KALABO 3
È Ɣisu Keela Woo Vagɔi Nii Wulovɛ Ɓɔɔ Gala Zéea?
1. Ɓɛɛ na kele-ɣele ka e Gala Kɔlɔi zu?
Gala Kɔlɔi bogɛ gaa numaa ta vaazu zɛʋu zɔlɔ wo su kwɛ̃ɛ gɛ lɛ ba zui nii ma. (Psalm 37:29) Kɔlɔ vɛlɛ-vɛlɛ zee-lɔzita kai lɔzita ɣa pua kii-ma Gala Kɔlɔi zu. Gala ge yee ɓadoni nuu yee naagɔ va dai ga tiɛ ga te kɔlɔi nii wonɛ. É ziɣi Genesis ma é zee-la Deuteronomy ma, Mooze ɣa é ponɛni. Tei e te wonɛni kwena ta-wuusu saagɔ wũ dooluo levega saa. Ziizɛ na keelai nii tɔɔ ɣɛ ma Jɔ̃ towaa é Faa wuloai kɛnɛ ma wonɛni. Tei e ponɛni kwena ta-wuusu gila wũ taa-wuo levega saa. Ɓɛɛ na ki-gaa-ziɛ ɣa Gala Kɔlɔ wonɛ veaitiɛ te ponɛni? Gala baa ŋinɛgi ɓɔni te va gaa te Gala Kɔlɔi wonɛ. (2 Samuel 23:2) Gala na ki-gaa-ziɛi ɣa te ponɛni. Nii ɣa dɛɛzu gaa Gala na kele-ɣelegi ɣa e Gala Kɔlɔi zu.—2 Temete 3:16; 2 Pite 1:20, 21 lodo.
Wɛlɛ ʋiliogi nii va Daa Kwɛ̃ɛ Ɣɛ Le Ga Gala Kɔlɔi Ɣa Ga Gaama?
2. Da leve ɣɛ le de kwɛ̃ɛ ga Gala Kɔlɔi ɣa ga gaama?
De koni gaa Gala Kɔlɔi wulovɛ Gala zéea ɓɔvɛlaale nii e boga e vile ŋinaa ŋeteai va tɔɔ ga gaama. Nu nɛpɛ gɛ lɛ zoo ga ɔɔ ŋinaa ŋeteai lɛ ga diɛ. (Joshua 23:14) Gaa ɓaa pɛ ma Ɣalagi nɔ ɣa ya zoo e nii lɛ ga diɛ e vaazu ɣɛɛzu ŋinaa ŋeteai zu.—Taitɔ 1:2, 3; Faa Wuloai Kɛnɛ Ma 1:1 lodo.
Kɔlɔi nii vagɛ ɓɔvɛlaale Gala ka é tevega. Gala Kɔlɔi ɣa sa numaa lamaa ya zui zu é zii-woo lamaa zu. Velei ɓalaa te ponɛni la wɔlɔ-wɔlɔi zu, kele-ɣele bea ta dɛɛzu ga tɔɔ ga gaama. Nii nuu yee naagɔitiɛ te ponɛni Gala Kɔlɔi zu tɔ ga faa gila. * Nii Gala Kɔlɔi boga é vile wõila ɓɔɔɓɔɔ ba, Gala ka kuloai zéea. Gala Kɔlɔi ɣa ɓɔ de va é da ŋeteai maa ʋeli bo. Gaamai niitiɛ te ɓɔga numaa lamaa va te kwɛ̃ɛ ga Gala Kɔlɔi wulovɛ Gala zèea.—1 Tɛsɛlonaikaitiɛ 2:13 lodo.
Wɛlɛ ʋiliogi nii va Ɓɛɛ Na Kele-Ɣele Ka E Gala Kɔlɔi Zu?
3. Zɛɓɛi Gala Kɔlɔi ɣa dɛ ga diɛ é vile Gala ba?
Nii Gala ge deʋea é vile nu ɓuse va tɔ ga faa ɓigi ta Gala Kɔlɔi faa woga e vile ba. Gala Kɔlɔi ɣa ɓɔ de va de kwɛ̃ɛ ga velei nuu maa wũgitiɛ te valani la zuu vagɔi ma ŋeteagi lɔɔ-zei-zuvɛ. Towaa kɛ ɓalaa de kwɛ̃ɛ velei zui nii vaazu ɣɛɛzu kɔnɔ la ga zuu vagɔi.—Faa Wuloai Kɛnɛ Ma 21:4, 5 lodo.
Gala Kɔlɔi ɣa ɓɔ de va de Gala na tɔgitiɛ kwɛ̃ɛ e vɛɛ na tɛnɛgitiɛ va. Towaa ɓɔ kɔnɔ de va de kwɛ̃ɛ velei é numaa zoni la wɔlɔ-wɔlɔ zu, e ɓɔ kɔnɔ de va de tuɓo veleitiɛ wɛ̃ɛ. Gala Kɔlɔi ɣa zoo e ɓɔ de va de Gala kwɛ̃ɛ ɓɔɔ ga pagɔ de ɣɛ ga na siɛ-pulu.—Loomɛitiɛ 15:4; Jĩi 2:23; 4:8 lodo.
4. Yaa leve ɣɛ le é Gala Kɔlɔi ɣaa ɣa?
È ɣɛ velei nɔ Ziizɛ ɓɔni la numaa va te Gala Kɔlɔi ɣaa ɣa, kɔlɔi nii ɣa ɓɔ è va è Gala Kɔlɔi ɣaa ɣa. Ziizɛ ɔɔ Gala Kɔlɔi zu ʋai lɛ ga tiɛ. “E te pɛ su-wulo-zuvɛ lɛɛni ga tiɛ.”—Luki 24:27, 45 lodo.
Faitiɛ te Gala Kɔlɔi zu da wulo su-nuu-ma é leve faa ta nɛpɛ ba. Kɛ, numaa lamaa tɛ lɛ wõini ga te Gala Kɔlɔi maa woli. Na ɣa ɣɛɛ na te yii-ma lɛ ga te wɛlɛ yiɛ yɛ maa woli. Kɛ tɔwɔ, nii mɛ lɛ é ʋii-ɓɛɛ ɓɔvɛlaale ya Gala Kɔlɔi maa woli na, é Gala kwɛ̃ɛ, yaa ɣɛ ŋetea wɔlɔ-wɔlɔ ta wɔlɔ-wɔlɔ.—Jɔ̃ 17:3 lodo.
^ par. 3 Wɛlɛ kɔlɔ-laɣa 21 ma va kɔlɔi nii zu: What Can the Bible Teach Us?
