De ɓɛtɛ Ɣalagi ɣele-ɣele gɛ e leve de va. Kpɛdɛvɛ de ʋaa ma è ɣɛ velei duu keea vagɔi ɣa wõila ga deaitiɛ. Ɛ lɛ de ɓɛtɛni gaa dɔɔ ɣɛ ɓɔɔ yee-ma. (Jeremiah 10:23) Velei nɔ duu kɛɛ vea vagɔitiɛ ta te leaitiɛ maazu vɛtɛ da, vele nɔɔ ɣa manɛɛ de yee-zei la Jehova na maazu vɛtɛgi wu (Isaiah 48:17, 18) Tɛnɛgi é Gala Kɔlɔi zu towaa ɓɔ de va.​—2 Temete 3:16 lodo.

Jehova na tɔgi ɓɔga na tɛnɛgi é Gala Kɔlɔi zu towaa ɓɔ de va de ŋetea vagɔ ɣɛ zaa, é ɓɔ de va de ŋeteai nii zɔlɔ wo kwɛ̃ɛ gɛ lɛ ba. Tei Gala ka é de ɓɛtɛɛ, maa nɛɛvɛ diɛ ziɛ gaa na tɔgi.​—Te Ɣɛɛ Ʋaitiɛ 15:29; Faa Wuloai Kɛnɛ Ma 4:11 lodo.

Tɛnɛgi é Gala Kɔlɔi zu towaa tɔgi zɔitiɛ vilegiɛ ba. Tɔgi zɔitiɛ ta ɓɔ de va faa taniga ʋaa ma. (Deuteronomy 22:8) Ani faa ta nɛpɛ ka vaana de yee laa luo, maa nɛɛvɛ de ɣi-gaa-ziɛ tɛnɛgi nii taniga ma ya ɓɔ de va fai natiɛ zu. (Proverbs 2:10-12) Gala Kɔlɔi bogɛ gaa zɛʋu wulovɛ Gala zéea. Tɛnɛgi nii ɣa ɓɔ de va de ɓɔɔ maazu vɛtɛ vɛ nɛpɛgi da ɣɛ na. Towaa kɛ wɔnɔ, dɛ lɛ faa nɛpɛ kɛɛ ya ŋada-zei nuu nɛpɛ ba.​—Te Ɣɛɛ Ʋaitiɛ 17:28 lodo.

Ziizɛ yɛpɛni é vile tɔ kpakpa felegɔ va. Ma maa wũgi zaɓui lɛɛvɛ de ma ŋeteai zu, natiɛ taa gaa, de Gala kwɛ̃ɛ, de wõila lɛ, de zii-mai ɣɛ. Maa nɛɛvɛ de ɣi-gaa-ziɛ tɔ maa wũgi nii ma daa na faa nɛpɛ deʋe zu. (Proverbs 3:6) Taitiɛ ta ziɛ ga tɛnɛgi niitiɛ siɛ-pulu ɣaa ɣɛ te yɔɔzu ta Jehova ni, kuu-zu-nɛɛ  ɓɔɔɓɔɔ kaa ɣɛ te ya, na ɣaa ɣɛɛ na taa zɛʋui nii zɔlɔ wo kwɛ̃ɛ gɛ lɛ ba.​—Mafiyu 22:36-38 lodo.

Tɔ fele kelei ɣaa ɓɔ de va zii-laa ɣɛ de ya daa na de veaitiɛ zaama. (1 Kɔlĩitiɛ 13:4-7) Velei Gala ka numaa zoda, daa maa woli ani da ziɛna ga tɛnɛ fele kelei.​—Mafiyu 7:12; 22:39, 40 lodo.

Tɛnɛgi é Gala Kɔlɔi zu towaa va gaa zee-vili kiizu kaalai zu. (Kolasaitiɛ 3:12-14) Gala Kɔlɔi tɛnɛ ta ɓalaa lɛɛvɛ ya ɓɔ kaalai va tɔɔ gaa, ʋulu vea te mɛ lɛ ɣaa wɛɛ.​—Genesis 2:24 lodo.

Ani da ziɛ na gaa tɛnɛgi é Gala Kɔlɔi zu, daa de woligitiɛ maa zu vɛtɛ, kuu-zu-nɛɛ ɣa ɣɛ de ya. Da wɔnɔ da tii vagɔ zɔlɔ wo ga de kɛ ɓɔvɛlaale taitiɛ ta tii ɣɛɛ vea ɣaa ziɛ ta niitiɛ ɣaa ziɛ te ga tele-bo bea, tiɛ ziɛ gaa tɛnɛgi é Gala Kɔlɔi zu. (Proverbs 10:4, 26; Hiiɓuluitiɛ 13:18) Gala daa woi de lɛnɛ gɛ wɔnɔ gaa de mɛ lɛ yii zɛlɛ faa ta nɛpɛ ma, nii ya ɣɛ de ya naa de yii-la, de Gala fai lo faa pɛ tuo.​—Mafiyu 6:24, 25, 33; 1 Temete 6:8-10 lodo.

Ani da ziɛ na gaa tɛnɛgi é Gala Kɔlɔi zu, towaa ɓɔ de va de ɓɔɔ maa zu vɛtɛ, da maa wooza seeɓɛ lamaa va. (Proverbs 14:30; 22:24, 25) Daa ziɛ na ga tɛnɛgi é Gala Kɔlɔi zu towaa kɛ wɔnɔ, dɛ lɛ dɔɔ-ɓakpa-ɓoale ya, naa ɣaa kɛ dɛ lɛ zeeɓɛɛ, ɔɔ nɔ ɣɛ gaa ŋada zei de va. (Proverbs 23:20) Jehova lɛ ɣɛni tea nuu mɛ lɛ dɔɔ ɓoale. Kɛ, lɛ vani gaa è kpoale é è zo. (Psalm 104:15; 1 Kɔlĩitiɛ 6:10) Tɛnɛgi é Gala Kɔlɔi zu towaa kɛɛ da ɣi-gaa-ziɛi ɓɔga de luɓo-velei ɣɛ gaa faa vagɔ. (Psalm 119:97-100) Kolai maa veaitiɛ tɛ lɛ nɔ zia gaa tɔgi é Gala Kɔlɔi zu gaa te wulo su-nuu-ma. Taa kɛ gaa te Gala daa maa lɛ.​—Mafiyu 5:14-16 lodo.