KALABO 50
Ya Leve Ɣɛ Le E Kɛ Kuuzu Nɛɛ Ɣɛ Ya Ɣaalai Zu?—Fele kelei
Lopaitiɛ ta ga faa-nɛɛ kuloai Jehova ya. É wõini duu kɛɛ veaitiɛ te te leaitiɛ maazu vɛtɛ ɓɔɔ ga pagɔ. Jehova tɛnɛ feevɛ duu kɛɛ veaitiɛ ya ga te zoo te nii ɣɛ. Tɛnɛgi niitiɛ ta ɓɔ lopaitiɛ va ta ɓalaa te kɛ kuuzu nɛɛ ɣɛ kaalai zu.
1. Tɛnɛ sɛɓɛi Jehova fea duu kɛɛ veaitiɛ ya?
Jehova wõini duu kɛɛ veaitiɛ te wõi ɓɔɔ ga te leaitiɛ, tiɛ siɛ tamaa ziɣi ba ga te yɛ kii-ma. E wõini wɔnɔ duu kɛɛ veaitiɛ te te leaitiɛ maazu vɛtɛ ga faa yowũ mɛlɛ ɣɛ ga tiɛ. Manɛɛ wɔnɔ tiɛ te leaitiɛ ɣalabo te te lo e ɣɛ velei Gala Kɔlɔi boga la. (Proverbs 1:8) Gala Kɔlɔi bogɛ duu kɛɛ veaitiɛ ma ga te: “Te leaitiɛ lo ga te ɣɛɛ-zɔ-kulo vele te yee ma . . . de maliɣii na tuoi zu.” (Ɛfɛsɔitiɛ 6:4 lodo) Jehova wuuzu ɣa nɛɛ ani duu kɛɛ veaitiɛ ta ziɛna ga tɛnɛgi nii, tiɛ te leaitiɛ lo. Duu kɛɛ veaitiɛ tɛ lɛ ga tɔ tii nii ʋe nu ta ɓɔni zeea.
2. Tɛnɛ sɛɓɛi Jehova fea lopaitiɛ ya?
Tɛnɛgi nii ɣa Jehova fea lopaitiɛ ya: “A wo ɣaa veaitiɛ woo mɛni.” (Kolasaitiɛ 3:20 lodo) Ani lopaitiɛ ta goo-mɛni kulona te ɣaa veaitiɛ ya Jehova wuuzu ɣa nɛɛ, te ɣaa veaitiɛ ɓalaa te wuuzu ɣa nɛɛ. (Proverbs 23:22-25) Ziizɛ po-kɔ̃ɔ pagɔ zeini siɛgi ma e ɣɛni la ga lopo wolo. Velei ɓalaa e ɣɛni ga tele-bo tuo wo nu e ɣaa ɓaani ga e goo-mɛni kulo kaa veaitiɛ ya, e wũfe te ma.—Luki 2:51, 52.
3. Taitiɛ te kaalai zu ta leve ɣɛ le te lɔtɔ Jehova va?
Ani ya ga duu keea nu, e wõini ɓɔɔ e leaitiɛ te wõi ɓɔɔ ga Jehova ga ʋike e ɣɛ velei nɔ e kɛɛzu la. Kɛ ya leve ɣɛ le sa e ɓɔ te va te nii ɣɛ? Ani ya nii ɣɛɛna Gala Kɔlɔi boga ga: “E [Jehova laa woi] lɛ ga e leaitiɛ, yiɛ yɛpɛ e vile te va wa ɣɛna zeini wa vɛlɛi la, wa ɣɛna ziɛzu pelei ma.” (Deuteronomy 6:7) Ga e faa lɛ ga nu kɛni e lɛ ma lii kana e bo. Ɣeeta e kwɛ̃ni nii manɛɛ e lɛ ma lii kana ga e bo e leaitiɛ ma ga te ɣigii yɛsu. Gala goi nii ɣa bosu ga manɛɛ yiɛ siɛ siɣi ba ga e yɛpɛ e leaitiɛ wɔ e vile Jehova va. Tɔ ɓɔɔ ga faa vagɔ ga wo siɛ siɣi ba dɔɔ nɛpɛ ga wo kaala Ɣala Kɔlɔ maa woliai ɣɛ. Ani wɛlɛ dɛ duu ɣaani, siɛgi nii ɣaa ɓɔ wo va ga wo zoo wo faa maa woli e vile Gala ba daa woi zu.
FAA LAMAA MAA WOLI
Wɛlɛ faa taniga va ya ɓɔ niitiɛ va te kaalai zu ga te wuuzu nɛɛ na ɣa ɣɛɛna te maazu vɛtɛ maa zɔlɔwo.
4. E leaitiɛ lo wõila vele zu
Ga e e leaitiɛ lo ɛ lɛ ga soloya. Kɛ Gala Kɔlɔi ɣa ɓɔ e va ɣɛ le? A Jĩi 1:19, 20 lodo, wo gaa-zaɣa-kɛɛ niitiɛ ɣaa wote:
-
Duu kɛɛ veaitiɛ ta dɛ ɣɛ le ga wõila ɣa te ya te leaitiɛ ʋaa ma ani ta ɣɛna yɛpɛzu te wɔ?
-
Ani duu kɛɛ veaitiɛ ta yii ɣaa-wãlana, zɛɓɛi e kɛɛ ɛ lɛ vani ga tɔ te leaitiɛ ɣɛɛzu kulo te yee ma siɛgi na ma? a
5. E leaitiɛ maazu vɛtɛ
Ga e e leaitiɛ maazu vɛtɛ manɛɛ e yɛpɛ te wɔ e vile zunu ɓɔga ŋaza nu ʋaa va siɛgi nii ma. Ɣeeta nii ɣa vaazu ɓaazu e yee ma. ƲILIOGI nii lɛ ga. Yá wolona, wo gaa-zaɣa-kɛɛ niitiɛ ɣaa wote.
-
Zɛɓɛi e kɛɛ na ɣa ɓaa ga duu kɛɛ vea taniga te yɛpɛ te leaitiɛ wɔ e vile ŋii pɛlɛ wu ʋaa va?
-
Duu kɛɛ vea taniga te levegɛ ɣɛ le ga te yɛpɛ te leaitiɛ wɔ e vile ŋii pɛlɛ wu ʋaa va?
E ɣɛ velei Gala Kɔlɔi boni la, zui nii ɣa nɔ ba yiɛ li wũ ma faa yowũ zu ɓɔvɛlaale Seeta ɣa e ga ma wũ-tuoi. A 2 Temete 3:1, 13 lodo, wo gaa-zaɣa-kɛɛ niitiɛ ɣaa wote:
-
Tuɓo-vele yowũ veai niitiɛ Gala Kɔlɔi yɛpɛi e vile te va ma woo 13 zu, taniga ta zee lɔ ba ɣaa-wo bo ga lopaitiɛ. Na ma, zɛɓɛi e kɛɛ e ga faa ɓi ga duu kɛɛ veaitiɛ te yɛpɛ te leaitiɛ wɔ e vile ŋii pɛlɛ wu ʋaa va? Zɛɓɛi e kɛɛ manɛɛ te te lopaitiɛ ɣalabo ga velei ta ɓɔɔ maazu vɛtɛ la tuɓo-vele yowũ veai niitiɛ ya?
E Ɣɛni Nii Wõni?
Jehova Na Seeleitiɛ ta kɔlɔ ɓɔga ʋilio lamaa ɓɛtɛzu ga e ɓɔ duu kɛɛ veaitiɛ va te yɛpɛ te leaitiɛ wɔ e vile ŋii pɛlɛ wu ʋaa va. Towa ɓɔ wɔnɔ te leaitiɛ va ga te kwɛ̃ɛ velei ta ɓɔɔ maazu vɛtɛ la tuɓo-vele yowũ veai niitiɛ ya. Taniga ta ga:
6. Wũfe E Ɣaa Veaitiɛ Ma
Lopaitiɛ ɓɔga nu nii niinɛitiɛ ta dɛ ga wũfe-ma ɣa te ya te ɣaa veaitiɛ ʋaa ma ga velei ta yɛpɛ la te wɔ. ƲILIOGI nii lɛ ga. Yá wolona, wo gaa-zaɣa-kɛɛ niitiɛ ɣaa wote.
-
Zɛɓɛi e kɛɛ e ga faa ɓi ga nu niinɛitiɛ te yɛpɛ te ɣaa veaitiɛ wɔ wũfe-ma vele zu?
-
Nu niinɛitiɛ ta leve ɣɛ le te yɛpɛ te ɣaa veaitiɛ wɔ wũfe-ma vele zu?
A Proverbs 1:8 lodo, wo gaa-zaɣa-kɛɛ nii ɣaa wote:
-
Zɛɓɛi manɛɛ nu niinɛitiɛ te kɛ ani te ɣaa veaitiɛ ta tɛnɛ feena te ya?
7. A Jehova ʋeli kii-ma wa ɣaalai zu
Taitiɛ te kaalai zu te ga Jehova Na Seeleitiɛ te ta, ta siɛ siɣi ba dɔwɔ nɛpɛ ga te kaala Ɣala Kɔlɔ maa woliai ɣɛ. Kaala Ɣala Kɔlɔ maa woliai nii maʋaa wulovɛ ɣɛ le? ƲILIOGI nii lɛ ga. Yá wolona, wo gaa-zaɣa-kɛɛ niitiɛ ɣaa wote.
-
Zɛɓɛi ya ɓɔ kaalai va ga te kaala Ɣala Kɔlɔ maa woliai ɣɛ dɔwɔ nɛpɛ?
-
Zɛɓɛi duu kɛɛ veaitiɛ ta kɛ ga te kaala Ɣala Kɔlɔ maa woliai ɣɛ ɓɔɔ ga pagɔ maɣaa-nɛɛ ɣɛ ba?—Wɛlɛ footei nii va e kalabogi nii lɔɔ-zei zuvɛ.
-
Zɛɓɛi ya kɛ tanisu na ɓaa ga taitiɛ te kaalai zu te Gala Kɔlɔi maa woli kii-ma?
Wɔlɔ-wɔlɔi zu Jehova ɣɛni wõini taitiɛ te kaalai zu te Gala Kɔlɔi maa woli kii-ma. A Deuteronomy 6:6, 7 lodo, wo gaa-zaɣa-kɛɛ nii ɣaa wote.
-
Ya leve ɣɛ le e ziɛ ga tɛnɛgi nii?
Niitiɛ ɣeeta wa kɛ kaala Ɣala Kɔlɔ maa woliai zu:
-
A ɣavele ɓɛtɛ gaalɛ-baitiɛ ʋaa ma.
-
A Gala goi taniga lodo wo yɛpɛ e vile ba.
-
Ani lopaa ta wo ya, ki-daa-wodoi ta ɣaa-ziɛ te ʋaa ma jw.org ma.
-
Ani e leaitiɛ ta ga nu niinɛa, ki-daa-wodoi ta ɣaa-ziɛ te ʋaa ma jw.org ma.
-
Niitiɛ wa maa woli Gala Kɔlɔi zu wa wo leaitiɛ a ɣaa-ɓaa wo ma wo-kɔ̃ɔ-mai ta ɣɛ.
-
A wɛlɛ ʋiliogi ta va jw.org ma wo yɛpɛ e vile ba.
NUMAA TANIGA TA ƔƐ TEA: “Lopaitiɛ tɛ lɛ zooga tɔ Gala Kɔlɔi ɣaa ɣa.”
-
Zɛɓɛi e ga yɛdɔ ɣi-gaa-ziɛi?
NII SA È MAA WOLIA
Jehova wõini duu kɛɛ veaitiɛ te wõi ga te leaitiɛ, te te lo na ɣa ɣɛɛna te te maazu vɛtɛ. E wõini wɔnɔ lopaitiɛ ɓalaa te wũfe te ɣaa veaitiɛ ma te goo-mɛni kulo te ya na ɣa ɣɛɛna taitiɛ te kaalai zu tiɛ feli kii-ma.
Ma-ɓigitiɛ
-
Duu kɛɛ veaitiɛ ta leve ɣɛ le te te leaitiɛ lo na ɣa ɣɛɛna te te maazu vɛtɛ?
-
Lopaitiɛ ta leve ɣɛ le te dɛ ga wũfe-ma ɣa te ya, te ɣaa veaitiɛ ʋaa ma?
-
Ani kaalai ɣa siɛ siɣina ba dɔɔ nɛpɛ ga te kaala Ɣala Kɔlɔ maa woliai ɣɛ, zɛɓɛi ya ɣɛ ga ma wulo su-nu-mai?
WƐLƐ FAA LAMAA VA
Kalabo sɛɓɛi ya ɓɔ e va e e leaitiɛ lo ga pagɔ?
Faa maa woli e vile tɛnɛgitiɛ va Gala Kɔlɔi fea niitiɛ ya te te ɣaa veaitiɛ maazu vɛtɛsu.
“Zɛɓɛi Gala Kɔlɔi Boga E Vile Nu Ɣaa Vea Maazu Vɛtɛ Faa Va?” (Kɔlɔi nii ɣa fãga wɔlɔi ma)
Wɛlɛ nii va e ɓɔni zunui nii va e zoo e deaitiɛ lo ɓɔɔ ga pagɔ.
Jehova Ɣa De Ɣalabo Ga Velei Da De Leaitiɛ Lo Da Ga Pagɔ (5:58)
Wɛlɛ velei duu keeaitiɛ ta ta ziɛ-pului zu-ɓaa la te yɔɔzu ta te luu zinaitiɛ.
a Gala Kɔlɔi ɣa yɛpɛna e vile “nu ɣɛɛzu kulo ʋaa va zee ma” su-wulu-zu ɣa ga, e manu ɣalabo, e manu lete to, na ɣa ɣɛɛna e te lɛnɛ. Ɛ lɛ ga ɔ wãla lɔɔ ʋaa ɣɛ ga tiɛ.—Proverbs 4:1.
