“A ɣɛ ga kala-mɔa.” (Hiiɓ. 5:12) Ɣi-gaa-ziɛ nɔ, Jehova—ɣa e ga kala-mɔ walai zui ɓɔga gee wɔlɔgi zu—tɔwɔ e de liliga ga de ɓɔ numaa va te faa wɛ̃ɛ e vile ba! Ga de ɓɔ numaa va te faa maa woli e vile Jehova va—kaalai zu, kuuwui zu, ɔɔ Gala goo wosu vɛ—ɛ lɛ ga soloya lii na ɣa ɣɛɛna tɔ ga faa ɓi. Da leve sa ɣɛ le de tii nii ɣɛ?

Gaa-zaɣa-kɛɛ nii ɣaa wotegi ɣa woi niitiɛ zu Pɔɔ boni Temete ma: “Yiɛ ɣaa-ɓaa kɔlɔ lodo fai ma kpɔ su, yiɛ numaa ɣaa-nɛkpɛ, yiɛ kalabo bo.” Pɔɔ ɣɛni wɔnɔ tea: “Ya na ɣɛɛna ya ɓɔɔ maazu vɛtɛ e vɛɛ niitiɛ va ta wuito e woo ma.” (1 Tem. 4:13, 16) Keela woi e de ya towa ɓɔ numaa va te zɛʋu maa zɔlɔwo. Na ma tɔ ga faa ɓi ga è ɣaa-ɓaa kɔlɔ lodo fai ɓɔga kalabo fai ma. Te kɔlɔi nii ɓɛtɛvɛ ga e ɓɔ e va e na ɣɛ. Wɛlɛ faa taniga va te kɔlɔi nii zu.

Jehova ɣa e ga kalamɔ walai. (Isa. 30:20) Kɔlɔi nii ɣa vaazu ɓɔsu e va ga e ɣaa-ɓaa yiɛ kɔlɔ lodo ga pagɔ na ɣa ɣɛɛna yiɛ numaa ɣalabo ga pagɔ. Na ɓalaa ɣɛɛvɛ kwɛ̃ɛ ga tɛnɛgoitiɛ ɓɔgapɛ te kɔlɔi nii zu, kulovɛ Jehova ya na ɣa ɣɛɛna tɔ numaa lɔtɔsu ɓɔɔ va. (Jɔ̃ 6:44) Na ma, yiɛ Jehova ʋile siɛ nɛpɛ ma na gaa-ɓai ʋaa ma. Yiɛ yee zei tɛnɛgoitiɛ wu te Gala Kɔlɔi zu. Siɛ nɛpɛ ma, yiɛ saala la Jehova ma lɛ ga ya ɓɔɔ. Taitiɛ ta wuito e ma, ɣaa-ɓaa e ɓɔ te va ga wõila ɓɔɔɓɔɔ ge ɣɛ te ya Jehova ʋaa ma.

Gala goo wotii nii e kɛɛzu, tɔ ga tii nii kuloai ba leilaa Jehova fea nu ɓuse ya. Ge laavɛ la ga ya yee laana gaa-ɓai nii ma Jehova fea, ya wulo su-nu-ma.—1 Pi. 4:11.

Wo ɣaa yɔwɔ̃itiɛ,

Jehova Na Seeleitiɛ Ta Ɣala Goo Wotii Maazu Vɛtɛ Veaitiɛ