KALABO 21

Ɓɛɛni Ka Zaa Te Keela Woo Vagɔi Wosu?

TƐ GÁ

Su lɛ sa woozani ga Jehova daa-nɔwɔ-wogitiɛ ɓɔgapɛ kpea. Tɔ vaazu nii ɣɛɛzu na Masadai zaala zu. Nii ɣa ɓɔɔ ga keela woo vagɔ manɛɛ nu ɓɔgapɛ ge mɛni. Ziizɛ boni pulu veaitiɛ ma ga te keela woi nii wo nu pɛ ma! (Mafiyu 28:19, 20) Nii Ziizɛ boni ga pulu veaitiɛ te kɛ Jehova Na Seeleitiɛ ta zaa kɛɛzu ɣɛ le.

1. Nii Ziizɛ boni Mafiyu 24:14 zu, tɔ zaa ɣɛɛzu ɣɛ le?

Ziizɛ ɣɛni tea: “Woo niinɛ vagɔi nii pilegɛi Gala ta Masadai va towaa wo zui wɔlɔ-kɔlɔ ma ɣaali.” (Mafiyu 24:14) Jehova Na Seeleitiɛ te wuuzu nɛɛvɛ ga te tii nii ɣɛ. Gá zaa keela woo vagɔi nii wosu zui wɔlɔ-kɔlɔ ma, zii woo lamaa zu tevegɛi ɓalaa 1,000 ba! Jehova Na Seeleitiɛ ta ɣaa ɓaazu ɓɔɔ ga ʋikee ga te tii nii ɣɛ. Jehova ɣa e ɓɔsu te va ga te kɛ.

2. Gá ɣaa ɓaazu ɣɛ le ga ge Gala goi wo numaa ma?

Gá Gala goi wo numaa ma vɛ nɛpɛgi ga te vɛtɛ na. E ɣɛ velei Kolai Maa Veaitiɛ te kɛɛni la wɔlɔ-wɔlɔi zu, ga li ge Gala goi wo numaa ma ‘pɛlɛitiɛ la.’ (Te Ɣɛɛ Ʋaitiɛ 5:42) Nii ɣa ɓɔ ge va ge Gala goi wo nu lamaa ma kwena nɛpɛ. Tei numaa tɛ lɛ ɣɛɛ ta vɛlɛitiɛ la siɛ nɛpɛ, ga Gala goi wo ɓalaa vɛ numaa ta lama na. Ga pele lamaa ɣaa-ziɛ ga ge yɛpɛ numaa wɔ e vile Jehova va e vɛɛ niitiɛ va e vaazu kɛɛzu nu ɓuse ʋaa ma.

3. Ɓɛɛni ka manɛɛ te keela woo vagɔi nii wo?

Manɛɛ Kolai Maa Vea ɓɔɔɓɔɔgitiɛ ɓɔgapɛ te keela woo vagɔi nii wo numaa ma. Ge zɔɓɛlɛ ɣa ɓɔɔ Gala goo wotii zu. Ga ɣaa ɓaazu ɓɔɔ ga ʋikee ga ge keela woi nii wo ɓɔvɛlaale ge kwɛ̃ni ga towa ɓɔ numaa va te zɛʋu maa zɔlɔwo. (1 Temete 4:16 lodo.) Tɛ lɛ ge ʋɔɔnɛ ʋea ga ge tii nii ɣɛ ɓɔvɛlaale Gala Kɔlɔi ɣɛ: “Nii wo maa zɔlɔ woga wɛlɛ sɔ̃wɔ ʋeeni. A teve te mɛlɛ geea wo ma.” (Mafiyu 10:7, 8) Nu pɛ taale ta yee zei keela woo vagɔi nii wu. Kɛ ga ɣaa ɓaazu giɛ keela woi nii wo ɓɔvɛlaale ge kwɛ̃ni ga na ɣa Jehova wõini ge kɛ, na ɣa ɣɛɛna towa kuuzu nɛɛ.

FAA LAMAA MAA WOLI

Wɛlɛ velei va Jehova Na Seeleitiɛ te ɣaa ɓaazu la ga te keela woi nii wo zui wɔlɔ-kɔlɔ ma. Wɛlɛ wɔnɔ velei va Jehova ɓɔsu la te va.

Gala goo wo fai zui wɔlɔ-kɔlɔ ma: (A) Costa Rica, (B) Wuita Zu, (C) Benin, (D) Thailand, (E) Yap, (F) Sweden

4. Gá ɣaa ɓaazu ɓɔɔ ga ge keela woi nii wo nu ɓɔgapɛ ma

Jehova Na Seeleitiɛ ta ɣaa ɓaazu ɓɔɔ ga te keela woi nii wo numaa ma zui wɔlɔ-kɔlɔ ma. ƲILIOGI nii lɛ ga. Yá wolona, wo gaa-zaɣa-kɛɛ nii ɣaa wote.

ƲILIOGI: Keela Woo Vagɔi Wo Fai Zui Wɔlɔ-Kɔlɔ Ma (7:33)

Zɛɓɛi e e yii zoga e vile velei va Jehova Na Seeleitiɛ te ɣaa ɓaazu la ga te keela woo vagɔi wo?

A Mafiyu 22:39 ɓɔga Loomɛitiɛ 10:13-15 lodo, wo gaa-zaɣa-kɛɛ niitiɛ ɣaa wote:

Gala goo wotii ɣa dɛɛzu ɣɛ le ga wõila ɣa ge ya numaa ʋaa ma?
Jehova ɣa ɣi-gaa-ziɛzu ɣɛ le e vile niitiɛ va te keela woo vagɔi wosu?—Wɛlɛ ma woo 15 va.

5. Ge vɛɛvɛ Gala ba giɛ tii ɣɛ

Niitiɛ numaa te levega su ta dɛɛzu ga Jehova ɣa pele wulozu ga giɛ ga ge tii nii ɣɛ. De ɣaa yɔwɔ̃i Pɔɔ nii e New Zealand e ɣɛni Gala goi wosu pɛlɛitiɛ la e wɛlɛ ŋaza nu gila ba. Ŋaza nui na Gala felini subu yiɛ Gala lili ga na daa-zeigi Jehova, yiɛ bo ma ga e nu leve ga e ɓɔ ba. Tei e woloni Gala felizu, Pɔɔ boni ga “ɣalava saagɔ leveni nɔ, giɛ li na pɛlɛi la.”

A 1 Kɔlĩitiɛ 3:9 lodo, wo gaa-zaɣa-kɛɛ nii ɣaa wote:

Nii numaa taniga te vɛɛ levesu su e vɛɛ nii va e ɣɛɛni ga ŋaza nui nii New Zealand, ta dɛɛzu ɣɛ le ga Jehova ɣa pele wulozu ga na numaitiɛ?

A Te Ɣɛɛ Ʋaitiɛ 1:8 lodo, wo gaa-zaɣa-kɛɛ nii ɣaa wote:

Zɛɓɛi e kɛɛ manɛɛ de Jehova ɣaa-zaɣa-kɛ ga e ɓɔ de va Gala goo wotii zu?

E ɣɛni nii wõni?

Dɔwɔ yɔɔzu ɣaalɛ-bai zu, ta ge ɣalabo ga velei manɛɛ ge Gala goi wo la. Ani e lia gaalɛ-bai nii ta zu, zɛɓɛi e ga ya ɣi-gaa-ziɛi e vile kalabogi nii va ta fe?

6. Gá Gala goi wo ɓɔvɛlaale Gala bogɛ ga ge kɛ

Wɔlɔ-wɔlɔi zu, numaa te ɣɛni ɣaa ɓaazu ga te Ziizɛ wulu veaitiɛ ɓeteve Gala goo wotii va. Kolai Maa Veaitiɛ te ɣaa-ɓaani ɓɔɔ ga tiɛ ‘goo-zu-wulo bo tiɛ dɛ ga woo niinɛ vagɔi maʋai ɣa ga gaama.’ (Felepaitiɛ 1:7) Vele ɣana Jehova Na Seeleitiɛ te kɛɛzu la zaa. a

ƲILIOGI nii lɛ ga.

ƲILIOGI: Gá Losu Kpã Keela Woo Vagɔi Wo Fai Ma (2:28)

A Te Ɣɛɛ Ʋaitiɛ 5:27-42 lodo, wo gaa-zaɣa-kɛɛ nii ɣaa wote:

Zɛɓɛi e kɛɛ gɛ lɛ ɓega Gala goo wotii va?—Wɛlɛ ma woo 29, 38, ɓɔga 39 va.

NUMAA TANIGA TA ƔƐ TEA: “Zɛɓɛi e kɛɛ Jehova Na Seeleitiɛ ta Gala goi wo pɛlɛitiɛ la?”

Ya gaa-zaɣa-kɛɛ nii ɣaa wote ɣɛ le?

NII SA È MAA WOLIA

Ziizɛ boni pulu veaitiɛ ma ga te keela woo vagɔi nii wo zui wɔlɔ-kɔlɔ ma. Jehova ɣa ɓɔsu na numaitiɛ va ga te tii nii ɣɛ.

Ma-ɓigitiɛ

Keela woo vagɔi ɣa zaa wosu ɣɛ le zui wɔlɔ-kɔlɔ ma?
Gala goo wotii ɣa dɛɛzu ɣɛ le ga wõila ɣa ge ya numaa ʋaa ma?
E ɣisu da kuuzu nɛɛ maa zɔlɔwo Gala goo wotii zu? Zɛɓɛi ɛ kɛɛ yiɛ na wo?

Kalabogi laa wuloa foloi nii ma:

Ɣaa-ɓaa e nii ɣɛ

Ya liina gaalɛ-bai zu, ge ɣaa yɔwɔ̃i taniga ɣaa-zaɣa-kɛ e vile faa ɓaagi taniga va te zee maazu ɣaleni ga te ɣɛ ga Gala goo wo nui ta, ta kulo su-nu-mai te maa zɔlɔ woga?

Zɔitiɛ e wõini e kɛ ponɛ vɛ:

Your other goal