KALABO 6
Zɛɓɛi É Ga Ki-togi É Vile Saa Vea Va?
1. Ki-togi ɣa gaa zɛɓɛ é vile saa vea va?
Laazɔi nii é ɣɛni gaa Ziizɛ na siɛ-pulu é zaani Bɛtani Yɛlusulɛɛ woba é kɛɛni gaa folo naagɔ Ziizɛ ɔ́ vɛɛ ziitizu na. Ziizɛ ɓɔga Laazɔi na seelaitiɛ Maata ɓɔga Meele te liini kabai la. Su lɛ ɣɛni woozani kpɔgi ɣaalɛ-ba na. Maata ɓɔga Meele te wuuzu nɛɛni ga ʋikee tei Ziizɛ é Laazɔi wu ziɣini saa ya nii é ɣɛni gaa ta zee-lai.—Jɔ̃ 11:21-24, 38-44 lodo.
Keela woo vagɔi é vile saa vea va Maata ɣɛni koni. É ɣɛni koni gaa Jehova ɣa vaazu saa vea wu ziɣi zu saa ya ga te ŋetea ɣɛ zui nii ma kɔnɔ.—Jɔ̃ 11:24 lodo.
2. Zɛɓɛi ya ɣɛ gaa diɛ ani da zaa na?
Gala ɣɛni Adã ma: “Ya ga pɔlɔ tɔwɔ ya zaa na ya ɣɛ ga pɔlɔi.”—GENESIS 3:19.
Gala nu ɓuse ɓɛtɛni gaa pɔlɔ. (Genesis 2:7; 3:19) Ani da zaa na de ma wɔʋɛ lɛ ma. Da gaa nu ɓuse, na ɣa ɣɛɛ na ŋani ta nɛpɛ gɛ lɛ na ya wulo de lɔtɔi va é li ŋada ɓalaa ani da zaa na. Dɛ lɛ saa ɣi-gaa-ziɛa faa nɛpɛ ma. Na ɣa é ɣɛɛni, tei Laazɔi wu ziɣini saa ya lɛ faa ta nɛpɛ boni é vile nii va é ɣɛni ɣɛɛzu la kabai zu ɓɔvɛlaale saa vea tɛ lɛ faa ta nɛpɛ koni.—Jɔ̃ 11:11-14; Ecclesiastes 9:5, 6, 10 lodo.
É ɣisu Gala kaa faa yowũ ɣɛɛ veaitiɛ vili ŋabu ɓoei zu ani ta zaa na? Gala Kɔlɔi bogɛ gaa saa vea tɛ lɛ faa ta nɛpɛ koni. Nii numaa ta bo é vile faa yowũ ɣɛɛ veaitiɛ vili fai va ŋabu ɓoei zu tɔ gaa zɛɛ ʋaa. Kalabogi nii lɛ Gala maa vii ya.—1 Jɔ̃ 4:8 lodo.
Wɛlɛ ʋiliogi nii va Zɛɓɛi É Ga Gala Na Masadai?
3. É ɣisu saa vea taa yɛpɛ de wɔ?
Saa vea tɛ lɛ yɛpɛɛ de wɔ ɔ́ nɔ ɣɛ ga te faa mɛni. (Psalm 115:17) Tanisu ŋinɛ yowũitiɛ taa yɛpɛ numaa wɔ tiɛ ɓɔɔ wulo gaa numai niitiɛ te zaa. (2 Pite 2:4) Jehova bogɛ ga de mɛ lɛ yɛpɛ saa vea wɔ.—Galeesiaitiɛ 5:20, 21 lodo.
4. Ɓɛɛni ka te vaazu wu ziɣi zu saa ya?
Numaa lamaa te kabai zu taa vaazu wu ziɣi zu saa ya zui nii ma. Numaa fikaa tɛ lɛ ɣɛni Gala koni te gaa faa yowũ ɣɛɛ vea ta vaazu wu ziɣi zu saa ya.—Luki 23:43; Te Ɣɛɛ Ʋaitiɛ 24:15 lodo.
Numaitiɛ te vaazu wu ziɣi zu saa ya ta vaazu gaamai maa woli zu é vile Gala ba. Ta dɛ gaa zee-la-ma ɣa te ya é vile Ziizɛ va ani ta goo-mɛni kulo na zéea. (Faa Wuloai Kɛnɛ Ma 20:11-13) Taitiɛ te vaazu wu ziɣi zu saa ya, ani ta goo-mɛni kulo na, ta zɛʋui zɔlɔ wo kwɛ̃ɛ gɛ lɛ ba.—Jɔ̃ 5:28, 29 lodo.
5. Zɛɓɛi bu-ziɣi-saa-yai ɣa dɛ ga diɛ é vile Jehova va?
Gala ge Ziizɛ leveni gaa é za de ʋaa ma, nii ɣa é kito fea de ya é vile saa vea va. Ki-togi é vile bu-ziɣi-saa-yai va, tɔɔ dɛɛzu ga wõila ɓɔga gaazu maa-wõi-ɣaa ɓɔ-ɓai ɣa Jehova ya. Ani Gala ka saa veaitiɛ wu-ziɣi na saa ya, ɓɛɛ ɣa ɓɔɔ e wõini e pɛtɛ gaa ma maa wũ?—Jɔ̃ 3:16; Loomɛitiɛ 6:23 lodo.
