ພະເຍຊູສອນວ່າ: “ເຈົ້າໄດ້ຮັບມາຟຣີໆ ກໍໃຫ້ຄົນອື່ນໄປຟຣີໆ.” (ມັດ. 10:8, ລ.ມ.) ເຮົາເຮັດຕາມຄຳແນະນຳນີ້ທີ່ຈະແຈ້ງໂດຍບໍ່ເອົາເງິນກັບຜູ້ຄົນສຳລັບຄຳພີໄບເບິນຫຼືປຶ້ມຕ່າງໆ. (2 ໂກ. 2:17) ເຖິງຢ່າງນັ້ນກໍຕາມ ປຶ້ມເຫຼົ່ານີ້ມີຄວາມຈິງທີ່ລໍ້າຄ່າຈາກຄຳພີໄບເບິນ. ມີການອອກຄວາມພະຍາຍາມຢ່າງໜັກແລະມີຄ່າໃຊ້ຈ່າຍໃນການພິມແລະສົ່ງປຶ້ມໄປໃຫ້ປະຊາຄົມຕ່າງໆຢູ່ທົ່ວໂລກ. ດັ່ງນັ້ນ ເຮົາຄວນເອົາສະເພາະປຶ້ມທີ່ເຮົາຕ້ອງການເທົ່ານັ້ນ.

ໃຊ້ຄວາມສຸຂຸມເມື່ອເອົາປຶ້ມໃຫ້ຄົນອື່ນ ແມ່ນແຕ່ເມື່ອປະກາດໃນບ່ອນສາທາລະນະ. (ມັດ. 7:6) ແທນທີ່ຈະມີແຕ່ຍື່ນປຶ້ມໃຫ້ຄົນທີ່ຍ່າງກາຍໄປ ໃຫ້ພະຍາຍາມລົມກັບຄົນເຫຼົ່ານັ້ນເພື່ອແນ່ໃຈວ່າເຂົາເຈົ້າສົນໃຈຢາກອ່ານ. ໃນຄຳຖາມທີ່ຢູ່ໜ້ານີ້ ເຈົ້າຕອບຢ່າງໜ້ອຍຂໍ້ໜຶ່ງໄດ້ບໍວ່າແມ່ນ? ຖ້າເຈົ້າບໍ່ແນ່ໃຈວ່າຄົນນັ້ນສົນໃຈຫຼືບໍ່ ດີທີ່ສຸດແມ່ນເອົາແຜ່ນພັບໃຫ້ລາວ. ແຕ່ຖ້າລາວຂໍວາລະສານຫຼືປຶ້ມອື່ນໆ ແນ່ນອນວ່າເຮົາຈະຍິນດີເອົາໃຫ້ລາວ.—ສຸພາ. 3:27, 28