KALABO 16

Zɛɓɛi Ziizɛ Kɛɛni Tei E Ɣɛni Zui Ma?

TƐ GÁ

Nu lamaa ta ɣi-gaa-ziɛ ga Ziizɛ ɣa dɛ nɔ ga duuyɛ̃. Taniga ta siɣi nɔ ga Gala Daa Woo wo nu. Fikaa ɣigii zu tɔ dɛ zɛlɛni gului ma yɛ za. Da zoo de faa lamaa wɛ̃ɛ e vile Ziizɛ va, ani da faa maa wolina e vile na ŋeteai va zui nii ma. Kalabogi nii zu, da vaazu wɛlɛzu faa taniga va Ziizɛ kɛɛni, ta velei fai niitiɛ ta ɓɔ la e va.

1. Tii zɛɓɛi ɓɔɔ fize wogɛi e ɣɛni Ziizɛ ɣaazu?

Ziizɛ na tii ɣɛni ga e “Gala na masadai mawoo niinɛ vagɔi wo.” (Luki 4:43 lodo.) E ɣɛni keela woo vagɔi wosu e vile Gala Na Masadai va, nii e vaazu daa-nɔwɔ-wogi ɓɔgapɛ kpeazu. a Ziizɛ keela woo vagɔi nii woni ɓɔɔ kwena saagɔ ta tikpe wuuzu.—Mafiyu 9:35.

2. Zɛɓɛi e kɛɛni Ziizɛ yiɛ faa maa-wɔlɔ-wɔlɔga ɣɛ?

Gala Kɔlɔi yɛpɛvɛ e vile “tii maa-wɔlɔ-wɔlɔgitiɛ ɓɔga faa maa-wɔlɔ-wɔlɔgitiɛ” va Gala ge gaa-ɓaa ʋeeni Ziizɛ ya ga e kɛ. (Te Ɣɛɛ Ʋaitiɛ 2:22) Gala ge gaa-ɓaa ʋeeni Ziizɛ ya ga e fãgai ɣaa yii, e nu lamaa wɔ̃nɔ kulo, e seeɓɛ vea valo na ɣa ɣɛɛna e saa vea wu-ziɣi saa ya. (Mafiyu 8:23-27; 14:15-21; Maki 6:56; Luki 7:11-17) Faa maa-wɔlɔ-wɔlɔgi niitiɛ Ziizɛ kɛɛni e dɛɛni ga Gala ka e Ziizɛ levega. Fai niitiɛ te dɛɛvɛ wɔnɔ ga gaa-ɓaa ɣa Gala zeea ga e daa-nɔwɔ-wogitiɛ ɓɔgapɛ kpea.

3. Zɛɓɛi da maa woli e vile velei va Ziizɛ na ŋeteai ɣɛɛni la?

Ziizɛ goo-mɛni kuloni Jehova ya faa pɛ su. (Jɔ̃ 8:29 lodo.) Velei ɓalaa faa ɓaa lamaa laani la Ziizɛ ma, e ɣaa ɓaani e niitiɛ ɓɔgapɛ kɛ Keea boni ma. E dɛɛni ga nu ɓuse ɣa zoo e Gala yii-mai ɣɛ ani ɓalaa faa ɓaa ka laana ma. Ziizɛ ‘po-kɔ̃ɔ zɛni ga de vile kɔ́wɔ wogi zu.’—1 Pite 2:21.

FAA LAMAA MAA WOLI

Wɛlɛ velei va Ziizɛ keela woo vagɔi woni la, e vɛɛ velei va e faa maa-wɔlɔ-wɔlɔga ɣɛɛni la.

4. Ziizɛ keela woo vagɔi woni

Ziizɛ ɔ li ɓɔɔ ŋada wooza ga e keela woo vagɔi wo nu lamaa ma. A Luki 8:1 lodo, wo gaa-zaɣa-kɛɛ niitiɛ ɣaa wote:

E ɣisu Ziizɛ keela woo vagɔi woni nɔ niitiɛ ma tɔ ɣaalɛ-ba ga te wuito Ziizɛ ma?
Zɛɓɛi Ziizɛ ɔ ɣaa-ɓaa e kɛ ga e numaa maa zɔlɔwo e Gala goi wo te ma?

Gala ge boni ga nui e yee ɓadoga ba ɔ keela woo vagɔi wo numaa ma. A Luki 4:17-19 lodo, wo gaa-zaɣa-kɛɛ niitiɛ ɣaa wote:

Niitiɛ Gala Kɔlɔi boni, Ziizɛ te ɣɛɛni ɣɛ le?
E ɣisu manɛɛ numaa te keela woo vagɔi nii mɛni?

5. Ziizɛ numaa ɣala boni

E wulo Gala Na Masadai ma ɣeela woi wulu Ziizɛ ɔ numaa ɣalabo ga ɔ ɓɔ te va te ŋetea kɛ. Wɛlɛ taniga va kalabogi nii zu Ziizɛ boni gizigi ma. A Mafiyu 6:14, 34 ɓɔga 7:12 lodo, wo gaa-zaɣa-kɛɛ niitiɛ ɣaa wote:

Tɛnɛ zɛɓɛi Ziizɛ feeni Gala goi niitiɛ zu?
E ɣisu da wulo zaa tɛnɛgi niitiɛ zu-nu-ma?

6. Ziizɛ faa maa-wɔlɔ-wɔlɔga ɣɛɛni

Jehova gaa-ɓaa ʋeeni Ziizɛ ya ga e faa maa-wɔlɔ-wɔlɔga ɣɛ. Ga wo wɛlɛ faa maa-wɔlɔ-wɔlɔgi nii ta va, a Maki 5:25-34 lodo ɔɔ ƲILIOGI nii lɛ ga. Yá wolona, wo gaa-zaɣa-kɛɛ niitiɛ ɣaa wote.

ƲILIOGI: Ŋaza Nui Nii E Ɣɛni Zeeɓɛzu E Valoa (5:10)

Ŋaza nui nii e ɣɛni zeeɓɛzu, zɛɓɛi ɓɔɔ e ɣɛni laani la?
Zɛɓɛi ɓɔɔ e e wuuzu nɛɛ e vile velei va Ziizɛ ɓɔni la ŋaza nui nii va?

A Jɔ̃ 5:36 lodo, wo gaa-zaɣa-kɛɛ nii ɣaa wote:

Faa maa-wɔlɔ-wɔlɔgitiɛ Ziizɛ kɛɛni, zɛɓɛi e dɛɛzu ga diɛ e vile ba?

E ɣɛni nii wõni?

Niitiɛ bɔɔlɔzu de kwɛ̃ni e vile Ziizɛ va kulovɛ kɔlɔ naagɔi niitiɛ zu—Mafiyu, Maki, Luki, e vɛɛ Jɔ̃ va. Gala Kɔlɔ wonɛ veai niitiɛ te faa ɓalaaga woni e vile Ziizɛ va. Niitiɛ ɓɔgapɛ Gala Kɔlɔ wonɛ veai niitiɛ te boni, towa ɓɔ de va de faa lamaa wɛ̃ɛ e vile Ziizɛ va.

MAFIYU

Towa e kɔlɔ maa wũgi wonɛni e vile Ziizɛ va. E yɛpɛvɛ e vile Ziizɛ na kala-bogitiɛ va. Maɓigii ɣa ga, kalabogi e boni e vile Gala Na Masadai va.
MAKI

Kɔlɔi e ponɛni kpuovɛ e leve kɔlɔi zɔitiɛ va. E yɛpɛvɛ e vile faa vapagaa va.
LUKI

E yɛpɛvɛ e vile velei Gala-feliai ʋize wogɛi e ɣɛni la Ziizɛ ɣaazu, e vɛɛ velei va e ŋazaitiɛ zoni la.
JƆ̃

E yɛpɛvɛ ga tamaa e vile niitiɛ va Ziizɛ ɔ bo na siɛ-puluitiɛ ma, e vɛɛ numaa va. Niitiɛ ta ɓɔ de va de kwɛ̃ɛ nui Ziizɛ e ɣɛni le.