KALABO 59
Ya Zoo E Lo Kpã Ani Ta Ɣɛna E Laa-Nɔwɔ-Wosu Kolai Ʋaa Ma
Kolai Maa Veaitiɛ ɓɔgapɛ ta vaazu levesu faa ɓoei zu, tiɛ te laa-nɔwɔ-wo ga te ɓe Jehova ʋeli ʋai va. E ɣisu manɛɛ nii kɛ de luo?
1. Zɛɓɛi e kɛɛ de laila ga faa ɓoei ɣa la de ma na luoi zu?
Gala Kɔlɔi bogɛ ga: “Nui nɛpɛ Gala tuo-wo zii kúu zu te ɣɛɛ vele ma su ɣilekpu ta Ziizɛ Kolai, kpɔɔla ka wo ga manui.” (2 Temete 3:12) Te Ziizɛ laa-nɔwɔ-woni ɓɔvɛlaale ɛ lɛ ŋɛni zui nii maʋaa va. Da ɓalaa dɛ lɛ zui nii maʋaa va. Na ɣa e kɛɛ ɛ lɛ wuloa ga diɛ ani gɔmɛtiitiɛ ɔɔ zɛɛ ʋaa ɣala pɛlɛ ɓulugitiɛ ta ɣɛna de laa-nɔwɔ-wosu.
2. Da ɣavele ɓɛtɛ ɣɛ le faa ɓoei ʋaa ma?
Manɛɛ de ɣaa-ɓaa de da ziɛ-pului zu-ɓaa de yɔɔzu da Jehova. Diɛ siɛ siɣi ba ɣee nɛpɛ diɛ Gala feli na ɣa ɣɛɛna diɛ Gala Kɔlɔi lodo. Ɣaa-ɓaa yiɛ li gaalɛ-baitiɛ ɓɔgapɛ su. Gaalɛ-bai niitiɛ ta ɓɔ e va e ya yee-la-mai zu-ɓaa ga e lo kpã faa ɓoei nɛpɛ bu ya la e ma ani ɓalaa kulovɛ ya ɣaalai zu. Pɔɔ nii tɔ daa-nɔwɔ-wo Kolai ʋaa ma e ɣɛni tea: ‘Jehova ɣa ga nà kpɔ-ba nu, gɛ̀ lɛ lua.’—Hiiɓuluitiɛ 13:6.
Ani da ɣɛna Gala goo wosu siɛ nɛpɛ ma towa ɓɔ de va de ɣɛ ga zii-lɔɔ vea. Gala goo wo fai ɣa kɛ da yee-la-mai zu-ɓaa. Towa kɛ wɔnɔ dɛ lɛ ɣɛɛ sa luozu nu nɛpɛ ba. (Proverbs 29:25) Ani e yii ɣa lɔɔna yiɛ Gala goo wo siɛgi nii ma, ya zoo e Gala goo wo ani ɓalaa gɔmɛtii ɣa ɣɛɛna tea de mɛlɛ Gala goo wo naa luoi zu.—1 Tɛsɛlonaikaitiɛ 2:2.
3. Ani da lo na kpã faa ɓoei yee wu da wulo ɣɛ le su-nu-ma?
Tɔ ga gaama ga dɛ lɛ wõini dɔ laa-nɔwɔ-wo. Kɛ ani da lo na kpã faa ɓoei yee wu da yee-la-mai zu ɣa ɓaa. Da lɔtɔ Jehova va ɓɔvɛlaale de kwɛ̃ni ga ani ya ɓoeina de yee ma towa ɓɔ de va. (Jĩi 1:2-4 lodo.) Jehova lɛ wõini dɔ laa-nɔwɔ-wo kɛ ani da lo na kpã faa ɓoei yee wu towa kuuzu nɛɛ. Gala Kɔlɔi ɣɛ: “Ani wa faa ɣɛ na é pele ma wiɛ malaa-nɔwɔ-wo bo wo yii lɔ gá, Gala ka lo wo wulu.” (1 Pite 2:20) Ani da lo na kpã Jehova ʋeli ʋai zu tɔ vaazu zɛʋui nii ʋeezu de ya kwɛ̃ɛ kɛ lɛ ba. Tɔ vaazu nii ɣɛɛzu ŋeteai nii zu nu nɛpɛ lɛ de laa-nɔwɔ-woga sa gaama ɣala-feliai ʋaa ma.—Mafiyu 24:13.
FAA LAMAA MAA WOLI
Faa maa woli e vile nii va e kɛɛ da laala ga da zoo de lo kpã ani ɓalaa da ɣɛna faa ɓoei yee wu. Wɛlɛ wɔnɔ kulo su-nu-mai va da maa zɔlɔwo.
4. Ya zoo e lo kpã ani ɓalaa ya numaitiɛ ta zeizu e ɣa
Ziizɛ ɣɛni kwɛ̃ni ga da numaitiɛ taniga te wuuzu lɛ vaazu nɛɛzu ani da ɣɛna Jehova ʋelizu. A Mafiyu 10:34-36 lodo, wo gaa-zaɣa-kɛɛ nii ɣaa wote.
-
Ani nu ɣa deʋena ga e Jehova ʋeli, zɛɓɛi tanisu na numaitiɛ ta kɛ?
Ga wo wɛlɛ ma wo-kɔ̃ɔ-mai ta va, ƲILIOGI nii lɛ ga. Yá wolona, wo gaa-zaɣa-kɛɛ nii ɣaa wote.
-
Zɛɓɛi ya kɛ ani ya numaitiɛ ɓɔga ya ziɛ-puluitiɛ ta ɣɛna wõini te kɛ e ɓe Jehova ʋeli ʋai va?
A Psalm 27:10 ɓɔga Maki 10:29, 30 lodo. Wa ma maa wũgi lodona, wo gaa-zaɣa-kɛɛ nii ɣaa wote. Wa fele kelei lodona wɔnɔ, wo gaa-zaɣa-kɛɛ nii ɣaa wote:
-
Ki-togi nii ɣa ɓɔ e va ɣɛ le ani ya nui ta ɔɔ ya ziɛ-pului ta ɣa ɣɛna ɣaa ɓaazu ga e kɛ e ɓe Jehova ʋeli ʋai va?
5. Ɣaa-ɓaa yiɛ Jehova ʋeli ani ɓalaa numaa ta e laa-nɔwɔ-wosu
Ani nu ɣa ɣɛna ɣaa ɓaazu ga e kɛ de ɓe Jehova ʋeli ʋai va kɛni da ɣɛ ga zii-lɔɔ vea ga de lo kpã. ƲILIOGI nii lɛ ga. Yá wolona, wo gaa-zaɣa-kɛɛ nii ɣaa wote.
-
Zɛɓɛi ɓɔɔ e wɛlɛɛ ba ʋiliogi nii zu ga e ɓɔga e va ga e ɣɛ ga zii-lɔɔ nu?
A Te Ɣɛɛ Ʋaitiɛ 5:27-29 ɓɔga Hiiɓuluitiɛ 10:24, 25 lodo. Wa ma maa wũgi lodona, wo gaa-zaɣa-kɛɛ nii ɣaa wote. Wa fele kelei lodona wɔnɔ, wo gaa-zaɣa-kɛɛ nii ɣaa wote:
-
Tanisu gɔmɛtii ɣa boga de mɛlɛ wũi ŋada ɣila ɔɔ de mɛlɛ li Gala goo wosu. Kɛ zɛɓɛi e kɛɛ e ga faa ɓi ga de ɣata Jehova ʋeli ʋai va?
6. Jehova ɣa ɓɔ e va e lo kpã
Jehova Na Seeleitiɛ te zui wɔlɔ-kɔlɔ ma ta ɣaa ɓaazu ga te Jehova ʋeli ani ɓalaa faa ɓaa ka laazu te ma. Ga e wɛlɛ nii va e ɓɔsu te va, ƲILIOGI nii lɛ ga. Yá wolona, wo gaa-zaɣa-kɛɛ nii ɣaa wote.
-
Ʋiliogi nii zu zɛɓɛi e ɓɔni de ɣaa yɔwɔ̃i niitiɛ va ga te lo kpã?
A Loomɛitiɛ 8:35, 37-39 ɓɔga Felepaitiɛ 4:13 lodo. Wa ma maa wũgi lodona, wo gaa-zaɣa-kɛɛ nii ɣaa wote. Wa fele kelei lodona wɔnɔ, wo gaa-zaɣa-kɛɛ nii ɣaa wote:
-
Gala goi niitiɛ te ɓɔga e va ɣɛ le ga e laala ga ya zoo e lo kpã faa ɓoei yee wu?
A Mafiyu 5:10-12 lodo, wo gaa-zaɣa-kɛɛ nii ɣaa wote.
-
Zɛɓɛi e kɛɛ kuuzu nɛɛ ɣa ɣɛ e ya ani ɓalaa ta ɣɛna e laa-nɔwɔ-wosu?
Jehova ʋeli vea lamaa ta losu kpã faa ɓoei nii wu numaa ta da te ma. Ya ɓalaa ya zoo e lo kpã!
NUMAA TANIGA TA ƔƐ TEA: “Gɛ lɛ zooga gɔ lo kpã faa ɓoei yee wu.”
-
Gala goi zɛɓɛi ya dodo ga e ɓɔ manui va e ɣɛ ga zii-lɔɔ nu?
NII SA È MAA WOLIA
Jehova wuuzu ɣa nɛɛ ani da ɣaa ɓaana de lo kpã faa ɓoei yee wu. Towa ɓɔ de va ga de zoo de lo kpã.
Ma-ɓigitiɛ
-
Zɛɓɛi e kɛɛ Kolai Maa Veaitiɛ te laila ga numaa ta te laa-nɔwɔ-wo Jehova ʋeli ʋai ʋaa ma?
-
Ya leve ɣɛ le e ɣavele ɓɛtɛ faa ɓoei nii ʋaa ma numaa ta da e ma?
-
Zɛɓɛi ya ɓɔ yiɛ e laala ga ya zoo e lo kpã Jehova ʋeli ʋai zu ani ɓalaa faa ɓoei ɣa laazu e ma?
WƐLƐ FAA LAMAA VA
Wuito nu niinɛi nii ma e yɛpɛ e vile velei Jehova ɓɔni la ba siɛgi ma e ɣɛni la kpidi vɛlɛ wu tei e boni ga ɛ lɛ yee vilisu gɔmɛti ʋaazu.
Wɛlɛ nii va e ɓɔni zunui nii ɓɔga ŋazai va ga te lo kpã Jehova ʋeli ʋai zu kwena tamaa wuuzu velei ɓalaa te ɣɛni te laa-nɔwɔ-wosu la.
Te Ɣɛni Jehova Ʋelizu Velei Ɓalaa Faitiɛ Ma Yɛni Ʋeli Bosu La (7:11)
Faa maa woli e vile velei va ya yii-lɔɔ la faa ɓoei yee wu.
“Ɣavele Ɓɛtɛ Faa Ɓoei Nii Ʋaa Ma Numaa Ta Da Yiɛ” (The Watchtower, July 2019)
Manɛɛ de ɣi-gaa-ziɛ ɣɛ le e vile faa ɓaagi nii va da numaitiɛ ta da de ma na ɣa ɣɛɛna da leve ɣɛ le de lo kpã?
“Gamai Lɛ Vaa Ga Zii-La, ‘Kɛ Towa Va Ga Boa Zɔkpɔ’” (The Watchtower, October 2017)
