KALABO 55
Ɣaa-Ɓaa E Ɓɔ Kuuwui Va
Zui wɔlɔ-kɔlɔ ma, numaa te wuuzu nɛɛvɛ ga tiɛ Jehova ʋile kuuwuitiɛ zu. Te wuuzu nɛɛvɛ kala-bogitiɛ ɓɔga kpɔbaitiɛ ʋaa ma ta maa zɔlɔwo. Tɔwɔ ta ɣaa-ɓaa ga te ɓɔ kuuwui va pele lamaa zu. Vele ɣana e ɣi-gaa-ziɛzu la e vile kuuwui nii va e su?
1. Pelei taniga ta ga zɛɓɛ ga ya leve la ga e ɓɔ kuuwui va?
De ɓɔgapɛ da zoo de ɓɔ kuuwui va. Kuuwui e su e ɣisu numaa ta na te ga pɔlɔ-zaɣa bea ɔɔ tɔɓɔ-zu-ba vea? Ya zoo e ɓɔ te va ga te li gaalɛ-baitiɛ zu? Ya zoo e ɓɔ te va pele taniga zu, ta ɣa ga yiɛ sɔɔla ɣeea te vɛ. Ɔɔ ga e ta vɛlɛi la ɓɛtɛ. (Jĩi 1:27 lodo.) Da vɛɛ ɓalaa de veaitiɛ va ga de Kiĩdɔ̃ Hɔɔgi maa ɓɛtɛ. Lɛ ga kui de ma ga de fai niitiɛ ɣɛ. Wõilai e de ya Jehova ʋaa ma ta de ɣaa yɔwɔ̃itiɛ towa ɓɔ de va de “da yii-ma [de] ɓɔɔ ʋe” ga de fai niitiɛ ɣɛ.—Psalms 110:3.
Jehova Na Seelei niitiɛ te bataizei maa zɔlɔ woga ta zoo te ɓɔ kuuwui va pele ɓalaa su. Zinaitiɛ te kuuwui zu, ani ta ɣaa ɓaana ta ɣɛ ga kuuwu wũ-tuo veaitiɛ ta ɓɔba veaitiɛ te ta. Ani zinaitiɛ ta ɣaa ɓaana kɔnɔ ta ɣɛ ga kuuwu wũ-tuo veaitiɛ te ta. Taitiɛ zobogi te vɛ ta ɓɔ kuuwui va ani ta ɣaa ɓaana te ɣɛ ga panɛ̃ɛ ta. Ta vɛɛ kɔnɔ de ɣaa yɔwɔ̃itiɛ va ga te da Ɣala feli vɛlɛitiɛ lo ɔɔ ga te li ŋada ɓalaa ga te Gala goo wo.
2. Da leve ɣɛ le de ɓɔ kuuwui va ga niitiɛ ya ɣɛ de ya?
Da zoo de “Jehova laa-maa-lɛ ga [da] lɔnɔ ba ŋɛniitiɛ.” (Proverbs 3:9) De wuuzu nɛɛvɛ ga de naʋolo ɔɔ ŋɛnii taniga ʋe ga de ɓɔ kuuwui va e vɛɛ Gala goo wotii va e ɣɛɛzu zui wɔlɔ-kɔlɔ ma. (2 Kɔlĩitiɛ 9:7 lodo.) Naʋoloi da fe towa ɓɔ ɓalaa de ɣaa yɔwɔ̃i niitiɛ va faa ɓaa ge laa te ma. Nu taniga ta “ŋɛni ta wulo su ga tee [tiɛ] daa-zu ɣɛ” ga te ɓɔ Gala goo wotii va. (1 Kɔlĩitiɛ 16:2 lodo.) Da ɓɔ kuuwui va ani da ɣɛna naʋolo loozu kologitiɛ zu da Ɣala feli zuvɛ ɔɔ de teve donate.pr418.com ma. Jehova wõini de dɛ ga wõila ɣa de ya faa ma ga velei da ɓɔ la na tii va ga niitiɛ e de ya.
FAA LAMAA MAA WOLI
Wɛlɛ pelei taniga va yà ɓɔ la kuuwui va.
3. Da ɓɔ kuuwui va ga niitiɛ e de ya
Jehova ɓɔga Ziizɛ te wõini ga nui ya faa-nɛɛ ɣɛ kuuzu nɛɛ vele zu. Ziizɛ wuuzu nɛɛ e ɣɛni tei e wɛlɛni po ŋazai va yiɛ ɣaa-ɓaa ga e naʋolo ʋe Gala na tii ʋaa ma. A Luki 21:1-4 lodo, wo gaa-zaɣa-kɛɛ niitiɛ ɣaa wote:
-
E ɣisu manɛɛ de naʋolo lamaa ʋe ga de Jehova yii-la?
-
Jehova ɓɔga Ziizɛ ta ɣi-gaa-ziɛ ɣɛ le ani da ɣɛna faa-nɛɛ ɣɛɛzu kuloai de ɣigii zu?
Ga e wɛlɛ nii va ta kɛ ga naʋoloi da fe, ƲILIOGI nii lɛ ga. Yá wolona, wo gaa-zaɣa-kɛɛ nii ɣaa wote.
-
Naʋoloi da fe towa bɔ ɣɛ le kuuwuitiɛ va zui wɔlɔ-kɔlɔ ma?
4. Da ɓɔɔ ʋe ga de Jehova na tii ta ɣɛ
Wɔlɔ-wɔlɔi zu, Jehova ʋeli veaitiɛ tɔ ɣaa-ɓaa ga te ta Ɣala felizu vɛtiɛ maa ɣele. Nii lɛ ɣɛni nɔ ga velei tɔ naʋolo ʋeela. A 2 Chronicles 34:9-11 lodo, wo gaa-zaɣa-kɛɛ nii ɣaa wote:
-
Yezɔitiɛ te ɓɔgapɛ tɔ ɣaa-ɓaa ɣɛ le ga te Gala feli zuvɛ ɓɛtɛ?
Ga e wɛlɛ velei va Jehova Na Seeleitiɛ ta kɛɛ la zaa, ƲILIOGI nii lɛ ga. Yá wolona, wo gaa-zaɣa-kɛɛ niitiɛ ɣaa wote:
-
Zɛɓɛi e kɛɛ manɛɛ de da Ɣala feli zuvɛ maa ɣele na ɣa ɣɛɛna de na zo ga pagɔ?
-
Ya leve ɣɛ le e ɓɔ tii nii va?
5. Zinaitiɛ te kuuwui zu ta ɣaa-ɓaa ga te tii lamaa ɣɛ kuuwui zu
Gala Kɔlɔi boga ga Kolai Maa Veai niitiɛ te ga zinaa manɛɛ te ɣaa-ɓaa te ɓɔ kuuwui va. Ga e wɛlɛ ma wo-kɔ̃ɔ-mai ta va, ƲILIOGI nii lɛ ga. Yá wolona, wo gaa-zaɣa-kɛɛ nii ɣaa wote.
-
Ʋiliogi nii zu, de ɣaa yɔwɔ̃i Ryan ɣaa ɓaani ɣɛ le ga e ɓɔ kuuwui va?
Gala Kɔlɔi nii lɛɛvɛ manɛɛ zinaitiɛ te kɛ ga te ɣaa-ɓaa ga te ɣɛ ga kuuwu wũ-tuo veaitiɛ ta ɓɔba veaitiɛ te ta ɔɔ kuuwu wũ-tuo veaitiɛ te ta. A 1 Temete 3:1-13 lodo, wo gaa-zaɣa-kɛɛ niitiɛ ɣaa wote:
NUMAA TANIGA TA ƔƐ TEA: “Minɛɛ ɣa Jehova Na Seeleitiɛ ta naʋolo zɔlɔ wona ga te ta lii ɣɛ?”
-
Ya gaa-zaɣa-kɛɛ nii ɣaa wote ɣɛ le?
NII SA È MAA WOLIA
Jehova wuuzu ɣa nɛɛ ga ʋike ani da ɣaa ɓaana de ɓɔ kuuwui va ga siɛgi e de ya e vɛɛ da zɔɔlaitiɛ va.
Ma-ɓigitiɛ
-
Da leve ɣɛ le de ɓɔ kuuwui va ga siɛgi e de ya?
-
Da leve ɣɛ le de ɓɔ kuuwui va ga niitiɛ e de ya?
-
Zɛɓɛi ɓɔɔ ya ɣɛ wõini e kɛ ga e ɓɔ kuuwui va?
WƐLƐ FAA LAMAA VA
Wɛlɛ nii va e kɛɛ ɛ lɛ sa ga kui Jehova ʋeli veaitiɛ ma ga tɔ ta weligi ɔɔ ta naʋoloi zei-zu puu kelei ʋe.
“Zɛɓɛi Gala Kɔlɔi Boga E Vile Nu Weli Puu Kele Ʋee Ʋai Va Gala Zeea?” (Kɔlɔi nii ɣa fãga wɔlɔi ma)
Gala Kɔlɔi tii taniga ʋeevɛ zinai niitiɛ ya te bataizei maa zɔlɔ woga ga te kɛ. Kɛ ani ŋaza nui e bataizei maa zɔlɔ woga maa nɛɛ e tii niitiɛ ɣɛ zinaitiɛ ta kɛ, zɛɓɛi pagɛi ga e kɛ?
“Nu Wũ-Tuo Ʋaitiɛ Ɣaa Ɣa Kuuwui Zu” (The Watchtower, February 2021)
Wɛlɛ Jehova Na Seelei niitiɛ va te ɣi kuloni te yɛʋui zu ga te li ga kɔlɔitiɛ te ɣaa yɔwɔ̃itiɛ wɔ.
Wɛlɛ velei va gá naʋolo zɔlɔwo la ga ge Gala goo wotii ɣɛ. Wɛlɛ wɔnɔ velei va kuloai la ba leilaa gala pɛlɛi zɔitiɛ va.
“Jehova Na Seeleitiɛ Ta Naʋolo Zɔlɔwo Ɣɛ Le Ga Te Gala Goo Wotii Ɣɛ?” (Kɔlɔi nii ɣa fãga wɔlɔi ma)
