Gala na masadai ɣa gaa masadai nii é Gala ta. Towaa Gala ge vaazu tosu nu ɓuse wɔmɛtiitiɛ ɓɔgapɛ poga gaa zii-mai ɣɛ zui zu ta Gala ta. Fai niitiɛ Gala na masadai vaazu kɛɛzu tɔ ga keela woo vagɔ. Gala na masadai ɣa vaazu nuu pɛ zii-laa zu. Towa va ga goo-la-ma zui wɔlɔ-kɔlɔ ma.​—1 Kɔlĩitiɛ 15:24; Mafiyu 6:9, 10; 24:14 lodo.

Jehova yee ɓadoga Ziizɛ Kolai va gaa é ɣɛ gaa masagi na gɔmɛtii ʋaa ma.​—Faa Wuloai Kɛnɛ Ma 11:15 lodo.

Wɛlɛ ʋiliogi nii va Zɛɓɛi Ya Ɣɛ Ga Diɛ Ani Da Zaa Na?

Ziizɛ ɣa é ga Masa pagɔi gɔmɛtii nii ʋaa ma ɓɔvɛlaale tɔ ga tuola nɛɛ nu. Lɛ wɔlɔ-wɔlɔ wulu ɣaa ʋe ga gaama va. (Mafiyu 11:28-30) Natiɛ te wulo ɓalaa ba gaa ɓaa ɣa zéea ga é ɓɔ nu ɓuse va, ɓɔvɛlaale tɔ vaazu yɛ su Gala ta yiɛ zui leʋe. Tei Gala ge Ziizɛ wu ziɣini saa ya, é liini Gala ta é zei ga keea yee-za su vele. (Hiiɓuluitiɛ 10:12, 13) Gala ge gaa ɓaa ʋeeni zéea ga é na masadai lɔɔ-zei Gala ta.​—Hiiɓuluitiɛ 10:12, 13 lodo.

Numaitiɛ Gala ge yee ɓadoga te va tiɛ ka te vɛɛzu Ziizɛ va te masadai ɣɛ Gala ta. (Daniel 7:27) Ziizɛ na kala dopoi niitiɛ zee-la-ma ɣɛni te ya, Jehova yee ɓadoni te va gaa maa wũ. É wulo niitiɛ wulu, Jehova ɣa dɛ yee ɓado su numaa va zee-la-ma te ya é yɛ ga su siɛgi nii ziitea. Ta bu-ziɣi-saa-yai maa zɔlɔ wo ŋinɛ dɔ-tɔi zu è ɣɛ velei Ziizɛ nɛ dɛɛ ɣɛɛni la.​—Jɔ̃ 14:1-3; 1 Kɔlĩitiɛ 15:42-44 lodo.

 Nuu liide ɣa é vaazu liizu Gala ta? Ziizɛ boni ga ta ga “baala kpulu kolo.” (Luki 12:32) Te liigoi ɣa ga tawuu-su wũ gila tawuu-su zee naagɔ kai naagɔ (144,000). Ta vaazu vɛɛzu Ziizɛ va te masadai ɣɛ zui maazu.​—Faa Wuloai Kɛnɛ Ma 14:1 lodo.

Masadai nii Gala ge fea Ziizɛ ya tɔɔ-zeini kwenagi nii zu 1914. * Tei Ziizɛ ɣɛɛni ga Masa Gala ta, é Seeta ɓɔga na ŋinɛ yowũitiɛ wuloni na é te loo zui ma. Seeta yii ɣa wãlani saa ga ʋikee na ɣa é kɛɛ faa yowũi lamagiɛ zui ma. (Faa Wuloai Kɛnɛ Ma 12:7-10, 12) Tei te Seeta ɓɔga na ŋinɛ yowũitiɛ vilini zui nii ma daa-nɔwɔ-wogi zu ɣa nɔ wɔɔlɔ zu. Da zaa wɛlɛ zu kɔɔ va yɛ wɔ, pulu va towai, seeɓɛ laali-taali-gitiɛ é vɛɛ zui va yɛ ɓeli yɛ wu su. Niitiɛ ta dɛɛzu ga Gala na Masadai maa ɓuovɛ sa ga é va zui maazu.​—Luki 21:7, 10, 11, 31 lodo.

Gala goi ɣa zaa wo su zui wɔlɔ-kɔlɔ ma ɣaali. Nii ɣa dɛɛzu ga Gala na Masadai ɣa saa vaazu ga goo-la-ma ɓɔga zee-vili kiizu numaa lamaa yɔɔzu. É ɓɔga wɔnɔ numaa lamaa va te yee zei Ziizɛ na gɔmɛtii wu. Nii ɣa dɛɛzu ga ta ga goo-mɛni-bea. Siɛgi ɣa ziiti na ga Gala na masadai é ŋeteagi nii zu ŋala-ŋala, towaa te wũ maa-wo. Na ɣa ɣɛɛ na nui nɛpɛgi é wõni é wulo Gala na masadai zu-nuu-ma, manɛɛ ma nuu ɣɛ ga goo-mɛni nu Ziizɛ ya.​—Faa Wuloai Kɛnɛ Ma 7:9, 14, 16, 17 lodo.

Gala na deʋei é vile nu ɓuse va na masadai ɣa vaazu te pɛ kɛɛzu kwena tawuu-su gila wuuzu. Zui ɣa vaazu ɣɛɛzu gaa ŋada vagɔ. Na ɣa ɣɛɛna gaa ɓela su vɛ Ziizɛ ɣa sa ya masadai leve wulu keea wɔ. (1 Kɔlĩitiɛ 15:24-26) Faa vagɔi niitiɛ é maa wolia é vile Gala na masadai va, ɣaa ɓaa é te lɛ ga numaa.​—Mafiyu 5:5 lodo.