KALABO 09

Gala-Feliai Ɣa Ɓɔ E Va E Lɔtɔ Gala Ba

TƐ GÁ

E ɣi-gaa-ziɛa dɛ ga manɛɛ e maazu vɛtɛ maa zɔlɔwo ya ŋeteai zu? Ya ɣi-gaa-ziɛzu gaa-zaɣa-kɛɛ taniga ma ya wõi ga e gaa wotegitiɛ zɔlɔwo? E wõini e gaa-nɛkpɛ maa zɔlɔwo? E wõini e lɔtɔ Jehova va? Gala-feliai ɣa ɓɔ e va e fai niitiɛ kɛ. Kɛ manɛɛ e Gala feli ɣɛ le? E ɣisu Gala ka wuito Gala-feliai te pɛ ma? Zɛɓɛi manɛɛ e kɛ ga e wuito ya Ɣala-feliai ma? De wɛlɛ sa faa taniga va.

1. Bɛɛ ɣa manɛɛ de feli na ɣa ɣɛɛna zɛɓɛi manɛɛ de feli ma?

Ziizɛ dɛɛni ga de Ɣeea Gala nii e gee-zuvɛ, towa manɛɛ de feli. Ziizɛ ɓalaa e Jehova ʋelini. E ɣɛni tea: “Na ma wa Gala feli ŋɛ ni. Yài è ga gé ɣeeai è gee-zuvɛ . . . ’” (Mafiyu 6:9.) Siɛ-pului e de yɔɔzu da Jehova, su ɣa ɓaa ani da na felizu.

Da Gala feli e vile faa nɛpɛ ba. Na ɓalaa ɣɛɛvɛ, ani de wõini ga Gala wuito da Ɣala-feliai ma kɛni e ɣɛ ga zii-ma ʋaa. “Ani da ŋɛni ta nɛpɛ feli na [Gala] ma zii-mai mavele ma, towaa de woi mɛni.” (1 Jɔ̃ 5:14.) Ziizɛ faa taniga lɛɛni manɛɛ de Gala feli e vile ba. (Mafiyu 6:9-13 lodo.) Ani da na Gala felizu de ɓala ʋaitiɛ ma, maa lɛ nɛɛni dɔ yeema ga de mama fe bɛ niitiɛ ʋaa ma e kɛɛzu de vɛ. Na ɣa ɣɛɛna de gaa-zaɣa-kɛ ga e ɓɔ numaa va.

2. Manɛɛ de Gala feli ɣɛ le?

Gala Kɔlɔi bogɛ de ma ga, nii “e de ɣigii zu de bo [Gala] ma.” (Psalms 62:8) Manɛɛ da Ɣala-feliai wulo ɓɔɔ de ɣigii zu. Da Gala feli ga woo wala ɔɔ ga woo maa yii ya, wũfe ma vele nɛpɛ su. Da Gala feli siɛ nɛpɛ ma ta ŋada nɛpɛ.

3. Gala ka da Ɣala feliaitiɛ ɣaa wote ɣɛ le?

Towa nii ɣɛ pele lamaa zu. Jehova Daa Woi ʋeevɛ de ya, tɔ ga Gala Kɔlɔi. Gaa-zaɣa-kɛɛtiɛ e de ya na ɣa da gaa wotegitiɛ zɔlɔwo na. Ani da Gala Kɔlɔi lodona, “towaa [ɓɔ] de va de kele-ɣele maa zɔlɔwo.” (Psalms 19:7; Jĩi 1:5 lodo.) Jehova ɣa zii-laa ʋe de ya ani faa ɓaa ka laana de ma. Towa kɛ feli veaitiɛ te ɓɔ de va ani da ɓalana.

FAA LAMAA MAA WOLI

Wɛlɛ velei va ya Gala feli la ga e zii-la e vɛɛ velei va ya wulo la su-nu-ma.

4. Manɛɛ de faa taniga ɣɛ ga Gala yee zei da Ɣala-feliai wu

Zɛɓɛi da kɛ ga Gala yee zei da Ɣala-feliai wu? ƲILIOGI nii lɛ ga.

ƲILIOGI: É Ɣisu Gala-Felia Te Pɛ Ka Gala Ka Wuito Ma?—Ʋilio Kpuogi (2:42)

Jehova wõini de feli. A Psalms 65:2 lodo, wo gaa-zaɣa-kɛɛ niitiɛ ɣaa wote:

E ɣisu Galagi nii “ya wuito Gala feli woitiɛ ma” e wõini e feli? Zɛɓɛi e kɛɛ yiɛ na wo?

Manɛɛ de ziɛ ga niitiɛ Gala ge boga ani de wõini e wuito da Ɣala feli woitiɛ ma. A Micah 3:4 ɓɔga 1 Pite 3:12 lodo, wo gaa-zaɣa-kɛɛ nii ɣaa wote:

Zɛɓɛi manɛɛ de kɛ ga Jehova wuito da Ɣala feli woitiɛ ma?

Ani numaa ta na liizu kɔɔ wɔɔzu te pɛ ta Gala feli ga e ɓɔ te va ga te te zili yɔwɔ̃itiɛ yee maazu ɣale. E ɣisu Gala ka wuito Gala-feliai niitiɛ ma?

5. Manɛɛ da Ɣala-feliai wulo de ɣigii zu

Ta numaa taniga ɣalabo ga tiɛ lɛ woo taniga ma tiɛ bo ta na Gala felizu. Kɛ e ɣisu vele ɣana Gala wõini de feli la? A Mafiyu 6:7 lodo, wo gaa-zaɣa-kɛɛ nii ɣaa wote:

Zɛɓɛi ya ɓɔ e va ga e mɛlɛ ɣɛ lɛɛzu faa gila ma yiɛ bo ya Ɣala-feliai zu?

Folo nɛpɛ ɣi-gaa-ziɛ faa vagɔi ta ma Jehova kɛɛ e vɛ, na ɣa ɣɛɛna e mama fe bɛ ya Ɣala-feliai zu. Yà nii ɣɛɛna ɣee nɛpɛ dɔwɔ gila kuuzu faa lamaa ɣa ɣɛ e ya ga e zoo e Gala feli e vile ba, ɛ lɛ sa ɣɛɛ lɛɛzu faa gila ma yiɛ bo.

A good father wants his child to speak to him from the heart. Likewise, Jehovah wants us to pray to him from our heart

6. Gala-feliai ɣa ɓɔɔ ga faa ɓi

Gala-feliai ɣa ɓɔ de va ɣɛ le siɛ nɛpɛ ma? ƲILIOGI nii lɛ ga.

ƲILIOGI: Gala-Feliai Ɣa Ɓɔ De Va De Lo Kpã (1:32)

Gala Kɔlɔi bogɛ ga Gala-feliai ɣa ɓɔ de va kuuzu nɛɛ ɓɔɔɓɔɔ ge ɣɛ de ya. A Felepaitiɛ 4:6, 7 lodo, wo gaa-zaɣa-kɛɛ niitiɛ ɣaa wote:

Velei ɓalaa ɣeeta Gala-feliai lɛ de wuloa faa ɓaagi taniga zu, towa ɓɔ de va ɣɛ le?
Zɛɓɛi ka ya wõi e Gala feli e vile ba?

E Ɣɛni Nii Wõni?

E ziɣi siɛgi ma te tɔɔ-zeini la ga te Gala Kɔlɔi wonɛ, numaa ta na Gala felizu ta daa wulo ga “e ɣɛɛ la”.—1 Chronicles 16:36.

7. Siɛ siɣi ba yiɛ Gala feli

Tanisu butii ɣa lama de ma, e kɛ de yeema ga de Gala feli. Gala-feliai ɣɛni ga faa ɓi ɣɛ le Ziizɛ ɣaazu? A Mafiyu 14:23 ɓɔga Maki 1:35 lodo, wo gaa-zaɣa-kɛɛ niitiɛ ɣaa wote: