ເຮົາ​ຢູ່​ໃນ​ໂລກ​ທີ່​ພະຍາຍາມ​ເຮັດ​ໃຫ້​ເຮົາ​ເຫັນ​ດີ​ເປັນ​ຊົ່ວ​ແລະ​ເຫັນ​ຊົ່ວ​ເປັນ​ດີ. (ເອຊາ 5:20) ໜ້າ​ເສົ້າ ບາງ​ຄົນ​ເຮັດ​ສິ່ງ​ທີ່​ພະ​ເຢໂຫວາ​ຊັງ ລວມ​ທັງ​ການ​ເຮັດ​ສິ່ງ​ທີ່​ບໍ່​ເໝາະ​ສົມ​ລະຫວ່າງ​ເພດ​ດຽວ​ກັນ. ໝູ່​ຢູ່​ໂຮງ​ຮຽນ​ຫຼື​ຄົນ​ອື່ນ​ອາດ​ພະຍາຍາມ​ຊັກຊວນ​ລູກ​ຂອງ​ເຮົາ​ໃຫ້​ເຮັດ​ຕາມ​ເຂົາ​ເຈົ້າ. ເຈົ້າ​ຈະ​ກຽມ​ລູກ​ແນວ​ໃດ​ໃຫ້​ຮູ້​ວິທີ​ປົກ​ປ້ອງ​ໂຕ​ເອງ​ເມື່ອ​ເຈິ​ເລື່ອງ​ແບບ​ນີ້?

ສອນ​ມາດຕະຖານ​ຂອງ​ພະ​ເຢໂຫວາ​ໃຫ້​ລູກ. (ເລວີ 18:3) ຄ່ອຍໆສອນ​ເຂົາ​ເຈົ້າ​ໃຫ້​ຮູ້​ວ່າ​ຄຳພີ​ໄບເບິນ​ເວົ້າ​ເຖິງ​ເລື່ອງ​ເພດ​ແນວ​ໃດ ເຈົ້າ​ຄວນ​ສອນ​ໃຫ້​ເໝາະ​ກັບ​ອາຍຸ​ແລະ​ຄວາມ​ເຂົ້າ​ໃຈ​ຂອງ​ເຂົາ​ເຈົ້າ. (ບັນຍັດ 6:7) ໃຫ້​ຖາມ​ໂຕ​ເອງ​ວ່າ: ‘ຂ້ອຍ​ໄດ້​ສອນ​ລູກ​ບໍ​ວ່າ​ການ​ສະແດງ​ຄວາມ​ຮັກ​ຢ່າງ​ເໝາະ​ສົມ​ເປັນ​ແນວ​ໃດ ການ​ແຕ່ງ​ໂຕ​ສຸພາບ​ສຳຄັນ​ສ່ຳ​ໃດ ແລະ​ໄດ້​ສອນ​ບໍ​ວ່າ​ຄົນ​ອື່ນ​ຕ້ອງ​ນັບຖື​ຄວາມ​ເປັນ​ສ່ວນ​ໂຕ​ຂອງ​ລູກ? ລູກ​ຂ້ອຍ​ຮູ້​ບໍ​ວ່າ​ຕ້ອງ​ເຮັດ​ແນວ​ໃດ​ຖ້າ​ມີ​ຄົນ​ພະຍາຍາມ​ໃຫ້​ເຂົາ​ເຈົ້າ​ເບິ່ງ​ສື່​ລາມົກ​ຫຼື​ຊວນ​ເຂົາ​ເຈົ້າ​ເຮັດ​ບາງ​ຢ່າງ​ທີ່​ພະ​ເຢໂຫວາ​ບອກ​ວ່າ​ຜິດ?’ ການ​ສອນ​ເລື່ອງ​ເຫຼົ່າ​ນີ້​ໃຫ້​ລູກ​ຈະ​ຊ່ວຍ​ປົກ​ປ້ອງ​ເຂົາ​ເຈົ້າ​ຈາກ​ອັນຕະລາຍ​ຕ່າງໆ. (ສຸພາ 27:12; ຜູ້ປ 7:12) ການ​ທີ່​ເຈົ້າ​ສອນ​ລູກ ເຮັດ​ໃຫ້​ເຫັນ​ວ່າ​ເຈົ້າ​ຮັກ​ມໍລະດົກ​ທີ່​ລ້ຳ​ຄ່າ​ທີ່​ໄດ້​ຈາກ​ພະ​ເຢໂຫວາ.—ເພງ 127:3

ເບິ່ງ​ວິດີໂອ​ສ້າງ​ເຮືອນ​ທີ່​ທົນ​ທານ—ປົກ​ປ້ອງ​ລູກ​ຈາກ​ສິ່ງ​ທີ່ “ຊົ່ວ” ແລ້ວ​ຕອບ​ຄຳຖາມ​ຕໍ່​ໄປ​ນີ້:

• ເປັນ​ຫຍັງ​ບາງ​ຄົນ​ຈຶ່ງ​ລັງເລ​ທີ່​ຈະ​ສອນ​ລູກ​ເລື່ອງ​ເພດ?

• ເປັນ​ຫຍັງ​ພໍ່​ແມ່​ຕ້ອງ​ຝຶກ​ສອນ​ລູກ​ດ້ວຍ “ຄຳ​ສັ່ງ​ສອນ​ແລະ​ຄຳ​ຕັກ​ເຕືອນ​ຈາກ​ພະ​ເຢໂຫວາ”?—ອຟຊ 6:4

• ອົງການ​ຂອງ​ພະ​ເຢໂຫວາ​ໄດ້​ຈັດ​ກຽມ​ຫຍັງ​ແດ່​ເພື່ອ​ຊ່ວຍ​ພໍ່​ແມ່​ສອນ​ລູກ​ເລື່ອງ​ເພດ?—ຫ​19.05 ຂອບ​ໜ້າ 12

• ເປັນ​ຫຍັງ​ເຈົ້າ​ຄວນ​ລົມ​ກັບ​ລູກ​ເປັນ​ປະຈຳ​ກ່ອນ​ທີ່​ຈະ​ມີ​ບັນຫາ​ຮ້າຍແຮງ​ເກີດ​ຂຶ້ນ?