KALABO 22

Ya Leve Ɣɛ Le E Keela Woo Vagɔi Wo Numaa Ma?

TƐ GÁ

Ya ɣɛna Gala Kɔlɔi maa wolizu tanisu ya ɣi-gaa-ziɛ ga, ‘manɛɛ nu ɓɔgapɛ ge nii wɛ̃ɛ!’ Gaama ve manɛɛ nu ɓɔgapɛ ge kwɛ̃ɛ! Kɛ tanisu ya ɣɛ luozu ga e yɛpɛ numaa wɔ e vile nii va e maa wolizu. De yɛpɛ e vile nii va ya ɓɔ yiɛ ga e mɛlɛ luo, kuuzu nɛɛ ɣɛ e ya, ya ɣɛna keela woo vagɔi wosu numaa ma.

1. Niitiɛ e maa wolizu ya leve ɣɛ le e dɛ ga numai niitiɛ e te wõni?

Ziizɛ na kala dopoitiɛ te ɣɛni tea: “Ɓɔvɛlaale nii gé pɛtɛga ta nii gé mɛniga kɛtei nɔ gé bo.” (Te Ɣɛɛ Ʋaitiɛ 4:20) Gaamai te maa wolini fize wogɛi ɓɔɔ e ɣɛni te ɣaazu na ɣa e kɛɛ te ɣaa-ɓaani te dɛ ga nu lamaa. Vele ɣana e ɣi-gaa-ziɛzu la? Ani vele ɣana e ɣi-gaa-ziɛzu la, yiɛ pele ɣaa-ziɛ ga e yɛpɛ ya numaitiɛ wɔ ta ya ziɛ-puluitiɛ e vile niitiɛ va e maa wolizu. Kɛ ga wũfe-ma vele.—Kolasaitiɛ 4:6 lodo.

Velei ya tɔɔ-zei la

Wa ya numaitiɛ wa ɣɛna yɛpɛzu, yɛpɛ e vile fai ta va e maa wolia Gala Kɔlɔi zu, ya ɣɛ tea: “Ge fai ta maa wolivɛ dɔwɔi nii zu ga e kuuzu nɛɛ ɓɔɔ.”
Ani ya ziɛ-pului ta ɣa zeeɓɛzu ɔɔ zii-zɛlɛ ge ma, ya Gala goi ta lɛɛ la.
Wa zɔitiɛ wo tii ɣɛɛzu kii-ma, ani ta e ɣaa-zaɣa-kɛɛ na ga ʋaa-ɓɛɛ-su yɛpɛ e vile nii va e maa wolia ya Ɣala Kɔlɔ maa woliai zu ɔɔ gaalɛ-bai zu.
Ya jw.org ʋãga wɔlɔi lɛ ga ya ziɛ-puluitiɛ
Numaa taniga ɣaa-zaɣa-kɛ ga te vɛɛ e va te wo ɣalabo, ɔɔ ɓɔ te va te kwɛ̃ɛ velei ta Jehova Na Seeleitiɛ ɣaa-zaɣa-kɛɛ la ga te Gala Kɔlɔi maa woli jw.org ma.

2. Zɛɓɛi e kɛɛ manɛɛ e ɣaa-ɓaa e vɛɛ Jehova Na Seeleitiɛ va ga wo Gala goi wo?

Ziizɛ na kala dopoitiɛ tɛ lɛ Gala goi woni nɔ niitiɛ ma te ɣɛni te wõni. Ziizɛ “te leveni ga fele-fele. E te leveni tai ɣaazɔ zu ta ŋadɛivɛtiɛ ɣaazɔ tɔ ɣagi ɣɛni vaazu liizu na” ga te Gala goi wo. (Luki 10:1) Velei te Gala goo wotii ɣɛɛni la, e ɓɔni nu lamaa va ga te keela woo vagɔi mɛni. Gala goi Ziizɛ na kala dopoitiɛ te boni kii-ma, e vaani ga kuuzu nɛɛ te wɔ. (Luki 10:17) Ya ɓalaa e wõini e vɛɛ Jehova Na Seeleitiɛ va ga wo Gala goi wo kii-ma?

FAA LAMAA MAA WOLI

Wɛlɛ nii va ya ɓɔ e va ga e mɛlɛ ɣɛ luozu ta velei ya kuuzu nɛɛ maa zɔlɔwo la ani ya ɣɛna keela woo vagɔi wosu.

3. Jehova ɣa vaazu ɓɔsu e va

Numaa taniga te wõini te Gala goi wo, kɛ ta ɣɛ luozu ɓɔvɛlaale ta ɣɛ ɣi-gaa-ziɛzu e vile nii va numaa ta bo e vile te va.

Ya ɣɛ luozu ga e yɛpɛ numaa wɔ e vile nii va e maa wolizu? Zɛɓɛi e kɛɛ yiɛ na wo?

ƲILIOGI nii lɛ ga. Yá wolona, wo gaa-zaɣa-kɛɛ nii ɣaa wote.

ƲILIOGI: Ge Jehova Ɣaa-Zaɣa-Kɛɛni ga e Zii-Lɔɔ (4:05)

Zɛɓɛi e ɓɔni Jehova Na Seelei niitiɛ va ga te ɣɛ ga zii-lɔɔ vea?

A Isaiah 41:10 lodo, wo gaa-zaɣa-kɛɛ nii ɣaa wote:

Ani ya ɣɛna luozu ga e Gala goo wo, Gala-feliai ɣa ɓɔ e va ɣɛ le?

E ɣɛni nii wõni?

Jehova Na Seeleitiɛ taniga tɔ ɣɛ luozu ga te keela woo vagɔi wo numaa ma. Gila ka ga Sergey, ɛ lɛ ɣɛni laani la ga ɔ zoo e yɛpɛ numaa wɔ. Kɛ e ɣaa-ɓaani e Gala Kɔlɔi maa woli. E ɣɛni tea: “velei ɓalaa gɔ ɣɛ luozu la, ge tɔɔ-zeini sa ga ge yɛpɛ numaa wɔ e vile niitiɛ va ge ɣɛni maa wolizu. Tei ge ɣɛni sa yɛpɛzu e vile Gala ba e ɓɔni ba ga ge ɣɛ ga zii-lɔɔ nu, na zee-la-mai zu-ɓaa.”

4. Kɛ wũfe-ma vele zu

Yá ɣɛna Gala goi wosu numaa ma mɛlɛ nɔ ɣi-gaa-ziɛ nii ma e vaazu bosu, kɛ ɣi-gaa-ziɛ ɓalaa velei e vaazu bosu la. A 2 Temete 2:24 ɓɔga 1 Pite 3:15 lodo, wo gaa-zaɣa-kɛɛ niitiɛ ɣaa wote:

Ya leve ɣɛ le e ziɛ ga Gala goi niitiɛ ya ɣɛna yɛpɛzu numaa wɔ e vile Gala ba?
Ya numaitiɛ ɔɔ ya ziɛ-puluitiɛ taniga tɛ lɛ vaazu yee zeizu nii wu e vaazu dɛɛzu ga tiɛ. Zɛɓɛi sa ya kɛ? Zɛɓɛi maa lɛ nɛɛni ɔ kɛ?
Zɛɓɛi e kɛɛ maa lɛ nɛɛni ɔ ɣɛ te ma, nii nɔɣa manɛɛ wo laala, kɛ pagɛ ga e te ɣaa-zaɣa-kɛ wũfe-ma vele zu?

5. Da ɣɛna keela wo vagɔi wosu numaa ma towa va ga kuuzu nɛɛ de wɔ

Jehova tii ʋeeni Ziizɛ ya ga e keela woo vagɔi wo numaa ma. Zɛɓɛi e ɣɛni ga Ziizɛ na ki-gaa-ziɛi e vile tii na va? A Jɔ̃ 4:34 lodo, wo gaa-zaɣa-kɛɛ niitiɛ ɣaa wote:

Da ɣɛna daa-mii ŋɛni vagɔ miizu towa ɓɔ de va na ɣa ɣɛɛna kuuzu nɛɛ ɣa ɣɛ de ya. Zɛɓɛi e kɛɛ Ziizɛ boni ga da ɣɛna Gala yii-mai ɣɛɛzu—ta ɣa ga Gala goo wogai—maʋaa wulovɛ ga da ɣɛ daa-mii ŋɛni miizu?
E ɣisu da kuuzu nɛɛ zɔlɔwo ani da ɣɛna Gala goo wosu?

Ɣaa-ɓaa e niitiɛ ɣɛ

Ya liina dɔɔ yɔɔzu ɣaalɛ-bai zu, wɛlɛ velei va ya maa woli la ga yiɛ Gala goi wo numaa ma.
Ɣaa-ɓaa e ɣɛ dɔɔ yɔɔzu ɣaalɛ-ba wɔlɔ vɛlɛi va. Kɔlɔ vɛlɛi nii ɣa e ɣavele ɓɛtɛ ga e zoo e yɛpɛ numaa wɔ e vile nii va e maa wolizu.
Vɛ ponɛi na ga “Numaa Taniga Ta Ɣɛ Tea” ɔɔ “Numaa Taniga Te Ɣɛ” kɔlɔi nii zu, towa ɓɔ yiɛ e gaa-zaɣa-kɛɛ niitiɛ wɛ̃ɛ numaa ta bo, ta velei ya te ɣaa wote la.

NUMAA TANIGA TA ƔƐ TEA: “Ʋaa-ɓɛɛ-su?”