KALABO 9
Daa Kuu-zu-nɛɛ Zɔlɔ Wo Ɣɛ Le Kaalai Zu?
1. Zɛɓɛi é kɛɛ ʋulu ʋai ɣa va ga kuu-zu-nɛɛ kaalai zu?
Keela woo vagɔi wulovɛ Jehova ya, towaa é ga kuu-zu-nɛɛ Ɣalagi. É wõini kuu-zu-nɛɛ ɣɛ kaalai zu. (1 Temete 1:11) Towaa é ʋulu ʋai lɔɔ-zeini. Ʋulu ʋai vagɛ kaalai ʋaa ma ɓɔvɛlaale towaa kɛ lopaitiɛ te wulo su ga pagɔ. Maa nɛɛvɛ Kolai maa vea te wũfe gɔmɛtii na tɔgitiɛ ma é vile ʋulu ʋaa va.—Luki 2:1, 4, 5 lodo.
Zɛɓɛi é gaa Gala na ki-gaa-ziɛi é vile ʋulu ʋaa va? É wõini ʋulu veaitiɛ te yɛ kii-ma, te mɛ lɛ ɣaa wɔi. Jehova wõini wõila ɓɔɔɓɔɔ ge ɣɛ te ya ɣiini faa ma. (Hiiɓuluitiɛ 13:4) Lɛ wõini ʋulu veaitiɛ tɔɔ ɣɛlɛ ɣii va. (Malachi 2:16) Kɛ towaa ɓe ba ʋulu vea te ɣaa wɛɛ, ani gila ka wɛ̃ɛ-ziɛ bona.—Mafiyu 19:3-6, 9 lodo.
2. Ʋulu veaitiɛ ta ɣiini so ɣɛ le?
Jehova ŋaza nu ɓɔga zunu ɓɛtɛvɛ gaa te ɓɔ ɣiini ba kaalai zu. (Genesis 2:18) Tei zunui ɣa é gaa kaalai wũ tuo nui, maa nɛɛvɛ é kaalai ɓala ma ʋaitiɛ ɣaa wulo ba. Yɛ te ɣalabo é vile Gala ba. Wõila ɓɔɔɓɔɔ gɛ ɣɛ zéea ŋazai ʋaa ma. Manɛɛ ʋulu vea te wõi ga ɣii, tiɛ wũfe ɣiini ma. Tei zunui ɓɔga ŋaza nui te gaa faa yowũ ɣɛɛ vea maa nɛɛvɛ tiɛ ɣiini su ʋaa yɛ, na ɣa va ga zii-la kaalai zu.—Ɛfɛsɔitiɛ 4:31, 32; 5:22-25, 33; 1 Pite 3:7 lodo.
3. É ɣisu pagɛ gaa é ɣɛlɛ é ŋazai ɔ é wɔɔ nu vɛ ani faa ɓaa ka vaana kaalai zu?
Ani faa ɓaa ka vaana kaalai zu manɛɛ zunui ɓɔga ŋazai te ɣaa ɓaa te gaa wulo ba, ta nii ɣɛ ani wõila ɣa te ya ɣiini faa ma. (1 Kɔlĩitiɛ 13:4, 5) É ɣɛ velei Gala Kɔlɔi boga la gaa wɔi lei ya faa ɣaa wulo ba kaalai zu.—1 Kɔlĩitiɛ 7:10-13 lodo.
4. Lopaitiɛ, zɛɓɛi Gala wõini wo sɔlɔ wo?
Jehova wõini wo kuu-zu-nɛɛ ma zɔlɔ wo. Tɔɔ wo lɛnɛ su gaa nii wa kɛ wo kuu-zu-nɛɛ zɔlɔ wo wa ŋeteai zu. Kele-ɣelegi é wo ɣaa veaitiɛ ya é wõini wo wulo su-nuu-ma. (Kolasaitiɛ 3:20) Ani wa goo-mɛni kulo na Jehova ya ta dui, wa kuu-zu-nɛɛ ma zɔlɔ wo.—Ɛfɛsɔitiɛ 6:1; Mafiyu 19:13-15; 21:15, 16 lodo.
5. Duu kɛɛ veaitiɛ ta leve ɣɛ le te leaitiɛ te kuu-zu-nɛɛ zɔlɔ wo?
Manɛɛ te ɣaa ɓaa te daa-mii ŋani, seɣe ɓɔga ŋiizi ɣaaziɛ te leaitiɛ ʋaa ma. (1 Temete 5:8) Kɛ ani é wõini é leaitiɛ te kuu-zu-nɛɛ zɔlɔ wo maa nɛɛvɛ é te ɣalabo gaa te wõi gaa Gala, tiɛ wuito gói ma. (Ɛfɛsɔitiɛ 6:4) Ani wõila ɓɔɔɓɔɔ kaa ɣɛɛ na é ya Gala faa ma, towaa ɓɔ é leaitiɛ va wõila ɓɔɔɓɔɔ ge ɣɛ te ya Gala faa ma. Ani ya é leaitiɛ ɣalabo na vele Gala Kɔlɔi boga la towaa kɛ te ɣi-gaa-ziɛ ga pagɔ.—2 Temete 3:15; Proverbs 22:6 lodo.
Ani ya é leaitiɛ zɛ-sɛ bona yɛ mama fe te vɛ taa wulo su-nuu-ma. Na ɣa ɣɛɛ na maa nɛɛvɛ wɔnɔ é te lo gaa pagɔ. Ya na ɣɛɛ na towaa kɛ tɛ lɛ yee-vili ga faa yowũ zu. Nii ɣaa kɛ kuu-zu-nɛɛ ɣɛ te ya. (Proverbs 22:15) Naa pɛ ge ɣɛɛ vɛ mɛ lɛ te lo gaa wãlalɔɔ vele.—Kolasaitiɛ 3:21 lodo.
Jehova Na Seeleitiɛ te kɔlɔ lamaa wulaa kɛnɛ ma nii ya ɓɔ duu ɣaa veaitiɛ ɓɔga te leaitiɛ va. Tɛnɛgi é kɔlɔi niitiɛ zu kulovɛ Gala Kɔlɔi zu.—Jĩi 1:25 lodo.
