Niitiɛ é maa wolia Gala Kɔlɔi zu é ya wõilai zuɓaa é vile Jehova va. Maa nɛɛvɛ de li wũ ma de da wõilai zuɓaa e vile Jehova va. (1 Pite 2:2) Ani e wõini e yɛ ŋetea wɔlɔ-wɔlɔ ta wɔlɔ-wɔlɔ keni é ɣaa ɓaa yɛ Gala Kɔlɔi maa woli ga e lɔtɔ Jehova va.​—Jɔ̃ 17:3; Juu 21 lodo.

Ya faa lamaa maa woli na e vile Jehova va ya yee-la-mai zu ɣaa ɓaa. Ya yee-la-mai ɣaa ɓɔ e va e Jehova yii-mai ɣɛ. (Hiiɓuluitiɛ 11:1, 6) Towaa ɓɔ e va e wulu ɣaa ʋe ya ʋaa yowũitiɛ va, è luɓo velei maa ʋeli bo.​—Te Ɣɛɛ Ʋaitiɛ 3:19 lodo.

Nii e maa wolia yá ɣɛ woini e dɛ ga numaa ɓɔvɛlaale, de wuuzu ɣaa nɛɛ ga de keela woo vagɔ wo numaa ma. Ani ya lebi na Gala Kɔlɔi maa woli zu, na ɣa ɓɔ yiɛ e kwɛ̃ɛ ga velei ya keela woo vagɔi nii lɛɛ la ga numaa. Na ɣa dɛ ga zee-la-ma ɣa e ya e vile Gala ba.​—Loomɛitiɛ 10:13-15 lodo.

Numaa fikaa taa tɔɔ-zei gaa tiɛ Gala Kɔlɔi lɛ gaa ta ziɛ-puluitiɛ e vɛɛ te ɣaa-yɔwɔ̃itiɛ va. Kwɛ̃ɛ ga velei ya kɛɛ la ga pagɔ. Yɛpɛ te wɔ e vile Gala na ki-togitiɛ va, mɛ lɛ faa yowũ wo e vile niitiɛ va te lai la. Kwɛ̃ɛ gaa e luɓo vele vagɔi ɣaa faa vɛɛ numaitiɛ ta ɣi-gaa-ziɛi va, e leve nii va ya bo te ma.​—2 Temete 2:24, 25 lodo.

Ya na Gala Kɔlɔi maa woli zu towaa ɓɔ e va e li naa yee luo ma Gala fai zu. Siɛ-pulu vagɔ ɣaa ɣɛ wo yɔɔzu wa  Jehova. Yaa ɣɛ gaa Jehova na numaitiɛ te ta wo ɣɛ ga kaala gila.​—2 Kɔlĩitiɛ 6:18 lodo.

Ɣaa ɓaa yɛ Gala Kɔlɔi maa woli, nii ɣa ya yee-la-mai zuɓaa Gala fai zu. (Hiiɓuluitiɛ 5:13, 14) Jehova Na Seeleitiɛ te ta ɣaa-zaɣa kɛ te ɓɔ e va e Gala Kɔlɔi maa woli. Kɔlɔi nii ta ɣɛ ma What Does the Bible Really Teach? Towa ɓɔ yiɛ e Gala Kɔlɔi ma woli. Ani ya faa lamaa maa woli na Gala Kɔlɔi zu, towaa ɓɔ yìɛ e ŋetea vagɔ ɣɛ.​—Psalm 1:1-3; 73:27, 28 lodo.

Keela woo vagɔi wulovɛ Jehova ya nii e gaa kuu-zu-nɛɛ Ɣalagi. Ani e wõini e lɔtɔ Jehova va keni e lɔtɔ na seelaitiɛ va. (Hiiɓuluitiɛ 10:24, 25) Ya ɣaa ɓaa na yɛ Jehova yii-mai ɣɛ, ya zɛʋui nii ma zɔlɔ wo kwɛ̃ɛ gɛ lɛ ba. Faa vagɔi ya kɛ ya ŋeteai zu tɔ ga e lɔtɔ Jehova va.​—1 Temete 1:11; 6:19 lodo.