KALABO 4
Ɓɛɛ Ɣa É Gaa Ziizɛ Kolai?
1. Ziizɛ na ŋeteagi lɔɔ-zeini ɣɛ le?
Tuɓo veleitiɛ ta ga zɛɓɛ te ɣɛni Ziizɛ ya ɔɔ kɛ numaa te lɔtɔ ba?—MAFIYU 11:29; MAKI 10:13-16.
Ziizɛ ɣɛni ga ŋinɛ pagɔ Gala taa tɔɔ vɛɛ kaazu zui ma. (Jɔ̃ 8:23) E ɣɛni ga Gala ɓɛtɛ ŋaniitiɛ pɛ te ma maa wũgi. Na ɣa ɣɛɛ na, towaa Jehova gaa ɓaa ʋeeni zèea ga e ŋani ɓɔgapɛ kpɛtɛ. Jehova ɓɔɔɓɔɔ ka e Ziizɛ ɓɛtɛni, na ɣa é Ziizɛ ɣɛɛ ga “Gala duu ɣilekpugi.” (Jɔ̃ 1:14) Ziizɛ ɣɛni ga Gala daa woo leve nuu, na ɣa e kɛɛ ta tili ga Woi.—Hiiɓuluitiɛ 1:2; Kolasaitiɛ 1:15, 16 lodo.
2. Ziizɛ vaani zui nii ma zɛɓɛ ʋaa ma?
Jehova ɣa é Ziizɛ leveni zui ma. Dusi ŋaza nui nii daa ɣɛni ga Meele towaa e Ziizɛ ɣaani. E ɣɛni ga kpea niinɛ ɛ lɛ ɣɛni zunu ʋaa woni. Nii ɣa dɛɛzu gaa, kèea ʋaa lɛ ŋɛni Ziizɛ va zui zu. (Luki 1:30-35) Ziizɛ vaani zui nii ma (1) ga e gaamai lɛ ga diɛ é vile Gala ba. E vaani kɔnɔ ga (2) é ɓɔ de va de kwɛ̃ɛ gaa nii da kɛ ga de Gala zii-la ani ɓalaa daa na faa ɓoei yee wu. Na ɣa ɣɛɛ na, (3) é vaani ɓalaa ga e de yɛʋui “wũ-maa-wo.”—Mafiyu 20:28 lodo.
3. Zɛɓɛi e kɛɛ manɛɛ de wũ-maa-wo ŋanii maa zɔlɔ wo?
Wũ-maa-wo ŋanii ɣa ga nii ya fe ga é nuu wũ-maa-wo saa ya. Jehova lɛ nu ɓuse ɓɛtɛni ga te wɔlɔ-zaɣa ɔɔ nɔ ɣɛ ga te za. Zɛɓɛi ya ɓɔ de va de nii ɣaa ɣa? Gulu gila ge ɣɛni zuu vagɔi zu Gala gé boni Adã ma ga é mɛ lɛ mi, ani ɔ mii na ɔ́ za. Ani Adã lɛ ɣɛni gulu ɣai nii miini, ɔ yɛ ŋetea wɔlɔ-wɔlɔ ta wɔlɔ-wɔlɔ. (Genesis 2:16, 17; 5:5) Gala Kɔlɔi bogɛ gaa Adã ɣa é kɛɛ nu ɓuse yɛ za, ɓɔvɛlaale Adã ɣɛni ga faa yowũ ɣɛɛ nuu ɔ́ deaitiɛ ka. Tei de pɛ de ga Adã deaitiɛ, na ɣa e kɛɛ de pɛ dɛɛ za faa yowũi laa-zɔ su. Wũ-maa-wo ŋanii ɣa ɓɔ de va é saai wulo de wulu de maa zɔlɔ woni Adã wulu vele zu.—Loomɛitiɛ 5:12; 6:23 lodo.
Ɓɛɛ ɣa ɔɔ de wũ-maa-wo saa ya? Saai ɣa é gaa nuu pɛ na faa yowũ zɔmɔ-sɔgi. Faa yowũ ɣɛɛ nuu nɛpɛ lɛ ʋɔlɔ nuu wũ-maa-wo ga saa ya.—Loomɛitiɛ 3:23, 24 lodo.
4. Zɛɓɛi é kɛɛni Ziizɛ yɛ za?
Ziizɛ lɛ ɣɛni ga faa yowũ ɣɛɛ nuu é ɣɛ velei nu ɓuse la. Na ma, Ziizɛ lɛ zaani ɓɔɔ ʋaa ma. Ɛ lɛ faa yowũ nɛpɛ kɛɛni. Ziizɛ zaani nu ɓɔgapɛ faa ma. Gala ge wõila ɓɔɔɓɔɔ dɛɛni ga nu ɓuse ɓɔvɛlaale, é duu ɣilekpugi leveni ga na za de ʋaa ma. Ziizɛ ɓalaa woila lɛɛvɛ ga diɛ, ɓɔvɛlaale e ʋaani bu ga e va e za de ʋaa ma.—Jɔ̃ 3:16; Loomɛitiɛ 5:18, 19 lodo.
Wɛlɛ ʋiliogi nii va Zɛɓɛi É Kɛɛni Ziizɛ Yɛ Za?
5. Ziizɛ loso ɣa saa gaa minɛɛ Gala taa?
Ziizɛ seeɓɛ vea valoni, e saa vea wu ziɣi saa ya. É lite wɔnɔ é numaa wulo faa ɓoei zu. Nii ɣa dɛɛzu ga Ziizɛ ɣa vaazu daa-nɔwɔ-wogi ɓɔgapɛ kpeazu ŋinaa ŋateai zu. Nii ɣaa ɣɛ ga kulo-su-nuu-ma goo-mɛni bea ʋaa ma. (Mafiyu 15:30, 31; Jɔ̃ 5:28) Tei Ziizɛ zaani, Gala bu ziɣini saa ya é ŋɛni dɔtɔi ʋe zèea. (1 Pite 3:18) Ziizɛ zeini ga Gala yee za-su vele yɛ na maa kpowũ ga ná gaa ɓaa ʋe zèea ga é ɣɛ ga masa zui maa zu. (Hiiɓuluitiɛ 10:12, 13) Ziizɛ ɣa saa ga masa Gala ta. Na ɣa ɣɛɛ na, keela woi é vile masadai nii va pulu veaitiɛ ta dɛɛzu ga numaa zui wɔlɔ-kɔlɔ ma.—Faa Wuloai Kɛnɛ Ma 11:15; Mafiyu 24:14 lodo.
Su ɓuovɛ sa ga Ziizɛ na masadai va zui maazu. Na ɣa ɣɛɛ na towaa sa ya daa-nɔwɔ-wogi ɓɔgapɛ kpea. Taitiɛ zee-la-ma te ya é vile Ziizɛ va, tiɛ goo-mɛni kulo zéea ta vaazu yɛ su zuu vagɔi zu zui nii ma.—Psalm 37:9-11 lodo.
