ເຈົ້າ​ມີ​ອາຍຸ​ລະຫວ່າງ 23-65 ປີ ແລະ​ກຳລັງ​ຮັບໃຊ້​ເຕັມ​ເວລາ​ບໍ? ເຈົ້າ​ມີ​ສຸຂະພາບ​ດີ​ແລະ​ພ້ອມ​ທີ່​ຈະ​ໄປ​ຮັບໃຊ້​ໃນ​ບ່ອນ​ໃດ​ກໍ​ໄດ້​ທີ່​ມີ​ຄວາມ​ຈຳເປັນ​ບໍ? ເຈົ້າ​ຄິດ​ເຖິງ​ເລື່ອງ​ທີ່​ຈະ​ສະໝັກ​ເຂົ້າ​ໂຮງ​ຮຽນ​ຜູ້​ປະກາດ​ລາຊະອານາຈັກ​ບໍ? ນັບ​ຕັ້ງ​ແຕ່​ຊັ້ນ​ຮຽນ​ທີ 1 ເປັນ​ຕົ້ນ​ມາ​ກໍ​ມີ​ພີ່ນ້ອງ​ຫຼາຍ​ພັນ​ຄົນ​ໄດ້​ສະໝັກ​ເຂົ້າ​ໂຮງ​ຮຽນ​ນີ້​ບໍ່​ວ່າ​ຈະ​ເປັນ​ຄູ່​ຜົວ​ເມຍ ພີ່ນ້ອງ​ຊາຍ​ໂສດ ແລະ​ພີ່ນ້ອງ​ຍິງ​ໂສດ. ແຕ່​ເຮົາ​ຢາກ​ໃຫ້​ພີ່ນ້ອງ​ຊາຍ​ໂສດ​ສະໝັກ​ຫຼາຍ​ຂຶ້ນ​ອີກ. ເຈົ້າ​ທີ່​ເປັນ​ພີ່ນ້ອງ​ຊາຍ​ໂສດ ໃຫ້​ຂໍ​ກັບ​ພະ​ເຢໂຫວາ​ໃຫ້​ຊ່ວຍ​ເຈົ້າ​ມີ​ຄວາມ​ຕ້ອງການ​ຫຼາຍ​ຂຶ້ນ​ທີ່​ຈະ​ເຮັດ​ໃຫ້​ເພິ່ນ​ພໍ​ໃຈ ແລະ​ຮຽນ​ແບບ​ລູກ​ຊາຍ​ຂອງ​ເພິ່ນ​ຫຼາຍ​ຂຶ້ນ. (ເພງ 40:8; ມທ 20:28; ຮຣ 10:7) ຈາກ​ນັ້ນ ໃຫ້​ຄິດ​ເບິ່ງ​ວ່າ​ຈະ​ເຮັດ​ຫຍັງ​ໄດ້​ແດ່​ເພື່ອ​ຫຼຸດ​ພາລະ​ໃຫ້​ໜ້ອຍ​ລົງ ເພື່ອ​ຈະ​ມີ​ຄຸນສົມບັດ​ເຂົ້າ​ໂຮງ​ຮຽນ​ນີ້​ໄດ້.

ຜູ້​ທີ່​ຈົບ​ຈາກ​ໂຮງ​ຮຽນ​ນີ້​ສາມາດ​ຮັບໃຊ້​ໃນ​ຮູບ​ແບບ​ໃດ ແລະ​ຮັບໃຊ້​ຢູ່​ໃສ​ໄດ້​ແດ່? ບາງ​ຄົນ​ຖືກ​ມອບ​ໝາຍ​ໃຫ້​ໄປ​ຮັບໃຊ້​ໃນ​ເຂດ​ທີ່​ໃຊ້​ພາສາ​ອື່ນ ຫຼື​ປະກາດ​ໃນ​ບ່ອນ​ສາທາລະນະ​ຢູ່​ເມືອງ​ໃຫຍ່​ໃນ​ຮູບ​ແບບ​ພິເສດ. ບາງ​ຄົນ​ຫຼັງ​ຈາກ​ທີ່​ຈົບ​ໂຮງ​ຮຽນ​ໄດ້​ໄລຍະ​ໜຶ່ງ​ກໍ​ໄດ້​ຮັບ​ມອບ​ໝາຍ​ເປັນ​ຜູ້​ດູ​ແລ​ໝວດ​ສົມທົບ ເປັນ​ຜູ້​ດູ​ແລ​ໝວດ ຫຼື​ເປັນ​ມິດຊັນນາຣີ. ເມື່ອ​ເຈົ້າ​ຄິດ​ຕຶກຕອງ​ກ່ຽວ​ກັບ​ໂອກາດ​ທີ່​ຈະ​ຮັບໃຊ້​ພະ​ເຢໂຫວາ ເຈົ້າ​ອາດ​ຈະ​ເວົ້າ​ຄື​ກັບ​ຜູ້​ພະຍາກອນ​ເອຊາຢາ​ທີ່​ວ່າ: “ຂ້າ​ນ້ອຍ​ຢູ່​ທີ່​ນີ້ ເຊີນ​ພະອົງ​ໃຊ້​ຂ້າ​ນ້ອຍ​ໄປ.”—ເອຊາ 6:8

ເປີດ​ວິດີໂອ​ມິດຊັນນາຣີ ຄົນ​ງານ​ທີ່​ທຳ​ງານ​ກ່ຽວ ແລະ​ຕອບ​ຄຳຖາມ​ຕໍ່​ໄປ​ນີ້:

• ມີ​ການ​ເລືອກ​ມິດຊັນນາຣີ​ແນວ​ໃດ?

• ມິດຊັນນາຣີ​ເຮັດ​ວຽກ​ທີ່​ດີ​ຫຍັງ​ແດ່?

• ການ​ເປັນ​ມິດຊັນນາຣີ​ໄດ້​ຮັບ​ພອນ​ຫຍັງ​ແດ່?