ຊີວິດຄລິດສະຕຽນ
ຈົ່ງໄປກະທຳໃຫ້ຄືນດີກັບພີ່ນ້ອງກ່ອນ—ໂດຍວິທີໃດ?
ໃຫ້ນຶກພາບວ່າເຈົ້າອາໄສຢູ່ແຂວງຄາລິເລໃນສະໄໝຂອງພະເຍຊູ. ເຈົ້າຕ້ອງເດີນທາງໄປເຢຣຶຊາເລມເພື່ອສະຫຼອງເທດສະການຈຳໜັກອາໄສ. ໃນເມືອງເຕັມແຕ່ຜູ້ນະມັດສະການທີ່ມາຈາກທຸກແຫ່ງທັງໃກ້ແລະໄກ. ເຈົ້າຢາກຖວາຍເຄື່ອງບູຊາໃຫ້ພະເຢໂຫວາ. ເຈົ້າເອົາແບ້ມານຳ ແລະຍ່າງຜ່າຝູງຄົນໄປຕາມທາງແຄບໆໃນເມືອງມຸ່ງໜ້າມາວິຫານ. ເມື່ອມາຮອດກໍເຫັນຄົນເຕັມວິຫານເຂົາເຈົ້າກໍຢາກຖວາຍເຄື່ອງບູຊາຄືກັນ. ໃນທີ່ສຸດຮອດຜຽນຂອງເຈົ້າທີ່ຈະມອບແບ້ໃຫ້ປະໂລຫິດ. ຕອນນັ້ນ ເຈົ້າຈື່ໄດ້ວ່າພີ່ນ້ອງຍັງຄຽດໃຫ້ເຈົ້າ ລາວອາດຈະຢູ່ໃນກຸ່ມຝູງຊົນ ຫຼືອາດຈະຢູ່ໃນເມືອງ. ພະເຍຊູອະທິບາຍວ່າເຈົ້າຄວນເຮັດຫຍັງ. (ອ່ານມັດທາຍ 5:24) ຕາມຄຳແນະນຳຂອງພະເຍຊູ ເຈົ້າກັບພີ່ນ້ອງທີ່ຄຽດໃຫ້ເຈົ້າຈະເຮັດແນວໃດເພື່ອຈະຄືນດີກັນ? ໃຫ້ເລືອກຄຳຕອບທີ່ຄວນເຮັດໃນຂອບລຸ່ມນີ້.
ເຈົ້າຄວນຈະ . . .
-
ໄປລົມກັບພີ່ນ້ອງເປັນສ່ວນຕົວຖ້າເຈົ້າຄິດວ່າມີເຫດຜົນພຽງພໍທີ່ລາວຄຽດໃຫ້ເຈົ້າ
-
ພະຍາຍາມແກ້ໄຂຄວາມຄິດຂອງພີ່ນ້ອງຖ້າເຈົ້າຮູ້ສຶກວ່າລາວຄິດຫຼາຍໂພດ ຫຼືຮູ້ສຶກວ່າລາວກໍມີສ່ວນຜິດຄືກັນ
-
ໃຫ້ຟັງຢ່າງອົດທົນເມື່ອພີ່ນ້ອງບອກຄວາມຮູ້ສຶກອອກມາ ແລະເຖິງວ່າເຈົ້າຈະບໍ່ເຂົ້າໃຈທັງໝົດ ໃຫ້ຂໍໂທດຢ່າງຈິງໃຈທີ່ເຮັດໃຫ້ລາວເສຍໃຈ ຫຼືສິ່ງທີ່ເຈົ້າໄດ້ເຮັດໂດຍບໍ່ຮູ້ຕົວ.
ພີ່ນ້ອງຂອງເຈົ້າຄວນຈະ . . .
-
ຫາວິທີໃຫ້ຄົນອື່ນເຂົ້າຂ້າງໂດຍເວົ້າໃຫ້ເຂົາເຈົ້າຟັງວ່າເຈົ້າເຮັດຜິດຕໍ່ລາວ
-
ໂທດເຈົ້າ ເວົ້າເຖິງລາຍລະອຽດທຸກຢ່າງທີ່ເຈົ້າເຮັດໃຫ້ລາວຄຽດ ແລະຢາກໃຫ້ເຈົ້າຍອມຮັບຜິດ
-
ເຫັນວ່າເຈົ້າໄດ້ສະແດງຄວາມຖ່ອມແລະຄວາມກ້າທີ່ມາລົມກັບລາວ ແລະລາວຄວນໃຫ້ອະໄພເຈົ້າຢ່າງໃຈກວ້າງ
ເຖິງວ່າໃນທຸກມື້ນີ້ການນະມັດສະການຂອງເຮົາບໍ່ໄດ້ຖວາຍສັດເປັນເຄື່ອງບູຊາ ແຕ່ພະເຍຊູສອນຫຍັງເຮົາເລື່ອງການຄືນດີກັບພີ່ນ້ອງທີ່ກ່ຽວຂ້ອງກັບການນະມັດສະການທີ່ພະເຈົ້າຍອມຮັບ?
