E ɣɛ velei de maa wolia la kalabo 13 zu, Gala lɛ yee zeiya Gala feli veleitiɛ ɓɔgapɛ bu. Na ɓalaa ɣɛɛvɛ, da zoo de de ɓɛtɛ Ɣalagi ʋeli ga velei e wõini de feli la. Zɛɓɛi e ga Gala feli velei “nii maa wuai” ya Gala zii-la? (Jĩi 1:​27) Wɛlɛ nii va Gala Kɔlɔi boga.

1. Da leve ɣɛ le de Gala feli ga velei e wõini de feli la?

Manɛɛ da ɣala feli velei ɣɛ ga velei Gala Kɔlɔi boga la. Ziizɛ ɣɛni Gala ma: “È laa woi ɣa ga gaama.” (Jɔ̃ 17:​17) Gala feli vea taniga tɛ lɛ ɓɛdɛni gaamai niitiɛ ma te Gala Kɔlɔi zu. Ta gaamai niitiɛ maa ʋeli ga nu ɓuse na kele-ɣelegi. Jehova wuuzu lɛ nɛɛni e vile niitiɛ va ta ɣɛlɛ “na tɔgi va.” (Maki 7:9 lodo.) Kɛ da Jehova wuuzu nɛɛ ani da felina e ɣɛ velei Gala Kɔlɔi boga la, diɛ wɔnɔ ziɛ ga na tɛnɛgi.

2. Manɛɛ diɛ Jehova ʋeli ɣɛ le?

Tei Jehova ɣa e de ɓɛtɛɛ, tɔ nɔɣa manɛɛ de feli. (Faa wuloai kɛnɛ ma 4:​11) Na zu-wulo-zu ɣa ga, manɛɛ wõila ɣɛ de ya faa ma. Na ɣa ɣɛɛna tɔ ɣilekpu nɔɣa manɛɛ diɛ feli. De mɛlɛ maa-niini gala nɛpɛ feli.​​—Isaiah 42:8 lodo.

Manɛɛ da Ɣala-feliai “maa wuai é ga ŋɛnii nii Gala ka yee zei bu.” (Loomɛitiɛ 12:1) Na zu-wulo-zu ɣa ga, manɛɛ diɛ ziɛ ga Gala na tɔgitiɛ. Taitiɛ wõila te ya Jehova ʋaa ma ta ziɛ ga na tɔgi e vile ʋulu ʋaa va. Tɛ lɛ yee viliga tuɓo-vele yowũ ʋaazu, e ɣɛ velei zigale ɓoale ʋai ɓɔga dɔɔ ɓakpa ɓoale ʋaitiɛ te la. a

3. Zɛɓɛi e kɛɛ manɛɛ de Jehova ʋeli kii-ma?

Gaalɛ-baitiɛ ga kɛ dɔwɔi zu towa ɓɔ ge va ge “Jehova laa-ma-lɛ. . .kuuwui zu.” (Psalms 111:​1, 2) Da nii ɣɛ ani da ɣɛna gui loozu gaalɛ-bai zu. (Psalms 104:​33 lodo.) Jehova bogɛ ga diɛ li gaalɛ-baitiɛ zu ɓɔvɛlaale wõila ɣa zeea de ʋaa ma. E kwɛ̃ni ga ta ɓɔ de va de yii-ma ɣɛ wɔlɔ-wɔlɔ ta wɔlɔ-wɔlɔ. Da liina gaalɛ-bai zu, da zoo de ɣiini zii-lɔɔ.

 FAA LAMAA MAA WOLI

4. De mɛlɛ maa-niini gala feli

5. Da ɣɛna Jehova ʋelizu tɔ ɣilekpu, towa ɓɔ de va dɛ lɛ yee viliga zɛɛ ʋaa ɣala feli ʋaazu.

 6. Da Jehova laa-maa-lɛ da ɣaalɛ-baitiɛ zu

Da Jehova laa-maa-lɛ, de de ɣaa yɔwɔ̃itiɛ zu-ɓaa ani da na gui loozu diɛ wɔnɔ gaa-zaɣa-kɛɛtiɛ ɣaa wote gaalɛ-baitiɛ zu. A Psalms 22:​22 lodo, wo gaa-zaɣa-kɛɛ niitiɛ ɣaa wote:

• E wuuzu ɣa nɛɛ ani ya wɛlɛ na numaa va tiɛ gaa-zaɣa-kɛɛtiɛ ɣaa wote da ɣaalɛ-baitiɛ zu?

• E wõini e ɣavele ɓɛtɛ ga e gaa-zaɣa-kɛɛ nii ta ɣaa wote?

7. Jehova wõini nii de maa wolizu diɛ dɛ ga numaa

Da Gala Kɔlɔi lɛ ga numaa pele lamaa zu. A Psalms 9:1 ɓɔga 34:1 lodo, wo gaa-zaɣa-kɛɛ nii ɣaa wote:

• Zɛɓɛi e maa wolia Gala Kɔlɔi zu e wõini e dɛ ga numaa?

 NII SA È MAA WOLIA

Da de ɓɛtɛ Ɣalagi wuuzu nɛɛ ani da felina tɔ ɣilekpu diɛ daa-maa-lɛ gaalɛ-baitiɛ zu. Na ɣa ɣɛɛna diɛ yɛpɛ numaa wɔ e vile niitiɛ va de maa wolia.

Ma-ɓigitiɛ

• Da leve ɣɛ le de kwɛ̃ɛ velei Gala wõini de feli la?

• Zɛɓɛi e kɛɛ Jehova nɔɣa manɛɛ de feli?

• Zɛɓɛi e kɛɛ manɛɛ diɛ Jehova ʋeli kii-ma?