KALABO 03
E Laavɛ Ga Nii Gala Kɔlɔi Boga?
Gala Kɔlɔi ki-to lamaa ʋeevɛ e vɛɛ tɛnɛ tamaa va. Ɣeeta e wõini e faa wɛ̃ɛ e vile niitiɛ va e boga, kɛ na ɓaavɛ ga e la ga tiɛ. E ɣisu manɛɛ e la ga ki-togitiɛ ta tɛnɛgitiɛ kuloai kɔlɔ wɔlɔ-zaɣagi nii zu? E ɣisu ya zoo e la ga nii Gala Kɔlɔi boga e vile zii-ma ɣɛɛ wo faa va, zaa ta ŋinaa? Nu lamaa laavɛ la. Gé wõini ya ɓalaa e wɛlɛ su va ani ya zoo e laala.
1. Niitiɛ te Gala Kɔlɔi zu e ɣisu ta ga gaama?
Gala Kɔlɔi bogɛ ga, tɔ ga “gaama woi nii [ponɛi] ɓɔɔ ga pagɔ.” (Ecclesiastes 12:10) E yɛpɛvɛ e vile faa ɓɔɔɓɔɔ ba numaa te kɛɛni. (Luki 1:3; 3:1, 2 lodo.) Kɔlɔ wɛ̃ɛ bea lamaa te dɛɛ ga nii Gala Kɔlɔi boga e vile siɛgitiɛ va, numaitiɛ, ŋada vɛitiɛ, ta niitiɛ te ɣɛɛni ta ga gaama.
2. Zɛɓɛi e kɛɛ da ɣɛ tea Gala Kɔlɔi vagɛ de ʋaa ma?
Gala Kɔlɔi yɛpɛvɛ e vile faa lamaa va numaa tɛ lɛ ɣɛni kwɛ̃ni siɛgi ma te ɣɛni ponɛsu la. E yɛpɛvɛ e vile niitiɛ va nu lamaa zaa te faa lamaa woni e vile ba. Faitiɛ e boni siɛgi ma te ponɛni la, nu lamaa tɛ lɛ ɣɛni laani la. Kɛ faitiɛ zaa numaa te maa wolia, ta dɛɛzu ga nii Gala Kɔlɔi boga tɔ ga gaama. Tɔ ga kɔlɔi “da yee la ma zaa, ŋinaa, wɔlɔ-wɔlɔ ta wɔlɔ-wɔlɔ.”—Psalm 111:8.
3. Zɛɓɛi e kɛɛ manɛɛ de la ga nii Gala Kɔlɔi boga e vile ŋinaa ŋeteai va?
Gala Kɔlɔi yɛpɛvɛ e vile fai “niitiɛ va tɛ lɛ dɛ ɣɛɛni.” a (Isaiah 46:10) E yɛpɛni e vile faa lamaa va tɔ vɛɛ ɣɛɛzu. E yɛpɛvɛ wɔnɔ e vile fai niitiɛ va zaa te ɣɛɛzu. Kalabogi nii zu, daa vaazu wɛlɛzu faa taniga va Gala Kɔlɔi boni. Velei fai niitiɛ te ɣɛɛ la, e ɣɛ velei nɔ Gala Kɔlɔi boni la, tɔ ga faa ɓi!
FAA LAMAA MAA WOLI
Faa maa woli e vile faa taniga va zaa numaa te maa wolizu, ta nii Gala Kɔlɔi boga, velei te la ga faa gila. Wɛlɛ wɔnɔ faa taniga va Gala Kɔlɔi boni.
4. Kɔlɔ wɛ̃ɛ bea lamaa te ʋaavɛ nii wu Gala Kɔlɔi boga
Wɔlɔ-wɔlɔi zu, e ɣɛni numaa taniga ɣisu ga zui nii ɣa zeini ŋɛni ta ma. ƲILIOGI nii lɛ ga.
Wɛlɛ nii va te ponɛni Joobi na kɔlɔi zu kwena 3,500 levega sa. A Job 26:7 lodo, wo gaa-zaɣa-kɛɛ nii ɣaa wote:
-
Nii Gala Kɔlɔi boni ga zui lɛ zeini ŋɛni ta nɛpɛ ma, zɛɓɛi e kɛɛ towa wulo ga nu lamaa?
Numaa tɛ lɛ ɣɛni ziɛi ma ʋai ɣaa ɣaani e yɛsu ɣeeta kwena 1800 zu. Kɛ wɛlɛ nii va Gala Kɔlɔi boni kwena 1500 levega sa. A Job 36:27, 28 lodo, wo gaa-zaɣa-kɛɛ niitiɛ ɣaa wote:
-
Zɛɓɛi ɓɔɔ e e wuuzu nɛɛ e vile nii va Gala Kɔlɔi boga e vile ziɛi maʋai va?
-
Gala goi nii e dodoga nɔ, e ɣisu e ya yee-la-mai zu ɓaavɛ e vile Gala Kɔlɔi va?
5. Gala Kɔlɔi yɛpɛni e vile faa ɓigii taniga va ga tɔ ɣɛ
A Isaiah 44:27–45:2 lodo, wo gaa-zaɣa-kɛɛ nii ɣaa wote:
-
Zɛɓɛi Gala Kɔlɔi boni e vile Babelɔ̃ va?
Faa taniga te dɛɛ ga Saalɔ nii e ɣɛni ga masagi Pɛrsia ta na kɔɔ wɔɔ veaitiɛ, te Babelɔ̃ lai zu ŋala-ŋalani. Te nii ɣɛɛni kwena 539 zu, tɔ vɛɛ Ziizɛ ɣaazu. Ziɛi nii e ɣɛni laani tai ɣaazu luovɛ, te pele ɓalaa laa laoni ga yiɛ yii la. Te lɛɛni tai nii zu ɓɔvɛlaale kpogi laa laogɛi e ɣɛni. Te numaitiɛ yee maazu ɣaleni ŋapi wɔɔ ʋaa lɛ ɣɛni ba. Tei te Babelɔ̃ lai zu ŋala-ŋalani, kwena 2,500 levega sa. Wɛlɛ nii va Gala Kɔlɔi boni.
A Isaiah 13:19, 20 lodo, wo gaa-zaɣa-kɛɛ nii ɣaa wote:
-
Nii Gala Kɔlɔi boni e vile Babelɔ̃ va, e ɣɛɛni ɣɛ le?
Babelɔ̃ lai te su ŋala-ŋalani e Iraq
6. Gala Kɔlɔi faa woni e vile niitiɛ va zaa te ɣɛɛzu
Gala Kɔlɔi bogɛ ga da ziɛgi ɣa e ga “ŋeteai ɣaa ɓela foloi.” (2 Temete 3:1) Wɛlɛ nii va Gala Kɔlɔi boni e vile siɛgi nii va de su.
A Mafiyu 24:6, 7 lodo, wo gaa-zaɣa-kɛɛ nii ɣa wote:
-
Zɛɓɛi Gala Kɔlɔi boni ga ɔ ɣɛ ŋetea ɣaa ɓela foloi zu?
A 2 Temete 3:1-5 lodo, wo gaa-zaɣa-kɛɛ niitiɛ ɣaa wote:
-
Zɛɓɛi Gala Kɔlɔi boni e vile nu lamaa luɓo-velei va ŋetea ɣaa ɓelagi zu?
-
Tuɓo-velei niitiɛ zaama, ma zɛɓɛ ɣa e pɛtɛsu?
NUMAA TANIGA TA ƔƐ TEA: “Nu ɓuse na kele-ɣele ka e Gala Kɔlɔi zu.”
-
Zɛɓɛi e ɓɔga e va e kwɛ̃ɛ ga da la ga nii Gala Kɔlɔi boga?
NII SA È MAA WOLIA
Nii kɔlɔ wɛ̃ɛ bea lamaa te boga, e vɛɛ niitiɛ va Gala Kɔlɔi boga, ta ɓɔ de va de la ga Gala Kɔlɔi.
Ma-ɓigitiɛ
-
E ɣisu niitiɛ te Gala Kɔlɔi zu ta ga gaama ɔɔ ta ga zɛɛ-ʋaa?
-
Faa taniga ta ga zɛɓɛ Gala Kɔlɔi boga ga kɔlɔ wɛ̃ɛ bea lamaa te ʋaa bu?
-
E ɣisu Gala Kɔlɔi yɛpɛvɛ e vile nii va e vaazu ɣɛɛzu ŋinaa ŋeteai zu? Zɛɓɛ e kɛɛ yiɛ na wo?
WƐLƐ FAA LAMAA VA
E ɣisu niitiɛ Gala Kɔlɔi boga, faa wulu ɣaa-ziɛ wuigitiɛ te bogɛ ga taniga ta ga zɛɛ-ʋaa?
“E Ɣisu Faa Wulu Ɣaa-Ziɛ wuigitiɛ Te Ʋaavɛ Nii Wu Gala Kɔlɔi Boga?” (Kɔlɔi nii ɣa fãga wɔlɔi ma)
Zɛɓɛi Gala Kɔlɔi boga e vile “ŋeteai ɣaa ɓelagi” va?
“Gala Kɔlɔi Yɛpɛvɛ E Vile Faa 6 Va De Pɛtɛsu Yiɛ Ɣɛ” (The Watchtower, May 1, 2011)
Faa maa woli e vile nii va Gala Kɔlɔi boni e vile Geliikiitiɛ ta masadai va, ta velei e ɣɛɛni la.
Niitiɛ Gala Kɔlɔi boga, wɛlɛ velei e zunu gila na ki-gaa-ziɛi maa ʋeli boni la e vile Gala Kɔlɔi va.
“Gɛ Lɛ Ɣɛni Laani La Ga, Gala Ka Na” (The Watchtower No. 5 2017)
a Nii Gala Kɔlɔi boni ga ɔ ɣɛ, tɔ ga keela woo kuloai Gala zeea.
