ພະເຢໂຫວາໃຫ້ກຳລັງໃຈເຮົາທຸກຄັ້ງທີ່ມີຄວາມຍາກລຳບາກ
“ພະເຈົ້າທີ່ຄອຍໃຫ້ກຳລັງໃຈໃນທຸກສະຖານະການ . . . ໃຫ້ກຳລັງໃຈເຮົາທຸກຄັ້ງທີ່ປະສົບຄວາມຍາກລຳບາກ.”—2 ໂກລິນໂທ 1:3, 4, ລ.ມ.
ເພງ: 33, 41
1, 2. ເມື່ອປະສົບກັບຄວາມຍາກລຳບາກ ພະເຢໂຫວາໃຫ້ກຳລັງໃຈເຮົາແນວໃດ ແລະພະອົງສັນຍາໃນເລື່ອງໃດ?
ພີ່ນ້ອງຊາຍໂສດຄົນໜຶ່ງຄິດເຖິງຄຳເວົ້າໃນ 1 ໂກລິນໂທ 7:28 ທີ່ບອກວ່າຄົນທີ່ແຕ່ງດອງ “ຈະມີຄວາມຍາກລຳບາກໃນເນື້ອໜັງ” ເຊິ່ງກໍຄືຄວາມຫຍຸ້ງຍາກໃນຊີວິດ. ພີ່ນ້ອງຄົນນີ້ຖາມຜູ້ເຖົ້າແກ່ສູງອາຍຸທີ່ແຕ່ງດອງແລ້ວວ່າ: “‘ຄວາມຍາກລຳບາກ’ ຕາມທີ່ເວົ້າໃນຂໍ້ນີ້ແມ່ນຫຍັງ ແລະຂ້ອຍຈະຮັບມືໄດ້ແນວໃດຖ້າແຕ່ງດອງ?” ກ່ອນທີ່ຈະຕອບ ຜູ້ເຖົ້າແກ່ໄດ້ຊີ້ເຖິງຄຳເວົ້າຂອງໂປໂລທີ່ກ່າວເຖິງພະເຢໂຫວາວ່າເປັນ “ພະເຈົ້າທີ່ຄອຍໃຫ້ກຳລັງໃຈໃນທຸກສະຖານະການ ພະອົງໃຫ້ກຳລັງໃຈເຮົາທຸກຄັ້ງທີ່ປະສົບຄວາມຍາກລຳບາກ.”—2 ໂກລິນໂທ 1:3, 4, ລ.ມ.
2 ເຮົາຮູ້ວ່າພະເຢໂຫວາເປັນພໍ່ທີ່ຮັກເຮົາແລະໃຫ້ກຳລັງໃຈເມື່ອເຮົາປະສົບກັບຄວາມຫຍຸ້ງຍາກ. ເຈົ້າອາດຈື່ຕອນທີ່ພະເຢໂຫວາໃຫ້ກຳລັງໃຈແລະຊີ້ນຳເຈົ້າໂດຍທາງຄຳພີໄບເບິນ. ດັ່ງນັ້ນ ເຮົາຈຶ່ງໝັ້ນໃຈວ່າພະອົງຢາກໃຫ້ເຮົາໄດ້ຮັບສິ່ງທີ່ດີທີ່ສຸດ ຄືກັບທີ່ຜູ້ຮັບໃຊ້ຂອງພະອົງໃນສະໄໝກ່ອນໄດ້ຮັບ.—ອ່ານເຢເຣມີ 29:11, 12
3. ເຮົາຈະຕອບຄຳຖາມຫຍັງໃນບົດນີ້?
3 ຖ້າເຮົາຮູ້ສາເຫດຂອງບັນຫາ ເຮົາຈະອົດທົນກັບບັນຫາແລະຄວາມຍາກລຳບາກໄດ້ງ່າຍກວ່າ. ບົດນີ້ເຮົາຈະຮຽນຮູ້ວ່າ ເປັນຫຍັງເຮົາອາດມີຄວາມຍາກລຳບາກໃນຊີວິດຄູ່ຫຼືໃນຄອບຄົວ? ໃນສະໄໝທີ່ຂຽນຄຳພີໄບເບິນແລະສະໄໝຂອງເຮົາມີຕົວຢ່າງຫຍັງແດ່ທີ່ຊ່ວຍເຮົາໃຫ້ໄດ້ຮັບກຳລັງໃຈ? ເມື່ອເຮົາໄດ້ຄຳຕອບຂອງຄຳຖາມເຫຼົ່ານີ້ເຮົາກໍຈະອົດທົນກັບຄວາມຍາກລຳບາກໄດ້.
ຄວາມຍາກລຳບາກໃນຊີວິດຄູ່
4, 5. ຜົວແລະເມຍອາດປະສົບກັບຄວາມຍາກລຳບາກຫຍັງແດ່?
4 ຫຼັງຈາກພະເຢໂຫວາສ້າງຜູ້ຊາຍຄົນທຳອິດແລ້ວ ພະອົງກໍສ້າງຜູ້ຍິງ ແລະໄດ້ໃຫ້ເປັນເມຍຂອງລາວ. ຈາກນັ້ນພະເຢໂຫວາບອກວ່າ: “ຜູ້ຊາຍຈະລາພໍ່ແມ່ແຫ່ງຕົນແລະຈະຕິດພັນຢູ່ກັບເມຍແຫ່ງຕົນແລະເຂົາທັງສອງຈະເປັນເນື້ອໜັງອັນດຽວກັນ.” (ຕົ້ນເດີມ 2:24) ແນ່ນອນ ເຮົາທຸກຄົນບໍ່ສົມບູນແບບ. (ໂລມ 3:23) ຍ້ອນແນວນີ້ ເມື່ອຊາຍຍິງແຕ່ງດອງກັນ ເຂົາເຈົ້າຄາດຫວັງໄດ້ວ່າຈະມີບັນຫາຕ່າງໆໃນຊີວິດ ເຊັ່ນ: ຕອນທີ່ຍັງເປັນໂສດຜູ້ຍິງມີພໍ່ແມ່ເປັນຜູ້ນຳ. ແຕ່ພະຄຳຂອງພະເຢໂຫວາບອກວ່າຫຼັງຈາກແຕ່ງດອງແລ້ວ ຜົວຈະເປັນຜູ້ນຳຂອງເມຍ. (1 ໂກລິນໂທ 11:3) ທຳອິດ ຜູ້ເປັນຜົວອາດຮູ້ສຶກວ່າຍາກທີ່ຈະແນະນຳເມຍໃນບາງເລື່ອງ ແລະເມຍອາດຮູ້ສຶກວ່າຍາກທີ່ຈະຍອມຮັບການຊີ້ນຳຂອງຜົວແທນທີ່ຈະເປັນພໍ່ແມ່. ເມື່ອຫາກໍແຕ່ງດອງກັນໃໝ່ໆຄວາມຍາກລຳບາກອາດລວມເຖິງຜົວແລະເມຍອາດບໍ່ເຫັນດີນຳກັນເລື່ອງຍາດພີ່ນ້ອງຂອງແຕ່ລະຝ່າຍ.
5 ຈະວ່າແນວໃດ ຖ້າຜົວແລະເມຍຮູ້ວ່າກຳລັງຈະມີລູກ. ເຖິງວ່າເຂົາເຈົ້າຈະດີໃຈຫຼາຍ ແຕ່ກໍຍັງມີເລື່ອງທີ່ກັງວົນນຳອີກ ເຊັ່ນວ່າ ການຖືພາຈະຜ່ານໄປໄດ້ດີບໍ ແລະລູກໃນທ້ອງຈະແຂງແຮງດີບໍ. ເຂົາເຈົ້າຍັງຮູ້ວ່າຈະມີລາຍຈ່າຍເພີ່ມຂຶ້ນ. ເມື່ອລູກເກີດມາແລ້ວທັງຜົວແລະເມຍຕ້ອງໄດ້ປັບປ່ຽນຫຼາຍຢ່າງ ເຂົາເຈົ້າອາດຈະບໍ່ໄດ້ເອົາໃຈໃສ່ກັນແລະກັນຫຼາຍຄືແຕ່ກ່ອນ. ຍ້ອນວ່າຜູ້ເປັນເມຍອາດຕ້ອງໄດ້ເບິ່ງແຍງລູກນ້ອຍເກືອບຕະຫຼອດເວລາ. ສ່ວນຜູ້ເປັນຜົວກໍມີໜ້າທີ່ຮັບຜິດຊອບຫຼາຍຂຶ້ນໃນການຈັດຫາສິ່ງຈຳເປັນໃຫ້ເມຍແລະລູກ.
6-8. ຜົວເມຍອາດຮູ້ສຶກແນວໃດຖ້າເຂົາເຈົ້າມີລູກບໍ່ໄດ້?
6 ຜົວເມຍບາງຄູ່ມີຄວາມຍາກລຳບາກອີກແບບໜຶ່ງ. ເຂົາເຈົ້າຢາກມີລູກແທ້ໆແຕ່ກໍມີບໍ່ໄດ້. ເມື່ອຜູ້ເປັນເມຍບໍ່ສາມາດຖືພາໄດ້ ລາວອາດຮູ້ສຶກເຈັບປວດຫຼາຍ. (ສຸພາສິດ 13:12) ໃນສະໄໝທີ່ຂຽນຄຳພີໄບເບິນ ການແຕ່ງດອງແລະການມີລູກເປັນເລື່ອງສຳຄັນຫຼາຍສຳລັບຜູ້ຍິງ. ດັ່ງນັ້ນ ລາເຊນເມຍຂອງຢາໂຄບຈຶ່ງຮູ້ສຶກເສຍໃຈຫຼາຍທີ່ບໍ່ສາມາດມີລູກໄດ້ຄືກັບເອື້ອຍຂອງລາວ. (ຕົ້ນເດີມ 30:1, 2) ໃນສະໄໝນີ້ມີບາງປະເທດ ຫຼາຍຄົນເຊື່ອວ່າການມີລູກເປັນເລື່ອງສຳຄັນ. ຫຼາຍຄົນມັກຖາມມິດຊັນນາລີທີ່ອາໄສຢູ່ຕ່າງປະເທດວ່າເປັນຫຍັງເຂົາເຈົ້າຄືບໍ່ເອົາລູກ. ເຖິງວ່າໄດ້ອະທິບາຍເຫດຜົນຢ່າງຈະແຈ້ງແລ້ວ ແຕ່ບາງຄົນກໍຍັງບອກວ່າ “ພວກເຮົາຈະອະທິດຖານເພື່ອໃຫ້ພວກເຈົ້າໄດ້ລູກເດີ້!”
7 ພີ່ນ້ອງຍິງໃນປະເທດອັງກິດຢາກມີລູກແທ້ໆ. ເມື່ອລາວຮູ້ວ່າບໍ່ສາມາດມີລູກໄດ້ໃນຕອນນີ້ ລາວຈຶ່ງຈົມຢູ່ໃນຄວາມທຸກ. ຈາກນັ້ນລາວແລະຜົວກໍຕັດສິນໃຈຮັບເອົາເດັກນ້ອຍຄົນໜຶ່ງມາລ້ຽງເປັນລູກ. ແຕ່ລາວຍັງຮູ້ສຶກໂສກເສົ້າເປັນບາງເທື່ອ. ລາວເລົ່າວ່າ: “ເຖິງວ່າຂ້ອຍຈະມີລູກລ້ຽງ ແຕ່ຄວາມຮູ້ສຶກກໍບໍ່ຄືກັບການລ້ຽງລູກແທ້ໆຂອງຕົວເອງ.”
8 ຄຳພີໄບເບິນບອກວ່າ ຜູ້ຍິງ “ຈະຢູ່ລອດປອດໄພດ້ວຍການມີລູກ.” (1 ຕີໂມເຕ 2:15, ລ.ມ.) ແຕ່ນີ້ບໍ່ໄດ້ໝາຍຄວາມວ່າລາວຈະໄດ້ຮັບຊີວິດຕະຫຼອດໄປ ຍ້ອນລາວມີລູກ. ສະນັ້ນຂໍ້ນີ້ໝາຍຄວາມວ່າແນວໃດ? ໝາຍຄວາມວ່າເມື່ອມີລູກແມ່ກໍຈະຫຍຸ້ງຢູ່ກັບການເອົາໃຈໃສ່ລູກແລະເບິ່ງແຍງເຮືອນຊານ. ຍ້ອນແນວນີ້ລາວຈຶ່ງບໍ່ມີເວລາທີ່ຈະໄປເຮັດສິ່ງທີ່ບໍ່ດີ ເຊັ່ນ: ການນິນທາຫຼືເຂົ້າໄປຫຍຸ້ງກ່ຽວເລື່ອງຂອງຄົນອື່ນ. (1 ຕີໂມເຕ 5:13) ແຕ່ລາວກໍອາດຍັງມີບັນຫາອື່ນໆໃນຊີວິດຄູ່ແລະຄອບຄົວ.
ພະເຢໂຫວາໄດ້ເຮັດຄຳສັນຍາຫຼາຍເລື່ອງເຊິ່ງໃຫ້ກຳລັງໃຈເຮົາໃນຂະນະທີ່ມີຄວາມຫຍຸ້ງຍາກ
9. ຄົນທີ່ແຕ່ງດອງແລ້ວອາດປະສົບກັບຄວາມຍາກລຳບາກຫຍັງອີກ?
9 ການສູນເສຍຄູ່ຊີວິດເປັນຄວາມຍາກລຳບາກຢ່າງໜຶ່ງທີ່ຜົວເມຍບາງຄູ່ປະສົບ. ເຖິງແມ່ນເຂົາເຈົ້າອາດບໍ່ຄາດຄິດວ່າເລື່ອງແບບນີ້ຈະເກີດຂຶ້ນກັບຕົວເອງ ແຕ່ຫຼາຍຄົນກໍຕ້ອງປະສົບກັບສະພາບການທີ່ຍາກລຳບາກນີ້. ຄລິດສະຕຽນເຊື່ອໝັ້ນໃນຄຳສັນຍາເລື່ອງການຟື້ນຂຶ້ນມາຈາກຕາຍ ແລະເລື່ອງນີ້ໃຫ້ກຳລັງໃຈເຂົາເຈົ້າຫຼາຍ. (ໂຢຮັນ 5:28, 29) ໃນຄຳພີໄບເບິນ ພະເຢໂຫວາພໍ່ຂອງເຮົາໄດ້ເຮັດຄຳສັນຍາຫຼາຍເລື່ອງເຊິ່ງໃຫ້ກຳລັງໃຈເຮົາໃນຂະນະທີ່ມີຄວາມຫຍຸ້ງຍາກ. ຕອນນີ້ໃຫ້ເຮົາມາເບິ່ງວ່າຜູ້ຮັບໃຊ້ບາງຄົນຂອງພະເຢໂຫວາໄດ້ຮັບກຳລັງໃຈແນວໃດ ແລະສິ່ງນີ້ໄດ້ຊ່ວຍເຂົາເຈົ້າແນວໃດ.
ຖ້າເຈົ້າສູນເສຍຄູ່ຊີວິດ ເຈົ້າຈະໄດ້ກຳລັງໃຈແນວໃດ? (ເບິ່ງຂໍ້ 9, 12)
ໄດ້ຮັບກຳລັງໃຈເມື່ອມີຄວາມຍາກລຳບາກ
10. ອານາໄດ້ຮັບກຳລັງໃຈແນວໃດ? (ເບິ່ງຮູບທຳອິດ)
10 ໃຫ້ຄິດເຖິງຕົວຢ່າງຂອງອານາ ເຊິ່ງເປັນເມຍທີ່ຮັກຂອງເອນການາ. ອານາຢາກມີລູກແຕ່ລາວເປັນໝັນ. ຜົວຂອງລາວມີເມຍອີກຄົນໜຶ່ງຊື່ ເປນີນາ ແລະລາວພັດມີລູກຫຼາຍຄົນ. (ອ່ານ 1 ຊາເມືອນ 1:4-7) ເນື່ອງຈາກອານາບໍ່ມີລູກ ເປນີນາຈຶ່ງເຍາະເຍີ້ຍລາວ ‘ທຸກໆປີ’ ແລະຍ້ອນແນວນີ້ລາວຈຶ່ງຮູ້ສຶກເຈັບປວດຫຼາຍຕື່ມອີກ. ອານາເຮັດແນວໃດເພື່ອຈະໄດ້ຮັບກຳລັງໃຈ? ລາວອະທິດຖານເຖິງພະເຢໂຫວາ ແລະເຖິງຂັ້ນໄປບ່ອນນະມັດສະການພະອົງແລະອະທິດຖານຢູ່ທີ່ນັ້ນເປັນເວລາດົນ. ລາວຂໍລູກຊາຍຄົນໜຶ່ງກັບພະເຢໂຫວາ ແລະໝັ້ນໃຈວ່າພະອົງຈະຊ່ວຍລາວ. ຫຼັງຈາກອະທິດຖານຈົບ ລາວກໍຮູ້ສຶກດີຂຶ້ນຫຼາຍແລະ “ມີໜ້າຊື່ນບານ.” (1 ຊາເມືອນ 1:12, 17, 18) ລາວຮູ້ວ່າພະເຢໂຫວາຈະຊ່ວຍໃຫ້ລາວມີລູກ ຫຼືບໍ່ກໍຈະໃຫ້ກຳລັງໃຈລາວໃນວິທີອື່ນ.
11. ເຮົາຕ້ອງອະທິດຖານແນວໃດຈຶ່ງຈະໄດ້ກຳລັງໃຈ?
11 ເນື່ອງຈາກເຮົາບໍ່ສົມບູນແບບແລະມີຊີວິດໃນໂລກທີ່ຊາຕານປົກຄອງ ເຮົາຍັງຈະມີຄວາມລຳບາກຕໍ່ໆໄປ. (1 ໂຢຮັນ 5:19) ແຕ່ດີແທ້ໆທີ່ເຮົາມີພະເຢໂຫວາ “ພະເຈົ້າທີ່ຄອຍໃຫ້ກຳລັງໃຈໃນທຸກສະຖານະການ.” ວິທີໜຶ່ງທີ່ເຮົາຈະໄດ້ຮັບການຊ່ວຍເຫຼືອກໍໂດຍທາງການອະທິດຖານ. ອານາໄດ້ບອກຄວາມຮູ້ສຶກແທ້ໆຂອງລາວກັບພະເຢໂຫວາແລະອ້ອນວອນໃຫ້ພະອົງຊ່ວຍ. ຄ້າຍຄືກັນ ເມື່ອເຮົາປະສົບກັບຄວາມທຸກລຳບາກ ເຮົາບໍ່ພຽງແຕ່ກ່າວເຖິງບັນຫາຂອງເຮົາໃຫ້ພະເຢໂຫວາຮັບຮູ້ ແຕ່ເຮົາຕ້ອງອ້ອນວອນຂໍໃຫ້ພະອົງຊ່ວຍແລະຕ້ອງລະບາຍຄວາມຮູ້ສຶກແທ້ໆຂອງເຮົາອອກມາ.—ຟີລິບ 4:6, 7, ລ.ມ.
12. ສິ່ງໃດຊ່ວຍອານາໃຫ້ມີຄວາມສຸກເຖິງວ່າປະສົບກັບຄວາມຍາກລຳບາກ?
12 ເຮົາອາດຮູ້ສຶກເສຍໃຈຫຼາຍຍ້ອນວ່າບໍ່ມີລູກຫຼືຍ້ອນຄົນທີ່ເຮົາຮັກເສຍຊີວິດ. ແຕ່ເຮົາຍັງພົບກຳລັງໃຈໄດ້. ໃຫ້ເບິ່ງເລື່ອງຂອງອານາທີ່ມີຊີວິດໃນສະໄໝພະເຍຊູ. ຫຼັງຈາກລາວແຕ່ງດອງໄດ້ພຽງແຕ່ 7 ປີ ຜົວກໍຕາຍ ແລະເບິ່ງຄືວ່າລາວບໍ່ມີລູກຈັກຄົນ. ສິ່ງໃດທີ່ຊ່ວຍລາວໃຫ້ມີກຳລັງໃຈ? ຄຳພີໄບເບິນບອກວ່າ: “ລາວມາທີ່ວິຫານບໍ່ເຄີຍຂາດ.” ເຖິງວ່າອາຍຸ 84 ປີແລ້ວ ແຕ່ລາວກໍຍັງໄປວິຫານເພື່ອອະທິດຖານແລະນະມັດສະການພະເຢໂຫວາ. (ລືກາ 2:37) ການເຮັດເຊັ່ນນັ້ນຊ່ວຍລາວໃຫ້ມີກຳລັງໃຈແລະມີຄວາມສຸກເຖິງວ່າຈະປະສົບກັບຄວາມຍາກລຳບາກ.
13. ຖ້າຍາດພີ່ນ້ອງເຮັດໃຫ້ເຮົາຜິດຫວັງ ເພື່ອນແທ້ຊ່ວຍໃຫ້ກຳລັງໃຈເຮົາແນວໃດ?
13 ເຮົາຍັງໄດ້ຮັບກຳລັງໃຈຈາກການຄົບຫາກັບເພື່ອນແທ້ໃນປະຊາຄົມ. (ສຸພາສິດ 18:24) ພໍລ້າອາຍຸພຽງແຕ່ 5 ປີ ຕອນທີ່ແມ່ຂອງລາວເຊົາຮັບໃຊ້ພະເຢໂຫວາ. ພໍລ້າເສຍໃຈຫຼາຍ ແລະລາວຮັບມືກັບເລື່ອງນີ້ຍາກຫຼາຍ. ແຕ່ຕໍ່ມາພີ່ນ້ອງອານທີ່ເປັນໄພໂອເນຍໄດ້ໃຫ້ກຳລັງໃຈແລະສະແດງຄວາມຮັກຕໍ່ລາວ. ພໍລ້າເລົ່າວ່າ: “ເຖິງວ່າອານບໍ່ໄດ້ເປັນຍາດພີ່ນ້ອງກັບຂ້ອຍ ແຕ່ລາວກໍຮັກແລະເປັນຫ່ວງຂ້ອຍແທ້ໆ ແລະການເຮັດເຊັ່ນນັ້ນຊ່ວຍຂ້ອຍໃຫ້ຮັບໃຊ້ພະເຢໂຫວາຕໍ່ໆໄປ.” ຫຼັງຈາກນັ້ນ ແມ່ຂອງພໍລ້າກໍກັບມາຮັບໃຊ້ພະເຢໂຫວາອີກ ແລະພໍລ້າມີຄວາມສຸກຫຼາຍທີ່ໄດ້ຮັບໃຊ້ນຳກັນກັບແມ່ອີກຄັ້ງ. ອານກໍມີຄວາມສຸກຄືກັນທີ່ໄດ້ຊ່ວຍພໍລ້າໃຫ້ຮັບໃຊ້ພະເຢໂຫວາຕໍ່ໆໄປ.
14. ເຮົາໄດ້ຮັບປະໂຫຍດແນວໃດເມື່ອເຮົາໃຫ້ກຳລັງໃຈຄົນອື່ນ?
14 ຖ້າເຮົາຫຍຸ້ງໃນການເຮັດດີຕໍ່ຄົນອື່ນ ເຮົາກໍຈະລືມບັນຫາຂອງເຮົາເອງ. ພີ່ນ້ອງຍິງຫຼາຍຄົນທີ່ແຕ່ງດອງແລ້ວແລະທີ່ຍັງໂສດຮູ້ວ່າເມື່ອບອກຂ່າວດີເລື່ອງລາຊະອານາຈັກກັບຄົນອື່ນ ເຂົາເຈົ້າກໍກຳລັງເຮັດວຽກກັບພະເຢໂຫວາແລະເຮັດຕາມຄວາມຕ້ອງການຂອງພະອົງ. ເຂົາເຈົ້າມີຄວາມສຸກຫຼາຍທີ່ໄດ້ເຮັດສິ່ງເຫຼົ່ານີ້. ທີ່ຈິງ ຖ້າເຮົາທຸກຄົນເປັນຫ່ວງຄົນອື່ນ ເຮົາກໍຈະບອກຂ່າວດີກັບເຂົາເຈົ້າ ແລະຖ້າເຮົາເຮັດສິ່ງທີ່ດີຕໍ່ພີ່ນ້ອງຮ່ວມຄວາມເຊື່ອ ເຮົາກໍຈະໃກ້ຊິດກັບເຂົາເຈົ້າຫຼາຍຂຶ້ນ. (ຟີລິບ 2:4) ໂປໂລກໍເຮັດແບບນັ້ນ ລາວຫ່ວງໃຍຄົນອື່ນຄືກັບ ‘ແມ່ . . . ທີ່ແພງລູກທັງຫຼາຍຂອງຕົນເອງ.’ ໂປໂລຍັງໃຫ້ກຳລັງໃຈແລະປອບໂຍນພີ່ນ້ອງຄືກັບ “ພໍ່ກະທຳກັບລູກ.”—ອ່ານ 1 ເທຊະໂລນີກ 2:7, 11, 12
ໃຫ້ກຳລັງໃຈຄອບຄົວ
15. ໃຜມີໜ້າທີ່ຮັບຜິດຊອບໃນການສອນລູກເລື່ອງພະເຢໂຫວາ?
15 ໃນປະຊາຄົມ ເຮົາຈະເຮັດແນວໃດເພື່ອໃຫ້ກຳລັງໃຈພີ່ນ້ອງທີ່ມີຄອບຄົວ? ບາງເທື່ອ ພີ່ນ້ອງໃໝ່ອາດຂໍໃຫ້ເຮົາສອນເລື່ອງພະເຢໂຫວາໃຫ້ລູກເຂົາເຈົ້າ ຫຼືຂໍເຮົາໃຫ້ສຶກສາກັບໄວໜຸ່ມທີ່ເປັນຍາດພີ່ນ້ອງຂອງເຂົາເຈົ້າ. ຄຳພີໄບເບິນສະແດງໃຫ້ເຫັນວ່າພະເຢໂຫວາມອບໜ້າທີ່ຮັບຜິດຊອບໃຫ້ພໍ່ແມ່ສອນແລະອົບຮົມລູກ. (ສຸພາສິດ 23:22; ເອເຟດ 6:1-4) ເຖິງວ່າມີບາງກໍລະນີທີ່ອາດຕ້ອງຂໍໃຫ້ຄົນອື່ນຊ່ວຍໃນດ້ານນີ້ ແຕ່ພໍ່ແມ່ກໍຍັງຕ້ອງສອນລູກ. ພໍ່ແມ່ຕ້ອງເວົ້າລົມກັບລູກເປັນປະຈຳ.
ພໍ່ແມ່ຕ້ອງເວົ້າລົມກັບລູກເປັນປະຈຳ
16. ເຮົາຄວນຈື່ຫຍັງໄວ້ເມື່ອຊ່ວຍລູກຂອງຄົນອື່ນ?
16 ເມື່ອພໍ່ແມ່ຂໍໃຫ້ເຮົາສຶກສາກັບລູກຂອງເຂົາເຈົ້າ ເຮົາຄວນຈື່ວ່າເຮົາບໍ່ມີສິດອຳນາດເທົ່າກັບພໍ່ແມ່. ບາງເທື່ອເຮົາອາດສຶກສາກັບເດັກນ້ອຍທີ່ພໍ່ແມ່ບໍ່ໄດ້ເປັນພະຍານພະເຢໂຫວາ. ຖ້າເຮົາສຶກສາກັບເດັກນ້ອຍທີ່ບໍ່ແມ່ນລູກຂອງເຮົາ ເປັນສິ່ງທີ່ດີຖ້າຈະສຶກສາຢູ່ເຮືອນຂອງເຂົາເຈົ້າຕອນທີ່ມີພໍ່ແມ່ຫຼືຄົນອື່ນທີ່ເປັນເປັນຜູ້ໃຫຍ່ຢູ່ນຳ ຫຼືບໍ່ກໍຢູ່ໃນບ່ອນສາທາລະນະ. ເຮົາບໍ່ຢາກເຮັດໃຫ້ຄົນອື່ນເຂົ້າໃຈຜິດ. ໃນທີ່ສຸດ ພໍ່ແມ່ຈະເປັນຄົນສອນເລື່ອງພະເຢໂຫວາໃຫ້ລູກ.
17. ລູກຈະໃຫ້ກຳລັງໃຈຄົນໃນຄອບຄົວໄດ້ແນວໃດ?
17 ໄວໜຸ່ມທີ່ກຳລັງຮຽນຮູ້ທີ່ຈະຮັກພະເຢໂຫວາກໍໃຫ້ກຳລັງໃຈແລະປອບໂຍນຄົນໃນຄອບຄົວໄດ້ ໂດຍນັບຖືພໍ່ແມ່ແລະເຮັດສຸດຄວາມສາມາດເພື່ອຊ່ວຍວຽກພໍ່ແມ່. ເມື່ອລູກຮັກສາຄວາມສັດຊື່ຕໍ່ພະເຢໂຫວາກໍເຮັດທຸກຄົນໃນຄອບຄົວມີກຳລັງໃຈ. ກ່ອນນໍ້າຖ້ວມໂລກ ເລເມກຜູ້ນະມັດສະການພະເຢໂຫວາເວົ້າເຖິງໂນເອລູກຊາຍຂອງຕົນວ່າ: “ລູກຄົນນີ້ຈະອອຍໃຈຂອງພວກເຮົາແຕ່ວຽກແລະແຕ່ການໜັກແຫ່ງມືຂອງພວກເຮົາຍ້ອນດິນທີ່ພະເຢໂຫວາໄດ້ດ່ານັ້ນ.” ຄຳພະຍາກອນນີ້ໄດ້ເປັນຈິງ ຫຼັງຈາກນໍ້າຖ້ວມໂລກພະເຢໂຫວາໄດ້ຍົກເລີກຄຳດ່າຫຼືຄຳສາບແຊ່ງຕໍ່ດິນ. (ຕົ້ນເດີມ 5:29; 8:21) ທຸກມື້ນີ້ ຖ້າລູກຮັກສາຄວາມສັດຊື່ຕໍ່ພະເຢໂຫວາ ຄອບຄົວກໍຈະໄດ້ກຳລັງໃຈ. ເຂົາເຈົ້າສາມາດຊ່ວຍທຸກຄົນໃນຄອບຄົວໃຫ້ອົດທົນກັບຄວາມລຳບາກໃນຕອນນີ້ແລະໃນອະນາຄົດ.
18. ອັນໃດຊ່ວຍເຮົາໃຫ້ອົດທົນກັບຄວາມຍາກລຳບາກຕ່າງໆ?
18 ໃນທຸກມື້ນີ້ປະຊາຊົນຂອງພະເຢໂຫວາໄດ້ກຳລັງໃຈຈາກການອະທິດຖານ ການຄຶດຕຶກຕອງເຖິງຕົວຢ່າງໃນຄຳພີໄບເບິນ ແລະການມີສາຍສຳພັນທີ່ໃກ້ຊິດກັບພີ່ນ້ອງຊາຍຍິງ. (ອ່ານຄຳເພງ 145:18, 19) ເຮົາຮູ້ວ່າພະເຢໂຫວາພ້ອມສະເໝີທີ່ຈະໃຫ້ກຳລັງໃຈເຮົາ ແລະພະອົງຈະຊ່ວຍເຮົາຢ່າງແນ່ນອນໃຫ້ອົດທົນກັບຄວາມຍາກລຳບາກຕ່າງໆທີ່ເຮົາປະສົບ!
