ຊີວິດຄລິດສະຕຽນ
ຮັກພະເຈົ້າແລະຮັກຄົນອື່ນ—ວິທີປູກຝັງຄຸນລັກສະນະນີ້
ເຖິງວ່າຄລິດສະຕຽນບໍ່ໄດ້ຢູ່ພາຍໃຕ້ກົດໝາຍຂອງໂມເຊ ແຕ່ກົດໝາຍ 2 ຂໍ້ທີ່ສຳຄັນທີ່ສຸດທີ່ບອກໃຫ້ຮັກພະເຈົ້າແລະໃຫ້ຮັກເພື່ອນບ້ານກໍຍັງເປັນສິ່ງທີ່ພະເຢໂຫວາຢາກໃຫ້ເຮົາເຮັດ. (ມັດ. 22:37-39) ຄວາມຮັກແບບນັ້ນບໍ່ໄດ້ມີໂດຍອັດຕະໂນມັດ ເຮົາຈຳເປັນຕ້ອງປູກຝັງ ແຕ່ຈະເຮັດແບບນັ້ນໄດ້ແນວໃດ? ວິທີທີ່ສຳຄັນຢ່າງໜຶ່ງຄືການອ່ານຄຳພີໄບເບິນທຸກມື້ ເມື່ອເຮົາໄດ້ພິຈາລະນາແງ່ມຸມຕ່າງໆກ່ຽວກັບຄຸນລັກສະນະຂອງພະເຈົ້າໃນຄຳພີໄບເບິນ ເຮົາຈະເຫັນ “ຄວາມສະຫງ່າງາມຂອງພະເຢໂຫວາ.” (ເພງ. 27:4, ລ.ມ.) ຜົນກໍຄື ເຮົາຈະຮັກພະອົງຫຼາຍຂຶ້ນແລະຄວາມຄິດຂອງເຮົາກໍຈະຄືພະອົງຫຼາຍຂຶ້ນຄືກັນ. ນີ້ກະຕຸ້ນເຮົາໃຫ້ເຊື່ອຟັງກົດໝາຍຂອງພະອົງ ເຊິ່ງລວມເຖິງຄຳສັ່ງທີ່ໃຫ້ສະແດງຄວາມຮັກຢ່າງບໍ່ເຫັນແກ່ຕົວຕໍ່ຄົນອື່ນ. (ໂຢ. 13:34, 35; 1 ໂຢ. 5:3) ໃຫ້ເຮົາມາເບິ່ງ 3 ວິທີທີ່ຊ່ວຍເຮົາໃຫ້ຮູ້ສຶກມ່ວນກັບການອ່ານຄຳພີໄບເບິນຫຼາຍຂຶ້ນ:
-
ໃຊ້ຈິນຕະນາການເພື່ອນຶກພາບໄປນຳ. ຕອນທີ່ເຈົ້າອ່ານຄຳພີໄບເບິນ ຂໍໃຫ້ນຶກພາບວ່າເຈົ້າຢູ່ໃນເຫດການນັ້ນ. ເຈົ້າຈະໄດ້ເຫັນ ໄດ້ຍິນ ແລະໄດ້ກິ່ນຫຍັງແດ່? ແລະຄົນອື່ນໆທີ່ຢູ່ໃນເຫດການນັ້ນອາດຮູ້ສຶກແນວໃດ?
-
ໃຊ້ວິທີການອ່ານທີ່ຫຼາກຫຼາຍ. ຕໍ່ໄປນີ້ເປັນບາງວິທີທີ່ເຮັດໄດ້ເຊັ່ນ: ອ່ານອອກສຽງຫຼືຟັງບັນທຶກສຽງການອ່ານໂດຍເບິ່ງເນື້ອໃນໄປນຳ. ເລືອກອ່ານກ່ຽວກັບບຸກຄົນໜຶ່ງຫຼືເລື່ອງໃດໜຶ່ງໃນຄຳພີໄບເບິນແທນທີ່ຈະອ່ານເປັນບົດໆລຽນກັນ. ຕົວຢ່າງເຊັ່ນ: ອ່ານເລື່ອງຂອງພະເຍຊູໂດຍໃຊ້ພາກຜະໜວກ ກ7 ຫຼື ຂ12 ໃນຄຳພີໄບເບິນສະບັບແປໂລກໃໝ່ ແລະເມື່ອອ່ານຂໍ້ຄຳພີປະຈຳວັນກໍອາດເປີດອ່ານບົດນັ້ນຈາກຄຳພີໄບເບິນ ຫຼືອ່ານຄຳພີໄບເບິນຕາມລຳດັບເວລາທີ່ຂຽນ.
-
ອ່ານເພື່ອຈະເຂົ້າໃຈ. ການອ່ານຄຳພີໄບເບິນພຽງໜຶ່ງບົດທຸກມື້ດ້ວຍຄວາມເຂົ້າໃຈແລະຄິດຕຶກຕອງກໍດີກວ່າການອ່ານພຽງເພື່ອໃຫ້ໄດ້ຫຼາຍໆບົດ. ດັ່ງນັ້ນ ໃຫ້ຄິດເຖິງສາກເຫດການທີ່ເກີດຂຶ້ນ ວິເຄາະລາຍລະອຽດ ໃຊ້ແຜນທີ່ແລະຂໍ້ອ້າງອີງ. ໃຫ້ເຈົ້າຄົ້ນຄວ້າຢ່າງໜ້ອຍໜຶ່ງເລື່ອງທີ່ເຈົ້າບໍ່ເຂົ້າໃຈ. ຖ້າເປັນໄປໄດ້ ໃຫ້ໃຊ້ເວລາຄິດຕຶກຕອງເທົ່າກັບເວລາທີ່ເຈົ້າອ່ານ.
