KALABO 15
Ɓɛɛ Ɣa E Ga Ziizɛ?
Nu lamaa faa mɛniga e vile Ziizɛ va. Na ɓalaa ɣɛɛvɛ e wulo na daa-zeigi wulu, tɛ lɛ faa lamaa wõini e vile ba. Ki-gaa-ziɛ lamaa ɣa numaa ya e vile Ziizɛ va. Kɛ zɛɓɛi Gala Kɔlɔi boga e vile Ziizɛ va?
1. Ɓɛɛ Ɣa E Ga Ziizɛ?
Ziizɛ ɣa ga keelai ta Gala ta. Gala ge kpɛtɛni ɔ vɛɛ ŋɛni ta nɛpɛ kpɛtɛzu. Na ɣa e kɛɛ Gala Kɔlɔi boga ga towa e ga “Gala kpɛtɛ ŋɛniitiɛ pɛ te mamaa wũgi.” (Kolasaitiɛ 1:15) Gala Kɔlɔi bogɛ wɔnɔ ga Ziizɛ ɣa e ga Gala “duu ɣilekpugi” ɓɔvɛlaale Jehova tɔ ɓɔɔ ɣa e Ziizɛ ɓɛtɛni. (Jɔ̃ 3:16) Ziizɛ ɓɔni Keea va ga te ŋɛnii zɔitiɛ ɓɔgapɛ kpɛtɛ. (Jɔ̃ 1:2, 3 lodo.) Siɛ-pulu vagɔ ɣa ɓɔɔ Ziizɛ ɓɔga Jehova yɔɔzu. Gala Kɔlɔi ɣa Ziizɛ lili ga “Woi” ɓɔvɛlaale towa e ga Gala na keela woo leve nui.—Jɔ̃ 1:14.
2. Zɛɓɛi e kɛɛni Ziizɛ yiɛ va zui ma?
Kwena 2,000 levega tei Jehova Ziizɛ leveni zui nii ma baa ŋinɛgi zaala zu. Kpea niinɛi nii tɔ tili ga Meele towa e Ziizɛ ɣaani. Nii ɣa dɛɛzu ga te Ziizɛ ɣaani ga nu ɓuse. (Luki 1:34, 35 lodo.) Ziizɛ vaani zui nii ma ga e ɣɛ ga nui Gala yee ɓadoga ba ɔɔ Kolai, ga e nu ɓuse wũ-maa-wo. a Niitiɛ ɓɔgapɛ Gala Kɔlɔi boni e vile nui nii va Gala ɔ yee ɓadoba, ta nii manui ɔ kɛ, te pɛ te ɣɛɛni Ziizɛ na ŋeteai zu. Fai niitiɛ te ɓɔni numaa va te kwɛ̃ɛ ga Ziizɛ ‘ɣa ga Kolai, é wɔnɔ ga ʋululai maƔalagi dui.’—Mafiyu 16:16.
3. Minɛɛ ɣa sa Ziizɛ na?
Tei Ziizɛ zaani, Gala buziɣini saa ya ŋinɛ dɔtɔi zu e li wulu Gala ta. “Gala ge gwala ɓakpaa é daa-zeigi nii zei bá é daa-zei pɛ maazu.” (Felepaitiɛ 2:9) Ziizɛ ɣee ɣaa ɓaavɛ sa ga ʋike. Jehova nɔɣa gaa-ɓaa zeea e leve Ziizɛ va.
FAA LAMAA MAA WOLI
Faa lamaa maa woli e vile Ziizɛ va. Wɛlɛ nii va e kɛɛ e ga faa ɓi ga de Ziizɛ wɛ̃ɛ.
4. Ziizɛ lɛ ga Gaa-Ɓaa Pɛ MaƔalagi
Gala Kɔlɔi bogɛ ga Ziizɛ ɣa goo-mɛni kulo Gala zeea, velei ɓalaa e la ga keelai ta Gala ta. Zɛɓɛi e kɛɛ diɛ na wo? ƲILIOGI nii lɛ ga wo wɛlɛ nii va e kɛɛ da ɣɛ tea Ziizɛ ɓɔga gaa-ɓaa pɛ maƔalagi tɛ lɛ ga tii.
Gala goi niitiɛ ta ɓɔ de va ga de zoo de Jehova ɓɔga Ziizɛ te yɔɔzu wɛ̃ɛ. A Gala goi niitiɛ lodo wo gaa-zaɣa-kɛɛ niitiɛ ɣaa wote.
Luki 1:30-32 lodo.
-
Gala ta ɣeelai e Jehova ɓɔga Ziizɛ te yɔɔzu wuloni ɣɛ le?
Mafiyu 3:16, 17 lodo.
-
Siɛgi ma te bataize ɣɛɛni la ga Ziizɛ, woo zɛɓɛi e wuloni Gala ta?
-
E ɣisu ɓɛɛ ɣa e ɣɛni yɛpɛzu?
Jɔ̃ 14:28 lodo.
-
Duu keea ɓɔga dui ɓɛɛ ɣa gaa-ɓaa zeea e leve bɔlɔ va? Duu keea ɓɔga dui ɓɛɛ ɣa tevegɛi bɔlɔ va?
-
Ziizɛ Jehova lilini ga keea. Zɛɓɛi na dɛɛzu ga diɛ?
Jɔ̃ 12:49 lodo.
-
E ɣisu Ziizɛ ɣa ɣi-gaa-ziɛzu ga ta keea ta ga tii?
5. Zɛɓɛi e dɛɛ ga Ziizɛ ɣa Gala yee ɓadoga ba?
Gala Kɔlɔi faa lamaa wogɛ e vile velei va numaa tɔ nui wɛ̃ɛ la Gala yee ɓadoga ba ga e nu ɓuse wũ-maa-wo. ƲILIOGI nii lɛ ga wo faa maa woli e vile faa taniga va Gala Kɔlɔi boni ga Ziizɛ ɔ kɛ, e vɛɛ velei va e fai niitiɛ ɣɛɛni la.
Gala goi niitiɛ lodo wo gaa-zaɣa-kɛɛ niitiɛ ɣaa wote:
A Mafiyu 2:4-6 lodo, wo kwɛ̃ɛ vɛ tɔ Ziizɛ ɣana. b
-
Vɛ Gala Kɔlɔi dɛɛni ga tɔ Ziizɛ ɣana, e ɣisu na ɣa te kaani na?—Mafiyu 2:1.
A Psalm 34:20 ɓɔga Zechariah 12:10 lodo, wo wɛlɛ niitiɛ va Gala Kɔlɔi boni e vile Ziizɛ zaa ʋai va.
-
E ɣisu fai niitiɛ te ɣɛɛni?—Jɔ̃ 19:33-37.
-
E ɣisu Ziizɛ ɣa e ɣɛni ga zaɓu fai niitiɛ te ɣɛ Gala Kɔlɔi boni ga ɔ ɣɛ?
-
Zɛɓɛi nii dɛɛzu ga yiɛ e vile Ziizɛ va?
6. Da faa maa wolina e vile Ziizɛ va, da wulo su-nu-ma
Gala Kɔlɔi bogɛ ga tɔ ga faa ɓi ga de faa maa woli e vile Ziizɛ va e vɛɛ nii va Gala wõini Ziizɛ kɛ. A Jɔ̃ 14:6 ɓɔga 17:3 lodo, wo gaa-zaɣa-kɛɛ nii ɣaa wote:
-
Zɛɓɛi e kɛɛ e ga faa ɓi ga de faa maa woli e vile Ziizɛ va?
Ziizɛ pelei laa laogɛ ga de ɣɛ ga Gala na siɛ-pulu. E gaamai lɛɛni e vile Jehova va, saala zu ɣa da zɛʋu zɔlɔwo kwɛ̃ɛ gɛ lɛ ba.
NUMAA TANIGA TE ƔƐ: “Jehova Na Seeleitiɛ tɛ lɛ laani ga Ziizɛ.”
-
Zɛɓɛi e ga yɛdɔ ɣi-gaa-ziɛi?
NII SA È MAA WOLIA
Ziizɛ ɣa ga Gala na keelai ta. Towa e ga Gala dui, e wɔnɔ ga nui Gala yee ɓadoga ba.
Ma-ɓigitiɛ
-
Zɛɓɛi e kɛɛ Gala Kɔlɔi ɣa Ziizɛ lili ga “Gala kpɛtɛ ŋɛniitiɛ pɛ te ma maa wũgi”?
-
Zɛɓɛi Ziizɛ kɛɛni Gala ta ɔ vɛɛ vaazu zui ma?
-
Da leve ɣɛ le de kwɛ̃ɛ ga Ziizɛ ɣa e ga nui Gala yee ɓadoga ba?
WƐLƐ FAA LAMAA VA
Faa maa woli e vile velei va de kwɛ̃ɛga la ga Ziizɛ ɣa Gala yee ɓadoga ba.
Wɛlɛ na va ani Gala Kɔlɔi bogɛ ga velei nu ɓuse ɣa duu ɣaa la, vele ɣana Gala Ziizɛ ɣaani la.
“Zɛɓɛi E Kɛɛ Ta Ziizɛ Lili Ga Gala Dui?” (Kɔlɔi nii ɣa fãga wɔlɔi ma)
Numaa taniga te ɣɛ Gala, Ziizɛ, ta Gala baa ŋinɛgi ta ga faa gila.
“E Ɣisu Ziizɛ Ɣa E Ga Gala?” (The Watchtower, April 1, 2009)
Wɛlɛ velei va ŋaza nui nii na ŋeteai maa ʋileni la tei e gaama wɛ̃ɛni Gala Kɔlɔi zu e vile Ziizɛ va.
“Ŋaza Nui Nii Zaɓui Lɛɛvɛ E Kɛɛni Yiɛ Gala Kɔlɔi Maa Woli” (Awake!, May 2013)
a Kalabo 26 ɓɔga 27 ɣa vaazu ɓɔsu de va de kwɛ̃ɛ nii e kɛɛ manɛɛ de wũ-maa-wo maa zɔlɔwo, ta velei Ziizɛ de wũ-maa woga la.
b Wɛlɛ Kɔlɔi Nii Laa Wulozu 2 va ga e siɛgi wɛ̃ɛ Gala Kɔlɔi boni la ga Ziizɛ ɔ vaa la zui nii ma.
