ອີກ​ບໍ່​ດົນ​ພະເຢໂຫວາ​ຈະ​ໝົດ​ຄວາມ​ອົດທົນ​ກັບ​ໂລກ​ນີ້. ສາສະໜາ​ປອມ​ຈະ​ຖືກ​ທຳລາຍ ກຸ່ມ​ຊາດ​ຕ່າງໆ​ຈະ​ພາກັນ​ມາ​ໂຈມຕີ​ປະຊາຊົນ​ຂອງ​ພະເຈົ້າ ແລະ​ພະເຢໂຫວາ​ຈະ​ທຳລາຍ​ຄົນ​ຊົ່ວ​ໃນ​ສົງຄາມ​ອາມາເຄໂດນ. ຄລິດສະຕຽນ​ທຸກ​ຄົນ​ລໍ​ຖ້າ​ເຫດການ​ທີ່​ສຳຄັນ​ແລະ​ໜ້າ​ຕື່ນ​ເຕັ້ນ​ເຫຼົ່ານີ້.

ແມ່ນ​ຢູ່​ວ່າ ເຮົາ​ບໍ່​ຮູ້​ລາຍ​ລະອຽດ​ທຸກ​ຢ່າງ​ກ່ຽວກັບ​ຄວາມທຸກຍາກ​ລຳບາກ​ຄັ້ງ​ໃຫຍ່. ເຊັ່ນ ເຮົາ​ບໍ່​ຮູ້​ວ່າ​ເຫດການ​ນີ້​ຈະ​ເລີ່ມ​ມື້​ໃດ​ປີ​ໃດ. ເຮົາ​ບໍ່​ຮູ້​ວ່າ​ອັນ​ໃດ​ຈະ​ເຮັດ​ໃຫ້​ອຳນາດ​ທາງ​ການເມືອງ​ຄິດ​ວ່າ​ຄວນ​ຈັດການ​ກັບ​ສາສະໜາ. ເຮົາ​ບໍ່​ຮູ້​ວ່າ​ກຸ່ມ​ຊາດ​ຕ່າງໆ​ຈະ​ໂຈມຕີ​ຄົນ​ຂອງ​ພະເຈົ້າ​ຢູ່​ດົນ​ປານ​ໃດ​ແລະ​ເລື່ອງ​ນີ້​ຈະ​ຈົບ​ແນວໃດ. ນອກຈາກນັ້ນ ເຮົາ​ບໍ່​ຮູ້​ວ່າ​ເມື່ອ​ຮອດ​ເວລາ​ແທ້ໆ​ພະເຢໂຫວາ​ຈະ​ໃຊ້​ຫຍັງ​ເພື່ອ​ທຳລາຍ​ຄົນ​ຊົ່ວ​ໃນ​ອາມາເຄໂດນ.

ແຕ່​ພະຄຳພີ​ໃຫ້​ຂໍ້ມູນ​ທຸກ​ຢ່າງ​ທີ່​ຈຳເປັນ​ກັບ​ເຮົາ​ເພື່ອ​ຈະ​ປະເຊີນ​ໜ້າ​ກັບ​ສິ່ງ​ທີ່​ຈະ​ເກີດ​ຂຶ້ນ​ໃນ​ອະນາຄົດ​ດ້ວຍ​ຄວາມ​ໝັ້ນໃຈ​ແລະ​ກ້າຫານ. ເຊັ່ນ ເຮົາ​ຮູ້​ວ່າ​ເຮົາ​ກຳລັງ​ຢູ່​ໃນ​ຕອນ​ປາຍ​ຂອງ “ສະໄໝ​ສຸດທ້າຍ.” (2ຕມ 3:1) ເຮົາ​ຮູ້​ວ່າ​ພະເຈົ້າ​ຈະ​ເຮັດ​ໃຫ້​ການ​ໂຈມຕີ​ສາສະໜາ “ສັ້ນ​ລົງ” ເພື່ອ​ໃຫ້​ສາສະໜາ​ແທ້​ບໍ່​ຖືກ​ທຳລາຍ. (ມທ 24:22) ເຮົາ​ຮູ້​ວ່າ​ພະເຢໂຫວາ​ຈະ​ຊ່ວຍ​ປະຊາຊົນ​ຂອງ​ເພິ່ນ​ໃຫ້​ລອດ. (2ປຕ 2:9) ແລະ​ເຮົາ​ຮູ້​ວ່າ​ຄົນ​ທີ່​ພະເຢໂຫວາ​ເລືອກ​ໃຫ້​ເປັນ​ຜູ້​ລົງໂທດ​ຄົນ​ຊົ່ວ​ແລະ​ຊ່ວຍ​ຊົນ​ຝູງ​ໃຫຍ່​ໃຫ້​ລອດ​ຜ່ານ​ອາມາເຄໂດນ​ນັ້ນ​ມີ​ອຳນາດ​ຫຼາຍ​ແລະ​ເພິ່ນ​ຈະ​ຈັດການ​ຢ່າງ​ຖືກຕ້ອງ​ຊອບທຳ.—ພນມ 19:11, 15, 16

ເຫດການ​ໃນ​ອະນາຄົດ​ຈະ​ເຮັດ​ໃຫ້​ຜູ້ຄົນ “ຢ້ານ​ຈົນ​ສະຫຼົບ​ໄປ.” ແຕ່​ຖ້າ​ເຮົາ​ອ່ານ​ແລະ​ຄິດຕຶກຕອງ​ກ່ຽວກັບ​ສິ່ງ​ທີ່​ພະເຢໂຫວາ​ເຮັດ​ໃນ​ອະດີດ​ເພື່ອ​ຊ່ວຍ​ຄົນ​ຂອງ​ເພິ່ນ​ໃຫ້​ລອດ​ແລະ​ເລື່ອງ​ຕ່າງໆ​ທີ່​ເພິ່ນ​ບອກ​ໃຫ້​ເຮົາ​ຮູ້​ກ່ຽວກັບ​ອະນາຄົດ ເຮົາ​ກໍ​ຈະ “ຢືນ​ໂຕ​ຊື່​ແລະ​ເງີຍ​ໜ້າ​ຂຶ້ນ” ໄດ້ ເພາະ​ເຮົາ​ໝັ້ນໃຈ​ວ່າ​ຄວາມ​ລອດ​ຂອງ​ເຮົາ​ຢູ່​ໃກ້​ແລ້ວ.—ລກ 21:26, 28