KALABO 5
Zɛɓɛi É Ga Gala Na Deʋei É Vile Zui Va?
1. Gala zui ɓɛtɛni zɛɓɛ ʋaa ma?
Jehova zui nii ɓɛtɛni nu ɓuse ʋaa ma. Naa ɣa manɛɛ de ɣɛ na, Gala lɛ Adã ɓɔga Iivi ɓɛtɛni ga te ŋetea kɛ Gala ta ɔɔ nɔ ɣɛ ga te duu ɣa na te na laaʋe. Kɛ é boni te ma gaa te duu ɣa te zui ma laaʋe. Jehova é na keelaitiɛ ɓɛtɛni ga te yɛ Gala taa. (Job 38:4, 7) Tei Jehova é Adã ɓɔga Iivi ɓɛtɛni, é ŋada vagɔi nii ʋeeni te ya tɔɔ na lili ga Idɛ̃ ga te yɛ na. (Genesis 2:15-17) Jehova boni ga manɛɛ Adã ɓɔga Iivi é vɛɛ te leaitiɛ va tɔɔ yɛ zui ma tiɛ yii-ma ɣɛ wɔlɔ-wɔlɔ ta wɔlɔ-wɔlɔ.—1 Jɔ̃ 2:17 lodo.
Tei Gala ge zui ɓɛtɛni ga ma maa wũ, vɛ na laa ɣɛni ga Idɛ̃ naa nɔ ɣa na ɣɛni ga zuu vagɔi. Manɛɛ Adã ɓɔga Iivi tɔɔ duu ɣa te zui ma laaʋe ga te leaitiɛ. Na yee luo vele tɔɔ saa zui wɔlɔ-kɔlɔ ma ɣɛ gaa zuu vagɔi ta te leaitiɛ. (Genesis 1:28) Zui nii ɣa é gaa nu ɓuse wɔ taazu wɔlɔ-wɔlɔ ta wɔlɔ-wɔlɔ. Gala gɛ lɛ wɔlɔ-wɔlɔ ma zui nii ŋala-ŋala ga.—Psalm 104:5 lodo.
Wɛlɛ ʋiliogi nii va Gala Zui Ɓɛtɛni Zɛɓɛ Ʋaa Ma?
2. Zɛɓɛi é kɛɛ zui lɛ dɛ ga ŋada vagɔ?
Jehova é Adã ɓɔga Iivi ɓɛɛni Idɛ̃ ɓɔvɛlaale te goo-mɛni-talai wuloni. Nuu nɛpɛ gɛ lɛ zoo ga ɔ́ va ga zuu vagɔi nii Adã ɓɔga Iivi te valani ma. Faa yowũ ɣɛɛ veaitiɛ te ŋeteagi nii ŋala-ŋala ga.—Job 9:24.; Loomɛitiɛ 5:18 lodo.
É ɣisu Jehova na deʋei nu ɓuse ʋaa ma lɛ saa wɔlɔ-wɔlɔ ɣɛɛ? Towaa ɣɛ ɓɔvɛlaale Jehova ɣa é ga gaa ɓaa pɛ ma Ɣalagi, nii ya bo na ɣa ya ɣɛ. (Isaiah 45:18) Velei é wõini nu ɓuse ŋetea ɣɛɛ la vele ɣa na é vaazu ɣɛɛzu la.—Loomɛitiɛ 8:21 lodo.
3. Zui ɣa vaazu ɣɛɛzu ga ŋada vagɔ ɣɛ le?
Zui ɣa vaazu ɣɛɛzu ga ŋada vagɔ Ziizɛ na masadai ɣa vaa na. Ziizɛ ɓɔga Gala na ŋiŋɛgi zɔitiɛ ta vaazu kɔi nii wɔɔzu da ɣɛ maa Amagɛdɔ̃. Ta vaazu Gala zili-yɔwɔ̃itiɛ zu ŋala-ŋala su. Ziizɛ ɣa vaazu Seeta vili su kpidi vɛlɛ wu kwena tawuu-su gila faa ma. Niitiɛ te wuito su Gala ma, Ziizɛ ɣa vaazu te maazu vɛtɛsu é te wũ-maa-wo Amagɛdɔ̃ wɔi zu. Taa yɛ ŋetea wɔlɔ-wɔlɔ ta wɔlɔ-wɔlɔ zuu vagɔi zu.—Faa Wuloai Kɛnɛ Ma 20:1-3; 21:3, 4 lodo.
4. Siɛ sɛɓɛi daa-nɔwɔ-wogi ɣa ɓea la?
Ʋolo ɓɛɛ ɣa Gala ka daa-nɔwɔ-wogi ɓea la zui zu? Ziizɛ é po-kɔ̃ɔ feeni yɛ dɛ gaa siɛgi Gala ge vaazu daa-nɔwɔ-wogi ɓea zu la maa ɓuovɛ saa. Faitiɛ zaa e ɣɛɛzu zui zu tɔɔ dɛɛzu gaa da saa ŋetea ɣaa ɓelagi zu. Yɛ dɛ wɔnɔ ga Gala na siɛgi ma ɓuovɛ saa.—Mafiyu 24:3, 7-14, 21, 22 lodo.
Ziizɛ na masadai ɣa vaazu ɣɛɛzu zui maazu gaa kwena tawuu-su gila. Siɛgi na zu ɣa daa-nɔwɔ-wogi vaazu ɓea zu la. (Isaiah 9:6, 7; 11:9) É wulo masadai wulu, Ziizɛ ɣa vaazu ɣɛɛzu ga zalaɣa-wulo nuu walai. Numaitiɛ te wuito su Gala ma towaa ta ʋaa yowũi zu ʋaa yɛ. Gala ka vaazu gaa ɓaa ʋeezu Ziizɛ ya ga é seeɓɛi ɓɔga pɔlɔ-zaɣagi ɓea é vɛɛ saa va.—Faa Wuloai Kɛnɛ Ma 21:4 lodo.
5. Ɓɛɛni ka te vaazu ɣɛɛzu ŋada vagɔi nii zu?
Ani ya lii na Jehova Na Seeleitiɛ ta ɣala feli vɛlɛi la ya wɛlɛ ɓɔɔ numaa va wõila ɓɔɔɓɔɔ ge te ya Gala faa ma. Te zɔɓɛlɛ zogiɛ ga te Gala yii-mai ɣɛ
Numaitiɛ te wuito su Gala ma, tiɛ ka te vaazu ɣɛɛzu zui zu. (1 Jɔ̃ 2:17) Ziizɛ é pulu veaitiɛ leveni ga natiɛ te numaa ɣalabo gaa te ɣɛ gaa goo-mɛni-bea. Na ɣa ɣɛɛ na te ɣɛ gaa Gala na siɛ-pulua. Jehova ɣa sa ɓɔsu numaa lamaa va gaa te zɛʋui nii ma zɔlɔ wo kwɛ̃ɛ gɛ lɛ ba zuu vagɔi zu, zui nii ma. (Zephaniah 2:3) Ani ya lii na Jehova Na Seeleitiɛ ta ɣala feli vɛlɛi la, ya faa lamaa maa woli é vile kaalai va. Nii ya ɓɔ ŋaza kɛbɛ vea va ta ɓɔga zini kɛbɛ vea te ɣii zo gaa pagɔ. Towaa ɓɔ kɔnɔ duu kɛɛ veaitiɛ va ta té leaitiɛ te kuu-zu-nɛɛ zɔlɔ wo kaalai zu. Duu kɛɛ veaitiɛ ɓɔga te leaitiɛ ta Gala Kɔlɔi maa woli kii-ma tiɛ wulo su-nuu-ma.—Faa Wuloai Kɛnɛ Ma 15:4 lodo.
