KALABO 06
Ŋeteai Lɔɔ-Zeini Ɣɛ Le?
“Gala ɣa zɛʋu wuloa zeea.” (Psalms 36:9) E laavɛ ga na? Tɔ numaa taniga ɣisu ga ŋeteai lɔɔ-zeini ɓɔɔ yee ma. Ani na ɣa ga gaama a kɛ tii nu ɓuse lɛ vaani zui nii ma zaɓu ma. Kɛ ani Jehova ɣa e ʋulu ŋɛniitiɛ ɓɛtɛɛ, a kɛ tii e te ɓɛtɛvɛ zaɓu ma kelee? a Faa maa woli e vile nii va Gala Kɔlɔi boga e vile ŋeteai lɔɔ-zeizuvɛ va. Wɛlɛ wɔnɔ nii va e kɛɛ e ga faa vagɔ ga de la ga nii Gala Kɔlɔi boga.
1. Ɓɛɛ ɣa e ŋɛni ɓɔgapɛ kpɛtɛni?
Gala Kɔlɔi ɣɛ “Ŋeteai lɔɔ-zeizuvɛ, Gala ge gee wɔlɔgi ɓɔga zui ɓɛtɛni.” (Genesis 1:1) Faa wulu ɣaa-ziɛ wuigitiɛ te lamaa te ʋaa bu ga zui, e vɛɛ ŋɛniitiɛ va te gee-zuvɛ te lɔɔ-zeizu ɣa ma. Gala ge te ɓɛtɛni ɣɛ le? Na “gaa-ɓaa ŋinɛgi” ɣa e ŋɛniitiɛ ɓɔgapɛ kpɛtɛɛ la. Taniga ta ga foloi, sɔmɔ dekaitiɛ, e vɛɛ zui va.—Genesis 1:2.
2. Gala zui ɓɛtɛni zɛɓɛ ʋaa ma?
Jehova “lɛ [zui] ɓɛtɛni ɓɔɔvɛ ʋaa ma, kɛ e kpɛtɛni ga numaa te yɛ ma.” (Isaiah 45:18) E zui nii ɓɛtɛni ɓɔɔ ga de yɛ ma kuuzu nɛɛ zu wɔlɔ-wɔlɔ ta wɔlɔ-wɔlɔ. (Isaiah 40:28; 42:5 lodo.) Faa wulu ɣaa-ziɛ wuigitiɛ te bogɛ ga zui nii wulovɛ ɓɔɔ ba leilaa. Zui nii ma nɔ ɣa nu ɓuse ɣa ŋetea ɣɛ na.
3. Nu ɓuse ɓɔga suoitiɛ te yɔɔzu wulovɛ ɣɛ le?
Tei Jehova zui ɓɛtɛni, e ʋulu ŋɛniitiɛ ɓɛtɛni ma. Tɔɔ-zeizuvɛ, e gulu lamaa ɓɛtɛni e vɛɛ suoitiɛ va zui ma ga maa-wũ. Tei sa na wuloni ba, “Gala ge zunui ɓɛtɛni maa niinigi zu.” (Genesis 1:27 lodo.) Zɛɓɛi e kɛɛ nu ɓuse wuloai ba leilaa? Da zoo de ziɛ ga Gala na tuɓo-veleitiɛ ɓɔvɛlaale e de ɓɛtɛni maa niinigi zu. Tuɓo-velei niitiɛ te ta ɣa ga wõila ta tele-bo tuoi. Velei e de ɓɛtɛɛ la da zoo wɔnɔ de zii woo maa woli, de wɛlɛ faa vapagaa va, na ɣa ɣɛɛna de gui ma ɣaa-nɛɛ wulo. Da zoo wɔnɔ de ɣɛ ga de ɓɛtɛ Ɣalagi na siɛ-pulu, kɛ suoitiɛ tɛ lɛ zooga tɔ na ɣɛ.
FAA LAMAA MAA WOLI
De wɛlɛ faa taniga va e dɛɛzu ga Gala ɣa e ʋulu ŋɛniitiɛ ɓɛtɛɛ. Wɛlɛ zaɓui va e kɛɛ da zoo de la ga nii Gala Kɔlɔi boga e vile ŋɛni ɓɔgapɛ kpɛtɛ ʋai va. Wɛlɛ nii va da maa woli wɔnɔ e vile Gala ba, ani da wɛlɛna tuɓo-vele vagɔitiɛ va e nu ɓuse ya.
4. Gala ɣa e ʋulu ŋɛniitiɛ ɓɛtɛɛ
Taitiɛ ta wɛlɛ niitiɛ va Gala ge kpɛtɛi te ŋɛni taniga ɓɛtɛ, ta te laa-maa-lɛ. Kɛ e ɣisu ɓɛɛ ɣa ɓɔɔ manɛɛ de daa-maa-lɛ? ƲILIOGI nii lɛ ga. Yá wolona, wo gaa-zaɣa-kɛɛ nii ɣaa wote.
-
Ŋɛni taniga ta ga zɛɓɛ Gala ge kpɛtɛɛ, numaa te wɛlɛɛ ba te ŋɛni taniga ɓɛtɛ?
Pɛlɛi ta nɛpɛ ka nɔ ga ŋɛni nui ta toga. Kɛ e ɣisu ɓɛɛ ɣa e ŋɛni ɓɔgapɛ kpɛtɛni? A Hiiɓuluitiɛ 3:4 lodo, wo gaa-zaɣa-kɛɛ niitiɛ ɣaa wote:
-
Ŋɛniitiɛ Gala ge kpɛtɛi gee-zuvɛ ta zui ma, ma zɛɓɛ ɣa ɓɔɔ e e wuuzu nɛɛ?
-
E ɣisu tɔ ga kele-ɣele faa ga de ɣi-gaa-ziɛ ga ŋɛni ɓɔgapɛ kpɛtɛ nu ɣa ma? Zɛɓɛi e kɛɛ yiɛ na wo?
E ɣɛni nii wõni?
Ya kɔlɔitiɛ ɓɔga ʋiliogitiɛ vɛtɛ te yɛpɛzu e vile nii va jw.org ma. Ya pɛtɛ vɛ ponɛɛ na ga “E Ɣisu Kpɛtɛ Nu Ɣa Ma?” e vɛɛ “Nii Numaa Taniga Te Boga E Vile Ŋeteai Lɔɔ-Zeizuvɛ Va.”
“Ɓɔvɛlaale pɛlɛ ta nɛpɛ ka nɔ ga ŋɛnii togɛi nu ta vɛ. Kɛ̀ Gala ka é ga ŋɛni pɛ to nui”
5. Tɔ ga faa vagɔ ga de la ga nii Gala Kɔlɔi boga e vile ŋɛni ɓɔgapɛ kpɛtɛ ʋai va
Genesis toso gilagi zu, Gala Kɔlɔi yɛpɛvɛ e vile zui ɓɛtɛ ʋai va e vɛɛ ʋulu ŋɛniitiɛ va te ma. E laavɛ ga nii e boga ɔɔ e ɣisu tɔ ga zɛɛ-ʋaa? ƲILIOGI nii lɛ ga. Yá wolona, wo gaa-zaɣa-kɛɛ niitiɛ ɣaa wote.
-
E Ɣisu Gala Kɔlɔi bogɛ ga Gala ge zui ɓɛtɛni e vɛɛ ŋɛnii ɓɔgapɛ ba e ma folo 6 wuuzu?
-
Nii Gala Kɔlɔi boga e vile ŋɛni ɓɔgapɛ kpɛtɛ ʋai va, e ɣisu tɔ ga gaama? Zɛɓɛi e kɛɛ yiɛ na wo?
A Genesis 1:1 lodo, wo gaa-zaɣa-kɛɛ nii ɣaa wote:
-
Faa wulu ɣaa-ziɛ wuigitiɛ te dɛɛ ga ŋɛniitiɛ te gee-zuvɛ e vɛɛ zui va te lɔɔ-zeizu ɣa ma. Nii te boga e vɛɛ nii va e dodoga Gala Kɔlɔi zu ta ga faa gila ɣɛ le?
Numaa taniga ta ɣi-gaa-ziɛzu ani Gala ge ʋulu ŋɛni gila ɓɛtɛni maa yiɛ sa ʋeli bo ga ʋulu ŋɛnii zɔitiɛ ɓɔgapɛ. A Genesis 1:21, 25, 27 lodo, wo gaa-zaɣa-kɛɛ niitiɛ ɣaa wote:
-
E ɣisu Gala Kɔlɔi dɛɛvɛ ga Gala ge ʋulu ŋɛni gila ɓɛtɛni maa ʋeli bo ga kaleitiɛ, suoitiɛ e vɛɛ sa nu ɓuse va? Ɔɔ é mazii ɣile-giledaitiɛ ɓɛtɛni? b
6. Gala nu ɓuse ɓɛtɛvɛ ɓɔɔ leilaa
A dɛ lɛ wuloni ga suoitiɛ ɣavele. A Genesis 1:26 lodo, wo gaa-zaɣa-kɛɛ nii ɣaa wote:
-
Gala de ɓɛtɛvɛ maa niinigi zu, na ɣa e kɛɛ da zoo de wõila lɛ de numaa ɣaazu maa wõi zo. Zɛɓɛi na dɛɛzu ga yiɛ e vile Gala na tuɓo-veleitiɛ va?
NUMAA TANIGA TA ƔƐ TEA: “Nii Gala Kɔlɔi boga e vile ŋɛni ɓɔgapɛ kpɛtɛ ʋai va tɔ ga zɛɛ-ʋaa.”
-
Zɛɓɛi e ga yɛdɔ ɣi-gaa-ziɛi? Zɛɓɛi e kɛɛ yiɛ ɣi-gaa-ziɛ ɣana?
NII SA È MAA WOLIA
Jehova ŋɛni ɓɔgapɛ kpɛtɛni gee-zuvɛ e vɛɛ zui va.
Ma-ɓigitiɛ
-
Zɛɓɛi Gala Kɔlɔi boga e vile ŋɛni ɓɔgapɛ kpɛtɛ ʋai va?
-
E ɣisu Gala ge ʋulu ŋɛni gila ɓɛtɛni maa yɛ sa ʋeli bo ga ʋulu ŋɛnii zɔitiɛ ɔɔ e te ɓɛtɛni ga gile-gile?
-
Zɛɓɛi e kɛɛ nu ɓuse wuloai ɓɔɔ ba leilaa?
WƐLƐ FAA LAMAA VA
Wɛlɛ ŋɛni taniga va e dɛɛzu ga kpɛtɛ nu ɣa ma.
“Zɛɓɛi Gala Ɓɛtɛ Ŋɛniitiɛ Ta Dɛ Ga Diɛ?” (Awake!, September 2006)
Wɛlɛ velei duu keeai ɣa ɓɔ la dui va ga e faitiɛ ɣaa ɣa Gala Kɔlɔi boga e vile ŋɛniitiɛ ɓɔgapɛ kpɛtɛ ʋai va.
Nii numaa taniga te boga ga ŋɛni ɓɔgapɛ te wulovɛ ɓɔɔ yee ma e vɛɛ nii va Gala Kɔlɔi boga, wɛlɛ na va ani ta ga faa gila.
Wɛlɛ nii va faa wulu ɣaa-ziɛ wiigitiɛ te boga e vile wɔlɔ-wɔlɔ zu veaitiɛ te maɣaitiɛ va ani tɔ dɛɛzu ga Gala ge ŋɛni pɛ kpɛtɛni ɔɔ te ɓɛtɛni ɓɔɔ yee ma.
Velei Ŋeteai Lɔɔ-Zeini La—Gaa-Zaɣa-Kɛɛ Looluoi Manɛɛ De Gaa Wote (bolosiɛ)
