ຊີວິດຄລິດສະຕຽນ
ຍິນດີຕ້ອນຮັບແຂກຂອງເຮົາ
ເຮົາຄາດໝາຍວ່າວັນທີ 23 ມີນາ ຈະມີແຂກປະມານ 12 ລ້ານຄົນຫຼືຫຼາຍກວ່ານັ້ນມາຮ່ວມການປະຊຸມອະນຸສອນ. ເຂົາເຈົ້າຈະໄດ້ຟັງຄຳບັນລະຍາຍເລື່ອງຄ່າໄຖ່ທີ່ເປັນຂອງຂວັນຈາກພະເຢໂຫວາແລະພະພອນອື່ນໆທີ່ມະນຸດຈະໄດ້ຮັບ! (ເອຊາ. 11:6-9; 35:5, 6; 65:21-23; ໂຢ. 3:16) ບໍ່ພຽງແຕ່ຜູ້ບັນລະຍາຍເທົ່ານັ້ນທີ່ຈະເວົ້າເລື່ອງພະເຈົ້າໃນໂອກາດພິເສດນີ້ ເຮົາທຸກຄົນສາມາດມີສ່ວນຮ່ວມໃນວຽກນີ້ໄດ້ໂດຍຕ້ອນຮັບແຂກຢ່າງອົບອຸ່ນ (ໂລມ 15:7) ລອງເບິ່ງຄຳແນະນຳຕໍ່ໄປນີ້.
-
ແທນທີ່ຈະນັ່ງຢູ່ແຕ່ບ່ອນນັ່ງຈົນເຖິງເວລາປະຊຸມເລີ່ມ ໃຫ້ຕ້ອນຮັບແຂກແລະຄົນທີ່ເຊົາປະກາດໂດຍຍິ້ມຢ່າງອົບອຸ່ນແລະທັກທາຍຢ່າງເປັນມິດ.
-
ເຖິງແມ່ນວ່າເຈົ້າຈະສົນໃຈແຂກທີ່ເຈົ້າເຊີນມາເປັນພິເສດ ແຕ່ໃຫ້ສົນໃຈຄົນອື່ນທີ່ມານຳເພາະເຂົາເຈົ້າກໍໄດ້ຮັບໃບເຊີນຈາກໂຄງການພິເສດ. ເຊີນຄົນໃໝ່ມານັ່ງກັບເຈົ້າເພື່ອໃຫ້ເບິ່ງຂໍ້ພະຄຳພີແລະປຶ້ມເພງນຳເຈົ້າ.
-
ຫຼັງຈາກຈົບຄຳບັນລະຍາຍ ກໍຂໍໃຫ້ຢູ່ຕໍ່ເພື່ອຕອບຄຳຖາມຂອງຜູ້ສົນໃຈ. ຖ້າມີເວລາໜ້ອຍເພາະມີອີກປະຊາຄົມໜຶ່ງຈັດປະຊຸມຕໍ່ ກໍໃຫ້ນັດໝາຍກັບໄປຢາມລາວຫຼັງຈາກ 2-3 ມື້. ຖ້າເຈົ້າບໍ່ມີຂໍ້ມູນຕິດຕໍ່ລາວ ເຈົ້າອາດຖາມວ່າ: “ຂ້ອຍຢາກຮູ້ວ່າເຈົ້າຄິດແນວໃດກັບການປະຊຸມມື້ນີ້ ມີວິທີທີ່ເຮົາຈະຕິດຕໍ່ກັນໄດ້ບໍ?”
