“ຈະມີການປະກາດຂ່າວດີເລື່ອງການປົກຄອງຂອງພະເຈົ້າ”
“ຈະມີການປະກາດຂ່າວດີເລື່ອງການປົກຄອງຂອງພະເຈົ້າ”
“ຈະມີການປະກາດຂ່າວດີເລື່ອງການປົກຄອງຂອງພະເຈົ້າໄປທົ່ວໂລກ ເພື່ອໃຫ້ຄົນທຸກຊາດມີໂອກາດໄດ້ຍິນ ແລ້ວຈຸດຈົບກໍຈະມາເຖິງ.”—ມັດທາຍ 24:14
ຄຳເວົ້ານີ້ໝາຍຄວາມວ່າແນວໃດ? ລູກາຜູ້ປຶ້ມຂ່າວດີເລົ່າວ່າພະເຢຊູ “ເດີນທາງໄປຕາມເມືອງແລະຕາມບ້ານເພື່ອປະກາດຂ່າວເລື່ອງການປົກຄອງຂອງພະເຈົ້າ” (ລູກາ 8:1) ພະເຢຊູເອງເວົ້າວ່າ: “ຂ້ອຍຕ້ອງປະກາດຂ່າວດີເລື່ອງການປົກຄອງຂອງພະເຈົ້າໃນເມືອງອື່ນໆນຳ ເພາະພະເຈົ້າສົ່ງຂ້ອຍມາເພື່ອເຮັດວຽກນີ້.” (ລູກາ 4:43) ພະເຢຊູສົ່ງລູກສິດອອກໄປປະກາດຂ່າວດີຕາມເມືອງແລະບ້ານຕ່າງໆແລະຕໍ່ມາເພິ່ນໄດ້ໃຫ້ຄຳສັ່ງກັບເຂົາເຈົ້າວ່າ “ເຈົ້າຈະເປັນພະຍານຂອງຂ້ອຍ. . .ຈົນຮອດສຸດຂອບໂລກ.”—ກິດຈະການ 1:8; ລູກາ 10:1
ຄລິດສະຕຽນໃນຍຸກທຳອິດເປັນແບບນັ້ນບໍ? ລູກສິດຂອງພະເຢຊູເຮັດຕາມຄຳສັ່ງຂອງເພິ່ນໂດຍບໍ່ລໍຊ້າ. “ໃນທຸກໆມື້ພວກເຂົາໄດ້ສອນແລະປະກາດຂ່າວດີເລື່ອງພະເຢຊູຜູ້ເປັນພະຄລິດ ທັງໃນວິຫານແລະຕາມບ້ານເຮືອນ.” (ກິດຈະການ 5:42) ວຽກປະກາດບໍ່ໄດ້ເຮັດສະເພາະກຸ່ມຄົນຊັ້ນສູງເທົ່ານັ້ນ. ນັກປະຫວັດສາດຊື່ເນອັນເດ ເວົ້າວ່າ: “ເຊວຊຸດ ນັກຂຽນຄົນທຳອິດທີ່ໂຈມຕີສາສະໜາຄລິດສະຕຽນເຄີຍເວົ້າໃນທາງເຍາະເຍີ້ຍວ່າແມ່ນແຕ່ຊ່າງປັ່ນຂົນແກະ ຊ່າງແປງເກີບ ຊ່າງຟອກໜັງ ຄົນບໍ່ມີການສຶກສາແລະສາມັນຊົນກໍຍັງເປັນຜູ້ປະກາດຂ່າວດີທີ່ມີໃຈແຮງກ້າ.” ຊອງ ເບີນາດີຂຽນໃນໜັງສືຂອງລາວທີ່ຊື່ສະຕະວັດຕົ້ນໆຂອງຄລິດຕະຈັກ (ພາສາຝຣັ່ງ) ວ່າ: “[ຄລິດສະຕຽນ] ຕ້ອງອອກໄປເວົ້າລົມກັບທຸກຄົນທຸກຫົນແຫ່ງ. ຕາມຖະໜົນເມືອງຕ່າງໆ ກາງເມືອງແລະຕາມບ້ານເຮືອນ. ບໍ່ວ່າຈະໄດ້ຮັບການຕ້ອນຮັບຫຼືບໍ່. . .ແລະຈົນເຖິງທີ່ສຸດປາຍແຜ່ນດິນໂລກ.”
ໃຜກຳລັງເຮັດແບບດຽວກັນໃນທຸກມື້ນີ້? ເດວິດ ວັດຕະສັນ ນັກບວດນິກາຍແອງຣິກັນຂຽນວ່າ: “ການທີ່ຄລິດຕະຈັກບໍ່ໄດ້ເຮັດວຽກປະກາດສັ່ງສອນຢ່າງຈິງຈັງເປັນສາເຫດຢ່າງໜຶ່ງທີ່ເຮັດໃຫ້ຄົນໃນທຸກມື້ນີ້ບໍ່ສົນໃຈເລື່ອງພະເຈົ້າ.” ໃນປຶ້ມຂອງລາວຊື່ເປັນຫຍັງກາໂຕລິກຈຶ່ງຖິ້ມຄວາມເຊື່ອ? (ພາສາສະເປນ) ໂຮເຊ ລູອິດ ເປເຣດ ກົວດາລູເປໄດ້ເວົ້າເຖິງກິດຈະກຳຂອງຄລິດຕະຈັກອິແວນເຈລິຄໍ ແອດເວນຕິດ ແລະອື່ນໆພ້ອມທັງໃຫ້ຂໍ້ສັງເກດວ່າ: “ເຂົາເຈົ້າບໍ່ໄດ້ປະກາດຕາມບ້ານ.” ລາວຂຽນກ່ຽວກັບພະຍານພະເຢໂຫວາວ່າ: “ເຂົາເຈົ້າເຮັດວຽກປະກາດຕາມບ້ານຢ່າງເປັນລະບົບລະບຽບ.”
ໂຈນາທານ ເທລີ ໄດ້ໃຫ້ຂໍ້ສັງເກດທີ່ໜ້າສົນໃຈແລະກົງກັບຄວາມເປັນຈິງໄວ້ໃນປຶ້ມ Cato Supreme Court Review 2001-2002 ວ່າ: “ເມື່ອເວົ້າເຖິງພະຍານພະເຢໂຫວາ ຄົນສ່ວນໃຫຍ່ຈະນຶກອອກທັນທີວ່າແມ່ນຜູ້ປະກາດທີ່ມາຢາມເຮົາຢູ່ເຮືອນເວລາທີ່ເຮົາບໍ່ສະດວກ. ສຳລັບພະຍານພະເຢໂຫວາແລ້ວ ການໄປຕາມບ້ານເພື່ອຊວນຜູ້ຄົນໃຫ້ປ່ຽນຄວາມເຊື່ອບໍ່ໄດ້ເປັນພຽງການເຜີຍແຜ່ສາສະໜາເທົ່ານັ້ນ ແຕ່ເປັນແກ່ນແທ້ຂອງສາສະໜາ.”
[ຂອບ]
ເຈົ້າເບິ່ງອອກບໍ?
ເມື່ອພິຈາລະນາຫຼັກຖານຕ່າງໆຈາກຄຳພີໄບເບິນທີ່ເວົ້າໄປໃນບົດຄວາມນີ້ເຈົ້າຄິດວ່າໃຜໃນທຸກມື້ນີ້ທີ່ເປັນຄລິດສະຕຽນແທ້? ເຖິງວ່າຈະມີຄລິດສະຕຽນຫຼາຍໝື່ນນິກາຍ ແຕ່ຂໍໃຫ້ນຶກເຖິງຖ້ອຍຄຳທີ່ພະເຢຊູເວົ້າກັບລູກສິດວ່າ: “ບໍ່ແມ່ນທຸກຄົນທີ່ເອີ້ນຂ້ອຍວ່າ ‘ນາຍ ນາຍ’ ຈະໄດ້ມີສ່ວນໃນການປົກຄອງທີ່ຢູ່ໃນສະຫວັນ ແຕ່ຄົນທີ່ຈະເຂົ້າໄປໄດ້ມີພຽງຄົນທີ່ເຮັດຕາມສິ່ງທີ່ພໍ່ຂອງຂ້ອຍທີ່ຢູ່ໃນສະຫວັນຕ້ອງການໃຫ້ເຮັດ.” (ມັດທາຍ 7:21) ການຮູ້ວ່າຄົນກຸ່ມໃດເປັນຄລິດສະຕຽນທີ່ກຳລັງເຮັດຕາມຄວາມຕ້ອງການຂອງພະເຈົ້າເຊິ່ງເປັນສິ່ງບົ່ງບອກວ່າເຂົາເຈົ້າແມ່ນຄລິດສະຕຽນແທ້ແລະການຄົບຫາກັບຄົນເຫຼົ່ານັ້ນຈະເຮັດໃຫ້ເຈົ້າໄດ້ຮັບພອນທີ່ບໍ່ມີສິ້ນສຸດໃນການປົກຄອງຂອງພະເຈົ້າ. ເຮົາຂໍເຊີນເຈົ້າໃຫ້ລອງສອບຖາມພະຍານພະເຢໂຫວາທີ່ໃຫ້ວາລະສານນີ້ກັບເຈົ້າເພື່ອຈະຮູ້ຫຼາຍຂຶ້ນກ່ຽວກັບການປົກຄອງຂອງພະເຈົ້າແລະພອນທີ່ການປົກຄອງນີ້ຈະນຳມາໃຫ້.—ລູກາ 4:43