KALABO 13
Zɛɓɛi É Vaazu Ɣɛɛzu Gaa Zɛɛ Ʋaa Ɣala Pɛlɛitiɛ?
1. E ɣisu Gala pɛlɛ ɓɔgapɛ pagɛ?
Gala pɛlɛ taniga wu numaa taa na te wõini te gaama Ɣalagi ʋeli. Gala kaa niitiɛ vɛtɛsu, na ɣa ɣɛɛ na kpɛdɛvɛ te ʋaa ma. Gala feli vea taniga taa yee vili faa yowũ lamaa zu, nii ɣa numaa yii-zuli. (2 Kɔlĩitiɛ 4:3, 4; 11:13-15) Faa yowũi niitiɛ taniga ta gaa kɔɔ wɔɔ ʋaa, e vɛɛ kuu-zu-ɓɔlɔ lamaa va ta kɛ ga numaa, na ɣa ɣɛɛ na fikaa ta wɛ̃ɛ ziɛ bo. Taitiɛ wõila te ya Gala faa ma, ta wɛlɛ na niitiɛ va tiɛ ɣɛ towaa te yii-zuuli.—Mafiyu 24:3-5, 11, 12 lodo.
Gaama Ɣala pɛlɛ wu veaitiɛ ta ɓaa la Gala na daa-zeigi ma. Zɛɛ ʋaa ɣala pɛlɛ wu veaitiɛ ta zii-zuuli. Taa zɛɛ ʋaa lamaa wo e vile Gala ba e vɛɛ saa vea va, ta ɣalabogi taniga tɛ lɛ wuloni Gala Kɔlɔi zu. Kɛ Jehova wõini a de gaamai wɛ̃ɛ e vile ba.—Ezekiel 18:4; 1 Temete 2:3-5 lodo.
2. Zɛɓɛi e vaazu ɣɛɛzu gaa zɛɛ ʋaa ɣala pɛlɛitiɛ?
Tɔ ga kuu-zu-nɛɛ ʋaa ga zɛɛ ʋaa ɣala pɛlɛ wu veaitiɛ tɛ lɛ zoo ga tɔɔ Gala ɣaa mɔɔlɛ. Taa ɓɔɔ wulo e ɣɛ wõila ɣa ɣɛ te ya Gala faa ma kɛ Dɛvelei na ŋeteai ɣa te wõini la. (Jĩi 4:4) Gala Kɔlɔi ɣaa zɛɛ ʋaa ɣala pɛlɛitiɛ lili ga “Babelɔ̃ laa ɓakpa walai.” Tei Nowa na siɛgi leveni Babelɔ̃ lai zu ɣa zɛɛ ʋaa ɣala feli ʋai lɔɔ-zeini na. Gala pɛlɛ wu veaitiɛ zaa tiɛ numaa ɣaa mɔɔlɛ, tiɛ te laa-nɔwɔ-wo, su lɛ saa wo zani gaa Gala ge te zu ŋala-ŋala.—Faa Wuloai Kɛnɛ Ma 17:1, 2, 5, 16, 17; 18:8 lodo.
Keela woo vagɔ lamaa ɣa dɛ na. Numaitiɛ te wõini te Gala yii-mai ɣɛ tɔwɔ te dɛ zɛɛ ʋaa ɣala pɛlɛitiɛ wu, Gala lɛ dɛ yee-mani te ma. Tɔɔ ɓɔsu te va gaa te Gala Kɔlɔi maa woli ga te zii-mai ɣɛ.—Micah 4:2, 5 lodo.
3. Taitiɛ te wõini te Jehova yii-mai ɣɛ zɛɓɛi manɛɛ te kɛ?
Gaama Ɣala-felia ɣa numaa yee-vili kii-zu
Niitiɛ te wõini gaa gaamai e vɛɛ faa vagɔi va, Jehova ɓɛdɛvɛ te ma. Tɔɔ te lɛnɛ su gaa te wulo zɛɛ ʋaa ɣala pɛlɛitiɛ wu. Taitiɛ te wõini ga Gala, ta ɣaa ɓaa zu gaa te zii-mai ɣɛ.—Faa Wuloai Kɛnɛ Ma 18:4 lodo.
Kolai na kala dopoitiɛ te Gala goo woni numaa ma wɔlɔ-wɔlɔ zu, tei tɔwɔ wõilai ɣɛni numai niitiɛ ya Gala faa ma te yee-zeini bu ga kuu-zu-nɛɛ. Jehova faa niinɛ lɛɛni ga tiɛ nii ɔɔ kɛ kuu-zu-nɛɛ ɣɛ te ya é vɛɛ kito ba. Ta wo-kɔ̃ɔ-mai ɣa gaa faa vagɔ de ʋaa ma, ɓɔvɛlaale te yee-zeini keela woo vagɔi wu te Jehova yii-mai ɣɛ.—1 Tɛsɛlonaikatiɛ 1:8, 9; 2:13 lodo.
Jehova ɣaa yee-zei niitiɛ wu ta wulu ɣaa ʋe zɛɛ ʋaa ɣala pɛlɛitiɛ va. Ya lɔtɔ na Jehova va yaa ɣɛ gaa na siɛ-pulu. Feli veaitiɛ ta ɣɛ wɔnɔ ga ya ziɛ-pulu niinɛ, wõila ɣa te ya ɣiini faa ma. Na ɣa ɣɛɛ na ya zɛʋu zɔlɔ wo kwɛ̃ɛ gɛ lɛ ba.—Maki 10:29, 30; 2 Kɔlĩitiɛ 6:17, 18 lodo.
4. Zɛɓɛi Gala ge vaazu kɛɛzu ga kuu-zu-nɛɛ ɣɛ zui wɔlɔ-kɔlɔ ma?
Zɛɛ ʋaa ɣala pɛlɛitiɛ zu ŋala-ŋala fai ɣa gaa keela woo vagɔ. Tɔɔ vaazu de wulo zu daa-nɔwɔ-wo tamaa zu, e va gaa zii-laa ɓɔɔɓɔɔ zui wɔlɔ-kɔlɔ ma. Zɛɛ ʋaa ɣala pɛlɛitiɛ tɛ lɛ sa wɔlɔ-wɔlɔ nu ɣa wɔlɔga. Nu ɓɔgapɛ ka saa ya Jehova yii-mai ɣɛ.—Faa Wuloai Kɛnɛ Ma 18:20, 21; 21:3, 4 lodo.
