Da ɣɛna de vaitiɛ zaama diɛ Jehova laa-maa-lɛ, da ɣi-gaa-ziɛ e ɣɛ velei Masagi Deeve kɛɛni la. E ɣɛni tea: “Tɔ ɓɔɔ ga faa vagɔ, e ga kuuzu nɛɛ ʋaa ga numaa te yɛ kii-ma zii-laa zu!” (Psalm 133:1) Zee-vili-kiizu lɛ vaa de yɔɔzu ɓɔɔ yee ma. Manɛɛ de ɓɔgapɛ de ɣaa-ɓaa ga zee-vili-kiizu ɣɛ de yɔɔzu.

1. Zɛɓɛi ɓɔɔ numaa ta pɛtɛ Jehova ʋeli veaitiɛ zaama?

Ani ya liina zuu ɓalaa su e li da ɣaalɛ-bai ta zu, ya kwɛ̃ɛ ga velei ɓalaa ɛ lɛ zii woi nii ɣaa ɣa la ta ɣɛ bosu, kɛ ya wɛlɛ wõilai va e de zaama. Zɛɓɛi e kɛɛ na ɣa ɣɛ? Ɓɔvɛlaale de ɓɔgapɛ da Gala Kɔlɔi maa wolizu na ɣa ɣɛɛna kɔlɔ ma zii ɣilagi nɔ ɣa de pɛ de maa wolizu zui wɔlɔ-kɔlɔ ma. Tɔwɔ a da ɣaa-ɓaa ga de wõila lɛ ga de vaitiɛ. Vɛ nɛpɛgi de na de ‘ɓɔgapɛ da Jehova na daa-zeigi lili, ga de feli kii-ma.’​​—Zephaniah 3:9.

2. Zɛɓɛi da kɛ ga zee-vili-kiizu ɣɛ kuuwui zu?

“A wõi ga ɣiini ga ɓɔɔɓɔɔ su wiɛ kulo yii zu wiɛ kɛ.” (1 Pite 1:​22) Da leve ɣɛ le de ziɛ ga tɛnɛgi nii? De mɛlɛ ɣaazu ɓado faa yowũi niitiɛ va de ɣaa yɔwɔ̃itiɛ ta kɛ. Kɛ de ɣi-gaa-ziɛ tuɓo-vele vagɔitiɛ ma e te ya. Mɛlɛ nɔ e ɣaa yɔwɔ̃i niitiɛ ɣɛ ga ya ziɛ-pulua wa tiɛni wo wuloai ŋada ɣila, kɛ niitiɛ ɓalaa wa tiɛni wɛlɛ wuloni ŋada ɣila te ɣɛ ga ya ziɛ-pulua. Manɛɛ de ɣaa-ɓaa wɔnɔ ga de mɛlɛ ɣɛ ga su-yɛvɛ bo bea.​​—A 1 Pite 2:​17. a

3. Ani wa e ɣaa yɔwɔ̃i ta wa ɓɔɛna zɛɓɛi manɛɛ e kɛ?

Ge yee-viligɛ kiizu, kɛ da ga faa yowũ ɣɛɛ vea. Tanisu da faa yowũ ɣɛ ga ɣiini. Na ɣa e kɛɛ Gala Kɔlɔi yɛ ɣɛ tea ‘a wiɛ . . . ɣiini su-ʋaa-yɛ.’ E ɣɛ wɔnɔ tea: “velei Jehova ɣa de zu-ʋaa-yɛ la a wiɛ ɣiini su-ʋaa-yɛ wa ɓalaa.” (Kolasaitiɛ 3:​13 lodo) Da faa yowũ lamaa ɣɛ Jehova ɣaazu kɛ towa de zu-ʋaa-yɛ. Na ma e wõini da ɓalaa de de ɣaa yɔwɔ̃itiɛ zu-ʋaa-yɛ. Ani ya kwɛ̃ɛna ga e faa yowũ ɣɛɛ ga e ɣaa yɔwɔ̃i ta ɣaa-ɓaa e fai na ɣaa wulo ba.​​—Mafiyu 5:​23, 24 lodo. b

 FAA LAMAA MAA WOLI

4. Mɛlɛ su-yɛvɛ bo

De wõini wõila ɣɛ de ya de ɣaa yɔwɔ̃itiɛ ʋaa ma. Kɛ na ɣa ɓaa de yee ma tanisu ga de wõi ga niitiɛ da tiɛni dɛ lɛ wuloni ŋada ɣila. Zɛɓɛi ya ɓɔ de va? A Te Ɣɛɛ Ʋaitiɛ 10:​34, 35 lodo, wo gaa-zaɣa-kɛɛ niitiɛ ɣaa wote:

• Jehova ɣa yee zei nu nɛpɛ bu ga e ɣɛ ga feli veaitiɛ te ta. Nii ɣa faa vɛɛ ɣɛ le ya ɣi-gaa-ziɛi va e vile niitiɛ va wa tiɛni wɛlɛ wuloni ŋada ɣila?

• Numaa ta su-yɛvɛ bo ɣɛ le vɛ e na ga e ɣaa ɓaazu ga e mɛlɛ yee vili su?

A 2 Kɔlĩitiɛ 6:​11-13 lodo, wo gaa-zaɣa-kɛɛ nii ɣaa wote:

• Ya leve ɣɛ le ga siɛ-pulu ɣɛ wo yɔɔzu wa e ɣaa yɔwɔ̃i niitiɛ wa tiɛni wɛlɛ wuloni ŋada ɣila?

5. Yiɛ numaa zu-ʋaa-yɛ na ɣa ɣɛɛna wiɛ yɔɔzu ɓɛtɛ wa tiɛni

Jehova ɣa de zu-ʋaa-yɛ velei ɓalaa e kwɛ̃ni ga dɛ lɛ wɔlɔ-wɔlɔ su-ʋaa-yɛ ga. A Psalms 86:5 lodo, wo gaa-zaɣa-kɛɛ niitiɛ ɣaa wote:

• E ɣisu Jehova wõini ɓɔɔ e de zu-ʋaa-yɛ?

• Zɛɓɛi e kɛɛ e wuuzu nɛɛ ga velei Jehova ɣa de zu-ʋaa-yɛ la?

• Zɛɓɛi e kɛɛ na ɣa ɓaa tanisu ga zii-la ɣɛ de yɔɔzu da numaa?

Da leve ɣɛ le de vile Jehova na po-kɔ̃ɔ-mai zu na ɣa ɣɛɛna zee-vili-kiizu ɣɛ de yɔɔzu da de ɣaa yɔwɔ̃itiɛ? A Proverbs 19:​11 lodo, wo gaa-zaɣa-kɛɛ nii ɣaa wote.

• Ani e ɣaa yɔwɔ̃i ta ɣa faa yowũ ɣɛɛna ga yiɛ, zɛɓɛi ya kɛ ga fai na zu mɛlɛ wɔɔlɔ?

 Tanisu da faa yowũ ɣɛ ga de vaitiɛ. Ani na ɣa ɣɛɛna zɛɓɛi manɛɛ de kɛ? ƲILIOGI nii lɛ ga. Yá wolona, wo gaa-zaɣa-kɛɛ nii ɣaa wote.

• Ʋiliogi nii zu, zɛɓɛi de ɣaa yɔwɔ̃i nii kɛɛni ga zii-la ɣɛ te yɔɔzu?

 NII SA È MAA WOLIA

Ya zoo e ɣaa-ɓaa ga zee-vili-kiizu ɣɛ kuuwui zu ani ya ɣɛna e vaitiɛ zu-ʋaa yɛsu na ɣa ɣɛɛna yiɛ wõila lɛ ga tiɛ.

Ma-ɓigitiɛ

• Ya leve ɣɛ le ga e mɛlɛ su-yɛvɛ bo?

• Zɛɓɛi e vaazu kɛɛzu ani wa ɓɔɛna wa e ɣaa yɔwɔ̃i ta?

• Zɛɓɛi e kɛɛ e wõini e vile Jehova na po-kɔ̃ɔ-mai zu ga yiɛ e vaitiɛ zu-ʋaa-yɛ?