KALABO 11

Velei Ya Wulo La Gala Kɔlɔi Lodo Fai Zu-Nu-Ma

TƐ GÁ

Ɣi-gaa-ziɛ ga e wõini e tii ta ɣɛ, kɛ na ɓai e yee ma. Zɛɓɛi sa ya kɛ ga e ziɛ ná wu? Kɛbɛ ya gaa wɛɛsu ga pɛlɛ-pɛlɛ. Vele ɣana nɔ e la ga Gala Kɔlɔi lodo fai. Ya ɣi-gaa-ziɛ zu ga, ga sa ga tɔɔ-zei ɣɛ le? Kalabogi nii zu, da vaazu yɛpɛzu e vile faa taniga va ya zoo e ɓɔ e va e wulo Gala Kɔlɔi lodo fai zu-nu-ma.

1. Zɛɓɛi e kɛɛ manɛɛ de Gala Kɔlɔi lodo siɛ nɛpɛ ma?

Nui ya Gala Kɔlɔi lodo siɛ nɛpɛ ma ɔɔ ‘tɔgi nii maa wulo zu lɛ maʋaa va’ kuuzu nɛɛ ɣa ɣɛ zeea. Nii nɛpɛgi manui ɣa yee vilisu towa wulo su-nu-ma. (Psalms 1:1-3 lodo.) Tɔɔ-zei ga yiɛ Gala Kɔlɔi lodo ga pɛlɛ-pɛlɛ folo nɛpɛ. Ya ɣɛ na sa Gala Daa Woi ɣaa ɣaazu, ya ɣɛ sa ma ɣaa nɛɛ wulozu yiɛ wõi ga yiɛ dodo.

2. Zɛɓɛi ya ɓɔ e va e wulo Gala Kɔlɔi lodo fai zu-nu-ma?

Ani de wõini de wulo Gala Kɔlɔi lodo fai zu-nu-ma, manɛɛ de ɣi-gaa-ziɛ ɓɔɔ ga pagɔ niitiɛ ma de maa wolizu. Manɛɛ diɛ Gala Kɔlɔi lodo, diɛ “ɣi-gaa-ziɛ ma” ɓɔɔ ga pagɔ. (Joshua 1:8) Yana dodosu, ɣi-gaa-ziɛ gaa-zaɣa-kɛɛ niitiɛ ma: ‘Zɛɓɛi nii dɛɛzu ga zu e vile Jehova va? Gà leve ɣɛ le ge ziɛ ga nii ge maa wolia na ŋeteai zu? Gà leve ɣɛ le ge ɓɔ numaa va ga niitiɛ ge maa wolia?’

3. Siɛ sɛɓɛi ya siɣi ba ga yiɛ Gala Kɔlɔi lodo?

Ná ɓaavɛ e yee ma ga e siɛ siɣi ba ga e Gala Kɔlɔi lodo? De bɔlɔɔ zu, nii ɣa ɣɛ ga diɛ. Ɣaa-ɓaa nii ya ’zoo da e kɛ siɛgi nii ʋaa ma.’ (Ɛfɛsɔitiɛ 5:16) Ya zoo e nii ɣɛ, ani ya siɛ siɣi na ba folo nɛpɛ ga e Gala Kɔlɔi lodo. Numaa taniga ta wu-ziɣi subu ga te Gala Kɔlɔi lodo. Taniga ta Gala Kɔlɔi lodo ga foloi. Fikaa wɔ ta kɛ ga kpɔkɔ tɔ vɛɛ laa zu. Siɛ sɛɓɛi solowogɛi e ʋaa ma ga e Gala Kɔlɔi lodo?

FAA LAMAA MAA WOLI

Faa maa woli e vile velei va ya Gala Kɔlɔi lodo fai ma ɣaa nɛɛ wulo la. Wɛlɛ velei ya ɣaa-ɓaa la ga e wulo su-nu-ma.

Velei nɔ da wõi ga diɛ daa-mii ŋɛni niinɛ mi, vele ɣana nɔ da Gala Kɔlɔi lodo fai ma ɣaa nɛɛ wulo la

4. Wɛlɛ velei va ya Gala Kɔlɔi lodo fai maa ɣaa nɛɛ wulo la

Ɣeeta na ɣa vaazu ɓaazu ga e Gala Kɔlɔi lodo fai lɔɔ-zei. Ɣaa-ɓaa yiɛ “maa-wõi-wõi kulo,” e ɣɛ velei ya wõi la ga e daa-mii ŋɛni niinɛ mi. A 1 Pite 2:2 lodo, wo gaa-zaɣa-kɛɛ nii ɣaa wote:

Yana Gala Kɔlɔi lodosu siɛ nɛpɛ ma, e ɣisu ya maa-wõi-wõi kulo ga yiɛ dodo wɔ?

ƲILIOGI nii lɛ ga, wo wɛlɛ velei numaa taniga te tɔɔ-zeini la ga tiɛ Gala Kɔlɔ lodo fai ma ɣaa nɛɛ wulo. Yá wolona, wo gaa-zaɣa-kɛɛ niitiɛ ɣaa wote.

ƲILIOGI: Nu Niinɛi Niitiɛ Te Wõini Sa Ga Gala Kɔlɔi Lodo Fai (5:33)

Ʋiliogi nii zu, zɛɓɛi nu niinɛi niitiɛ te ɣaa ɓaani ga te kɛ?
Zɛɓɛi e ɓɔni te va ga tiɛ Gala Kɔlɔi lodo siɛ nɛpɛ ma?
Zɛɓɛi te kɛɛni ga te Gala Kɔlɔi lodo fai ma ɣaa nɛɛ wulo?

Niitiɛ ya ɓɔ e va ga e tɔɔ-zei:

Tɔɔ-zei ga yiɛ Gala Kɔlɔi nii lodo gaa ɣaazu lɛ ɓaani. Ya tɔɔ-zei ga New World Translation ɔɔ ga Gala Kɔlɔi nii ya gaa ɣaa ɓɔɔ ga pagɔ.
Ya tɔɔ-zei vɛ e wõini e ná lodo. Ga e ki-daa-wodo zɔlɔwo, wɛlɛ kologi nii zu va “Tɔɔ-Zei Ga Yiɛ Gala Kɔlɔi Lodo.”
Ɣi-zɛ vɛtiɛ zu e na lodoga. Ya na ɣɛ kologi nii zu “Yee Wo Pile Vɛtiɛ Va E Na Lodoga Gala Kɔlɔi Zu”, kɔlɔi nii zu.
Li JW.org Wɔlɔ Ɓulugi zu fãga-wɔlɔi ma. Ya Gala Kɔlɔi lodo na, na ɣa ɣɛɛna e wuito goo-ziɣii ma zii woo lamaa zu, vɛ nɛpɛgi e na.
Ya wɛlɛ ɓalaa appendixes zu va Gala Kɔlɔi nii zu New World Translation. Ya wɛlɛ faa taniga va te zu, ya ɓɔ e va e wulo ya Ɣala Kɔlɔ maa woliai zu-nu-ma.

5. Ɣavele ɓɛtɛ ɓɔɔ Gala Kɔlɔ maa woliai ʋaa ma

A Psalms 119:34 lodo, wo gaa-zaɣa-kɛɛ nii ɣaa wote:

Zɛɓɛi e kɛɛ manɛɛ e Gala feli ɔ ʋɛɛ Gala Kɔlɔi lodo fai lɔɔ-zeizu, ɔɔ ya Ɣala Kɔlɔ maa woliai lɔɔ-zeizu?

Ya wulo ɣɛ le ya Ɣala Kɔlɔ maa woliai zu-nu-ma? Yana ɣavele ɓɛtɛzu kalabogi ta ʋaa ma kɔlɔi nii zu, ɣaa-ɓaa e fai niitiɛ ɣɛ:

Palegaitiɛ lodo te Faa Lamaa Maa Woli wologi maa zuvɛ
Gala goitiɛ lodo, na ɣa ɣɛɛna wɛlɛ velei Gala goitiɛ te niitiɛ zu-wulo-zu la te kɔlɔi nii zu.
Yee wo pile woi niitiɛ va ta gaa-zaɣa-kɛɛ ɣaa wote, na ɣa ɓɔ e va e kɔlɔi nii maa woli ɓɔɔ ga pagɔ.

E ɣɛni nii wõni?

Jehova Na Seeleitiɛ te vɛɛ Gala Kɔlɔ ɓalaaga lodosu. Na ɓalaa ɣɛɛvɛ ge wõini ɓɔɔ ga New World Translation of the Holy Scriptures ɓɔvɛlaale ponɛvɛ ɓɔɔ ga pagɔ, gaa ɣaa zu lɛ ɓaani, na ɣa ɣɛɛna Gala na daa-zeigi ɣa su. —Wɛlɛ fãga-wɔlɔi ma va “E Ɣisu Jehova Na Seeleitiɛ Ta Ɓɔɔ Ɣala Kɔlɔ Ɣa Ma?”

NUMAA TANIGA TA ƔƐ TEA: “Gala Kɔlɔi maa woli ʋai ɣa ɓɔɔ ga tii ɓaa-ɓaa, gɛ lɛ ziɛa na wu.”