KALABO 04
Ɓɛɛ Ɣa E Ga Gaama Ɣalagi?
Nu ɓuse vɛɛ ɓɔɔ gala tamaa ʋelizu kwena tamaa wuuzu. Kɛ Gala Kɔlɔi yɛpɛvɛ e vile Galagi ta va. ‘Galagi nii levegɛ galagitiɛ ɓɔgapɛ ba.’ (2 Chronicles 2:5) Ɓɛɛ ɣa ɓɔɔ e ga Galagi nii? Zɛɓɛi e kɛɛ tevegɛi galagitiɛ ɓɔgapɛ ba numaa te vɛɛ felizu? Kalabogi nii zu, wɛlɛ nii va Galagi nii wõini e kwɛ̃ɛ e vile ba.
1. Zɛɓɛi e ga Gala na daa-zeigi, tɔwɔ de levegɛ ɣɛ le de kwɛ̃ɛ ga e wõini de na daa-zeigi wɛ̃ɛ?
Gala ge na daa-zeigi lɛɛvɛ ga diɛ Gala Kɔlɔi zu. Ɛ ɣɛ: “Na ɣa ge ga Jehova. Na daa-zeigi ɣana.” (Isaiah 42:5, 8 lodo) Te Gala na daa-zeigi wonɛni Hiiɓulu woi zu. Lɔɔma goi zu ta tili ga Jehova, tɔwɔ su-wulo-zu ɣa ga “Towa Kɛ Zii-Mai Ɣɛ.” Jehova wõini de na daa-zeigi wɛ̃ɛ. (Exodus 3:15) De levegɛ ɣɛ le de nii wɛ̃ɛ? Gala na daa-zeigi ɣa Gala Kɔlɔi zu tevegɛi ɓalaa 7,000 va! a “Gaama Ɣalagi e gee-zuvɛ e vɛɛ zui ma va” na daa-zeigi ɣa ga Jehova.—Deuteronomy 4:39
2. Zɛɓɛi Gala Kɔlɔi ɣa dɛ ga diɛ e vile Jehova va?
Gala Kɔlɔi bogɛ ga galagitiɛ ɓɔgapɛ zaama numaa ta feli, Jehova tɔ ɣilekpu ɣa e ga gaama Ɣalagi. Wɛlɛ zaɓui taniga va. Jehova na gaa-ɓai ɣa ŋɛni ɓɔgapɛ maazu na ɣa ɣɛɛna tɔ “ɣilekpu ka e ga Ɣalaso Gwalai zui pɛ maazu.” (Psalms 83:18 lodo) Towa e ga ‘Gaa-Ɓaa pɛ maƔalagi,’ na zu-wulo-zu ɣa ga gaa-ɓaa ɣa zeea ga e nii nɛpɛ kɛ e wõini e kɛ. Towa e ŋɛniitiɛ ɓɔgapɛ kpɛtɛɛ gee-zuvɛ e vɛɛ ʋulu ŋɛni ɓɔgapɛ ba e zui ma. (Faa wuloai kɛnɛ ma 4:8, 11) Jehova lɛ wuloni ga nu ɓuse, tɔ na wɔlɔ-wɔlɔ ta wɔlɔ-wɔlɔ.—Psalm 90:2.
FAA LAMAA MAA WOLI
Faa maa woli e vile velei Gala na daa-zeigi ɓɔga toso laa-zeigitiɛ te yɔɔzu wuloai la. Wɛlɛ wɔnɔ velei Gala na daa-zeigi lɛɛ la, ta nii e kɛɛ yiɛ dɛ ga diɛ.
3. Toso laa-zeigitiɛ te lamagɛ kɛ na daa-zei kpɔɔɓɔɔgi ɣa nɔ ɣilekpu
Ga e nu na daa-zei kpɔɔɓɔɔgi ɓɔga toso laa-zeigitiɛ yɔɔzu wɛ̃ɛ, ƲILIOGI nii lɛ ga. Yá wolona, wo gaa-zaɣa-kɛɛ nii ɣaa wote.
-
Toso laa-zeigitiɛ ta ɣa ga “maliɣii,” ɓɔga daa-zei kpɔɔɓɔɔgi te yɔɔzu wulovɛ ɣɛ le?
Gala Kɔlɔi bogɛ ga numaa ta Gala tamaa ʋeli. A Psalms 136:1-3 lodo, wo gaa-zaɣa-kɛɛ nii ɣa wote:
-
Ɓɛɛ ɣa e ga Galagi nii tevegɛi galagitiɛ ɓɔgapɛ ba?
4. Jehova wõini e na daa-zeigi wɛ̃ɛ, yiɛ tili la
E ɣisu Jehova wõini e na daa-zeigi wɛ̃ɛ? ƲILIOGI nii lɛ ga. Yá wolona, wo gaa-zaɣa-kɛɛ nii ɣaa wote.
-
Zɛɓɛi e kɛɛ daa ɣɛ tea Jehova wõini numaa te na daa-zeigi wɛ̃ɛ?
Jehova wõini numaa tiɛ tili ga na daa-zeigi. A Loomɛitiɛ 10:13 lodo, wo gaa-zaɣa-kɛɛ niitiɛ ɣaa wote:
-
Zɛɓɛi e kɛɛ e ga faa ɓi ga de Gala lili ga na daa-zeigi?
-
Zɛɓɛi ya ɣɛ ga ya ɣi-gaa-ziɛi ani nu ta ɣa ɣi-zɛ na ya laa-zeigi zu yiɛ e lili la?
-
E ɣisu Jehova ɣa ɣi-gaa-ziɛ ɣɛ le, ani ya na tilisu ga na daa-zeigi?
5. Jehova wõini e ɣɛ ga na siɛ-pulu
Ŋaza nui nii kuloai Cambodia ta tili ga Soten e ɣɛni tea: “nii vaa ɓɔɔ ga kuuzu nɛɛ ɓɔɔɓɔɔ pɔ,” ga tei e faa maa wolini e vile Jehova na daa-zeigi va. ƲILIOGI nii lɛ ga. Yá wolona, wo gaa-zaɣa kɛɛ nii ɣaa wote.
-
Ʋiliogi nii zu, tei Soten Gala na daa-zeigi wɛ̃ɛni zɛɓɛi na kɛɛni ga na ki-gaa-ziɛi?
Ɔ vɛɛ ɣɛɛzu ga nu na siɛ-pulu kɛni ya manui na daa-zeigi wɛ̃ɛ. A Jĩi 4:8a lodo, wo gaa-zaɣa-kɛɛ niitiɛ ɣaa wote:
-
Zɛɓɛi Jehova wõini e kɛ?
-
Ani ya Gala na daa-zeigi wɛ̃ɛna yiɛ tili la, na ɣa ɓɔ e va ɣɛ le ga e ɣɛ ga na siɛ-pulu?
NUMAA TANIGA TE ƔƐ: “Galagi ɣa nɔ ɣilekpu, na ma ya tili ga daa-zei nɛpɛ.”
-
E laavɛ ɓɔɔ la ga Gala na daa-zeigi ɣa ga Jehova?
-
Ya leve ɣɛ le e dɛ ga Gala wõini diɛ tili ga na daa-zeigi?
NII SA È MAA WOLIA
Gaama Ɣala ɣilekpugi na daa-zeigi ɣa ga Jehova. É wõini de na daa-zeigi wɛ̃ɛ, diɛ tili la ga de ɣɛ ga na siɛ-pulu.
Ma-ɓigitiɛ
-
Jehova wulovɛ ba leilaa ɣɛ le galagi zɔitiɛ zaama numaa ta feli?
-
Zɛɓɛi e kɛɛ manɛɛ diɛ Gala lili ga na daa-zeigi?
-
Zɛɓɛni ka te dɛɛzu ga Jehova wõini ga de ɣɛ ga na siɛ-pulu?
WƐLƐ FAA LAMAA VA
Wɛlɛ faa looluo va e dɛɛzu ga Gala ka na.
Zaɓui wɛ̃ɛ e kɛɛ e ga kele-ɣele faa ga de laala ga Gala ka na wɔ.
Zaɓui wɛ̃ɛ e kɛɛ manɛɛ de Gala lili ga na daa-zeigi, velei ɓalaa dɛ lɛ koni velei tɔ tili la wɔlɔ-wɔlɔi zu.
E ɣisu tɔ ga faa ɓi ga de Gala tili ga na daa-zei kpɔɔɓɔɔgi? Zaɓui wɛ̃ɛ e kɛɛ da ɣɛ tea Gala na daa-zei kpɔɔɓɔɔgi ɣa nɔ ɣilekpu.
“E Ɣisu Gala Na Daa-Zeigi Lamagɛ?” (Kɔlɔi nii ɣa fãga wɔlɔi ma)
a Ani e wõini e ki-daa-wodo lamaa zɔlɔwo e vile Gala na daa-zeigi zu-wulo-zu va, ta nii e kɛɛ numaa taniga te daa-zeigi nii wuloa Gala Kɔlɔi taniga zu, wɛlɛ Appendix A4 Gala Kɔlɔi nii zu: New World Translation of the Holy Scriptures.
