“ລູກເຮັດໃຫ້ພວກເຂົາຮູ້ຈັກຊື່ຂອງພະອົງແລ້ວ”
“ລູກເຮັດໃຫ້ພວກເຂົາຮູ້ຈັກຊື່ຂອງພະອົງແລ້ວ”
“ລູກຊ່ວຍພວກເຂົາໃຫ້ຮູ້ຈັກຊື່ຂອງພະອົງແລ້ວ. . .ລູກເຮັດໃຫ້ພວກເຂົາຮູ້ຈັກຊື່ຂອງພະອົງແລ້ວ ແລະຈະເຮັດໃຫ້ພວກເຂົາຮູ້ຈັກຕໍ່ໆໄປອີກ.”—ໂຢຮັນ 17:6, 26
ຄຳເວົ້ານີ້ໝາຍຄວາມວ່າແນວໃດ? ພະເຢຊູໄດ້ເຮັດໃຫ້ຊື່ຂອງພະເຈົ້າເປັນທີ່ຮູ້ຈັກໂດຍໃຊ້ຊື່ນີ້ໃນວຽກປະກາດ ແລະເມື່ອພະເຢຊູອ່ານພະຄຳພີໃຫ້ຜູ້ຄົນຟັງແບບທີ່ເຮັດຢູ່ເລື້ອຍ ໆ ເພິ່ນກໍໄດ້ອອກສຽງຊື່ສະເພາະຂອງພະເຈົ້ານຳ. (ລູກາ 4:16-21) ພະເຢຊູສອນລູກສິດໃຫ້ອະທິດຖານວ່າ: “ພະເຈົ້າ ພໍ່ຂອງພວກເຮົາ ຂໍໃຫ້ຊື່ຂອງພະອົງເປັນທີ່ເຄົາລົບນັບຖືຢູ່ສະເໝີ.”—ລູກາ 11:2
ຄລິດສະຕຽນໃນຍຸກທຳອິດເປັນແບບນັ້ນບໍ? ອັກຄະສາວົກເປໂຕບອກຜູ້ເຖົ້າຜູ້ແກ່ໃນເມືອງເຢຣູຊາເລັມວ່າພະເຈົ້າໄດ້ເລືອກຄົນກຸ່ມໜຶ່ງອອກມາຈາກປະເທດຕ່າງໆໃຫ້ເປັນ ‘ປະຊາຊົນທີ່ໃຊ້ຊື່ຂອງພະອົງ.’ (ກິດຈະການ 15:14) ອັກຄະສາວົກແລະລູກສິດຄົນອື່ນໆໄດ້ປະກາດວ່າ: “ທຸກຄົນທີ່ອ້ອນວອນໂດຍອອກຊື່ຂອງພະເຢໂຫວາຈະລອດ.” (ກິດຈະການ 2:21; ໂຣມ 10:13) ນອກຈາກນັ້ນ ເຂົາເຈົ້າຍັງໃຊ້ຊື່ຂອງພະເຈົ້າໃນການຂຽນຂອງເຂົາເຈົ້ານຳ. ປຶ້ມໂທເຊບທາ ຫຼືປະມວນກົດໝາຍຂອງຄົນຢິວທີ່ເປັນລາຍລັກອັກສອນເຊິ່ງຂຽນແລ້ວປະມານປີ 300 ບັນທຶກເຫດການຕອນທີ່ພວກຜູ້ຕໍ່ຕ້ານໄດ້ເຜົາການຂຽນຂອງຄລິດສະຕຽນໄວ້ດັ່ງນີ້: “ປຶ້ມຂອງຜູ້ຂຽນກິດຕິຄຸນແລະປຶ້ມຂອງພວກມິນິມ [ຮູ້ກັນວ່າເປັນຄລິດສະຕຽນຄົນຢິວ] ຖືກເຜົາທຳລາຍຈົນໝົດ. ພວກເຂົາສັ່ງໃຫ້ເຜົາປຶ້ມເຫຼົ່ານັ້ນທັນທີທີ່ເຫັນ. . .ທັງປຶ້ມແລະຊື່ຂອງພະເຈົ້າທີ່ຢູ່ປຶ້ມເຫຼົ່ານັ້ນກໍຖືກເຜົາໄປນຳ.”
ໃຜກຳລັງເຮັດແບບດຽວກັນໃນທຸກມື້ນີ້? ໃນໜ້າຄຳນຳຂອງຄຳພີໄບເບິນສະບັບຣີໄວສະແຕນດາດ ເວີຊັນ ເຊິ່ງໄດ້ຮັບອະນຸຍາດໂດຍສະພາຄລິດຕະຈັກຂອງພະຄລິດແຫ່ງສະຫະລັດກ່າວວ່າ: “ການໃຊ້ຊື່ສະເພາະຂອງພະເຈົ້າທ່ຽງແທ້ອົງດຽວຄືກັບວ່າມີພະເຈົ້າອື່ນໆອີກທີ່ເຮັດໃຫ້ຕ້ອງແຍກພະອົງໄວ້ຕ່າງຫາກ ເປັນສິ່ງທີ່ຄົນຢິວເຊົາປະຕິບັດມາຕັ້ງແຕ່ກ່ອນສະໄໝຄລິດສະຕຽນແລ້ວແລະບໍ່ສົມຄວນຢ່າງຍິ່ງທີ່ຄລິດຕະຈັກໃດໆຂອງຄລິດສະຕຽນຈະໃຊ້ຊື່ນີ້.” ດ້ວຍເຫດນີ້ ພະຄຳພີສະບັບດັ່ງກ່າວຈຶ່ງແທນທີ່ຊື່ຂອງພະເຈົ້າດ້ວຍຄຳວ່າ “ອົງພະຜູ້ເປັນເຈົ້າ” ເຊິ່ງເປັນຄຳລະບຸຕຳແໜ່ງ. ເມື່ອບໍ່ດົນມານີ້ ສຳນັກວາຕິໄດ້ມີຄຳສັ່ງໄປຍັງອະທິການທຸກຄົນວ່າ: “ຫ້າມບໍ່ໃຫ້ມີການໃຊ້ຫຼືອອກສຽງຊື່ຂອງພະເຈົ້າໃນຮູບອັກສອນເຮັບເຣີສີ່ໂຕ (ຢຫວຫ) a ໃນເພງນະມັດສະການແລະໃນບົດສວດອະທິດຖານ.”
ໃນທຸກມື້ນີ້ແມ່ນໃຜທີ່ໃຊ້ແລະເຮັດໃຫ້ຊື່ຂອງພະເຈົ້າເປັນທີ່ຮູ້ຈັກ? ເຊີເກເລົ່າວ່າຕອນເປັນໄວລຸ້ນ ລາວຢູ່ກີກິດສະຖານ ແລະເຄີຍເບິ່ງໜັງເລື່ອງໜຶ່ງທີ່ເຮັດໃຫ້ລາວຮູ້ວ່າຊື່ຂອງພະເຈົ້າແມ່ນເຢໂຫວາ. ແຕ່ຫຼັງຈາກນັ້ນປະມານສິບປີ ລາວກໍບໍ່ໄດ້ຍິນຊື່ຂອງພະເຈົ້າອີກເລີຍ. ຕໍ່ມາ ເມື່ອເຊີເກຍ້າຍໄປຢູ່ສະຫະລັດອາເມຣິກາ ມີພະຍານພະເຢໂຫວາສອງຄົນມາຫາລາວຢູ່ເຮືອນແລະໃຫ້ລາວເບິ່ງຊື່ຂອງພະເຈົ້າຈາກຄຳພີໄບເບິນ. ເຊີເກຕື່ນເຕັ້ນຫຼາຍທີ່ໄດ້ເຫັນຄົນທີ່ໃຊ້ຊື່ເຢໂຫວາ. ໜ້າສົນໃຈທີ່ວັດຈະນານຸກົມເວັບສະເຕີ ເທິດ ນິວ ອິນເຕີເນຊັນແນວ ນິຍາມຄຳ “ພະເຢໂຫວາພະເຈົ້າ” ວ່າ “ພະເຈົ້າອົງສູງສຸດແລະພະເຈົ້າອົງດຽວທີ່ພະຍານພະເຢໂຫວາຍອມຮັບແລະນະມັດສະການ.”
[ຂໍ້ຄວາມໄຂເງື່ອນ]
a ໃນພາສາລາວ ຊື່ຂອງພະເຈົ້າອອກສຽງວ່າ “ເຢໂຫວາ.”