂຫວາກັບເຂົາເຈົ້າ ຂ້ອຍຈຶ່ງວາງແຜນຮຽນພາສາຫວຽດນາມ.” ສ່ວນຫຼາຍແລ້ວຂ້ອຍຮຽນໂດຍເອົາຫໍສັງເກດການ ພາສາອັງກິດແລະພາສາຫວຽດນາມມາທຽບກັນ ຂ້ອຍຫາໝູ່ໃນປະຊາຄົມພາສາຫວຽດນາມທີ່ຢູ່ໃກ້ໆ. ເມື່ອອາຍຸ 18 ປີ ຂ້ອຍກໍເລີ່ມເປັນໄພໂອເນຍ ແລ້ວເຂົ້າໂຮງຮຽນພະຄຳພີສຳລັບຊາຍໂສດ. ຕອນນີ້ຂ້ອຍເປັນທັງໄພໂອເນຍແລະຜູ້ເຖົ້າແກ່ຄົນດຽວໃນກຸ່ມພາສາຫວຽດນາມ. ຄົນຫວຽດນາມຫຼາຍຄົນປະຫຼາດໃຈທີ່ຂ້ອຍຮຽນພາສາຂອງເຂົາເຈົ້າ. ເຂົາເຈົ້າເຊີນຂ້ອຍເຂົ້າມາໃນເຮືອນ ແລະຂ້ອຍໄດ້ສຶກສາກັບຫຼາຍຄົນ ມີຫຼາຍຄົນກ້າວໜ້າຈົນຮັບບັບເຕມາ.”—ສົມທຽບກັບກິດຈະການ 2:7, 8
9. ວຽກສອນຄົນໃຫ້ເປັນລູກສິດສອນຫຍັງເຈົ້າແດ່?
9 ວຽກສອນຄົນເປັນລູກສິດສອນເຈົ້າໃຫ້ມີນິດໄສການເຮັດວຽກທີ່ດີ ມີທັກສະໃນການສື່ສານ ເປັນຄົນມີຄວາມໝັ້ນໃຈແລະມີໄຫວພິບ. (ສຸພາສິດ 21:5; 2 ຕີໂມເຕ 2:24) ບໍ່ພຽງເທົ່ານັ້ນ ວຽກນີ້ເຮັດໃຫ້ມີຄວາມສຸກ ເພາະເຈົ້າໄດ້ຮຽນວິທີໃຊ້ຂໍ້ພະຄຳພີອະທິບາຍຄວາມເຊື່ອຂອງເຈົ້າແລະວິທີທີ່ຈະເຮັດວຽກຢ່າງໃກ້ຊິດກັບພະເຢໂຫວາ.—1 ໂກລິນໂທ 3:9
10. ເຖິງວ່າຢູ່ໃນເຂດທີ່ຜູ້ຄົນບໍ່ຄ່ອຍສົນໃຈ ແຕ່ເຈົ້າຈະມີຄວາມສຸກໃນວຽກສອນຄົນໃຫ້ເປັນລູກສິດໄດ້ແນວໃດ?
10 ເຖິງວ່າເຂດປະກາດຂອງເຈົ້າມີໜ້ອຍຄົນທີ່ຢາກຮຽນຄຳພີໄບເບິນ ແຕ່ເຈົ້າກໍມີຄວາມສຸກໃນວຽກສອນຄົນໃຫ້ເປັນລູກສິດໄດ້. ການຊ່ວຍໃຜຈັກຄົນໃຫ້ເຂົ້າມາເປັນລູກສິດ ທັງປະຊາຄົມຕ້ອງຊ່ວຍກັນແລະເຮັດວຽກເປັນທີມ. ເຖິງວ່າພີ່ນ້ອງຄົນດຽວອາດຊ່ວຍຄົນໃດຄົນໜຶ່ງໃຫ້ເຂົ້າມາເປັນພະຍານພະເຢໂຫວາ ແຕ່ເຮົາທຸກຄົນກໍມີຄວາມສຸກເພາະໄດ້ຊ່ວຍກັນເຮັດວຽກນີ້. ຕົວຢ່າງ: ແບຣນດອນເປັນໄພໂອເນຍໃນເຂດທີ່ບໍ່ຄ່ອຍມີຄົນສົນໃຈມາໄດ້ 9 ປີແລ້ວ ລາວເລົ່າວ່າ: “ຂ້ອຍມັກວຽກປະກາດເພາະເປັນວຽກທີ່ພະເຈົ້າບອກໃຫ້ເຮົາເຮັດ. ຂ້ອຍເລີ່ມເປັນໄພໂອເນຍເມື່ອຮຽນຈົບມັດທະຍົມ. ຂ້ອຍມັກໃຫ້ກຳລັງໃຈພີ່ນ້ອງຊາຍໄວຮຸ່ນໃນປະຊາຄົມແລະເຫັນຄວາມກ້າວໜ້າຂອງເຂົາເຈົ້າ. ຫຼັງຈາກເຂົ້າໂຮງຮຽນພະຄຳພີສຳລັບຊາຍໂສດ ຂ້ອຍກໍໄດ້ຮັບວຽກມອບໝາຍໃໝ່. ເຖິງວ່າຂ້ອຍບໍ່ເຄີຍຊ່ວຍໃຜໃນເຂດໃຫ້ກ້າວໜ້າຈົນຮັບບັບເຕມາຄືກັບຄົນອື່ນ ແຕ່ຂ້ອຍກໍດີໃຈທີ່ໄດ້ວາງແຜນເພື່ອຈະມີສ່ວນຮ່ວມຢ່າງເຕັມທີໃນວຽກສອນຄົນໃຫ້ເປັນລູກສິດ.”—ຜູ້ເທສະໜາປ່າວປະກາດ 11:6
ແຜນຊີວິດຈະຊ່ວຍເຈົ້າໃຫ້ໄດ້ຮັບຫຍັງ
11. ພີ່ນ້ອງໄວຮຸ່ນຫຼາຍຄົນມີຄວາມສຸກກັບວຽກຮັບໃຊ້ພະເຢໂຫວາແບບໃດອີກ?
11 ມີວຽກຮັບໃຊ້ພະເຢໂຫວາຫຼາຍຢ່າງທີ່ເຮົາເຮັດໄດ້. ຕົວຢ່າງ: ພີ່ນ້ອງໄວຮຸ່ນຫຼາຍຄົນຊ່ວຍວຽກກໍ່ສ້າງ ເຊິ່ງມີຄວາມຈຳເປັນຕ້ອງສ້າງຫໍປະຊຸມອີກຫຼາຍຮ້ອຍຫຼັງ. ສະຖານທີ່ເຫຼົ່ານີ້ເຮັດໃຫ້ພະເຢໂຫວາໄດ້ຮັບຄຳສັນລະເສີນ ດັ່ງນັ້ນ ການຊ່ວຍໃນວຽກກໍ່ສ້າງຈະເຮັດໃຫ້ເຈົ້າມີຄວາມສຸກ. ນອກຈາກນັ້ນ ເຈົ້າຍັງຈະມີຄວາມສຸກທີ່ໄດ້ເຮັດວຽກກັບພີ່ນ້ອງຊາຍຍິງຫຼາຍຄົນ ແລະເຈົ້າສາມາດຮຽນຮູ້ຫຼາຍຢ່າງເຊັ່ນ: ຮູ້ວິທີເຮັດວຽກໃຫ້ປອດໄພແລະວິທີເຮັດວຽກຮ່ວມກັບຜູ້ດູແລຂອງເຈົ້າ.
12. ວຽກໄພໂອເນຍເປີດໂອກາດໃຫ້ໄດ້ຮັບໃຊ້ແບບອື່ນໆແນວໃດ?
12 ພີ່ນ້ອງຊາຍຊື່ເຄວິນບອກວ່າ: “ຕອນຍັງນ້ອຍຂ້ອຍຫວັງວ່າມື້ໜຶ່ງຈະໄດ້ມີໂອກາດຮັບໃຊ້ພະເຢໂຫວາເຕັມເວລາ. ເມື່ອອາຍຸ 19 ປີ ຂ້ອຍກໍເລີ່ມເປັນໄພໂອເນຍແລະເຮັດວຽກບໍ່ເຕັມເວລາກັບພີ່ນ້ອງຊາຍທີ່ຮັບເໝົາກໍ່ສ້າງເຊິ່ງເຮັດໃຫ້ຂ້ອຍໄດ້ຮຽນວິທີຕິດຕັ້ງຫຼັງຄາ ປ່ອງຢ້ຽມແລະປະຕູ. ຕໍ່ມາຂ້ອຍກໍເຮັດວຽກກັບທີມບັນເທົາທຸກຈາກພາຍຸເຮີຣິເຄນ 2 ປີ ແລະໄດ້ຊ່ວຍສ້ອມແປງຫໍປະຊຸມແລະເຮືອນຂອງພີ່ນ້ອງ. ເມື່ອຂ້ອຍໄດ້ຍິນວ່າມີໂຄງການກໍ່ສ້າງໃນອາຝຼິກກາໃຕ້ ຂ້ອຍເລີຍສະໝັກແລະໄດ້ໄປທີ່ນັ້ນ. ໃນອາຝຼິກກາ ຂ້ອຍຍ້າຍຈາກການກໍ່ສ້າງຫໍປະຊຸມຫຼັງໜຶ່ງແລ້ວໄປສ້າງຫຼັງອື່ນຕໍ່ໃນທຸກໆສອງສາມອາທິດ. ກຸ່ມກໍ່ສ້າງເປັນຄືກັບຄອບຄົວຂອງຂ້ອຍ ພວກເຮົາຢູ່ນຳກັນ ສຶກສາຄຳພີໄບເບິນນຳກັນ ແລະເຮັດວຽກນຳກັນ. ຂ້ອຍມີຄວາມສຸກທີ່ໄດ້ໄປປະກາດກັບພີ່ນ້ອງທ້ອງຖິ່ນໃນແຕ່ລະອາທິດ. ແຜນຊີວິດທີ່ຂ້ອຍໄດ້ເຮັດຕັ້ງແຕ່ຍັງນ້ອຍເຮັດໃຫ້ຂ້ອຍມີຄວາມສຸກໃນແບບທີ່ຂ້ອຍບໍ່ເຄີຍຄິດມາກ່ອນ.”
“ແຜນຊີວິດທີ່ຂ້ອຍໄດ້ເຮັດຕັ້ງແຕ່ຍັງນ້ອຍເຮັດໃຫ້ຂ້ອຍມີຄວາມສຸກໃນແບບທີ່ຂ້ອຍບໍ່ເຄີຍຄິດມາກ່ອນ”
13. ເປັນຫຍັງພີ່ນ້ອງໄວຮຸ່ນຫຼາຍຄົນມີຄວາມສຸກທີ່ໄດ້ຮັບໃຊ້ໃນເບເທນ?
13 ບາງຄົນເຄີຍຮັບໃຊ້ເປັນໄພໂອເນຍ ແຕ່ຕອນນີ້ຮັບໃຊ້ຢູ່ເບເທນ. ການຮັບໃຊ້ໃນເບເທນເປັນອີກວິທີໜຶ່ງທີ່ເຮັດໃຫ້ເຈົ້າມີຄວາມສຸກ ເພາະທຸກສິ່ງທີ່ເຈົ້າເຮັດຢູ່ທີ່ນັ້ນແມ່ນເຮັດເພື່ອພະເຢໂຫວາ. ຄອບຄົວເບເທນຊ່ວຍໃຫ້ມີຄຳພີໄບເບິນແລະໜັງສືຕ່າງໆທີ່ຊ່ວຍຜູ້ຄົນໄດ້ຮຽນຄວາມຈິງ. ດັດສະຕິນເຊິ່ງຮັບໃຊ້ໃນເບເທນເລົ່າວ່າ: “ຂ້ອຍຕັ້ງເປົ້າໝາຍຮັບໃຊ້ເຕັມເວລາຕັ້ງແຕ່ອາຍຸ 9 ປີ ແລະເມື່ອຮຽນຈົບ ຂ້ອຍກໍເລີ່ມເປັນໄພໂອເນຍ. ຫຼັງຈາກໜຶ່ງປີເຄິ່ງ ຂ້ອຍກໍຖືກເຊີນໃຫ້ມາຮັບໃຊ້ໃນເບເທນ ຂ້ອຍໄດ້ຮຽນຮູ້ວິທີໃຊ້ເຄື່ອງພິມແລະຕໍ່ມາກໍຮຽນວິທີຂຽນໂປຣແກຣມຄອມພິວເຕີ. ໃນເບເທນ ຂ້ອຍມີຄວາມສຸກຫຼາຍທີ່ໄດ້ຍິນກ່ອນຄົນອື່ນວ່າວຽກສອນຄົນທົ່ວໂລກກ້າວໜ້າແນວໃດ. ຂ້ອຍຮັກການຮັບໃຊ້ຢູ່ນີ້ ເພາະສິ່ງທີ່ເຮົາເຮັດແມ່ນຊ່ວຍຜູ້ຄົນໃຫ້ເຂົ້າມາໃກ້ຊິດກັບພະເຢໂຫວາ.”
ເຈົ້າຈະວາງແຜນອະນາຄົດຂອງເຈົ້າແນວໃດ?
14. ເຈົ້າຈະກຽມຕົວແນວໃດຕັ້ງແຕ່ຕອນນີ້ເພື່ອຈະຮັບໃຊ້ເຕັມເວລາ?
14 ເຈົ້າຈະກຽມຕົວແນວໃດເພື່ອຈະຮັບໃຊ້ເຕັມເວລາ? ເພື່ອຈະຮັບໃຊ້ພະເຢໂຫວາຢ່າງດີທີ່ສຸດ ເຈົ້າຕ້ອງມີຄຸນລັກສະນະທີ່ດີຂອງຄລິດສະຕຽນ. ດັ່ງນັ້ນ ໃຫ້ສຶກສາຄຳພີໄບເບິນເປັນປະຈຳ ຄິດຕຶກຕອງ ແລະພະຍາຍາມອອກຄວາມຄິດເຫັນໃນການປະຊຸມ. ໃນໄລຍະທີ່ເຈົ້າກຳລັງຮຽນຢູ່ ເຈົ້າສາມາດຝຶກເວົ້າເລື່ອງຄວາມຈິງກັບຄົນອື່ນໆ ຝຶກເປັນຄົນທີ່ສົນໃຈຄົນອື່ນໂດຍການຮູ້ຈັກໃຊ້ຄຳຖາມແລະຟັງເມື່ອເຂົາເຈົ້າຕອບ. ນອກຈາກນັ້ນ ເຈົ້າຍັງສາມາດສະເໜີຊ່ວຍວຽກປະຊາຄົມໄດ້ ເຊັ່ນ: ອະນາໄມແລະສ້ອມແປງຫໍປະຊຸມ. ພະເຢໂຫວາພໍໃຈທີ່ຈະໃຊ້ຄົນຖ່ອມຕົວແລະຄົນທີ່ເຕັມໃຈຊ່ວຍວຽກ. (ອ່ານຄຳເພງ 110:3; ກິດຈະການ 6:1-3) ອັກຄະສາວົກໂປໂລຊວນຕີໂມເຕມາຮັບໃຊ້ເປັນມິດຊັນນາລີຍ້ອນລາວ “ມີຊື່ສຽງອັນດີໃນພວກພີ່ນ້ອງ.”—ກິດຈະການ 16:1-5
ໃນໄລຍະທີ່ເຈົ້າກຳລັງຮຽນຢູ່ ເຈົ້າສາມາດຝຶກເວົ້າເລື່ອງຄວາມຈິງກັບຄົນອື່ນໆ
15. ເຈົ້າອາດເຮັດຫຍັງເພື່ອຈະມີວຽກທີ່ຈະຊ່ວຍເຈົ້າເປັນໄພໂອເນຍ?
15 ສ່ວນຫຼາຍຜູ້ຮັບໃຊ້ເຕັມເວລາຈຳເປັນຕ້ອງມີວຽກເຮັດ. (ກິດຈະການ 18:2, 3) ເຈົ້າອາດຮຽນວິຊາຊີບໃນໄລຍະສັ້ນເພື່ອຈະຊ່ວຍໃຫ້ໄດ້ວຽກບໍ່ເຕັມເວລາທີ່ເໝາະກັບເຂດຂອງເຈົ້າ. ໃຫ້ລົມກັບຜູ້ດູແລໝວດແລະໄພໂອເນຍຄົນອື່ນກ່ຽວກັບແຜນຊີວິດຂອງເຈົ້າ ແລະຂໍຄຳແນະນຳຈາກເຂົາເຈົ້າ. ຈາກນັ້ນ ກໍໃຫ້ເຮັດຄືກັບທີ່ຄຳພີໄບເບິນບອກໄວ້ວ່າ: “ບໍ່ວ່າເຈົ້າຈະເຮັດຫຍັງກໍໃຫ້ຝາກໄວ້ກັບພະເຢໂຫວາ ແລ້ວແຜນການຂອງເຈົ້າຈະສຳເລັດ”—ສຸພາສິດ 16:3, ລ.ມ.; 20:18
16. ການຮັບໃຊ້ເຕັມເວລາຊ່ວຍເຈົ້າໃຫ້ພ້ອມສຳລັບໜ້າທີ່ຮັບຜິດຊອບອື່ນໆໃນອະນາຄົດແນວໃດ?
16 ເຈົ້າໝັ້ນໃຈໄດ້ວ່າພະເຢໂຫວາຢາກໃຫ້ເຈົ້າ “ກຳເອົາ” ອະນາຄົດທີ່ມີຄວາມສຸກ. (ອ່ານ 1 ຕີໂມເຕ 6:18, 19) ການຮັບໃຊ້ເຕັມເວລາຈະເຮັດໃຫ້ເຈົ້າມີໂອກາດເຮັດວຽກຮ່ວມກັບຜູ້ຮັບໃຊ້ເຕັມເວລາຄົນອື່ນໆ ແລະຊ່ວຍເຈົ້າໃຫ້ເປັນຄລິດສະຕຽນທີ່ມີຄວາມເປັນຜູ້ໃຫຍ່. ນອກຈາກນັ້ນ ຫຼາຍຄົນພົບວ່າການຮັບໃຊ້ເຕັມເວລາຕັ້ງແຕ່ຍັງນ້ອຍຍັງຊ່ວຍເຂົາເຈົ້າໃຫ້ມີຊີວິດຄູ່ທີ່ປະສົບຜົນສຳເລັດ. ສ່ວນຫຼາຍ ພີ່ນ້ອງທີ່ເຄີຍເປັນໄພໂອເນຍກ່ອນແຕ່ງດອງກໍຈະສືບຕໍ່ເປັນໄພໂອເນຍນຳກັນ.—ໂລມ 16:3, 4
17, 18. ການວາງແຜນກ່ຽວຂ້ອງແນວໃດກັບຫົວໃຈຂອງເຈົ້າ?
17 ຄຳເພງ 20:4 (ທ.ປ.) ເວົ້າເຖິງພະເຢໂຫວາວ່າ: ‘ຂໍພະອົງໂຜດໃຫ້ຕາມທີ່ເຈົ້າປາດຖະໜາແລະນຳພາແຜນການທຸກຢ່າງຂອງເຈົ້າໃຫ້ສຳເລັດ’ ເມື່ອວາງແຜນເລື່ອງອະນາຄົດ ຂໍໃຫ້ຄິດເບິ່ງວ່າແທ້ໆແລ້ວໃຈເຈົ້າຢາກເຮັດຫຍັງ ຄິດວ່າພະເຢໂຫວາກຳລັງເຮັດຫຍັງໃນສະໄໝຂອງເຮົາ ແລະເຈົ້າຈະເຮັດຫຍັງໄດ້ແດ່ເພື່ອສະໜັບສະໜູນວຽກຂອງພະອົງ ແລ້ວກໍວາງແຜນເຮັດໃນສິ່ງທີ່ພະອົງພໍໃຈ.
18 ເມື່ອເຈົ້າໃຊ້ຊີວິດເພື່ອຮັບໃຊ້ພະເຢໂຫວາຢ່າງເຕັມທີແລະສັນລະເສີນພະອົງເຈົ້າຈະມີຄວາມສຸກຫຼາຍ. ເຈົ້າຈະພົບ ‘ຄວາມສະໜຸກໃນພະເຢໂຫວາ ແລະພະອົງຈະໂຜດແກ່ເຈົ້າຕາມທີ່ໃຈເຈົ້າຂໍ.’—ຄຳເພງ 37:4
^ ຂໍ້ 7 ໂຮງຮຽນນີ້ໄດ້ປ່ຽນມາເປັນໂຮງຮຽນຜູ້ປະກາດລາຊະອານາຈັກ.
ເລື່ອງທີ່ເຈົ້າອາດຈະມັກ
ໝູ່ຂອງເຈົ້າຄິດແນວໃດ
ຊີວິດທີ່ດີທີ່ສຸດເທົ່າທີ່ຈະມີໄດ້
ເຈົ້າຢາກໃຊ້ຊີວິດໃຫ້ຄຸ້ມຄ່າບໍ? ລອງຟັງຄາມາຣອນເລົ່າວ່າລາວມີຊີວິດທີ່ມີຄວາມສຸກໃນບ່ອນທີ່ບໍ່ຄາດຄິດໄດ້ແນວໃດ.
