Eeɓɔlɔhɛ̃ɛ nii e ɣɛni ga kaala wũ tuo nuu, Gala ge deaitiɛ ɣaa lɛɛni-ba zuu gila su é tɔ fe te ya. É zui ɓɔɔ lili ni gaa “Yezɔ,” tiɛ ka manɛɛ tɔɔ ɓɔ numaa va te Gala Kɔlɔi ɓɔga Gala feli velei maa woli. (Psalm 147:19, 20) Numaa lamaa te zui wɔlɔ-kɔlɔ ma tɔɔ wulo nii su-nuu-ma.​—Te Ɣɛɛ Ʋaitiɛ 3:25 lodo.

Gala ge Yezɔitiɛ ziɣini gaa te ɣɛ gaa na seeleitiɛ. Yezɔitiɛ ta wo-kɔ̃ɔ-mai ɓɔgɛ de va de kwɛ̃ɛ gaa ani da ziɛ na gaa Gala na tɔgitiɛ daa wulo su-nuu-ma. (Deuteronomy 4:6) Yezɔitiɛ ka manɛɛ tɔɔ ɓɔ nuu pɛ ba te gaama Ɣalagi wɛ̃ɛ.​—Isaiah 43:10, 12 lodo.

Tei Yezɔitiɛ tɛ lɛ ŋɛni saa wuito so Jehova ma é te maa ʋelini gaa Kolai maa veaitiɛ. (Mafiyu 21:43; 23:37, 38) Kolai maa vea ɓɔɔɓɔɔ gitiɛ ka saa te gaa Jehova Na Seeleitiɛ, Yezɔitiɛ laa le saa.​—Te Ɣɛɛ Ʋaitiɛ 15:14, 17 lodo.

Ziizɛ pulu veaitiɛ ɣaa lɛɛni ba e te ɣalabo gaa te Gala gói wo zui wɔlɔ-kɔlɔ ma. (Mafiyu 10:7, 11; 24:14; 28:19, 20) Tii nii ɣa sa vaazu ɓeazu ɓɔvɛlaale ŋeteai ɣaa ɓela foloi ɣa sa vaazu ziiti zu. Zui wɔlɔ-kɔlɔ ma Jehova ɣa saa numaa lamaa ɣaalɛɛ-zu ba gaa te feli. (Faa Wuloai Kɛnɛ Ma 7:9, 10) Gaama Ɣala feli veaitiɛ te yee-viligɛ kii-zu ga tiɛ ɣiini su baa, tiɛ kɔnɔ ɣiini zii ɣaa wɔwɔ-pɔ. Zui wɔlɔ-kɔlɔ ma kalabo ma zii gilagi nɔ ɣa ta wulo su-nuu-ma ta ɣaalɛ-baitiɛ zu.​—Hiiɓuluitiɛ 10:24, 25 lodo.

Kwenagi nii zu 1870, numaa fikaa te tɔɔ zeini gaa tiɛ Gala Kɔlɔi ma woli wɔnɔ. Te zooni te gaama lamaa wɛ̃ɛ Gala Kɔlɔi zu. Te kwɛ̃ɛni gaa Ziizɛ boni pulu veaitiɛ ma gaa te Gala gói wo, naa ɣa e kɛɛni te tɔɔ zei gaa tiɛ Gala gói wo zui wɔlɔ-kɔlɔ ma. Kwenagi nii zu 1931, te daa-zeigi nii ziɣini e Gala Kɔlɔi zu na ɣa ga Jehova Na Seeleitiɛ.​—Te Ɣɛɛ Ʋaitiɛ 1:8; 2:1, 4; 5:42 lodo.

Kolai na siɛgi zu, taitiɛ te ɣɛni Gala feli ʋai ma ɓawola, te ɓɔni Kolai ma veaitiɛ va te kwɛ̃ɛ gaa Ziizɛ ɣa e gaa kuu-wui ma wũ tuoi. (Te Ɣɛɛ Ʋaitiɛ 16:4, 5) Velei nɔ e ɣɛɛni la wɔlɔ-wɔlɔ zu, taitiɛ te Gala feli ʋai ma ɓawola ta zaa ɓɔsu Jehova Na Seeleitiɛ va. Taitiɛ te Gala feli ʋai ma ɓawola zui wɔlɔ-kɔlɔ ma, tiɛ ka te Jehova Na Seeleitiɛ ta ofisi walaitiɛ maazu vɛtɛsu. Na ɣa te kɔlɔitiɛ ɓɛtɛ zu na zii woo lamaa zu tevegɛi ɓalaa zii woo 600 va. Taitiɛ te Gala feli ʋai ma ɓawola tiɛ ka te tɛnɛ feezu de ya kuloai Gala Kɔlɔi zu, tiɛ pele wulo ga kuu-wuitiɛ tevegɛi ɓalaa 100,000 ba zui wɔlɔ-kɔlɔ ma. Tiɛ wɛlɛ wɔnɔ Gala goo wotii maazu va zui wɔlɔ-kɔlɔ ma. Kuu-wuitiɛ zu, kuu-wuu wũ tuo veaitiɛ ta na ga te kuu-wui maazu vɛtɛ. Kuu-wuu wũ tuoi niitiɛ te ɓɛdɛvɛ Gala na numaitiɛ ma wõila te ya te ʋaa ma.​—1 Pite 5:2, 3 lodo.

Jehova Na Seeleitiɛ te yee-viligɛ kiizu ga te Gala goo wotii ɣɛ, ga te ɓɔ numaa va te ɣɛ ga Ziizɛ wulu veaitiɛ te ta. Na ya ɣɛɛ na te ɓɔ numaa va gaa te Gala Kɔlɔi maa woli. E ɣɛ velei Kolai ma veaitiɛ te kɛɛni la wɔlɔ-wɔlɔ zu, gaa li pɛlɛitiɛ la gaa ge Gala goi wo numaa ma. (Te Ɣɛɛ Ʋaitiɛ 20:20) Gaa li gaa ge Gala Kɔlɔi lɛ gaa niitiɛ te wõini te gaamai wɛ̃ɛ. Zee-vili kiizu nɔ lei ɔ ɣɛ Jehova Na Seeleitiɛ ya, kɛ ta gaa kaala gila. Jehova ɣa é gaa te ɣeea, wõila zéea te ʋaa ma. Na ɣa ɣɛɛ na taa ɓɔ ɣiini ba. (2 Tɛsɛlonaikaitiɛ 1:3) Tei Jehova Na Seeleitiɛ ta zii-mai ɣɛ, tiɛ ka kuu-zu-nɛɛ ɓɔɔɓɔɔ ge te ya zui nii ma.​—1 Pite 2:9; Te Ɣɛɛ Ʋaitiɛ 20:35 lodo.